| ᠡᠷᠲᠡ ᠤᠷᠢᠳᠤ ᠶᠢᠨ ᠴᠠᠭ ᠲᠤ᠂ ᠬᠤᠶᠠᠷ ᠪᠠᠳᠢᠷᠴᠢᠨ ᠯᠠᠮᠠ ᠪᠠᠶᠢᠵᠤ ᠭᠡᠨᠡ᠃ ᠬᠤᠶᠠᠭᠤᠯᠠ ᠪᠠᠨ ᠴᠦᠮ ᠶᠠᠳᠠᠭᠤ ᠪᠠᠶᠢᠵᠠᠢ᠃ ᠨᠢᠭᠡ ᠯᠠᠮᠠ ᠨᠢ ᠰᠠᠨᠠᠭᠠ | ᠰᠠᠶᠢᠲᠠᠢ᠂ ᠶᠠᠭᠠᠬᠢᠪᠠᠯ ᠰᠠᠶ᠋ᠢ ᠬᠤᠶᠠᠭᠤᠯᠠ ᠪᠠᠨ ᠪᠠᠶᠠᠵᠢᠨ ᠴᠢᠨᠡᠭᠡᠯᠢᠭᠵᠢᠬᠦ ᠪᠤᠯ ᠳ᠋ᠠ ᠬᠡᠵᠦ ᠦᠷᠭᠦᠯᠵᠢ ᠪᠤᠳᠤᠳᠠᠭ ᠭᠡᠨᠡ᠃ ᠨᠦᠭᠦᠭᠡ ᠨᠢᠭᠡ ᠯᠠᠮᠠ ᠨᠢ ᠬᠠᠷᠢᠨ | ᠲᠡᠶᠢᠮᠦ ᠪᠢᠰᠢ᠂ ᠲᠡᠭᠦᠨ ᠤ ᠰᠡᠳᠬᠢᠯ ᠰᠠᠨᠠᠭᠠ ᠨᠢ ᠬᠤᠪᠳᠤᠭ ᠰᠢᠨᠤᠬᠠᠢ᠂ ᠦᠷᠭᠦᠯᠵᠢ ᠳᠡᠭᠡᠨ ᠨᠦᠭᠦᠬᠡ ᠨᠢᠭᠡ ᠰᠠᠶᠢᠨ ᠰᠠᠨᠠᠭᠠ ᠲᠠᠢ ᠯᠠᠮᠠ ᠶᠢᠨ ᠠᠷᠤᠭ ᠳᠤᠲᠤᠷᠠᠬᠢ | ᠶᠠᠭᠤᠮᠠ ᠶᠢ ᠶᠠᠭᠠᠬᠢᠵᠤ ᠮᠡᠬᠡᠯᠡᠵᠦ ᠠᠪᠬᠤ ᠪᠢᠯᠡ ᠬᠡᠵᠦ ᠪᠤᠳᠤᠳᠠᠭ ᠪᠠᠶᠢᠵᠠᠢ᠃ ᠨᠢᠭᠡ ᠡᠳᠤᠷ ᠬᠤᠶᠠᠭᠤᠯᠠ ᠪᠠᠨ ᠶᠠᠪᠤᠭᠰᠠᠭᠠᠷ ᠪᠠᠶᠢᠵᠤ᠂ ᠨᠢᠭᠡᠨ ᠬᠠᠭᠤᠷᠠᠢ | ᠬᠤᠳᠳᠤᠭ ᠳᠤᠬᠢᠶᠠᠯᠳᠤᠪᠠ᠃ ᠤᠶᠢᠷᠠᠲᠤᠵᠤ ᠤᠴᠢᠭᠠᠳ ᠦᠵᠡᠭᠰᠡᠨ ᠴᠢᠨᠢ ᠲᠡᠷᠡ ᠬᠤᠳᠳᠤᠭ ᠲᠤ ᠨᠢᠭᠡᠨ ᠪᠦᠳᠦᠭᠦᠨ ᠮᠤᠳᠤ ᠤᠷᠭᠤᠵᠤ ᠪᠠᠶᠢᠭᠰᠠᠨ ᠪᠦᠭᠡᠳ | ᠮᠤᠳᠤᠨ ᠳᠡᠭᠡᠷᠡ ᠨᠢ ᠨᠢᠭᠡᠨ ᠭᠠᠷᠤᠳᠢ ᠡᠭᠦᠷᠯᠡᠵᠦ ᠵᠤᠯᠵᠠᠭᠠ ᠭᠠᠷᠭᠠᠴᠢᠬᠠᠭᠰᠠᠨ ᠪᠠᠶᠢᠪᠠ᠃ | ᠲᠡᠭᠡᠭᠡᠳ ᠲᠡᠳᠡ ᠬᠤᠶᠠᠭᠤᠯᠠ ᠪᠠᠨ ᠵᠦᠪᠳᠡᠯᠴᠡᠭᠡᠳ ᠬᠤᠳᠳᠤᠭ ᠲᠤ ᠴᠤᠬᠤᠮ ᠶᠠᠭᠤ ᠪᠠᠶᠢᠬᠤ ᠶᠢ ᠳᠡᠭᠡᠰᠦ ᠪᠠᠷ ᠡᠭᠡᠯᠵᠢᠯᠡᠨ ᠪᠠᠭᠤᠵᠤ ᠦᠵᠡᠬᠦ ᠪᠠᠷ ᠪᠤᠯᠪᠠ᠃ | ᠬᠤᠪᠳᠤᠭ ᠰᠢᠨᠤᠬᠠᠢ ᠯᠠᠮᠠ ᠤᠷᠢᠳᠠᠪᠠᠷ ᠪᠠᠭᠤᠬᠤ ᠪᠠᠷ ᠲᠤᠭᠳᠠᠭᠠᠳ᠂ ᠬᠡᠯᠡᠭᠰᠡᠨ ᠨᠢ᠄ 《 ᠪᠢ ᠪᠠᠭᠤᠭᠰᠠᠨ ᠤ ᠰᠡᠭᠦᠯᠡᠷ᠂ ᠴᠢᠮᠠ ᠶᠢ ᠳᠡᠭᠡᠰᠦ ᠪᠠᠨ ᠲᠠᠲᠠ ᠭᠡᠵᠦ | ᠬᠡᠯᠡᠪᠡᠯ ᠴᠢ ᠨᠠᠮᠠ ᠶᠢ ᠳᠠᠷᠤᠶᠢᠬᠠᠨ ᠲᠠᠲᠠᠵᠤ ᠭᠠᠷᠭᠠᠭᠠᠷᠠᠢ︕ 》 ᠭᠡᠳ ᠬᠤᠳᠳᠤᠭ ᠲᠤ ᠤᠷᠤᠪᠠ᠃ ᠬᠠᠷᠠ ᠰᠠᠨᠠᠭᠠ ᠲᠠᠢ ᠯᠠᠮᠠ ᠲᠡᠷᠡ ᠬᠤᠳᠳᠤᠭ ᠤᠨ | ᠢᠷᠤᠭᠠᠷ ᠢ ᠦᠵᠡᠭᠡᠳ ᠭᠠᠷᠴᠤ ᠢᠷᠡᠭᠰᠡᠨ ᠤ ᠳᠠᠷᠠᠭᠠ ᠳᠤᠲᠤᠷᠠ ᠪᠠᠨ᠄ ᠪᠢ ᠬᠡᠷᠪᠡ ᠲᠡᠭᠦᠨ ᠢ ᠬᠠᠭᠤᠷᠠᠢ ᠬᠤᠳᠳᠤᠭ ᠲᠤ ᠲᠦᠯᠬᠢᠵᠦ ᠤᠷᠤᠭᠤᠯᠪᠠᠯ᠂ ᠲᠡᠭᠦᠨ ᠤ | ᠠᠷᠤᠭ ᠢ ᠯᠠᠪ ᠤᠯᠵᠤ ᠴᠢᠳᠠᠨᠠ ᠬᠡᠵᠦ ᠪᠤᠳᠤᠭᠠᠳ ᠰᠠᠶᠢᠨ ᠰᠠᠨᠠᠭᠠᠲᠤ ᠯᠠᠮᠠ ᠳᠤ ᠬᠡᠯᠡᠭᠰᠡᠨ ᠨᠢ᠄《 ᠴᠢ ᠬᠡᠷᠪᠡ ᠬᠤᠪᠴᠠᠰᠤ ᠪᠠᠨ ᠲᠠᠶᠢᠯᠵᠤ ᠨᠢᠴᠦᠭᠦᠨ ᠢᠶᠠᠷ | ᠤᠷᠤᠬᠤ ᠦᠭᠡᠢ ᠪᠤᠯ ᠮᠤᠳᠤᠨ ᠤ ᠰᠠᠯᠠᠭᠠᠨ ᠳᠤ ᠬᠤᠪᠴᠠᠰᠤ ᠴᠢᠨᠢ ᠤᠷᠠᠭᠳᠠᠨᠠ ᠰᠢᠤ》 ᠭᠡᠪᠡ᠃ ᠲᠡᠭᠦᠨ ᠤ ᠬᠡᠯᠡᠭᠰᠡᠨ ᠢ ᠰᠤᠨᠤᠰᠤᠭᠠᠳ ᠰᠠᠶᠢᠨ ᠰᠠᠨᠠᠭᠠᠲᠤ ᠯᠠᠮᠠ | ᠨᠢᠴᠦᠭᠦᠨ ᠢᠶᠠᠷ ᠬᠤᠳᠳᠤᠭ ᠲᠤ ᠤᠷᠤᠵᠤ᠂ ᠬᠤᠳᠳᠤᠭ ᠤᠨ ᠢᠷᠤᠭᠠᠷ ᠤᠨ ᠡᠷᠬᠢᠨ ᠲᠤᠭᠤᠷᠢᠨ ᠢ ᠦᠵᠡᠴᠢᠬᠡᠭᠡᠳ᠄《 ᠨᠠᠮᠠ ᠶᠢ ᠲᠠᠲᠠᠵᠤ ᠭᠠᠷᠭᠠᠭᠠᠷᠠᠢ︕》 | ᠭᠡᠵᠦ ᠰᠠᠶᠢᠨ ᠰᠠᠨᠠᠭᠠᠲᠤ ᠯᠠᠮᠠ ᠬᠡᠳᠦᠶᠢᠴᠢᠨᠡᠭᠡᠨ ᠳᠠᠭᠤᠳᠠᠵᠤ ᠬᠠᠰᠬᠢᠷᠤᠭᠰᠠᠨ ᠴᠤ ᠦᠨᠦᠬᠢ ᠨᠢ ᠶᠡᠷᠦ ᠬᠠᠷᠢᠭᠤ ᠦᠬᠡᠢ ᠪᠠᠶᠢᠯᠠ᠃ ᠢᠩᠬᠢᠭᠡᠳ ᠰᠠᠶ᠋ᠢ ᠮᠡᠬᠡᠯᠡᠭᠳᠡᠭᠰᠡᠨ | ᠢᠶᠠᠨ ᠮᠡᠳᠡᠭᠡᠳ᠂ ᠠᠷᠭᠠ ᠪᠤᠰᠤ ᠨᠢᠴᠦᠭᠦᠨ ᠢᠶᠠᠷ ᠬᠤᠳᠳᠤᠭ ᠤᠨ ᠢᠷᠦᠭᠠᠷ ᠲᠤ ᠰᠠᠭᠤᠭᠠᠳ ᠬᠦᠮᠦᠨ ᠢᠷᠡᠵᠦ ᠠᠪᠤᠷᠠᠬᠤ ᠶᠢ ᠬᠦᠯᠢᠶᠡᠪᠡ ᠭᠡᠨᠡ᠃ | ᠬᠤᠶᠠᠷ ᠯᠠᠮᠠ ᠬᠡᠳᠦᠶᠢᠪᠡᠷ ᠪᠠᠳᠢᠷᠴᠢᠨ ᠪᠤᠯᠪᠠᠴᠤ ᠪᠠᠰᠠ ᠶᠢᠰᠦᠨ ᠵᠦᠢᠯ ᠤᠨ ᠵᠢᠭᠦᠷᠲᠡᠨ ᠠᠷᠢᠶᠠᠲᠠᠨ ᠤ ᠦᠭᠡ ᠬᠡᠯᠡ ᠶᠢ ᠮᠡᠳᠡᠳᠡᠭ ᠭᠡᠨᠡ᠃ ᠡᠨᠡ ᠦᠶᠡᠰ ᠲᠤ | ᠭᠠᠷᠤᠳᠢ ᠶᠢᠨ ᠵᠤᠯᠵᠠᠭᠠ ᠨᠢ ᠬᠤᠭᠤᠷᠤᠨᠳᠤ ᠪᠠᠨ ᠵᠢᠷᠵᠢᠭᠢᠨᠡᠨ ᠱᠤᠯᠤᠭᠠᠨᠠᠵᠤ᠂ ᠨᠢᠭᠡ ᠨᠢ ᠬᠡᠯᠡᠭᠦ ᠳᠡᠭᠡᠨ᠄《 ᠪᠢᠳᠡ ᠤᠳᠤ ᠬᠤᠶᠠᠷ ᠭᠤᠷᠪᠠᠨ ᠡᠳᠤᠷ ᠪᠤᠯᠪᠠᠯ ᠡᠨᠡ | ᠬᠠᠭᠤᠷᠠᠢ ᠬᠤᠳᠳᠤᠭ ᠠᠴᠠ ᠨᠢᠰᠴᠦ ᠭᠠᠷᠤᠨᠠ᠃ ᠭᠡᠲᠡᠯᠡ ᠡᠨᠡ ᠬᠦᠭᠡᠷᠦᠬᠦᠢ ᠯᠠᠮᠠ ᠬᠤᠳᠳᠤᠭ ᠠᠴᠠ ᠶᠠᠭᠠᠬᠢᠵᠤ ᠭᠠᠷᠤᠨᠠ ᠪᠤᠢ︖》 ᠭᠡᠪᠡ᠃ ᠦᠭᠡᠷᠡ ᠨᠢᠭᠡ | ᠨᠢ ᠵᠠᠯᠭᠠᠭᠠᠳ᠄《 ᠬᠠᠮᠢᠶᠠ ᠦᠭᠡᠢ ᠯᠠ ᠳ᠋ᠠ᠂ ᠲᠡᠷᠡ ᠮᠠᠨ ᠤ ᠢᠳᠡᠰᠢᠨ ᠠᠴᠠ ᠬᠤᠪᠢᠶᠠᠯᠴᠠᠨ ᠬᠦᠷᠳᠡᠵᠦ᠂ ᠮᠠᠨᠤᠰ ᠬᠤᠳᠳᠤᠭ ᠠᠴᠠ ᠭᠠᠷᠬᠤ ᠦᠶᠡ ᠳᠤ | ᠲᠡᠭᠡᠰᠦᠨ ᠤ ᠦᠵᠦᠭᠦᠷ ᠢ ᠬᠦᠯ ᠳᠡᠭᠡᠨ ᠡᠯᠭᠦᠴᠢᠭᠡᠪᠡᠯ ᠲᠡᠭᠦᠨ ᠢ ᠲᠠᠲᠠᠭᠠᠳ ᠭᠠᠷᠭᠠᠴᠢᠬᠠᠨᠠ ᠰᠢᠤ》 ᠭᠡᠯᠡ᠃ ᠰᠠᠶᠢᠨ ᠰᠠᠨᠠᠭᠠᠲᠤ ᠯᠠᠮᠠ ᠲᠡᠳᠡᠨᠤᠰ ᠤᠨ ᠬᠡᠯᠡᠭᠰᠡᠨ | ᠦᠭᠡ ᠶᠢ ᠰᠤᠨᠤᠰᠤᠭᠠᠳ ᠲᠤᠩ ᠪᠠᠶᠠᠷᠯᠠᠵᠤ᠂ ᠭᠤᠷᠪᠠ ᠬᠤᠨᠤᠭ ᠤᠨ ᠳᠠᠷᠠᠭᠠ ᠭᠠᠷᠤᠳᠢ ᠶᠢᠨ ᠵᠤᠯᠵᠠᠭᠠ ᠲᠠᠢ ᠬᠠᠮᠲᠤ ᠬᠠᠭᠤᠷᠠᠢ ᠬᠤᠳᠳᠤᠭ ᠠᠴᠠ ᠭᠠᠷᠤᠭᠰᠠᠨ | ᠭᠡᠨᠡ᠃ | ᠰᠠᠶᠢᠨ ᠰᠠᠨᠠᠭᠠᠲᠤ ᠪᠠᠳᠢᠷᠴᠢᠨ ᠯᠠᠮᠠ ᠭᠠᠷᠴᠤ ᠢᠷᠡᠭᠡᠳ ᠦᠵᠡᠭᠰᠡᠨ ᠴᠢᠨᠢ ᠬᠤᠪᠴᠠᠰᠤ ᠪᠤᠯᠤᠨ ᠠᠷᠤᠭ ᠨᠢ ᠠᠯᠢ ᠬᠡᠳᠦᠶᠢᠨ ᠪᠠᠷᠠ ᠰᠤᠷᠠᠭ ᠦᠭᠡᠢ ᠪᠤᠯᠴᠢᠬᠠᠪᠠ᠃ | ᠲᠡᠭᠡᠭᠡᠳ ᠲᠡᠷᠡ ᠰᠠᠶᠢᠨ ᠰᠠᠨᠠᠭᠠᠲᠤ ᠯᠠᠮᠠ ᠬᠠᠮᠢᠭᠠᠰᠢ ᠶᠠᠪᠤᠬᠤ ᠪᠠᠨ ᠤᠯᠵᠤ ᠶᠠᠳᠠᠨ᠂ ᠠᠷᠭᠠ ᠪᠤᠰᠤ ᠠᠰ ᠤᠮᠠᠷᠠᠲᠤ ᠵᠦᠭ ᠢ ᠴᠢᠭᠯᠡᠨ ᠪᠦᠲᠦᠨ ᠨᠢᠭᠡ ᠡᠳᠦᠷ | ᠶᠠᠪᠤᠭᠠᠳ᠂ ᠪᠦᠷᠦᠢ ᠪᠤᠯᠬᠤ ᠶᠢᠨ ᠠᠯᠳᠠ ᠳᠤ ᠰᠠᠶ᠋ᠢ ᠨᠢᠭᠡᠨ ᠲᠤᠮᠤ ᠴᠠᠭᠠᠨ ᠮᠤᠩᠭᠤᠯ ᠭᠡᠷ ᠤᠨ ᠳᠡᠷᠭᠡᠳᠡ ᠬᠦᠷᠪᠡ᠃ ᠭᠡᠷ ᠲᠤ ᠤᠷᠤᠭᠠᠳ ᠦᠵᠡᠭᠰᠡᠨ ᠴᠢᠨᠢ ᠭᠡᠷ | ᠤᠨ ᠬᠤᠶᠢᠮᠤᠷ ᠲᠤ ᠬᠠᠨᠵᠤᠨ ᠤ ᠠᠪᠳᠠᠷᠠ ᠲᠠᠯᠪᠢᠵᠤ᠂ ᠭᠡᠷ ᠤᠨ ᠱᠠᠯᠠ ᠪᠠᠷ ᠲᠦᠭᠦᠷᠡᠩ ᠵᠢᠭᠦᠷᠲᠡᠨ ᠠᠷᠢᠶᠠᠲᠠᠨ ᠤ ᠪᠠᠭᠠᠰᠤ ᠪᠠᠶᠢᠵᠤ᠂ ᠭᠡᠷ ᠤᠨ ᠲᠤᠭᠤᠨᠤ ᠶᠢᠨ | ᠱᠠᠭᠠᠵᠠᠭᠠᠢ ᠶᠢᠨ ᠡᠭᠦᠷ ᠲᠤ ᠪᠠᠰᠠ ᠬᠡᠳᠦᠨ ᠱᠠᠭᠠᠵᠠᠭᠠᠢ ᠶᠢᠨ ᠵᠤᠯᠵᠠᠭᠠ ᠪᠠᠶᠢᠪᠠ᠃ | ᠪᠦᠷᠦᠢ ᠲᠠᠰᠤᠷᠠᠭᠰᠠᠨ ᠤ ᠬᠤᠶᠢᠨᠠ᠂ ᠪᠠᠳᠢᠷᠴᠢᠨ ᠯᠠᠮᠠ ᠠᠷᠭᠠ ᠪᠤᠰᠤ ᠬᠠᠨᠵᠤᠨ ᠤ ᠠᠪᠳᠠᠷᠠ ᠳᠤ ᠰᠢᠷᠭᠤᠨ ᠤᠷᠤᠭᠠᠳ ᠬᠡᠪᠲᠡᠪᠡ᠃ ᠭᠡᠨᠡᠳᠲᠡ ᠱᠠᠭᠠᠵᠠᠭᠠᠢ | ᠭᠠᠳᠠᠨᠠ ᠠᠴᠠ ᠨᠢᠰᠦᠨ ᠤᠷᠤᠵᠤ ᠢᠷᠡᠯᠡ᠃ ᠱᠠᠭᠠᠵᠠᠭᠠᠢ ᠶᠢᠨ ᠵᠤᠯᠵᠠᠭᠠ ᠡᠵᠢ ᠠᠴᠠ ᠪᠠᠨ᠄《 ᠡᠵᠢ ᠡ᠂ ᠦᠨᠦᠳᠦᠷ ᠶᠠᠭᠤ ᠤᠯᠵᠤ ᠢᠷᠠᠪᠡ︖》 ᠭᠡᠵᠦ | ᠠᠰᠠᠭᠤᠬᠤ ᠳᠤ ᠡᠵᠢ ᠨᠢ᠄《 ᠵᠡᠷᠯᠢᠭ ᠴᠢᠨ᠋ᠸᠠ ᠨᠢᠭᠡᠨ ᠬᠤᠨᠢ ᠪᠠᠷᠢᠭᠠᠳ ᠢᠳᠡᠵᠦ ᠪᠠᠶᠢᠬᠤ ᠲᠠᠭᠠᠷᠠᠯᠳᠤᠭᠠᠳ᠂ ᠪᠢ ᠬᠤᠨᠢᠨ ᠤ ᠮᠢᠬᠠᠨ ᠠᠴᠠ ᠨᠢ ᠬᠤᠪᠢᠶᠠᠯᠴᠠᠵᠤ | ᠢᠳᠠᠯᠠ᠃ 》 ᠭᠡᠳ ᠡᠵᠢ ᠨᠢ ᠵᠠᠯᠭᠠᠭᠠᠳ ᠪᠠᠰᠠ᠄《 ᠮᠠᠷᠭᠠᠰᠢ ᠪᠠᠰᠠ ᠨᠢᠭᠡ ᠵᠠᠭᠤ ᠵᠢᠷᠠᠨ ᠬᠦᠮᠦᠨ ᠤ ᠨᠢᠳᠦ ᠶᠢ ᠤᠯᠵᠤ ᠢᠳᠡᠬᠦ ᠶᠤᠮ ᠪᠠᠶᠢᠨᠠ》 ᠱᠠᠭᠠᠵᠠᠭᠠᠢ | ᠶᠢᠨ ᠵᠤᠯᠵᠠᠭᠠ ᠨᠤᠭᠤᠳ ᠲᠤᠩ ᠭᠠᠶᠢᠬᠠᠯᠳᠤᠵᠤ ᠠᠰᠠᠭᠤᠭᠰᠠᠨ ᠨᠢ᠄《 ᠶᠠᠭᠤᠨ ᠳᠤ ᠲᠡᠶᠢᠮᠦ ᠤᠯᠠᠨ ᠬᠦᠮᠦᠨ ᠤ ᠨᠢᠳᠤ ᠶᠢ ᠤᠬᠤᠬᠤ ᠶᠤᠮ ᠪᠤᠢ︖》 ᠭᠡᠬᠦ | ᠳᠤ᠂ ᠡᠬᠡ ᠱᠠᠭᠠᠵᠠᠭᠠᠢ ᠬᠡᠯᠡᠭᠰᠡᠨ ᠨᠢ᠄《 ᠮᠠᠨ ᠤ ᠠᠳᠡ ᠠᠴᠠ ᠠᠰ ᠬᠤᠶᠢᠳᠤ ᠵᠦᠭ ᠲᠤ ᠨᠢᠭᠡᠨ ᠬᠠᠨ ᠤ ᠭᠦᠩᠵᠦ ᠡᠪᠠᠳᠴᠢᠯᠡᠭᠡᠳ᠂ ᠨᠢᠭᠡ ᠵᠠᠭᠤ ᠵᠢᠷᠠᠨ | ᠡᠮᠴᠢ ᠬᠦᠷᠴᠦ ᠤᠴᠢᠭᠠᠳ ᠡᠮᠴᠢᠯᠡᠭᠰᠡᠨ ᠪᠤᠯᠪᠠᠴᠤ ᠲᠡᠷᠡ ᠭᠦᠩᠵᠦ ᠶᠢᠨ ᠡᠪᠠᠳᠴᠢᠨ ᠢ ᠡᠳᠡᠭᠡᠭᠡᠵᠦ ᠴᠢᠳᠠᠭᠰᠠᠨ ᠦᠭᠡᠢ ᠭᠡᠨᠡ᠃ ᠡᠵᠡᠨ ᠬᠠᠨ ᠠᠭᠤᠷᠯᠠᠬᠤ ᠳᠠᠭᠠᠨ | ᠲᠡᠳᠡᠭᠡᠷ ᠡᠮᠴᠢ ᠨᠠᠷ ᠤᠨ ᠲᠤᠯᠤᠭᠠᠢ ᠶᠢ ᠨᠢ ᠴᠠᠪᠴᠢᠭᠠᠳ ᠤᠯᠠᠨ ᠳᠤ ᠦᠵᠡᠭᠦᠯᠦᠨᠡ ᠭᠡᠨᠡ︕ 》ᠭᠡᠵᠤ ᠬᠡᠯᠡᠬᠦ ᠳᠤ᠂ ᠵᠤᠯᠵᠠᠭᠠᠨ ᠱᠠᠭᠠᠵᠠᠭᠠᠢ ᠨᠤᠭᠤᠳ ᠨᠡᠩ | ᠴᠤ ᠭᠠᠶᠢᠬᠠᠰᠢ ᠠᠯᠳᠠᠵᠤ ᠳᠠᠬᠢᠨ ᠠᠰᠠᠭᠤᠭᠰᠠᠨ ᠨᠢ᠄《 ᠲᠡᠷᠡ ᠡᠵᠡᠨ ᠬᠠᠨ ᠤ ᠭᠦᠩᠵᠦ ᠨᠢ ᠶᠠᠮᠠᠷ ᠬᠦᠴᠢᠷ ᠲᠦᠪᠡᠭᠲᠡᠢ ᠡᠪᠠᠳᠴᠢᠨ ᠡᠮᠬᠡᠭ ᠲᠠᠢ ᠪᠤᠯᠴᠢᠬᠠᠭᠠᠳ | ᠲᠡᠶᠢᠮᠦ ᠤᠯᠠᠨ ᠡᠮᠴᠢ ᠶᠢ ᠶᠠᠭᠠᠬᠢᠬᠤ ᠶᠢᠨ ᠴᠤ ᠠᠷᠭᠠ ᠦᠬᠡᠢ ᠪᠤᠯᠭᠠᠴᠢᠬᠠᠪᠠ︖》 ᠭᠡᠬᠦ ᠳᠤ ᠶᠡᠭᠡ ᠱᠠᠭᠠᠵᠠᠭᠠᠢ ᠬᠡᠯᠡᠭᠰᠡᠨ ᠨᠢ᠄《 ᠭᠦᠩᠵᠦ ᠶᠢᠨ ᠴᠢᠬᠢᠨ ᠳᠤ | ᠨᠢᠭᠡᠨ ᠲᠤᠮᠤ ᠠᠭᠠᠯᠵᠢ ᠰᠢᠷᠭᠤᠵᠤ ᠤᠷᠤᠭᠰᠠᠨ ᠭᠡᠨᠡ᠂᠂᠂᠂ 》ᠭᠡᠵᠦ ᠬᠡᠯᠡᠵᠦ ᠪᠠᠷᠠᠬᠤ ᠠᠴᠠ ᠡᠮᠤᠨᠡ ᠵᠤᠯᠵᠠᠭᠠᠨ ᠱᠠᠭᠠᠵᠠᠭᠠᠢ ᠨᠤᠭᠤᠳ ᠪᠠᠰᠠ ᠠᠰᠠᠭᠤᠭᠰᠠᠨ | ᠨᠢ᠄《 ᠶᠠᠮᠠᠷ ᠠᠷᠭᠠ ᠪᠠᠷ ᠲᠡᠷᠡ ᠠᠭᠠᠯᠵᠢ ᠶᠢ ᠮᠠᠯᠲᠠᠵᠤ ᠭᠠᠷᠭᠠᠳᠠᠭ ᠪᠢᠯᠡ︖》 ᠭᠡᠬᠦ ᠳᠤ᠂ ᠡᠬᠡ ᠱᠠᠭᠠᠵᠠᠭᠠᠢ ᠨᠢ᠄《 ᠴᠤᠬᠤᠮ ᠳᠠᠭᠠᠨ ᠲᠤᠩ ᠬᠢᠯᠪᠠᠷᠬᠠᠨ | ᠰᠢᠤ᠂ ᠲᠤᠮᠤ ᠭᠡᠷ ᠤᠨ ᠳᠤᠲᠤᠷᠠ ᠪᠠᠭᠠ ᠭᠡᠷ ᠪᠠᠷᠢᠵᠤ᠂ ᠭᠡᠷ ᠤᠨ ᠳᠤᠲᠤᠷᠠ ᠪᠠᠨ ᠬᠦᠰᠢᠭᠡ ᠲᠠᠲᠠᠭᠠᠳ᠂ ᠳᠠᠷᠠᠭᠠ ᠨᠢ ᠭᠠᠯ ᠲᠦᠯᠡᠨᠡ᠃ ᠡᠨᠡ ᠦᠶᠡᠰ ᠲᠤ | ᠠᠭᠠᠯᠵᠢ ᠬᠠᠷᠢᠨ ᠲᠡᠭᠷᠢ ᠳᠤᠯᠠᠭᠠᠷᠠᠭᠠᠳ ᠵᠤᠨ ᠪᠤᠯᠤᠯᠠ ᠭᠡᠳ ᠵᠤᠯᠵᠠᠭᠠ ᠪᠠᠨ ᠳᠠᠭᠠᠭᠤᠯᠵᠤ ᠴᠢᠬᠢᠨ ᠠᠴᠠ ᠨᠢ ᠭᠠᠷᠴᠤ ᠢᠷᠡᠨᠡ᠃》 ᠭᠡᠵᠦ ᠬᠡᠯᠡᠵᠦ ᠪᠠᠷᠠᠲᠠᠯᠠ᠂ | ᠵᠡᠷᠯᠢᠭ ᠴᠢᠨ᠋ᠸᠠ ᠶᠡᠬᠡᠯᠡ ᠬᠠᠨᠤᠮᠵᠢᠲᠠᠢ ᠪᠠᠷ ᠭᠠᠳᠠᠨᠠ ᠠᠴᠠ ᠤᠷᠤᠵᠤ ᠢᠷᠡᠯᠡ᠃ ᠪᠢᠴᠢᠬᠠᠨ ᠱᠠᠭᠠᠵᠠᠭᠠᠢ ᠨᠤᠭᠤᠳ᠄《 ᠴᠢᠨ᠋ᠸᠠ ᠠᠬᠠ ᠡ᠂ ᠴᠢᠨ᠋ᠸᠠ ᠠᠬᠠ ᠡ᠂ | ᠲᠠ ᠦᠨᠦᠳᠦᠷ ᠶᠠᠭᠤ ᠤᠯᠵᠤ ᠢᠳᠡᠪᠡ︖》 ᠭᠡᠵᠦ ᠠᠰᠠᠭᠤᠬᠤ ᠳᠤ ᠵᠡᠷᠯᠢᠭ ᠴᠢᠨ᠋ᠸᠠ᠄《 ᠦᠨᠦᠳᠦᠷ ᠨᠢᠭᠡ ᠬᠤᠨᠢ ᠪᠠᠷᠢᠵᠤ ᠠᠪᠤᠭᠠᠳ ᠠᠮᠲᠠᠷᠬᠠᠨ | ᠵᠤᠭᠤᠭᠯᠠᠯᠠ᠃ 》ᠭᠡᠵᠦ ᠭᠡᠯᠡᠵᠦ ᠪᠠᠷᠠᠩᠭᠤᠳᠠ ᠵᠠᠯᠬᠠᠭᠤᠷᠠᠨ ᠬᠡᠪᠲᠡᠯᠡ᠃ ᠳᠠᠷᠠᠭᠠ ᠪᠠᠷ ᠨᠢ ᠪᠠᠰᠠ ᠨᠢᠭᠡ ᠦᠨᠡᠭᠡ ᠤᠷᠤᠵᠤ ᠢᠷᠡᠬᠦ ᠳᠤ᠂ ᠪᠢᠴᠢᠬᠠᠨ ᠱᠠᠭᠠᠵᠠᠭᠠᠢ | ᠨᠤᠭᠤᠳ ᠦᠨᠡᠭᠡ ᠠᠴᠠ ᠶᠠᠮᠠᠷ ᠶᠠᠭᠤᠮᠠ ᠤᠯᠵᠤ ᠢᠳᠡᠭᠰᠡᠨ ᠪᠤᠢ ᠭᠡᠵᠦ ᠶᠠᠭᠠᠷᠠᠯᠳᠤᠨ ᠠᠰᠠᠭᠤᠬᠤ ᠳᠤ《 ᠵᠡᠷᠯᠢᠭ ᠴᠢᠨ᠋ᠸᠠ ᠶᠢᠨ ᠪᠠᠷᠢᠭᠰᠠᠨ ᠬᠤᠨᠢᠨ ᠤ ᠮᠢᠬᠠᠨ | ᠠᠴᠠ ᠬᠤᠪᠢᠶᠠᠯᠴᠠᠵᠤ ᠢᠳᠡᠯᠡ》 ᠭᠡᠵᠦ ᠦᠨᠡᠭᠡ ᠬᠡᠯᠡᠮᠡᠭᠴᠡ ᠪᠠᠨ ᠮᠠᠩᠰᠢᠭᠤᠷᠠᠨ ᠤᠨᠲᠠᠪᠠ᠃ ᠬᠠᠮᠤᠭ ᠰᠡᠭᠦᠯ ᠳᠤᠨᠢ ᠪᠠᠷᠰ ᠤᠮᠤᠭ ᠰᠦᠷ ᠲᠠᠢ ᠤᠷᠤᠵᠤ ᠢᠷᠡᠬᠦ | ᠳᠤ᠂ ᠪᠢᠴᠢᠬᠠᠨ ᠱᠠᠭᠠᠵᠠᠭᠠᠢ ᠨᠤᠭᠤᠳ᠄《 ᠪᠠᠷᠰ ᠠᠪᠠᠭᠠ ᠲᠠ ᠶᠠᠮᠠᠷ ᠭᠦᠷᠦᠭᠡᠰᠦ ᠪᠠᠷᠢᠵᠤ ᠢᠳᠡᠪᠡ︖》ᠭᠡᠵᠦ ᠠᠰᠠᠭᠤᠭᠰᠠᠨ ᠳᠤ ᠪᠠᠷᠰ ᠶᠡᠬᠡᠯᠡ ᠤᠮᠤᠭ ᠲᠠᠢ | ᠪᠠᠷ᠄《 ᠪᠢ ᠦᠬᠡᠷ ᠤᠨ ᠮᠢᠬᠠ ᠢᠳᠡᠯᠡ᠃》 ᠭᠡᠵᠦ ᠤᠮᠤᠭ ᠲᠠᠢ ᠬᠡᠯᠡᠭᠡᠳ ᠪᠠᠰᠠ ᠯᠠ ᠤᠨᠲᠠᠴᠢᠬᠠᠯᠠ᠃ ᠳᠠᠷᠠᠭᠠ ᠦᠷᠯᠦᠭᠡ ᠡᠷᠲᠡ ᠵᠡᠷᠯᠢᠭ ᠴᠢᠨ᠋ᠸᠠ᠂ ᠦᠨᠡᠭᠡ᠂ | ᠪᠠᠷᠰ ᠭᠡᠷ ᠠᠴᠠ ᠭᠠᠷᠴᠤ ᠶᠠᠪᠤᠭᠰᠠᠨ ᠤ ᠬᠤᠶᠢᠨᠠ᠂ ᠪᠠᠳᠢᠷᠴᠢᠨ ᠯᠠᠮᠠ ᠱᠠᠭᠠᠵᠠᠭᠠᠢ ᠶᠢᠨ ᠬᠡᠯᠡᠭᠰᠡᠨ ᠵᠦᠭ ᠢᠶᠠᠷ᠂ ᠠᠰ ᠤᠮᠠᠷᠠᠰᠢ ᠪᠠᠨ ᠪᠦᠲᠦᠨ ᠨᠢᠭᠡ ᠡᠳᠦᠷ | ᠶᠠᠪᠤᠭᠠᠳ᠂ ᠪᠦᠷᠦᠢ ᠪᠤᠯᠬᠤ ᠳᠤ ᠰᠠᠶ᠋ᠢ ᠬᠡᠳᠦ ᠬᠡᠳᠦᠨ ᠮᠤᠩᠭᠤᠯ ᠭᠡᠷ ᠲᠠᠢ ᠪᠠᠶᠠᠨ ᠠᠶᠢᠯ ᠤᠨ ᠭᠠᠳᠠᠨᠠ ᠬᠦᠷᠴᠠᠢ᠃ ᠱᠠᠯᠳᠠᠩ ᠨᠢᠴᠦᠬᠦᠨ ᠤᠴᠢᠷ ᠠᠴᠠ ᠭᠡᠷ ᠲᠤ | ᠤᠷᠤᠬᠤ ᠶᠢᠨ ᠠᠷᠭᠠ ᠦᠬᠡᠢ ᠲᠤᠯᠠ ᠦᠬᠡᠷ ᠤᠨ ᠬᠠᠰᠢᠶᠠᠨ ᠳᠤ ᠬᠤᠨᠤᠭᠯᠠᠬᠤ ᠯᠠ ᠪᠤᠯᠵᠠᠢ᠃ ᠦᠷᠯᠦᠭᠡ ᠡᠷᠲᠡ᠂ ᠦᠬᠡᠷᠴᠢᠨ ᠨᠢ ᠬᠠᠰᠢᠶᠠᠨ ᠳᠠᠭᠠᠨ ᠤᠷᠤᠵᠤ | ᠢᠷᠡᠬᠦ ᠳᠤ ᠴᠢᠷᠮᠠᠨ ᠨᠢᠴᠦᠭᠦᠨ ᠪᠠᠳᠢᠷᠴᠢᠨ ᠯᠠᠮᠠ ᠶᠢ ᠦᠵᠡᠭᠡᠳ ᠲᠤᠩ ᠭᠠᠶᠢᠬᠠᠵᠤ᠂ ᠰᠠᠨᠳᠤᠷᠤᠨ᠄《 ᠴᠢ ᠠᠯᠢ ᠭᠠᠵᠠᠷ ᠤᠨ ᠬᠦᠮᠦᠨ ᠪᠤᠢ︖》 ᠭᠡᠵᠦ | ᠠᠰᠠᠭᠤᠬᠤ ᠳᠤ ᠪᠠᠳᠢᠷᠴᠢᠨ ᠯᠠᠮᠠ᠄《 ᠪᠢ ᠪᠤᠯ ᠨᠢᠭᠡᠨ ᠡᠮᠴᠢ ᠮᠦᠨ᠃》 ᠡᠮᠴᠢ ᠬᠦᠮᠦᠨ ᠭᠡᠰᠡᠨ ᠢ ᠦᠬᠡᠷᠴᠢᠨ ᠰᠤᠨᠤᠰᠤᠮᠠᠭᠴᠠ ᠪᠠᠨ ᠬᠠᠨ ᠳᠠᠭᠠᠨ ᠳᠠᠷᠦᠢ | ᠲᠦᠷᠭᠡᠨ ᠮᠡᠳᠡᠭᠦᠯᠬᠦ ᠳᠤ᠂ ᠬᠠᠨ ᠨᠢ ᠪᠠᠶᠠᠷᠯᠠᠬᠤ ᠶᠢᠨ ᠶᠡᠬᠡᠪᠡᠷ ᠪᠠᠶᠠᠷᠯᠠᠵᠤ᠄《 ᠪᠤᠰᠢᠭᠤᠬᠠᠨ ᠬᠤᠪᠴᠠᠰᠤ ᠦᠭᠴᠦ ᠡᠮᠦᠰᠦᠭᠦᠯᠦᠭᠡᠳ ᠳᠠᠭᠠᠭᠤᠯᠵᠤ ᠢᠷᠡ︕》 | ᠬᠡᠮᠡᠨ ᠵᠠᠷᠯᠢᠭᠳᠠᠪᠠ᠃ | ᠦᠬᠡᠷᠴᠢᠨ ᠨᠢ ᠪᠠᠳᠢᠷᠴᠢᠨ ᠯᠠᠮᠠ ᠳᠤ ᠬᠤᠭᠤᠯᠠ ᠴᠠᠢ ᠢᠳᠡᠭᠦᠯᠵᠦ ᠤᠤᠭᠤᠯᠭᠠᠭᠰᠠᠨ ᠤ ᠳᠠᠷᠠᠭᠠ ᠲᠡᠭᠦᠨ ᠢ ᠳᠠᠭᠠᠭᠤᠯᠵᠤ ᠬᠠᠨ ᠳᠤ ᠤᠴᠠᠷᠠᠭᠤᠯᠪᠠ᠃ | ᠬᠠᠨ᠄《 ᠴᠢ ᠬᠡᠷᠪᠡ ᠡᠮᠴᠢ ᠶᠤᠮ ᠪᠤᠯ ᠮᠢᠨᠤ ᠬᠡᠤᠬᠡᠨ ᠤ ᠡᠪᠡᠳᠴᠢᠨ ᠢ ᠡᠳᠡᠭᠡᠷᠡᠭᠦᠯᠵᠦ ᠴᠢᠳᠠᠨᠠ ᠤᠤ︖ 》 ᠭᠡᠵᠦ ᠪᠠᠳᠢᠷᠴᠢᠨ ᠯᠠᠮᠠ ᠠᠴᠠ ᠠᠰᠠᠭᠤᠭᠰᠠᠨ ᠳᠤ᠂ | 《 ᠡᠵᠡᠨ ᠬᠠᠨ ᠲᠠ ᠨᠠᠮᠠ ᠶᠢ ᠲᠤᠭᠤᠭᠰᠠᠨ ᠶᠤᠮ ᠴᠢᠨᠢ᠂ ᠪᠢ ᠯᠠᠪᠲᠠᠢ ᠨᠤᠬᠠᠢ ᠮᠤᠷᠢᠨ ᠤ ᠬᠦᠴᠦᠨ ᠢᠶᠠᠨ ᠡᠷᠭᠦᠨᠡ》 ᠭᠡᠵᠦ ᠪᠠᠳᠢᠷᠴᠢᠨ ᠯᠠᠮᠠ | ᠬᠠᠷᠢᠭᠤᠯᠤᠭᠠᠳ᠂ ᠱᠠᠭᠠᠵᠠᠭᠠᠢ ᠶᠢᠨ ᠬᠡᠯᠡᠭᠰᠡᠨ ᠠᠷᠭᠠ ᠪᠠᠷ ᠲᠤᠮᠤ ᠭᠡᠷ ᠤᠨ ᠳᠤᠲᠤᠷᠠ ᠪᠠᠭᠠ ᠭᠡᠷ ᠪᠠᠷᠢᠵᠤ᠂ ᠪᠠᠭᠠ ᠭᠡᠷ ᠤᠨ ᠳᠤᠲᠤᠷᠠ ᠪᠠᠨ ᠬᠦᠬᠡ ᠶᠤᠷᠤᠭ ᠢᠶᠠᠷ | ᠬᠦᠰᠢᠭᠡ ᠲᠠᠲᠠᠵᠤ᠂ ᠭᠦᠩᠵᠦ ᠶᠢ ᠳᠤᠲᠤᠷᠠ ᠨᠢ ᠰᠠᠭᠤᠯᠭᠠᠭᠠᠳ᠂ ᠭᠠᠯ ᠲᠦᠯᠡᠵᠦ ᠡᠬᠢᠯᠡᠪᠡ᠃ ᠭᠠᠯ ᠲᠦᠯᠡᠭᠡᠳ ᠳᠡᠮᠡᠢ ᠤᠳᠠᠭᠰᠠᠨ ᠦᠭᠡᠢ᠂ ᠦᠨᠡᠭᠡᠷ ᠪᠤᠳᠤᠭᠰᠠᠨ | ᠠᠴᠠ ᠭᠠᠷᠤᠭᠰᠠᠨ ᠦᠭᠡᠢ᠂ ᠶᠡᠭᠡ ᠠᠭᠠᠯᠵᠢ ᠨᠢ ᠨᠢᠭᠡ ᠰᠦᠷᠦᠭ ᠵᠤᠯᠵᠠᠭᠠ ᠪᠠᠨ ᠳᠠᠭᠠᠭᠤᠯᠤᠭᠰᠠᠭᠠᠷ ᠭᠦᠩᠵᠦ ᠶᠢᠨ ᠴᠢᠬᠢᠨ ᠠᠴᠠ ᠭᠠᠷᠴᠤ ᠢᠷᠡᠯᠡ᠃ ᠬᠡᠳᠦᠨ | ᠡᠳᠦᠷ ᠪᠤᠯᠤᠭᠰᠠᠨ ᠦᠭᠡᠢ᠂ ᠭᠦᠩᠵᠦ ᠶᠢᠨ ᠡᠪᠡᠳᠴᠢᠨ ᠨᠢ ᠪᠦᠷᠢᠮᠦᠰᠦᠨ ᠡᠳᠡᠭᠡᠷᠡᠯᠡ᠃ ᠪᠠᠳᠢᠷᠴᠢᠨ ᠯᠠᠮᠠ ᠶᠢᠨ ᠡᠨᠡᠬᠦ ᠦᠢᠯᠡ ᠠᠵᠢᠯᠯᠠᠭᠠ ᠨᠢ ᠪᠠᠰᠠ ᠨᠢᠭᠡ ᠵᠠᠭᠤ | ᠵᠢᠷᠠᠨ ᠡᠮᠴᠢ ᠶᠢ ᠦᠬᠦᠯ ᠠᠴᠠ ᠨᠢ ᠬᠡᠯᠲᠦᠷᠢᠭᠦᠯᠪᠡ᠃ ᠡᠵᠡᠨ ᠬᠠᠨ ᠪᠠᠶᠠᠷᠯᠠᠬᠤ ᠶᠢᠨ ᠶᠡᠭᠡ ᠪᠠᠷ ᠪᠠᠶᠠᠷᠯᠠᠭᠠᠳ ᠵᠠᠷᠯᠢᠭ ᠪᠠᠭᠤᠯᠭᠠᠨ ᠪᠠᠳᠢᠷᠴᠢᠨ ᠯᠠᠮᠠ ᠳᠤ ᠭᠡᠷ | ᠬᠦᠷᠦᠩᠭᠡ ᠬᠦᠷᠲᠡᠭᠡᠨ ᠱᠠᠩᠨᠠᠪᠠ᠃ ᠲᠡᠭᠦᠨ ᠠᠴᠠ ᠬᠤᠶᠢᠰᠢ ᠪᠠᠳᠢᠷᠴᠢᠨ ᠯᠠᠮᠠ ᠰᠠᠶᠢᠨ ᠰᠠᠶᠢᠬᠠᠨ ᠠᠮᠢᠳᠤᠷᠠᠯ ᠢ ᠡᠳ᠋ᠯᠡᠭᠰᠡᠨ ᠭᠡᠨᠡ᠃ | ᠬᠠᠷᠠ ᠰᠠᠨᠠᠭᠠᠲᠤ ᠪᠠᠳᠢᠷᠴᠢᠨ ᠯᠠᠮᠠ ᠡᠨᠡᠬᠦ ᠴᠢᠮᠡᠭᠡ ᠶᠢ ᠰᠤᠨᠤᠰᠤᠭᠰᠠᠨ ᠤ ᠳᠠᠷᠠᠭᠠ᠂ ᠰᠠᠶᠢᠨ ᠰᠠᠨᠠᠭᠠᠲᠤ ᠪᠠᠳᠢᠷᠴᠢᠨ ᠯᠠᠮᠠ ᠲᠠᠢ ᠠᠭᠤᠯᠵᠠᠨ ᠵᠤᠯᠭᠠᠵᠤ᠂ | ᠲᠡᠭᠦᠨ ᠤ ᠪᠠᠶᠠᠵᠢᠭᠰᠠᠨ ᠪᠠᠶᠢᠳᠠᠯ ᠢ ᠠᠰᠠᠭᠤᠭᠠᠳ᠂ ᠶᠠᠭᠠᠷᠠᠤ ᠰᠠᠨᠳᠤᠷᠤᠤ ᠪᠠᠷ ᠦᠨᠦᠬᠢ ᠱᠠᠭᠠᠵᠠᠭᠠᠢ ᠡᠭᠦᠷᠯᠡᠭᠰᠡᠨ ᠭᠡᠷ ᠲᠤ ᠬᠦᠷᠴᠦ ᠤᠴᠢᠭᠠᠳ᠂ ᠬᠠᠨᠵᠤᠨ ᠤ | ᠠᠪᠳᠠᠷᠠ ᠳᠤ ᠰᠢᠷᠭᠤᠵᠤ ᠤᠷᠤᠪᠠ᠃ ᠬᠡᠪᠲᠡᠭᠡᠳ ᠳᠡᠮᠡᠢ ᠤᠳᠠᠭᠰᠠᠨ ᠦᠭᠡᠢ ᠲᠡᠭᠷᠢ ᠬᠠᠷᠠᠩᠭᠤᠢ ᠪᠤᠯᠪᠠ᠃ ᠬᠠᠮᠤᠭ ᠤᠨ ᠲᠦᠷᠦᠭᠦᠨ ᠳᠤ ᠭᠠᠳᠠᠨᠠ ᠠᠴᠠ ᠤᠷᠤᠵᠤ | ᠢᠷᠡᠭᠰᠡᠨ ᠨᠢ ᠡᠬᠡ ᠱᠠᠭᠠᠵᠠᠭᠠᠢ ᠪᠠᠶᠢᠯᠠ᠃ ᠤᠯᠠᠨ ᠵᠤᠯᠵᠠᠭᠠ ᠨᠢ ᠡᠬᠡ ᠠᠴᠠ ᠪᠠᠨ᠄《 ᠡᠵᠢ ᠡ᠂ ᠲᠠ ᠶᠠᠮᠠᠷ ᠢᠳᠡᠰᠢ ᠤᠯᠵᠤ ᠢᠳᠡᠪᠡ︖》 ᠭᠡᠵᠤ | ᠠᠰᠠᠭᠤᠬᠤ ᠳᠤ ᠡᠬᠡ ᠨᠢ᠄《 ᠶᠠᠭᠤ ᠴᠤ ᠤᠯᠳᠠᠭᠰᠠᠨ ᠦᠭᠡᠢ᠃》 ᠭᠡᠵᠦ ᠬᠡᠯᠡᠪᠡ᠃ ᠳᠠᠷᠠᠭᠠ ᠨᠢ ᠪᠠᠷᠰ ᠤᠷᠤᠵᠤ ᠢᠷᠡᠭᠡᠳ ᠪᠠᠰᠠ ᠶᠠᠭᠤ ᠴᠤ ᠤᠯᠵᠤ | ᠢᠳᠡᠭᠰᠡᠨ ᠦᠭᠡᠢ ᠭᠡᠳ ᠶᠡᠭᠡ ᠯᠡ ᠠᠭᠤᠷ ᠲᠠᠢ ᠬᠡᠪᠲᠡᠪᠡ᠃ ᠳᠠᠷᠠᠭᠠ ᠳᠤ ᠨᠢ ᠴᠢᠨ᠋ᠸᠠ ᠤᠷᠤᠵᠤ ᠢᠷᠡᠭᠡᠳ ᠮᠦᠨ ᠯᠡ ᠶᠠᠭᠤ ᠴᠤ ᠤᠯᠵᠤ ᠢᠳᠡᠭᠰᠡᠨ ᠦᠭᠡᠢ ᠭᠡᠵᠦ | ᠬᠡᠯᠡᠬᠦ ᠶᠢᠨ ᠳᠠᠭᠠᠤ ᠭᠡᠷ ᠳᠤᠲᠤᠷᠠ ᠨᠠᠰᠢ ᠴᠠᠰᠢ ᠳᠡᠮᠡᠢ ᠯᠡ ᠬᠤᠯᠬᠢᠵᠤ ᠪᠠᠶᠢᠯᠠ᠃ ᠬᠠᠮᠤᠭ ᠰᠡᠭᠦᠯ ᠳᠤ ᠨᠢ ᠦᠨᠡᠭᠡ ᠤᠷᠤᠵᠤ ᠢᠷᠡᠭᠡᠳ ᠰᠠᠨᠠᠭᠠ ᠰᠢᠭᠦᠷᠡᠰᠦ | ᠠᠯᠳᠠᠨ ᠪᠠᠰᠠ ᠯᠠ ᠶᠠᠭᠤ ᠴᠤ ᠤᠯᠵᠤ ᠢᠳᠡᠭᠰᠡᠨ ᠦᠭᠡᠢ ᠭᠡᠪᠡ᠃ ᠭᠡᠨᠡᠳᠲᠡ᠂ ᠦᠨᠦᠷ ᠤᠨ ᠰᠡᠷᠡᠯ ᠨᠢ ᠰᠤᠷᠭᠤᠭ ᠦᠨᠡᠭᠡ ᠪᠠᠶᠠᠷᠯᠠᠨ ᠳᠡᠪᠬᠡᠷᠴᠦ《 ᠪᠢ ᠬᠦᠮᠦᠨ | ᠤ ᠮᠢᠬᠠᠨ ᠤ ᠦᠨᠦᠷ ᠢ ᠦᠨᠦᠷᠯᠡᠵᠦ ᠤᠯᠤᠯᠠ 》 ᠭᠡᠳ ᠦᠨᠳᠦᠷ ᠳᠠᠭᠤᠨ ᠢᠶᠠᠷ ᠤᠷᠢᠯᠠᠨ ᠴᠢᠷᠠᠯᠠᠪᠠ᠃ ᠢᠩᠬᠢᠭᠡᠳ ᠤᠯᠠᠨ ᠵᠢᠭᠦᠷᠲᠡᠨ ᠠᠷᠢᠶᠠᠲᠠᠨ ᠨᠤᠭᠤᠳ | ᠬᠠᠷᠠ ᠰᠠᠨᠠᠭᠠᠲᠤ ᠪᠠᠳᠢᠷᠴᠢᠨ ᠯᠠᠮᠠ ᠦᠭᠡᠳᠡ ᠳᠠᠭᠠᠷᠢᠨ ᠤᠷᠤᠵᠤ᠂ ᠬᠠᠷᠠ ᠰᠠᠨᠠᠭᠠᠲᠤ ᠪᠠᠳᠢᠷᠴᠢᠨ ᠯᠠᠮᠠ ᠶᠢᠨ ᠮᠢᠬᠠ ᠶᠢ ᠬᠤᠪᠢᠶᠠᠯᠴᠠᠵᠤ ᠢᠳᠡᠭᠰᠡᠨ ᠤ ᠳᠠᠷᠠᠭᠠ | ᠠᠮᠲᠠᠷᠬᠠᠨ ᠨᠦᠢᠷᠰᠤᠯᠠ ᠭᠡᠨᠡ᠃ | ︽ᠤᠷᠠᠳ ᠤᠨ ᠲᠤᠮᠳᠠᠳᠤ ᠬᠤᠰᠢᠭᠤᠨ ᠤ ᠤᠶᠢᠯᠠᠯᠭᠠ ︾ ᠠᠴᠠ ᠪᠠᠭᠤᠯᠭᠠᠪᠠ᠃ | | |