ᠤᠷᠠᠳ ᠮᠣᠩᠭᠤᠯᠴᠣᠳ ᠤᠨ ᠮᠠᠯ ᠠᠵᠣ ᠠᠬᠤᠢ ᠶᠢᠨ ᠵᠠᠩ ᠦᠢᠯᠡ — ᠮᠠᠯ ᠢᠮᠨᠡᠵᠦ ᠲᠠᠮᠠᠭᠠᠯᠠᠬᠤ ᠲᠤᠬᠠᠢ ᠶᠤᠰᠤᠨ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2024/6/18
    ᠢᠮ ᠲᠡᠮᠳᠡᠭ ᠤᠨ ᠲᠦᠷᠦᠯ ᠵᠦᠢᠯ᠄ ᠢᠮ ᠭᠡᠳᠡᠭ ᠪᠣᠯ ᠮᠠᠯ ᠤᠨ ᠴᠢᠬᠢᠨ ᠳᠤ ᠡᠯᠳᠡᠪ ᠶᠠᠩᠵᠤ ᠶᠢᠨ ᠬᠠᠶᠢᠴᠢᠯᠠᠪᠤᠷᠢ ᠲᠡᠮᠳᠡᠭ ᠲᠠᠯᠪᠢᠬᠤ ᠶᠢ ᠬᠡᠯᠡᠵᠤ ᠪᠤᠢ᠃    ᠴᠤᠭᠤᠯᠪᠤᠷᠢ ᠢᠮ — ᠴᠢᠬᠢᠨ ᠤ ᠬᠢ ᠨᠢ ᠭᠤᠣᠯ ᠢᠶᠠᠷ ᠵᠦᠰᠦᠵᠦ ᠰᠠᠯᠭᠠᠭᠰᠠᠨ ᠲᠡᠮᠳᠡᠭ ︵ᠵᠦᠪ ᠪᠤᠷᠤᠭᠤ ᠲᠠᠯ᠎ᠠ ᠶᠢᠨ ᠴᠢᠬᠢᠨ ᠳᠤ︶᠃    ᠭᠠᠨᠵᠤᠭ᠎ᠠ ᠢᠮ — ᠴᠢᠬᠢᠨ ᠤ ᠠᠷᠤ ᠦᠪᠦᠷ ᠲᠠᠯᠠᠪᠠᠢ ᠶᠢ ᠲᠠᠭᠠᠭᠤᠯᠵᠤ ᠨᠠᠷᠢᠬᠠᠨ ᠵᠦᠰᠦᠵᠦ ᠤᠨᠵᠢᠢᠯᠭᠠᠭᠰᠠᠨ ᠲᠡᠮᠳᠡᠭ᠃    ᠤᠬᠤᠮᠠᠯ ᠢᠮ — ᠴᠢᠬᠢᠨ ᠤ ᠬᠢ ᠨᠢ ᠠᠷᠤ ᠦᠪᠦᠷ  ᠲᠠᠯ᠎ᠠ ᠠᠴᠠ ᠬᠤᠷᠤᠭᠤᠨ ᠤ ᠦᠨᠳᠡᠭᠡᠨ ᠴᠢᠨᠡᠭᠡᠨ ᠤᠬᠤᠵᠤ ᠬᠠᠶᠠᠭᠰᠠᠨ ᠲᠡᠮᠳᠡᠭ᠃    ᠵᠢᠷᠦᠬᠡᠨ ᠢᠮ — ᠴᠢᠬᠢᠨ ᠤ ᠦᠵᠦᠬᠦᠷ ᠠᠴᠠ ᠦᠯᠦ ᠮᠡᠳᠡᠭᠳᠡᠮ᠎ᠡ ᠬᠤᠶᠠᠷ ᠬᠠᠵᠠᠭᠤ ᠠᠴᠠ ᠨᠢ ᠣᠭᠳᠤᠯᠵᠤ ᠤᠷᠤᠮ ᠭᠠᠷᠭᠠᠨ ᠦᠯᠡᠳᠡᠭᠡᠭᠰᠡᠨ ᠲᠡᠮᠳᠡᠭ᠃    ᠲᠠᠭᠠᠷᠢᠩᠬᠠᠢ ᠢᠮ — ᠴᠢᠬᠢᠨ ᠤ ᠦᠵᠦᠬᠦᠷ ᠠᠴᠠ ᠨᠢ ᠬᠤᠷᠤᠭᠤ ᠬᠢᠷᠢᠲᠡᠢ ᠤᠭᠳᠤᠯᠵᠤ ᠠᠪᠤᠭᠰᠠᠨ ᠲᠡᠮᠳᠡᠭ᠃    ᠬᠦᠨᠳᠡᠯᠡᠨ ᠢᠮ — ᠴᠢᠬᠢᠨ ᠤ ᠬᠢ ᠨᠢ ᠠᠷᠤ ᠦᠪᠦᠷ  ᠲᠠᠯ᠎ᠠ  ᠶᠢ ᠬᠦᠨᠳᠡᠯᠡᠨ ᠨᠢᠭᠡ ᠵᠦᠰᠦᠭᠰᠡᠨ ᠢᠮ᠃    ᠰᠠᠮ ᠢᠮ — ᠴᠢᠬᠢᠨ ᠤ ᠬᠢ ᠨᠢ ᠠᠷᠤ ᠪᠤᠶᠤ ᠡᠮᠦᠨᠡᠭᠦᠷ ᠨᠢ ᠬᠦᠨᠳᠡᠯᠡᠨ ᠬᠤᠶᠠᠷ ᠵᠦᠰᠦᠭᠰᠡᠨ ᠢᠮ ︵ᠰᠠᠮ ᠲᠠᠢ ᠠᠳᠠᠯᠢ︶᠃    ᠬᠠᠭᠠᠰ ᠲᠠᠭᠠᠷᠢᠩᠬᠠᠢ ᠢᠮ — ᠴᠢᠬᠢᠨ ᠤ ᠬᠢ ᠨᠢ ᠦᠵᠦᠬᠦᠷ  ᠤᠨ ᠠᠷᠤ ᠦᠪᠦᠷ ᠠᠴᠠ ᠬᠠᠭᠠᠰ ᠤᠭᠳᠤᠯᠵᠤ ᠠᠪᠤᠭᠰᠠᠨ ᠲᠡᠮᠳᠡᠭ᠃    ᠴᠢᠭᠴᠢᠬᠡᠢ ᠢᠮ — ᠴᠢᠬᠢᠨ ᠤ ᠬᠢ ᠨᠢ ᠡᠮᠦᠨ᠎ᠡ ᠲᠠᠯ᠎ᠠ ᠠᠴᠠ ᠳᠠᠯᠪᠢ ᠶᠢᠨ ᠲᠤᠮᠳᠠ ᠬᠡᠰᠡᠭ ᠲᠤ ᠴᠢᠬᠢᠨ ᠤᠭ ᠴᠢᠭ ᠠᠴᠠ ᠭᠠᠳᠠᠭᠰᠢ ᠴᠢᠭ ᠲᠠᠢ ᠵᠢᠭᠠᠬᠠᠨ ᠤᠭᠳᠤᠯᠤᠭᠰᠠᠨ ᠲᠡᠮᠳᠡᠭ᠃    ᠡᠷᠡᠬᠡᠢ ᠢᠮ — ᠴᠢᠬᠢᠨ ᠤ ᠬᠢ ᠨᠢ ᠡᠮᠦᠨ᠎ᠡ ᠲᠠᠯ᠎ᠠ ᠠᠴᠠ ᠶᠠᠭ ᠠᠰ ᠪᠢᠰᠢ ᠵᠢᠰᠢᠭᠦᠦ ᠲᠤᠳᠤᠭᠰᠢ ᠵᠢᠭᠠᠬᠠᠨ ᠤᠭᠳᠤᠯᠤᠭᠰᠠᠨ ᠲᠡᠮᠳᠡᠭ᠃    ᠡᠳᠡᠭᠡᠷ ᠢᠮ ᠠᠴᠠ ᠭᠠᠳᠠᠨ᠎ᠠ ᠪᠠᠰᠠ ᠣᠯᠠᠨ ᠶᠠᠩᠵᠤ ᠶᠢᠨ ᠢᠮ ᠪᠠᠶᠢᠳᠠᠭ᠃ ᠴᠢᠬᠢᠨ ᠤ ᠢᠮ ᠢ ᠬᠤᠨᠢ ᠢᠮᠠᠭᠠᠨ ᠤ ᠴᠢᠬᠢ ᠶᠢ ᠬᠠᠶᠢᠴᠢᠯᠠᠵᠤ ᠲᠠᠯᠪᠢᠳᠠᠭ ᠶᠤᠮ᠃ ᠲᠡᠭᠡᠬᠦ ᠳᠤ ᠪᠠᠨ ᠵᠢᠯ ᠪᠦᠷᠢ ᠶᠢᠨ ᠬᠠᠩᠰᠢ ᠶᠢᠨ ᠡᠳᠦᠷ ᠪᠤᠶᠤ ᠮᠠᠯ ᠤᠨ ᠢᠮ ᠲᠠᠯᠪᠢᠬᠤ ᠲᠤᠰᠬᠠᠢ ᠲᠤᠭᠳᠠᠭᠰᠠᠨ ᠡᠳᠦᠷ ᠪᠠᠶᠢᠳᠠᠭ᠃ ᠵᠠᠷᠢᠮ ᠠᠶᠢᠯ ᠨᠢ ᠦᠬᠡᠷ ᠲᠤ  ᠪᠠᠨ ᠪᠠᠰᠠ ᠢᠮ ᠲᠠᠯᠪᠢᠳᠠᠭ ᠪᠦᠭᠡᠳ ᠪᠢᠷᠠᠭᠤ ᠪᠤᠯᠤᠭᠰᠠᠨ ᠬᠤᠶᠢᠨ᠎ᠠ ᠰᠠᠶ᠋ᠢ ᠳᠠᠯᠪᠢᠨ᠎ᠠ᠃    ᠲᠠᠮᠠᠭ᠎ᠠ ᠶᠢᠨ ᠲᠦᠷᠦᠯ ᠵᠦᠢᠯ᠄ ᠲᠠᠮᠠᠭ᠎ᠠ ᠭᠡᠳᠡᠭ ᠪᠣᠯ ᠲᠡᠮᠦᠷ ᠢ ᠤᠯᠠᠶᠢᠳᠬᠠᠨ ᠶᠠᠩᠵᠤ ᠪᠦᠷᠢ ᠶᠢᠨ ᠲᠦᠷᠰᠦ ᠶᠢ ᠤᠷᠠᠯᠠᠨ ᠭᠠᠩᠨᠠᠵᠤ ᠬᠢᠭᠰᠡᠨ ᠲᠡᠮᠳᠡᠭ ᠪᠤᠯᠤᠨ᠎ᠠ᠃ ᠲᠠᠮᠠᠭ᠎ᠠ ᠶᠢ ᠦᠬᠡᠷ ᠤᠨ ᠡᠪᠡᠷ ᠲᠡᠭᠡᠷ᠎ᠡ᠂ ᠠᠳᠤᠭᠤᠨ ᠤ ᠭᠤᠶᠠᠨ ᠳᠡᠭᠡᠷ᠎ᠡ᠂ ᠲᠡᠮᠡᠭᠡᠨ ᠤ ᠬᠠᠴᠠᠷ ᠳᠡᠭᠡᠷ᠎ᠡ ᠲᠤᠰ ᠲᠤᠰ ᠲᠠᠷᠤᠳᠠᠭ ᠶᠤᠮ᠃ ᠲᠠᠮᠠᠭ᠎ᠠ ᠶᠢᠨ ᠶᠠᠩᠵᠤ ᠬᠡᠯᠪᠡᠷᠢ ᠣᠯᠠᠨ ᠪᠠᠶᠢᠳᠠᠭ᠃ ᠲᠦᠯᠦᠭᠡᠯᠡᠬᠦ ᠴᠢᠨᠠᠷᠲᠠᠢ ᠲᠠᠮᠠᠭ᠎ᠠ ᠶᠢᠨ ᠵᠦᠢᠯ ᠳᠤ ᠭᠤᠣᠯᠳᠠᠭᠤ ᠨᠠᠷᠠ ᠰᠠᠷᠠᠨ ᠲᠠᠮᠠᠭ᠎ᠠ᠂ ᠲᠠᠪᠬᠤᠷ ᠰᠠᠷ᠎ᠠ᠂ ᠰᠢᠷᠡᠭᠡ ᠲᠠᠢ ᠠᠯᠢᠮᠠᠨ ᠲᠠᠮᠠᠭ᠎ᠠ᠂ ᠡᠰᠢᠲᠡᠢ ᠠᠯᠢᠮᠠᠨ ᠲᠠᠮᠠᠭ᠎ᠠ᠂ ᠬᠠᠰ ᠲᠠᠮᠠᠭ᠎ᠠ᠂ ᠬᠦᠷᠢᠶ᠎ᠡ ᠲᠠᠢ ᠬᠠᠰ ᠲᠠᠮᠠᠭ᠎ᠠ ᠨᠢᠭᠡ ᠨᠢᠲᠦ ᠲᠠᠢ ᠴᠠ ᠲᠠᠮᠠᠭ᠎ᠠ ︵ᠲᠦᠪᠡᠳ ᠦᠰᠦᠭ︶᠂ ᠬᠤᠶᠠᠷ ᠨᠢᠲᠦ ᠲᠠᠢ ᠲᠦᠪᠡᠳ ᠦᠰᠦᠭ ᠤᠨ ᠴᠠ ᠲᠠᠮᠠᠭ᠎ᠠ᠂ ᠲᠦᠪᠡᠳ ᠦᠰᠦᠭ ᠤᠨ ᠮᠠ ᠲᠠᠮᠠᠭ᠎ᠠ᠂ ᠲᠦᠪᠡᠳ ᠦᠰᠦᠭ ᠤᠨ ᠳ᠋ᠠ ᠲᠠᠮᠠᠭ᠎ᠠ ︵ᠪᠦᠭᠳᠦᠷ ᠳ᠋ᠠ︶᠂  ᠬᠤᠣᠰ ᠭᠠᠷᠠᠬᠠᠨ ᠲᠠᠮᠠᠭ᠎ᠠ᠂ ᠴᠢᠨᠳᠠᠮᠤᠨᠢ ᠲᠠᠮᠠᠭ᠎ᠠ᠂ ᠰᠢᠷᠡᠭᠡ ᠲᠠᠢ ᠴᠢᠨᠳᠠᠮᠤᠨᠢ ᠲᠠᠮᠠᠭ᠎ᠠ᠂ ᠵᠢᠭᠠᠰᠤᠨ ᠲᠠᠮᠠᠭ᠎ᠠ᠂ ᠭᠤᠬᠠᠨ ᠲᠠᠮᠠᠭ᠎ᠠ᠂ ᠴᠣᠶᠢᠨᠵᠢᠨ ᠲᠠᠮᠠᠭ᠎ᠠ᠂ ᠠᠴᠠᠨ ᠲᠠᠮᠠᠭ᠎ᠠ᠂ ᠬᠦᠷᠢᠶ᠎ᠡ ᠲᠠᠢ ᠲᠣᠣᠬᠠᠢ ᠲᠠᠮᠠᠭ᠎ᠠ᠂ ᠲᠠᠩ ᠰᠢᠷᠡᠭᠡᠨ ᠲᠠᠮᠠᠭ᠎ᠠ᠂ ᠰᠢᠷᠡᠭᠡᠨ ᠲᠠᠮᠠᠭ᠎ᠠ᠂ ᠢᠯᠢᠭᠦᠷ ᠲᠠᠮᠠᠭ᠎ᠠ᠂ ᠮᠣᠩᠭᠤᠯ ᠦᠰᠦᠭ ᠤᠨ ᠳ᠋ᠠ ᠲᠠᠮᠠᠭ᠎ᠠ᠂ ᠮᠠ ᠲᠠᠮᠠᠭ᠎ᠠ᠂ ᠴᠠ ᠲᠠᠮᠠᠭ᠎ᠠ᠂ ᠠ ᠲᠠᠮᠠᠭ᠎ᠠ᠂ ᠪᠠ᠊ ᠲᠠᠮᠠᠭ᠎ᠠ᠂ ᠴᠢᠭᠳᠠᠨ ᠲᠠᠮᠠᠭ᠎ᠠ᠂ ᠬᠤᠯᠤ ᠲᠠᠮᠠᠭ᠎ᠠ᠂ ᠲᠣᠩᠭᠤᠷ ᠲᠠᠮᠠᠭ᠎ᠠ ᠵᠡᠷᠭᠡ ᠪᠠᠶᠢᠳᠠᠭ᠃                                      ᠮᠣᠩᠭᠤᠯ ᠲᠡᠤᠬᠡ  ᠰᠤᠶᠤᠯ  ᠤᠨ ᠰᠤᠩᠭᠤᠳᠠᠭ ᠵᠣᠬᠢᠶᠠᠯ ᠤᠨ ᠬᠦᠮᠦᠷᠭᠡ᠂ ᠵᠠᠩ                                       ᠦᠢᠯᠡ ᠶᠢᠨ ᠴᠣᠪᠤᠷᠠᠯ ᠪᠢᠴᠢᠭ ︽ᠤᠷᠠᠳ ᠵᠠᠩ ᠦᠢᠯᠡ︾ ᠠᠴᠠ ᠪᠠᠭᠤᠯᠭᠠᠪᠠ 
ᠢᠷᠡᠯᠲᠡ᠄ ᠤᠷᠠᠳ ᠤᠨ ᠲᠤᠮᠳᠠᠳᠤ ᠬᠤᠰᠢᠭᠤᠨ ᠤ ᠵᠠᠰᠠᠭ ᠤᠨ ᠤᠷᠳᠤᠨ ᠤ ᠮᠤᠩᠭᠤᠯ ᠰᠦᠯᠵᠢᠶ᠎ᠡ