【ᠠᠷᠠᠳ ᠤᠨ ᠲᠤᠮᠤᠭ ᠦᠯᠢᠭᠡᠷ】ᠭᠠᠶᠢᠬᠠᠮᠰᠢᠭᠲᠤ ᠠᠩᠴᠢᠨ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2023/3/23
     ᠡᠷᠲᠡ ᠤᠷᠢᠳᠤ ᠶᠢᠨ ᠴᠠᠭ ᠲᠤ᠂ ᠢᠮᠠᠭᠠᠲᠤ ᠶᠢᠨ ᠠᠭᠤᠯᠠ ᠶᠢᠨ ᠡᠮᠦᠨ᠎ᠡ ᠬᠤᠷᠮᠤᠢ ᠳᠤ᠂ ᠢᠷᠭᠠᠶᠢᠲᠤ ᠭᠤᠤᠯ ᠤᠨ ᠬᠦᠪᠡᠭᠡᠨ ᠳᠤ᠂ ᠨᠢᠭᠡᠨ ᠶᠠᠳᠠᠭᠤ ᠭᠦᠭᠰᠢᠨ ᠡᠵᠢ ᠰᠠᠭᠤᠵᠤ ᠪᠠᠶᠢᠵᠠᠢ᠃ ᠬᠦᠭᠰᠢᠨ ᠡᠵᠢ ᠠᠯᠠᠭᠠᠨ ᠳᠡᠭᠡᠷ᠎ᠡ ᠪᠠᠨ ᠲᠠᠯᠪᠢᠪᠠᠯ ᠪᠦᠮᠪᠦᠷᠢᠨᠡᠮ᠂ ᠠᠮᠠᠨ ᠳᠠᠭᠠᠨ ᠭᠢᠪᠡᠯ ᠬᠠᠶᠢᠯᠤᠮᠠᠷ᠂ ᠴᠤᠷ ᠤᠨ ᠭᠠᠭᠴᠠ ᠬᠦᠪᠡᠭᠦᠨ ᠲᠠᠢ ᠪᠠᠶᠢᠵᠠᠢ᠃ ᠬᠦᠦ ᠶᠢᠨ ᠬᠢᠨᠢ ᠨᠡᠷ᠎ᠡ ᠨᠢ ᠶᠠᠭᠠᠯᠳᠠᠢ ᠭᠡᠳᠡᠭ᠃ ᠬᠦᠭᠰᠢᠨ ᠡᠵᠢ ᠳᠡᠭᠡᠨ ᠲᠤᠶᠢᠯ ᠤᠨ ᠠᠴᠢᠯᠠᠯ ᠡᠯᠪᠡᠷᠢᠯ ᠲᠠᠢ ᠭᠡᠨ᠎ᠡ᠃ ᠶᠢᠰᠦᠨ ᠨᠠᠰᠤᠲᠠᠢ ᠠᠴᠠ ᠡᠬᠢᠯᠡᠵᠦ ᠠᠪᠤ ᠶᠢᠨ ᠢᠶᠠᠨ ᠦᠮᠴᠢ ᠪᠤᠯᠭᠠᠨ ᠦᠯᠡᠳᠡᠭᠡᠭᠰᠡᠨ ᠬᠦᠷᠡᠩ ᠵᠡᠭᠡᠷᠳᠡ ᠮᠤᠷᠢ ᠪᠠᠨ ᠤᠨᠤᠵᠤ᠂ ᠶᠢᠰᠦᠨ ᠳᠠᠪᠬᠤᠷ ᠨᠤᠮᠤ ᠲᠠᠢ ᠨᠤᠮᠤ ᠰᠤᠮᠤ  ᠪᠠᠨ ᠮᠦᠷᠦᠪᠴᠢᠯᠡᠭᠡᠳ᠂ ᠢᠷᠭᠠᠶᠢᠲᠤ ᠶᠢᠨ ᠭᠤᠤᠯ ᠤᠨ ᠶᠡᠷᠡ ᠶᠢᠰᠦᠨ ᠲᠤᠬᠤᠢ ᠶᠢ ᠲᠤᠭᠤᠷᠢᠵᠤ᠂ ᠢᠮᠠᠭᠠᠲᠤ ᠶᠢᠨ ᠠᠭᠤᠯᠠ ᠶᠢᠨ ᠶᠡᠷᠡ ᠶᠢᠰᠦᠨ ᠳᠠᠪᠠᠭ᠎ᠠ ᠪᠠᠷ ᠳᠠᠪᠠᠵᠤ᠂ ᠠᠩ ᠭᠦᠷᠦᠭᠡ ᠬᠢᠵᠦ ᠠᠮᠢᠳᠤᠷᠠᠨ᠂ ᠭᠦᠭᠰᠢᠨ ᠡᠵᠢ ᠲᠠᠢ ᠪᠠᠨ ᠬᠠᠷᠢᠯᠴᠠᠨ ᠲᠦᠰᠢᠭᠯᠡᠵᠦ᠂ ᠬᠤᠪᠢ ᠵᠠᠶᠠᠭ᠎ᠠ ᠪᠠᠨ ᠬᠠᠮᠲᠤᠳᠬᠠᠨ ᠠᠮᠢᠳᠤᠷᠠᠵᠤ ᠪᠠᠶᠢᠵᠠᠢ᠃     ᠡᠨᠡᠷᠢᠩᠭᠦᠢ ᠡᠵᠢ ᠨᠢ ᠬᠦᠦ ᠪᠠᠨ ᠲᠤᠶᠢᠯ ᠢᠶᠠᠷ ᠡᠩᠭᠦᠷᠡᠶᠢᠯᠡᠨ ᠬᠠᠶᠢᠷᠠᠯᠠᠳᠠᠭ ᠭᠡᠨ᠎ᠡ᠃ ᠡᠳᠤᠷ ᠪᠦᠷᠢ ᠶᠢᠨ ᠦᠷᠯᠦᠭᠡ ᠡᠷᠲᠡ ᠬᠦᠦ ᠨᠢ ᠰᠠᠶᠢᠬᠠᠨ ᠨᠤᠶᠢᠷᠰᠤᠬᠤ  ᠳᠤ ᠡᠵᠢ ᠨᠢ ᠡᠷᠲᠡᠯᠡᠨ ᠪᠤᠰᠴᠤ ᠬᠦᠳᠡᠭᠡ ᠭᠡᠭᠡᠷ᠎ᠡ ᠪᠠᠷ ᠠᠷᠭᠠᠯ ᠲᠡᠭᠦᠳᠡᠭ᠃ ᠦᠷᠯᠦᠭᠡ ᠠᠷᠭᠠᠯ ᠲᠡᠭᠦᠬᠦ ᠪᠠᠷ ᠭᠠᠷᠬᠤ ᠪᠤᠯᠭᠠᠨ ᠭᠦᠭᠰᠢᠨ ᠡᠵᠢ ᠨᠢ ᠭᠤᠷᠤᠬ᠎ᠠ ᠶᠢᠨ ᠬᠠᠵᠠᠭᠤ ᠳᠠᠬᠢ ᠨᠤᠭᠤᠭᠠᠨ ᠵᠦᠯᠭᠡᠨ ᠳᠡᠭᠡᠷ᠎ᠡ ᠬᠤᠶᠠᠷ ᠪᠤᠭᠤ ᠮᠦᠷᠭᠦᠯᠳᠦᠵᠦ ᠪᠠᠶᠢᠬᠤ ᠲᠠᠢ ᠲᠠᠭᠠᠷᠠᠯᠳᠤᠳᠠᠭ ᠭᠡᠨ᠎ᠡ᠃ ᠨᠠᠰᠤᠲᠠᠨ ᠭᠤᠧᠠᠢ ᠡᠨᠡᠬᠦ ᠤᠴᠠᠷᠠᠯ ᠢ ᠬᠦᠦ  ᠳᠡᠭᠡᠨ ᠬᠡᠯᠡᠵᠦ ᠦᠭᠭᠦᠶ᠎ᠡ ᠭᠡᠵᠦ ᠭᠡᠳᠦ ᠤᠳᠠᠭ᠎ᠠ ᠪᠤᠳᠤᠭᠰᠠᠨ ᠪᠤᠯᠪᠠᠴᠤ ᠭᠡᠷ ᠲᠡᠭᠡᠨ ᠬᠠᠷᠢᠵᠤ ᠢᠷᠡᠭᠰᠡᠭᠡᠷ ᠶᠠᠭᠤ ᠴᠤ ᠦᠭᠡᠢ ᠪᠦᠷ ᠮᠠᠷᠲᠠᠴᠢᠬᠠᠳᠠᠭ᠃    ᠨᠢᠭᠡᠨ ᠡᠳᠤᠷ ᠬᠦᠭᠰᠢᠨ ᠡᠵᠢ ᠠᠷᠭᠠᠯ ᠲᠡᠭᠦᠵᠤ ᠪᠠᠶᠢᠬᠤ ᠳᠤ ᠬᠤᠶᠠᠷ ᠪᠤᠭᠤ ᠪᠠᠰᠠ ᠯᠠ ᠮᠦᠷᠭᠦᠯᠳᠦᠭᠡᠳ᠂ ᠬᠡᠨ ᠬᠡᠨ ᠳᠡᠭᠡᠨ ᠴᠤ ᠨᠠᠶᠢᠷ ᠲᠠᠯᠪᠢᠬᠤ ᠦᠭᠡᠢ ᠪᠠᠶᠢᠬᠤ ᠶᠢ ᠤᠯᠵᠤ ᠦᠵᠠᠪᠠ᠃ ᠡᠨᠡᠬᠦ ᠤᠴᠢᠷ ᠢ ᠮᠠᠷᠲᠠᠬᠤ ᠦᠭᠡᠢ ᠶᠢᠨ ᠲᠦᠯᠦᠭᠡ ᠬᠦᠭᠰᠢᠨ ᠡᠵᠢ ᠨᠢ ᠲᠤᠯᠤᠭᠠᠢ ᠳᠡᠭᠡᠷ᠎ᠡ ᠪᠠᠨ ᠬᠠᠮᠠᠷᠠᠭ ᠵᠡᠭᠦᠭᠡᠳ ᠭᠡᠷ ᠲᠡᠭᠡᠨ ᠬᠠᠷᠢᠪᠠ᠃ ᠬᠦᠦ ᠨᠢ ᠡᠵᠢ ᠶᠢᠨ ᠢᠶᠠᠨ ᠡᠶᠢᠮᠦᠷᠬᠦ ᠳᠦᠷᠢ ᠪᠠᠶᠢᠳᠠᠯ ᠲᠠᠢ ᠪᠠᠶᠢᠬᠤ ᠶᠢ ᠦᠵᠡᠭᠡᠳ ᠭᠠᠶᠢᠬᠠᠵᠤ ᠠᠰᠠᠭᠤᠭᠰᠠᠨ ᠨᠢ᠄《 ᠡᠵᠢ ᠡ᠂ ᠲᠠᠨ ᠤ ᠡᠨᠡ ᠴᠢᠨᠢ ᠶᠠᠮᠠᠷ ᠤᠴᠢᠷ ᠪᠤᠯᠴᠢᠬᠠᠪᠠ︖》 ᠭᠡᠬᠦ ᠳᠤ᠂ ᠡᠵᠢ ᠨᠢ᠄ 《 ᠠ᠂ ᠡᠵᠢ ᠨᠢ ᠴᠢᠮ᠎ᠠ ᠳᠤ ᠨᠢᠬᠡ ᠤᠴᠢᠷ ᠢ ᠬᠡᠯᠡᠶ᠎ᠡ ᠭᠡᠳ ᠮᠠᠷᠲᠠᠭᠠᠳ ᠯᠠ ᠪᠠᠶᠢᠨ᠎ᠠ᠂ ᠲᠡᠭᠡᠭᠡᠳ ᠰᠠᠶ᠋ᠢ ᠡᠶᠢᠮᠦ ᠠᠷᠭ᠎ᠠ ᠶᠢ ᠠᠪᠴᠠᠢ 》ᠭᠡᠵᠦ ᠬᠠᠷᠢᠭᠤᠯᠬᠤ ᠳᠤ ᠬᠦᠦ ᠨᠢ᠄ 《 ᠶᠠᠮᠠᠷ ᠤᠴᠢᠷ ᠪᠤᠯᠴᠢᠬᠠᠪᠠ ᠳ᠋ᠠ︖ 》ᠭᠡᠬᠦ ᠳᠤ᠂ ᠨᠠᠰᠤᠲᠠᠨ᠄《 ᠪᠢ ᠡᠳᠦᠷ ᠪᠤᠯᠭᠠᠨ ᠠᠷᠭᠠᠯ ᠲᠡᠭᠦᠬᠦ ᠪᠠᠷ ᠶᠠᠪᠤᠬᠤ ᠳᠤ᠂ ᠪᠤᠯᠠᠭ ᠤᠨ ᠬᠦᠪᠡᠭᠡᠨ ᠤ ᠵᠦᠯᠭᠡᠨ ᠳᠡᠭᠡᠷ᠎ᠡ ᠬᠤᠶᠠᠷ ᠪᠤᠭᠤ ᠮᠦᠷᠭᠦᠯᠳᠦᠨ ᠲᠡᠮᠡᠴᠡᠯᠳᠦᠵᠦ ᠪᠠᠶᠢᠬᠤ ᠲᠠᠢ ᠲᠠᠭᠠᠷᠠᠯᠳᠤᠳᠠᠭ ᠶᠤᠮ 》 ᠭᠡᠯ᠎ᠡ᠃    ᠶᠠᠭᠠᠯᠳᠠᠢ ᠬᠦᠷᠡᠩ ᠵᠡᠭᠡᠷᠳᠡ ᠪᠠᠨ ᠤᠨᠤᠵᠤ᠂ ᠶᠢᠰᠦᠨ ᠳᠠᠪᠬᠤᠷ ᠨᠤᠮᠤ ᠲᠠᠢ ᠰᠤᠮᠤ ᠰᠠᠭᠠᠳᠠᠭ ᠢᠶᠠᠨ ᠠᠭᠰᠠᠵᠤ ᠢᠷᠭᠠᠶᠢᠲᠤ ᠶᠢᠨ ᠭᠤᠤᠯ ᠢ ᠲᠤᠭᠤᠯᠤᠨ᠂ ᠢᠮᠠᠭᠠᠲᠤ ᠶᠢᠨ ᠠᠭᠤᠯᠠ ᠶᠢ ᠳᠠᠪᠠᠭᠠᠳ᠂ ᠦᠨᠦᠬᠢ ᠬᠤᠶᠠᠷ ᠪᠤᠭᠤ ᠶᠢ ᠠᠩᠨᠠᠨ ᠪᠠᠷᠢᠬᠤ ᠳᠤ᠂ ᠤᠨᠴᠠᠭᠠᠢ ᠭᠠᠶᠢᠬᠠᠯᠲᠠᠢ ᠨᠢ ᠬᠤᠶᠠᠷ ᠪᠤᠭᠤ ᠶᠢᠨ ᠪᠡᠶ᠎ᠡ ᠠᠴᠠ ᠨᠢᠭᠡ ᠠᠯᠲᠠᠨ ᠶᠠᠰᠤ᠂ ᠨᠢᠭᠡ ᠮᠦᠩᠭᠦᠨ ᠶᠠᠰᠤ ᠤᠨᠠᠵᠤ ᠢᠷᠡᠭᠰᠡᠨ ᠭᠡᠨ᠎ᠡ᠃    ᠶᠠᠭᠠᠯᠳᠠᠢ ᠶᠢᠨ ᠠᠯᠲᠠ ᠮᠦᠩᠬᠦᠨ ᠶᠠᠰᠤ ᠤᠯᠤᠭᠰᠠᠨ ᠴᠢᠮᠡᠭᠡ ᠨᠢ ᠤᠳᠠᠯ ᠦᠭᠡᠢ ᠬᠤᠪᠳᠤᠭ ᠰᠢᠨᠤᠬᠠᠢ ᠬᠠᠷᠠᠯᠳᠠᠢ ᠬᠠᠨ ᠤ ᠴᠢᠬᠢᠨ ᠳᠤ ᠤᠷᠤᠪᠠ᠃ ᠬᠡᠷᠪᠡ ᠦᠨᠡᠨ ᠠᠯᠲᠠ ᠮᠦᠩᠭᠦᠨ ᠶᠠᠰᠤ ᠮᠦᠨ ᠶᠤᠮ ᠪᠤᠯ ᠲᠡᠷᠡ ᠨᠢ ᠯᠠᠪᠲᠠᠢ ᠳᠡᠭᠡᠳᠦ ᠲᠡᠭᠷᠢ ᠠᠴᠠ ᠰᠤᠶᠤᠷᠬᠠᠭᠰᠠᠨ ᠤᠯᠳᠠᠰᠢ ᠦᠭᠡᠢ ᠤᠷᠬᠤᠳᠠᠢ ᠪᠠᠶᠢᠬ᠎ᠠ ᠳ᠋ᠠ᠂ ᠬᠡᠷᠪᠡ ᠡᠨᠡ ᠡᠷᠳᠡᠨᠢ ᠶᠢ ᠤᠯᠴᠢᠬᠠᠪᠠᠯ ᠬᠦᠭᠵᠢᠨ ᠳᠡᠭᠵᠢᠷᠡᠵᠦ᠂ ᠪᠠᠶᠠᠨ ᠡᠷᠬᠢᠮ ᠪᠤᠯᠬᠤ ᠨᠢ ᠳᠠᠮᠵᠢᠭ ᠦᠭᠡᠢ ᠭᠡᠵᠦ ᠬᠠᠷᠠᠯᠳᠠᠢ ᠬᠠᠨ ᠳᠤᠲᠤᠷ᠎ᠠ ᠪᠠᠨ ᠪᠤᠳᠤᠭᠠᠳ᠂ ᠤᠯᠠᠨ ᠲᠦᠰᠢᠮᠡᠳ ᠢᠶᠠᠨ ᠴᠤᠭᠯᠠᠭᠤᠯᠵᠤ᠂ ᠵᠦᠪᠳᠠᠯᠴᠡᠨ ᠬᠤᠤᠪᠢᠯᠳᠤᠭᠰᠠᠨ ᠤ ᠬᠤᠶᠢᠨ᠎ᠠ᠂ ᠨᠠᠭᠠᠳᠤᠮ ᠤᠨ ᠬᠤᠷᠠᠯ ᠬᠢᠬᠦ ᠪᠠᠷ ᠳᠤᠬᠲᠠᠵᠤ᠂ ᠶᠠᠭᠠᠯᠳᠠᠢ ᠶᠢ ᠲᠤᠰᠬᠠᠶᠢᠯᠠᠨ ᠤᠷᠢᠵᠤ᠂ ᠡᠨᠡᠬᠦ ᠦᠪᠡᠳᠡᠭᠰᠢ ᠶᠡᠭᠡ ᠨᠠᠶᠢᠷ ᠨᠠᠭᠠᠳᠤᠮ ᠳᠤ ᠤᠷᠤᠯᠴᠠᠭᠤᠯᠬᠤ ᠪᠠᠷ ᠪᠤᠯᠪᠠ᠃    ᠶᠠᠭᠠᠯᠳᠠᠢ ᠬᠦᠷᠡᠩ ᠵᠡᠭᠡᠷᠳᠡ ᠪᠠᠨ ᠤᠨᠤᠵᠤ᠂ ᠨᠤᠮᠤ ᠰᠠᠭᠠᠳᠠᠭ ᠢᠶᠠᠨ ᠠᠭᠰᠠᠭᠠᠳ ᠶᠠᠭ ᠶᠠᠪᠤᠬᠤ ᠭᠡᠵᠤ ᠪᠠᠶᠢᠬᠤ ᠳᠤ ᠡᠵᠢ ᠨᠢ ᠬᠦᠦ ᠶᠢᠨ ᠢᠶᠠᠨ ᠭᠠᠷ ᠠᠴᠠ ᠠᠳᠬᠤᠵᠤ ᠨᠢᠯᠪᠤᠰᠤ ᠪᠦᠮᠪᠦᠷᠢᠭᠦᠯᠦᠭᠰᠠᠭᠡᠷ ᠬᠦᠦ ᠳᠡᠭᠡᠨ ᠵᠠᠬᠢᠭᠰᠠᠨ ᠨᠢ᠄ 《 ᠬᠦᠦ ᠮᠢᠨᠢ ᠡ᠂ ᠰᠡᠷᠡᠮᠵᠢᠲᠠᠢ ᠶᠠᠪᠤᠭᠠᠷᠠᠢ︕ ᠨᠤᠶᠠᠨ ᠬᠦᠮᠦᠨ ᠢ ᠢᠲᠡᠭᠡᠵᠦ ᠪᠤᠯᠬᠤ ᠦᠭᠡᠢ᠂ ᠨᠤᠶᠢᠲᠠᠨ ᠮᠤᠳᠤ ᠶᠢ ᠲᠦᠰᠢᠵᠦ ᠪᠤᠯᠬᠤ ᠦᠭᠡᠢ ᠰᠢᠤ︕ 》ᠭᠡᠯ᠎ᠡ᠃ ᠬᠦᠦ ᠨᠢ ᠡᠵᠢ ᠳᠡᠭᠡᠨ᠄ 《 ᠡᠵᠢ ᠡ᠂ ᠲᠠ ᠰᠠᠨᠠᠭ᠎ᠠ ᠠᠮᠤᠷ ᠪᠠᠶᠢᠭᠠᠷᠠᠢ᠂ ᠬᠦᠦ ᠶᠢᠨ ᠴᠢᠨᠢ ᠳᠡᠷᠭᠡᠳᠡ ᠶᠢᠰᠦᠨ ᠳᠠᠪᠬᠤᠷ ᠨᠤᠮᠤ ᠲᠠᠢ ᠨᠤᠮᠤ ᠰᠤᠮᠤ᠂ ᠬᠦᠷᠡᠩ ᠵᠡᠭᠡᠷᠳᠡ ᠬᠦᠯᠦᠭ ᠮᠢᠨᠢ ᠪᠠᠶᠢᠳᠠᠭ ᠯᠠ ᠶᠤᠮ ᠪᠤᠯ᠂ ᠬᠦᠦ ᠴᠢᠨᠢ ᠪᠢ ᠦᠨᠳᠦᠷ ᠵᠡᠷᠭᠡ ᠦᠯᠡᠮᠵᠢ ᠹᠦᠩᠯᠦ ᠶᠢᠨ ᠡᠮᠦᠨ᠎ᠡ ᠯᠠᠪᠲᠠᠢ ᠲᠤᠯᠤᠭᠠᠢ ᠪᠦᠬᠦᠶᠢᠬᠦ ᠦᠭᠡᠢᠶᠤᠮ᠃ 》ᠭᠡᠪᠡ᠃    ᠲᠠᠯ᠎ᠠ ᠨᠤᠲᠤᠭ ᠤᠨ ᠦᠪᠡᠳᠡᠭᠰᠢ ᠶᠡᠭᠡ ᠨᠠᠶᠢᠷ ᠨᠠᠭᠠᠳᠤᠮ ᠬᠡᠳᠤᠨ ᠡᠳᠤᠷ ᠦᠷᠭᠦᠯᠵᠢᠯᠡᠪᠡ᠃ ᠬᠦᠷ ᠬᠦᠭᠵᠢᠶᠡᠨ ᠤ ᠳᠤᠮᠳᠠ᠂ ᠵᠢᠰᠦᠷ ᠬᠠᠨ ᠱᠦᠪᠦᠭᠡᠷ ᠡᠷᠡᠦ  ᠶᠢᠨ ᠢᠶᠠᠨ ᠢᠮᠠᠭᠠᠨ ᠰᠠᠬᠠᠯ ᠢᠶᠠᠨ ᠢᠯᠢᠨ ᠪᠠᠶᠢᠵᠤ᠄ 《 ᠡᠨᠡ ᠤᠳᠠᠭᠠᠨ ᠤ ᠨᠠᠶᠢᠷ ᠨᠠᠭᠠᠳᠤᠮ ᠤᠷᠢᠳᠤ ᠡᠮᠦᠨ᠎ᠡ ᠭᠠᠷᠤᠭᠠᠳᠤᠢ ᠦᠪᠡᠳᠡᠭᠰᠢ ᠶᠠᠪᠤᠭᠳᠠᠯ᠎ᠠ 》ᠬᠡᠵᠦ ᠬᠡᠯᠡᠬᠦ ᠳᠤ᠂ ᠤᠯᠠᠨ ᠲᠦᠰᠢᠮᠡᠳ ᠨᠢ ᠬᠠᠷᠢᠨ᠄ 《 ᠨᠠᠶᠢᠷ ᠨᠠᠭᠠᠳᠤᠮ ᠤᠷᠢᠳᠤ ᠭᠠᠷᠤᠭᠠᠳᠤᠢ ᠦᠪᠡᠳᠡᠭᠰᠢ ᠪᠤᠯᠤᠭᠰᠠᠨ ᠴᠤ ᠬᠠᠷᠠᠮᠰᠠᠯᠲᠠᠢ ᠨᠢ ᠭᠠᠷᠤᠳᠢ ᠶᠢᠨ ᠦᠳᠦ ᠲᠤᠲᠠᠵᠤ ᠪᠠᠶᠢᠨ᠎ᠠ ᠳ᠋ᠠ 》ᠬᠡᠵᠡᠬᠡᠪᠡ᠃ ᠲᠡᠭᠡᠬᠦ ᠳᠤ ᠬᠠᠨ ᠨᠢ᠄ 《 ᠶᠠᠪᠤᠬᠤ ᠬᠦᠮᠦᠨ ᠨᠢ ᠬᠠᠮᠢᠭ᠎ᠠ ᠪᠠᠶᠢᠨ᠎ᠠ︖ ᠤᠨᠤᠯᠭ᠎ᠠ ᠶᠢᠨ ᠲᠤᠮᠤ ᠮᠤᠷᠢ ᠨᠢ ᠬᠠᠮᠢᠭ᠎ᠠ ᠪᠠᠶᠢᠨ᠎ᠠ︖ ᠠᠭᠰᠠᠬᠤ ᠨᠤᠮᠤ ᠰᠠᠭᠠᠳᠠᠭ ᠨᠢ ᠬᠡᠨ ᠤ ᠭᠠᠷ ᠲᠤ ᠪᠠᠶᠢᠨ᠎ᠠ︖ 》ᠭᠡᠬᠦ ᠳᠤ ᠤᠯᠠᠨ ᠲᠦᠰᠢᠮᠡᠳ ᠨᠢ ᠨᠢᠭᠡᠨ ᠳᠠᠭᠤᠨ ᠢᠶᠠᠷ᠄《 ᠶᠠᠪᠤᠬᠤ ᠬᠦᠮᠦᠨ ᠪᠤᠯ ᠶᠠᠭᠠᠯᠳᠠᠢ᠂ ᠤᠨᠤᠯᠭ᠎ᠠ ᠶᠢᠨ ᠲᠤᠮᠤ ᠮᠤᠷᠢ ᠪᠤᠯ ᠬᠦᠷᠡᠩ ᠵᠡᠭᠡᠷᠳᠡ᠂ ᠠᠭᠰᠠᠬᠤ ᠨᠤᠮᠤ ᠰᠤᠮᠤ ᠪᠤᠯ ᠶᠢᠰᠦᠨ ᠨᠤᠮᠤᠲᠤ ᠰᠤᠮᠤ 》ᠭᠡᠵᠦ ᠬᠠᠷᠢᠭᠤᠯᠪᠠ᠃    ᠰᠡᠴᠡᠨ ᠮᠡᠷᠭᠡᠨ ᠠᠩᠴᠢᠨ ᠬᠦᠦ ᠶᠠᠭᠠᠯᠳᠠᠢ᠂ ᠬᠠᠷᠠᠯᠳᠠᠢ ᠬᠠᠨ ᠤ ᠪᠡᠰᠢᠷ ᠢ ᠮᠡᠳᠡᠭᠡᠳ᠂ ᠬᠦᠮᠦᠰ ᠤᠨ ᠠᠩᠬᠠᠷᠤᠮᠵᠢ ᠦᠭᠡᠢ ᠪᠠᠶᠢᠬᠤ ᠳᠤ ᠶᠢᠰᠦᠨ ᠨᠤᠮᠤᠲᠤ ᠰᠤᠮᠤ ᠪᠠᠨ ᠠᠭᠰᠠᠵᠤ᠂ ᠬᠦᠷᠠᠩ ᠵᠡᠭᠡᠷᠳᠡ ᠮᠤᠷᠢᠨ ᠳᠠᠭᠠᠨ ᠮᠤᠷᠳᠠᠭᠠᠳ᠂ ᠭᠠᠷᠤᠳᠢ ᠶᠢᠨ ᠦᠳᠦ ᠶᠢ ᠡᠷᠢᠬᠦ ᠪᠠᠷ ᠠᠯᠤᠰ ᠲᠡᠷᠳᠡᠭᠡ ᠶᠠᠪᠤᠪᠠ᠃ ᠲᠡᠷᠡ ᠠᠭᠤᠯᠠᠨ ᠤ ᠪᠠᠷᠲᠠᠭ᠎ᠠ᠂ ᠤᠰᠤᠨ ᠤ ᠠᠶᠤᠯ ᠠᠴᠠ ᠡᠮᠢᠶᠡᠯ ᠦᠭᠡᠢ ᠪᠠᠷ ᠰᠢᠭᠤᠳ ᠤᠷᠤᠭᠰᠢᠯᠠᠨ ᠶᠠᠪᠤᠯ᠎ᠠ᠃ ᠦᠳᠡ ᠪᠤᠯᠬᠤ ᠶᠢᠨ ᠠᠯᠳᠠ ᠳᠤ᠂ ᠨᠢᠭᠡᠨ ᠠᠶᠢᠯ ᠳᠤ ᠪᠠᠭᠤᠪᠠ᠃ ᠲᠡᠷᠡ ᠮᠤᠷᠢ ᠪᠠᠨ ᠤᠶᠠᠵᠤ᠂ ᠨᠤᠮᠤ ᠰᠠᠭᠠᠳᠠᠭ ᠢᠶᠠᠨ ᠮᠤᠩᠭᠤᠯ ᠭᠡᠷ ᠤᠨ ᠳᠡᠭᠡᠪᠦᠷ ᠳᠡᠭᠡᠷ᠎ᠡ ᠨᠢ ᠲᠠᠯᠪᠢᠭᠠᠳ᠂ ᠭᠡᠷ ᠲᠤ ᠨᠢ ᠤᠷᠤᠵᠠᠢ᠃ ᠭᠡᠷ ᠲᠤ ᠤᠷᠤᠭᠠᠳ ᠦᠵᠡᠭᠰᠡᠨ ᠴᠢᠨᠢ᠂ ᠭᠤᠷᠪᠠᠨ ᠬᠡᠤᠬᠡᠳ ᠪᠠᠶᠢᠭᠰᠠᠨ ᠪᠦᠭᠡᠳ ᠨᠢᠭᠡ ᠨᠢ ᠴᠢᠷᠠᠯᠠᠨ ᠤᠬᠢᠯᠠᠵᠤ᠂ ᠨᠢᠭᠡ ᠨᠢ ᠲᠡᠨᠡᠭᠯᠡᠨ ᠢᠨᠢᠶᠡᠵᠦ᠂ ᠨᠦᠭᠦᠭᠡ ᠨᠢᠭᠡ ᠨᠢ ᠠᠯᠢᠶᠠᠷᠬᠠᠨ ᠨᠠᠭᠠᠳᠴᠤ ᠪᠠᠶᠢᠭ᠎ᠠ ᠨᠢ ᠶᠠᠭᠠᠯᠳᠠᠢ ᠳᠤ ᠬᠠᠴᠢᠨ ᠵᠢᠭᠲᠡᠢ ᠪᠤᠳᠤᠭᠳᠠᠵᠤ᠂ ᠠᠰᠠᠭᠤᠭᠰᠠᠨ ᠨᠢ᠄《 ᠡᠨᠡ ᠴᠢᠨᠢ ᠶᠠᠮᠠᠷ ᠤᠴᠢᠷ ᠪᠤᠯᠴᠢᠬᠠᠪᠠ︖ 》ᠭᠡᠬᠦ ᠳᠤ᠂ ᠬᠠᠮᠤᠭ ᠤᠨ ᠪᠠᠭ᠎ᠠ ᠬᠡᠤᠬᠡᠳ ᠬᠠᠷᠢᠭᠤᠯᠤᠭᠰᠠᠨ ᠨᠢ᠄《 ᠪᠢᠳᠡ ᠠᠬ᠎ᠠ ᠳᠡᠭᠦᠦ ᠲᠠᠪᠤᠭᠤᠯᠠ ᠪᠠᠶᠢᠭᠰᠠᠨ ᠶᠤᠮ᠃ ᠶᠡᠭᠡ ᠠᠬ᠎ᠠ ᠪᠤᠯᠤᠨ ᠬᠤᠶᠠᠳᠤᠭᠠᠷ ᠠᠬ᠎ᠠ ᠨᠢᠭᠡᠨᠲᠠ ᠠᠪᠤᠷᠭᠤ ᠮᠤᠭᠠᠢ ᠳᠤ ᠵᠠᠯᠭᠢᠭᠳᠠᠪᠠ᠃ ᠭᠤᠷᠪᠠᠳᠤᠭᠠᠷ ᠠᠬ᠎ᠠ ᠦᠨᠦᠳᠦᠷ ᠵᠠᠯᠭᠢᠭᠳᠠᠬᠤ ᠭᠡᠵᠦ ᠪᠤᠢ᠂ ᠲᠡᠶᠢᠮᠦ ᠠᠴᠠ ᠲᠡᠷᠡ ᠤᠬᠢᠯᠠᠵᠤ ᠪᠤᠢ᠃ ᠳᠦᠷᠪᠡᠳᠦᠭᠡᠷ ᠠᠬ᠎ᠠ ᠮᠠᠷᠭᠠᠰᠢ ᠵᠠᠯᠭᠢᠭᠳᠠᠬᠤ ᠭᠡᠵᠦ ᠪᠠᠶᠢᠬᠤ ᠪᠤᠯᠬᠤᠷ ᠲᠡᠷᠡ ᠲᠡᠨᠡᠭᠰᠢᠨ ᠢᠨᠢᠶᠡᠵᠦ ᠪᠠᠶᠢᠨ᠎ᠠ᠃ ᠨᠦᠭᠦᠭᠡᠳᠦᠷ ᠮᠢᠨᠦ ᠡᠭᠡᠯᠵᠢ ᠪᠤᠯᠤᠭᠰᠠᠨ ᠪᠠᠶᠢᠬ᠎ᠠ᠂ ᠲᠡᠶᠢᠮᠦ ᠠᠴᠠ ᠪᠢ ᠰᠡᠯᠡᠭᠦᠴᠡᠨ ᠨᠠᠭᠠᠳᠴᠤ ᠪᠠᠶᠢᠭ᠎ᠠ ᠨᠢ ᠡᠨᠡ ᠪᠢᠯᠡ 》ᠭᠡᠵᠦ ᠬᠠᠷᠢᠭᠤᠯᠪᠠ᠃    ᠶᠠᠭᠠᠯᠳᠠᠢ᠄《 ᠡᠵᠢ ᠴᠢᠨᠢ ᠬᠠᠮᠢᠭ᠎ᠠ ᠶᠠᠪᠤᠭᠰᠠᠨ ᠪᠤᠢ︖ 》ᠭᠡᠵᠦ ᠠᠰᠠᠭᠤᠬᠤ ᠳᠤ ᠬᠠᠮᠤᠭ ᠤᠨ ᠵᠢᠭᠠᠯ ᠨᠢ᠄《 ᠠᠷᠭᠠᠯ ᠲᠡᠭᠦᠬᠦ ᠪᠠᠷ ᠶᠠᠪᠤᠭᠰᠠᠨ 》 ᠭᠡᠪᠡ᠃ ᠶᠠᠭᠠᠯᠳᠠᠢ ᠪᠠᠰᠠ᠄《 ᠲᠤᠮᠤ ᠠᠪᠤᠷᠭᠤ ᠮᠤᠭᠠᠢ ᠬᠠᠮᠢᠭ᠎ᠠ ᠪᠠᠶᠢᠨ᠎ᠠ︖ 》 ᠭᠡᠵᠦ ᠠᠰᠠᠭᠤᠬᠤ ᠳᠤ ᠵᠢᠭᠠᠯ ᠬᠦᠪᠡᠭᠦᠨ᠄《 ᠡᠵᠢ ᠶᠢᠨ ᠬᠡᠯᠡᠬᠦ ᠪᠠᠷ᠂ ᠲᠡᠷᠡ ᠬᠦ ᠬᠠᠷ᠎ᠠ ᠪᠠᠷᠠᠭᠠᠨ ᠶᠠᠭᠤᠮ᠎ᠠ ᠪᠤᠯ ᠳᠠᠷᠤᠢ ᠠᠪᠤᠷᠭᠤ ᠮᠤᠭᠠᠢ ᠮᠦᠨ ᠭᠡᠨ᠎ᠡ 》 ᠭᠡᠵᠦ ᠬᠠᠷᠢᠭᠤᠯᠬᠤ ᠶᠢᠨ ᠳᠠᠭᠠᠤ ᠵᠡᠭᠦᠨ ᠬᠤᠶᠢᠳᠤ ᠵᠦᠭ ᠲᠤ ᠶᠡᠭᠡ ᠠᠭᠤᠯᠠ ᠰᠢᠭ᠋ ᠬᠦᠨᠳᠡᠯᠢᠰᠦᠨ ᠬᠡᠪᠲᠡᠵᠦ ᠪᠠᠶᠢᠭ᠎ᠠ ᠬᠠᠷ᠎ᠠ ᠪᠠᠷᠠᠭᠠᠨ ᠠᠮᠢᠲᠠᠨ ᠢ ᠵᠢᠭᠠᠵᠤ᠄《 ᠲᠡᠷᠡ ᠡᠳᠤᠷ ᠪᠦᠷᠢ ᠶᠢᠨ ᠦᠳᠡ ᠪᠤᠯᠬᠤ ᠳᠤ ᠠᠳᠡ ᠬᠦᠷᠴᠦ ᠢᠷᠡᠭᠡᠳ ᠮᠠᠨᠠᠶᠢᠬᠢ ᠶᠢᠨ ᠨᠢᠭᠡ ᠶᠢ ᠵᠠᠯᠭᠢᠵᠤ ᠢᠳᠡᠳᠡᠭ 》ᠭᠡᠵᠦ ᠬᠠᠷᠢᠭᠤᠯᠪᠠ᠃    ᠶᠠᠭᠠᠯᠳᠠᠢ ᠰᠤᠨᠤᠰᠤᠮᠠᠭᠴᠠ ᠪᠠᠨ᠂ ᠡᠳᠡᠭᠡᠷ ᠬᠦᠭᠡᠷᠦᠬᠦᠨ ᠵᠢᠭᠠᠯ ᠤᠳ ᠤᠨ ᠠᠮᠢ ᠶᠢ ᠠᠪᠤᠷᠠᠬᠤ ᠶᠢᠨ ᠲᠦᠯᠦᠭᠡ᠂ ᠬᠠᠨ ᠤ ᠵᠠᠷᠯᠢᠭ ᠢ ᠬᠠᠶᠢᠬᠤᠷᠤᠭᠰᠠᠨ ᠦᠭᠡᠢ  ᠪᠠᠷ᠂ ᠶᠢᠰᠦᠨ ᠨᠤᠮᠤᠲᠤ ᠨᠤᠮᠤ ᠰᠤᠮᠤ ᠪᠠᠨ ᠠᠪᠴᠤ᠂ ᠪᠦᠬᠦ ᠪᠡᠶ᠎ᠡ ᠶᠢᠨ ᠡᠷ᠎ᠡ ᠴᠢᠳᠠᠯ ᠢᠶᠠᠨ ᠰᠢᠪᠬᠠᠨ᠂ ᠨᠤᠮᠤ ᠪᠠᠨ ᠲᠦᠭᠦᠷᠢᠭ ᠪᠤᠯᠲᠠᠯ᠎ᠠ ᠲᠡᠯᠢᠭᠡᠳ ᠬᠦᠯᠢᠶᠡᠪᠡ᠃ ᠶᠠᠭ ᠦᠳᠡ ᠪᠤᠯᠬᠤ ᠶᠢᠨ ᠦᠶᠡᠰ ᠲᠤ᠂ ᠭᠡᠨᠡᠳᠲᠡ ᠬᠤᠢ ᠰᠠᠯᠬᠢ ᠬᠡᠶᠢᠰᠴᠦ᠂ ᠭᠱᠡᠨ ᠵᠠᠭᠤᠷ᠎ᠠ ᠲᠡᠭᠷᠢ ᠪᠦᠷᠬᠦᠵᠦ᠂ ᠭᠠᠵᠠᠷ ᠪᠤᠳᠤᠩᠭᠤᠶᠢᠷᠠᠨ ᠬᠠᠷᠠᠯᠠᠭᠠᠳ᠂ ᠡᠯᠡᠰᠦ ᠰᠢᠷᠦᠢ ᠬᠡᠶᠢᠰᠴᠦ᠂ ᠬᠠᠶᠢᠷ ᠴᠢᠯᠠᠭᠤ ᠳᠡᠭᠳᠡᠭᠡᠳ᠂ ᠦᠨᠦᠬᠢ ᠬᠠᠷ᠎ᠠ ᠪᠠᠷᠠᠭᠠᠨ ᠲᠤᠮᠤ ᠠᠪᠤᠷᠭᠤ ᠮᠤᠭᠠᠢ ᠲᠡᠭᠷᠢ ᠶᠢᠨ ᠬᠠᠶᠠᠭᠠᠨ ᠠᠴᠠ ᠪᠠᠭᠤᠨ ᠢᠷᠡᠵᠦ᠂ ᠪᠦᠳᠦᠭᠦᠨ ᠠᠮᠠ ᠪᠠᠨ ᠠᠩᠭᠠᠯᠵᠠᠨ ᠰᠢᠭᠤᠳ ᠳᠠᠭᠠᠷᠢᠨ ᠤᠷᠤᠵᠤ ᠢᠷᠡᠯ᠎ᠡ᠃ ᠠᠩᠴᠢᠨ ᠬᠦᠦ ᠶᠢᠨ ᠬᠠᠷᠪᠤᠭᠰᠠᠨ ᠰᠤᠮᠤ ᠦᠴᠦᠬᠡᠨ ᠴᠤ ᠮᠠᠳᠠᠭ ᠦᠭᠡᠢ ᠪᠠᠷ ᠠᠪᠤᠷᠭᠤ ᠮᠤᠭᠠᠢ  ᠶᠢᠨ ᠲᠤᠯᠤᠭᠠᠢ ᠪᠤᠯᠤᠨ ᠨᠢᠷᠦᠭᠤ ᠶᠢ ᠨᠢ ᠨᠡᠪᠲᠡ ᠬᠠᠷᠪᠤᠨ ᠴᠤᠭᠤᠯᠪᠠ᠃ ᠶᠠᠭᠠᠯᠳᠠᠢ ᠬᠦᠦ ᠲᠤᠮᠤ ᠠᠪᠤᠷᠭᠤ ᠮᠤᠭᠠᠢ ᠶᠢᠨ ᠦᠮᠦᠬᠡᠢ ᠴᠢᠰᠦᠨ ᠤ ᠰᠢᠩᠭᠡᠭ ᠦᠨᠦᠷ  ᠲᠤ ᠤᠬᠠᠭ᠎ᠠ ᠠᠯᠳᠠᠨ ᠮᠠᠨᠠᠷᠠᠵᠠᠢ᠃    ᠡᠨᠡ ᠦᠶ᠎ᠡ ᠳᠤ᠂ ᠭᠤᠷᠪᠠᠨ ᠬᠡᠤᠬᠡᠳ ᠤᠨ ᠡᠵᠢ ᠨᠢ ᠤᠬᠢᠯᠠᠵᠤ ᠪᠠᠷᠬᠢᠷᠠᠭᠰᠠᠭᠠᠷ ᠮᠤᠩᠭᠤᠯ ᠭᠡᠷ ᠲᠡᠭᠡᠨ ᠭᠦᠶᠦᠨ ᠤᠷᠤᠵᠤ ᠢᠷᠡᠬᠦ ᠳᠤ᠂ ᠭᠤᠷᠪᠠᠨ ᠬᠡᠤᠬᠡᠳ  ᠨᠢ ᠬᠠᠷᠢᠨ ᠬᠤᠬᠢᠷᠠᠯ ᠠᠮᠰᠠᠭᠰᠠᠨ ᠦᠭᠡᠢ ᠡᠩᠬᠡ ᠮᠡᠨᠳᠦ ᠪᠠᠶᠢᠭᠰᠠᠨ ᠪᠦᠭᠡᠳ ᠵᠦᠪᠬᠡᠨ ᠭᠡᠷ ᠤᠨ ᠵᠡᠭᠦᠨ ᠬᠠᠶᠠᠭ᠎ᠠ ᠪᠠᠷ ᠨᠢᠭᠡᠨ ᠬᠦᠮᠦᠨ ᠦᠬᠦᠭᠰᠡᠨ ᠬᠦᠮᠦᠨ ᠮᠡᠲᠦ ᠬᠡᠪᠲᠡᠵᠦ ᠪᠠᠶᠢᠯ᠎ᠠ᠃    ᠡᠵᠢ ᠨᠢ ᠬᠡᠤᠬᠡᠳ ᠠᠴᠠ ᠪᠠᠨ᠄《 ᠡᠨᠡ ᠬᠠᠮᠢᠭᠠᠬᠢ ᠬᠦᠮᠦᠨ ᠪᠤᠢ︖ ᠶᠠᠭᠠᠬᠢᠭᠠᠳ ᠠᠳᠡ ᠬᠡᠪᠲᠡᠵᠦ ᠪᠠᠶᠢᠬᠤ ᠶᠤᠮ ᠪᠤᠢ︖ 》ᠭᠡᠵᠦ ᠠᠰᠠᠭᠤᠬᠤ ᠳᠤ᠂ ᠬᠡᠤᠬᠡᠳ ᠤᠳ ᠨᠢ᠄《 ᠲᠡᠷᠡ ᠪᠤᠯ ᠲᠤᠮᠤ ᠠᠪᠤᠷᠭᠤ ᠮᠤᠭᠠᠢ ᠶᠢ ᠬᠠᠷᠪᠤᠵᠤ ᠠᠯᠠᠭᠠᠳ ᠠᠮᠢ ᠠᠪᠤᠷᠠᠭᠰᠠᠨ ᠠᠴᠢᠲᠤ ᠬᠦᠮᠦᠨ ᠮᠦᠨ 》ᠭᠡᠳ᠂ ᠤᠴᠢᠷ ᠶᠠᠪᠤᠳᠠᠯ  ᠤᠨ ᠦᠩᠭᠡᠷᠡᠯᠲᠡ ᠶᠢ ᠡᠵᠢ ᠳᠡᠭᠡᠨ ᠨᠠᠷᠢᠨ ᠲᠤᠳᠤᠷᠬᠠᠢ ᠬᠡᠯᠡᠵᠦ ᠦᠭᠴᠡᠢ᠃ ᠡᠵᠢ ᠨᠢ ᠡᠨᠡᠬᠦ ᠦᠭᠡ ᠨᠦᠭᠦᠳ ᠢ ᠰᠤᠨᠤᠰᠤᠮᠠᠭᠴᠠ᠂ ᠶᠠᠭᠠᠷᠠᠤ ᠰᠠᠨᠳᠤᠷᠠᠤ ᠪᠠᠷ ᠠᠪᠳᠠᠷ᠎ᠠ ᠠᠴᠠ ᠪᠠᠨ ᠭᠠᠷᠤᠳᠢ ᠶᠢᠨ ᠦᠳᠦ ᠪᠠᠨ ᠭᠠᠷᠭᠠᠵᠤ᠂ ᠮᠠᠨᠠᠷᠠᠨ ᠤᠨᠠᠭᠰᠠᠨ ᠠᠩᠴᠢᠨ ᠢ ᠠᠪᠤᠷᠠᠵᠤ ᠰᠡᠷᠭᠦᠭᠡᠭᠡᠳ᠄《ᠵᠠᠯᠠᠭᠤ ᠮᠢᠨᠢ ᠡ᠂ ᠠᠯᠳᠠᠷ ᠨᠡᠷ᠎ᠡ ᠴᠢᠨᠢ ᠬᠡᠨ ᠭᠡᠳᠡᠭ ᠪᠤᠢ︖ ᠶᠠᠮᠠᠷ ᠤᠴᠢᠷ ᠢᠶᠠᠷ ᠠᠳᠡ ᠢᠷᠡᠭᠰᠡᠨ ᠪᠤᠢ︖ 》ᠭᠡᠵᠦ ᠠᠰᠠᠭᠤᠬᠤ ᠳᠤ ᠶᠠᠭᠠᠯᠳᠠᠢ᠄《 ᠪᠢ ᠬᠠᠷᠠᠯᠳᠠᠢ ᠬᠠᠨ ᠤ ᠵᠠᠷᠯᠢᠭ ᠢᠶᠠᠷ ᠭᠠᠷᠤᠳᠢ  ᠶᠢᠨ ᠦᠳᠦ ᠶᠢ ᠡᠷᠢᠵᠦ ᠶᠠᠪᠤᠨ᠎ᠠ᠃ ᠬᠡᠷᠪᠡ ᠦᠨᠦᠳᠦᠷ ᠡᠷᠢᠵᠦ ᠤᠯᠬᠤ ᠦᠭᠡᠢ ᠪᠤᠯ ᠠᠮᠢ ᠨᠠᠰᠤᠨ ᠳᠤ ᠮᠢᠨᠢ ᠠᠶᠤᠯᠲᠠᠢ ᠪᠤᠯᠤᠨ᠎ᠠ》 ᠭᠡᠬᠦ ᠳᠤ ᠬᠦᠭᠰᠢᠨ ᠡᠵᠢ ᠰᠤᠨᠤᠰᠤᠩᠭᠤᠳᠠ᠂ ᠭᠠᠷ ᠲᠠᠬᠢ ᠭᠠᠷᠤᠳᠢ ᠶᠢᠨ ᠦᠳᠦ ᠪᠠᠨ ᠠᠩᠴᠢᠨ ᠬᠦᠦ ᠳᠤ ᠭᠠᠷᠳᠠᠭᠤᠯᠵᠤ᠄《 ᠡᠨᠡ ᠪᠤᠯ ᠳᠠᠷᠤᠢ ᠴᠢᠨᠤ ᠡᠷᠢᠵᠦ ᠶᠠᠪᠤᠭ᠎ᠠ ᠭᠠᠷᠤᠳᠢ ᠶᠢᠨ ᠦᠳᠦ ᠮᠦᠨ᠂ ᠴᠢ ᠠᠪᠤᠭᠠᠳ ᠶᠠᠪᠤ᠃ ᠬᠠᠷᠠᠯᠳᠠᠢ ᠬᠠᠨ ᠬᠡᠳᠦᠢ ᠬᠠᠷ᠎ᠠ ᠰᠡᠳᠬᠢᠯ᠂ ᠬᠠᠷᠭᠢᠰ ᠰᠠᠨᠠᠭ᠎ᠠ ᠲᠠᠢ ᠪᠠᠶᠢᠭᠰᠠᠨ ᠴᠤ᠂ ᠴᠢ ᠡᠷᠬᠡ ᠰᠦᠷᠲᠡᠨ ᠳᠤ ᠪᠠᠭᠤᠵᠤ ᠦᠭᠬᠦ ᠦᠭᠡᠢ ᠯᠠ ᠶᠤᠮ ᠪᠤᠯ᠂ ᠬᠠᠷᠠᠯᠳᠠᠢ ᠬᠠᠨ ᠴᠢᠮ᠎ᠠ ᠶᠢ ᠶᠠᠭᠠᠬᠢᠵᠤ ᠴᠤ ᠴᠢᠳᠠᠬᠤ ᠦᠭᠡᠢ ᠳ᠋ᠠ》 ᠭᠡᠵᠡᠢ᠃    ᠶᠠᠭᠠᠯᠳᠠᠢ ᠭᠠᠷᠤᠳᠢ ᠶᠢᠨ ᠦᠳᠦ ᠪᠠᠨ ᠬᠠᠨ ᠳᠤ ᠲᠤᠰᠢᠶᠠᠨ ᠦᠭᠪᠡ᠃ ᠭᠡᠲᠡᠯ᠎ᠡ ᠬᠠᠷᠠᠯᠳᠠᠢ ᠬᠠᠨ ᠪᠠᠰᠠ ᠯᠠ ᠰᠡᠳᠬᠢᠯ ᠬᠠᠨᠤᠭᠰᠠᠨ ᠦᠭᠡᠢ ᠪᠠᠷ ᠨᠢᠳᠤ ᠪᠠᠨ ᠰᠡᠶᠢᠮᠡᠶᠢᠯᠭᠡᠨ᠄《 ᠮᠠᠨ ᠤ ᠨᠠᠶᠢᠷ ᠨᠠᠭᠠᠳᠤᠮ ᠦᠨᠡᠭᠡᠷ ᠤᠷᠢᠳ ᠡᠮᠦᠨ᠎ᠡ ᠭᠠᠷᠤᠭ᠎ᠠ ᠦᠭᠡᠢ ᠦᠪᠡᠳᠡᠭᠰᠢ ᠶᠡᠬᠡᠪᠡᠷ ᠶᠠᠪᠤᠭᠳᠠᠯ᠎ᠠ》 ᠭᠡᠬᠦ ᠳᠤ᠂ ᠲᠦᠰᠢᠮᠡᠳ ᠨᠢ《 ᠨᠠᠶᠢᠷ ᠨᠠᠭᠠᠳᠤᠮ ᠴᠤ ᠵᠤᠶᠢᠷᠯᠡᠰᠢ ᠦᠭᠡᠢ ᠦᠪᠡᠳᠡᠭᠰᠢ ᠶᠡᠭᠡ ᠪᠠᠷ ᠶᠠᠪᠤᠭᠳᠠᠯ᠎ᠠ᠂ ᠭᠡᠲᠡᠯ᠎ᠡ ᠪᠠᠰᠠ ᠠᠪᠤᠷᠭᠤ ᠮᠤᠭᠠᠢ ᠶᠢᠨ ᠰᠦᠰᠦ ᠲᠤᠲᠠᠵᠤ ᠪᠠᠶᠢᠨ᠎ᠠ》 ᠭᠡᠪᠡ᠃ ᠬᠠᠷᠠᠯᠳᠠᠢ ᠬᠠᠨ ᠵᠠᠯᠭᠠᠭᠠᠳ ᠠᠰᠠᠭᠤᠭᠰᠠᠨ ᠨᠢ᠄《 ᠶᠠᠪᠤᠬᠤ ᠬᠦᠮᠦᠨ ᠨᠢ ᠬᠠᠮᠢᠭ᠎ᠠ ᠪᠠᠶᠢᠨ᠎ᠠ︖ ᠤᠨᠤᠯᠭ᠎ᠠ ᠶᠢᠨ ᠬᠦᠯᠦᠭ ᠮᠤᠷᠢ ᠨᠢ ᠬᠠᠮᠢᠭ᠎ᠠ ᠪᠠᠶᠢᠨ᠎ᠠ︖ ᠠᠭᠰᠠᠬᠤ ᠨᠤᠮᠤ ᠰᠠᠭᠠᠳᠠᠭ ᠨᠢ ᠬᠡᠨ ᠤ ᠭᠠᠷ ᠲᠤ ᠪᠠᠶᠢᠨ᠎ᠠ︖》 ᠭᠡᠬᠦ ᠳᠤ᠂ ᠲᠦᠰᠢᠮᠡᠳ ᠨᠢ ᠨᠢᠭᠡᠨ ᠳᠠᠭᠤᠨ ᠢᠶᠠᠷ᠄《 ᠶᠠᠪᠤᠬᠤ ᠬᠦᠮᠦᠨ ᠪᠤᠯ ᠶᠠᠭᠠᠯᠳᠠᠢ᠂ ᠤᠨᠤᠯᠭ᠎ᠠ ᠶᠢᠨ ᠬᠦᠯᠦᠭ ᠮᠤᠷᠢ ᠪᠤᠯ ᠬᠦᠷᠡᠩ ᠵᠡᠭᠡᠷᠳᠡ᠂ ᠠᠭᠰᠠᠬᠤ ᠨᠤᠮᠤ ᠰᠤᠮᠤ ᠪᠤᠯ ᠶᠢᠰᠦᠨ ᠨᠤᠮᠤᠲᠤ ᠰᠤᠮᠤ》 ᠭᠡᠵᠤ ᠬᠠᠷᠢᠭᠤᠯᠪᠠ᠃    ᠶᠠᠭᠠᠯᠳᠠᠢ ᠬᠦᠦ ᠬᠠᠨ ᠤ ᠵᠠᠷᠯᠢᠭ ᠢᠶᠠᠷ ᠶᠠᠪᠤᠭᠰᠠᠭᠠᠷ ᠪᠠᠶᠢᠵᠤ᠂ ᠶᠠᠭ ᠰᠠᠶᠢᠬᠠᠨ ᠲᠦᠮᠡᠨ ᠲᠡᠮᠡᠭᠡ ᠬᠠᠷᠢᠭᠤᠯᠤᠭᠰᠠᠨ ᠴᠢᠬᠢᠷᠠᠭ ᠲᠡᠩᠬᠡᠯᠡᠭᠦᠨ ᠪᠡᠶ᠎ᠡ ᠲᠠᠢ᠂ ᠨᠢᠭᠡᠨ ᠰᠢᠷ᠎ᠠ ᠡᠪᠦᠭᠡᠨ ᠲᠠᠢ ᠤᠴᠠᠷᠠᠪᠠ᠃ ᠲᠡᠮᠡᠭᠡᠴᠢᠨ ᠡᠪᠦᠭᠡᠨ ᠶᠠᠭᠠᠯᠳᠠᠢ ᠠᠴᠠ ᠬᠡᠨ ᠤ ᠵᠠᠷᠯᠢᠭ ᠢᠶᠠᠷ ᠶᠠᠪᠤᠵᠤ ᠪᠠᠶᠢᠬᠤ ᠶᠢ ᠨᠢ ᠠᠰᠠᠭᠤᠬᠤ ᠳᠤ᠂ ᠶᠠᠭᠠᠯᠳᠠᠢ᠄《 ᠪᠢ ᠬᠠᠷᠠᠯᠳᠠᠢ ᠬᠠᠨ ᠤ ᠵᠠᠷᠯᠢᠭ ᠢᠶᠠᠷ ᠠᠪᠤᠷᠭᠤ ᠮᠤᠭᠠᠢ ᠶᠢᠨ ᠰᠦᠰᠦ ᠶᠢ ᠡᠷᠢᠵᠦ ᠤᠯᠬᠤ ᠪᠠᠷ ᠶᠠᠪᠤᠵᠤ ᠪᠠᠶᠢᠨ᠎ᠠ》 ᠭᠡᠵᠦ ᠬᠠᠷᠢᠭᠤᠯᠪᠠ᠃ ᠡᠪᠦᠭᠡᠨ᠄《 ᠬᠦᠭᠡᠷᠦᠬᠦᠢ ᠬᠦᠦ ᠮᠢᠨᠢ ᠳ᠋ᠠ᠂ ᠴᠢᠮ᠎ᠠ ᠳᠤ ᠤᠯᠵᠤ ᠠᠪᠬᠤ ᠠᠷᠭ᠎ᠠ ᠪᠠᠶᠢᠨ᠎ᠠ ᠤᠤ︖ ᠠᠪᠤᠷᠭᠤ ᠮᠤᠭᠠᠢ ᠶᠢᠨ ᠰᠦᠰᠦ ᠪᠠᠷᠠᠭᠤᠨ ᠲᠠᠯ᠎ᠠ ᠶᠢᠨ ᠦᠨᠳᠦᠷ ᠠᠭᠤᠯᠠᠨ ᠤ ᠡᠮᠦᠨ᠎ᠡ ᠬᠤᠷᠮᠤᠢ ᠳᠤ ᠪᠠᠶᠢᠬᠤ ᠮᠦᠷᠲᠡᠭᠡᠨ ᠲᠡᠷᠡ ᠠᠪᠤᠷᠭᠤ ᠮᠤᠭᠠᠢ ᠡᠳᠦᠷ ᠪᠦᠷᠢ ᠨᠠᠷᠠ ᠮᠠᠨᠳᠤᠬᠤ ᠶᠢᠨ ᠦᠶᠡᠰ ᠢᠶᠠᠷ ᠪᠤᠰᠴᠤ᠂ ᠦᠳᠡ ᠪᠤᠯᠬᠤ ᠶᠢᠨ ᠬᠢᠷᠢ ᠳᠤ ᠬᠠᠷ᠎ᠠ ᠦᠩᠭᠡ ᠲᠠᠢ ᠪᠤᠯᠵᠤ᠂ ᠦᠳᠡᠰᠢ ᠤᠷᠤᠢ ᠪᠤᠯᠬᠤ ᠳᠤ ᠨᠡᠩ ᠠᠶᠤᠮᠠᠷ ᠪᠤᠯᠳᠠᠭ᠃ ᠳᠡᠭᠡᠳᠦ ᠤᠷᠤᠭᠤᠯ ᠨᠢ ᠲᠡᠭᠷᠢ ᠶᠢᠨ ᠤᠳᠤᠳ ᠢ ᠲᠤᠯᠭᠠᠭᠤᠷᠢᠯᠠᠵᠤ᠂ ᠳᠤᠤᠷᠠᠲᠤ ᠤᠷᠤᠭᠤᠯ ᠢᠶᠠᠨ ᠭᠠᠵᠠᠷ ᠲᠤ ᠰᠢᠷᠭᠤᠭᠤᠯᠤᠭᠰᠠᠨ ᠠᠪᠤᠷᠭᠤ ᠠᠮᠢᠲᠠᠨ ᠪᠤᠯᠳᠠᠭ᠃ ᠬᠦᠦ ᠮᠢᠨᠢ ᠡ︕ ᠴᠢ ᠤᠴᠢᠵᠤ ᠲᠤᠷᠰᠢᠵᠤ ᠦᠵᠡ ᠯᠡ ᠳ᠋ᠡ》 ᠭᠡᠵᠦ ᠬᠡᠯᠡᠵᠦ ᠦᠭᠬᠦᠯ᠎ᠡ᠃    ᠠᠩᠴᠢᠨ ᠬᠦᠦ ᠶᠠᠭᠠᠯᠳᠠᠢ᠂ ᠲᠡᠮᠡᠭᠡᠴᠢᠨ ᠡᠪᠦᠭᠡᠨ ᠤ ᠦᠭᠡ ᠶᠢ ᠪᠠᠲᠤ ᠴᠡᠭᠡᠵᠢᠯᠡᠵᠦ᠂ ᠪᠠᠷᠠᠭᠤᠨ ᠠᠭᠤᠯᠠᠨ ᠤ ᠬᠤᠷᠮᠤᠢ ᠳᠤ ᠰᠢᠭᠤᠳ ᠬᠦᠷᠴᠦ ᠪᠠᠭᠤᠳᠠᠯᠯᠠᠪᠠ᠃ ᠳᠠᠷᠠᠭ᠎ᠠ ᠡᠳᠦᠷ ᠤᠨ ᠬᠢᠨᠢ ᠦᠷᠯᠦᠭᠡ ᠡᠷᠲᠡ ᠪᠤᠰᠴᠤ᠂ ᠪᠤᠭᠤ ᠶᠢᠨ ᠡᠪᠡᠷ ᠢᠶᠠᠷ ᠠᠮᠠᠭᠠᠢ ᠬᠢᠵᠦ᠂ ᠵᠡᠭᠡᠷ᠎ᠡ ᠶᠢᠨ ᠠᠷᠠᠰᠤ ᠪᠠᠷ ᠴᠤᠯᠪᠤᠭᠤᠷ ᠬᠢᠬᠦ ᠪᠠᠷ ᠪᠡᠯᠡᠳᠬᠡᠪᠡ᠃ ᠨᠠᠷᠠ ᠮᠠᠨᠳᠤᠬᠤ ᠶᠢᠨ ᠦᠶ᠎ᠡ ᠳᠤ᠂ ᠠᠭᠤᠯᠠᠨ ᠤ ᠡᠩᠭᠡᠷ ᠲᠤ ᠬᠦᠷᠴᠦ ᠦᠵᠡᠭᠰᠡᠨ ᠴᠢᠨᠢ᠂ ᠦᠨᠡᠭᠡᠷ ᠨᠢᠭᠡ ᠮᠤᠨᠳᠠᠭ ᠶᠡᠭᠡ ᠠᠮᠢᠲᠠᠨ ᠬᠡᠪᠲᠡᠵᠦ ᠪᠠᠶᠢᠬᠰᠠᠨ ᠠᠴᠠ ᠪᠠᠨ ᠪᠤᠰᠬᠤ ᠭᠡᠳ ᠳᠡᠯᠴᠢᠯᠡᠵᠦ ᠪᠠᠶᠢᠪᠠ᠃ ᠶᠠᠭᠠᠯᠳᠠᠢ ᠬᠤᠷᠴᠠ ᠱᠠᠯᠠᠮᠠᠭᠠᠢ ᠪᠠᠷ ᠬᠦᠷᠴᠦ ᠤᠴᠢᠨ ᠬᠠᠵᠠᠭᠠᠷᠯᠠᠭᠠᠳ ᠠᠪᠤᠯ᠎ᠠ᠃ ᠦᠳᠡ ᠪᠤᠯᠬᠤ ᠶᠢᠨ ᠠᠯᠳᠠ ᠳᠤ᠂ ᠡᠨᠡᠬᠦ ᠠᠮᠢᠲᠠᠨ ᠦᠨᠡᠭᠡᠷ ᠬᠠᠷ᠎ᠠ ᠡᠷᠢᠶᠡᠨ ᠪᠤᠯᠵᠤ ᠬᠤᠪᠢᠷᠠᠭᠠᠳ᠂ ᠴᠤᠯᠪᠤᠭᠤᠷ ᠢ ᠲᠠᠰᠤᠯᠬᠤ ᠭᠡᠵᠦ ᠳᠡᠯᠴᠢᠯᠡᠯ᠎ᠡ᠃ ᠶᠠᠭᠠᠯᠳᠠᠢ ᠠᠪᠤᠷᠭᠤ ᠮᠤᠭᠠᠢ ᠶᠢ ᠴᠢᠷᠴᠦ ᠬᠠᠨ ᠤ ᠤᠷᠳᠤᠨ ᠳᠤ ᠬᠦᠷᠬᠦ ᠤᠶᠢᠷᠠᠲᠤᠬᠤ ᠳᠤ᠂ ᠨᠠᠷᠠ ᠶᠠᠭ ᠪᠠᠷᠠᠭᠤᠨᠰᠢᠯᠠᠵᠤ ᠰᠢᠩᠭᠡᠬᠦ ᠤᠶᠢᠷᠠᠲᠤᠯ᠎ᠠ᠃ ᠴᠢᠷᠦᠭᠳᠡᠵᠦ ᠶᠠᠪᠤᠭ᠎ᠠ ᠠᠪᠤᠷᠭᠤ ᠮᠤᠭᠠᠢ ᠬᠤᠷᠤᠮᠬᠠᠨ ᠵᠠᠭᠤᠷ᠎ᠠ ᠳᠡᠭᠡᠳᠦ ᠤᠷᠤᠭᠤᠯ ᠨᠢ ᠲᠡᠭᠷᠢ ᠶᠢ ᠲᠤᠯᠵᠤ᠂ ᠳᠤᠤᠷᠠᠲᠤ ᠤᠷᠤᠭᠤᠯ ᠨᠢ ᠭᠠᠵᠠᠷ ᠲᠤ ᠰᠢᠬᠢᠳᠦᠭᠰᠡᠨ ᠠᠪᠤᠷᠭᠤ ᠲᠤᠮᠤ ᠠᠮᠢᠲᠠᠨ ᠪᠤᠯᠵᠤ᠂ ᠠᠩᠴᠢᠨ ᠬᠦᠦ ᠶᠠᠭᠠᠯᠳᠠᠢ ᠪᠤᠯᠤᠨ ᠬᠦᠷᠡᠩ ᠵᠡᠭᠡᠷᠳᠡ ᠮᠤᠷᠢ᠂ ᠶᠢᠰᠦᠨ ᠨᠤᠮᠤ ᠲᠠᠢ ᠨᠤᠮᠤ ᠰᠤᠮᠤ ᠶᠢ ᠵᠠᠯᠬᠢᠴᠢᠭᠡᠮᠡᠷ ᠪᠠᠶᠢᠯ᠎ᠠ᠃ ᠬᠠᠷᠠᠯᠳᠠᠢ ᠬᠠᠨ ᠪᠤᠯᠤᠨ ᠤᠯᠠᠨ ᠲᠦᠰᠢᠮᠡᠳ ᠡᠨᠡᠬᠦ ᠪᠠᠶᠢᠳᠠᠯ ᠢ ᠦᠵᠡᠮᠡᠭᠴᠡ ᠬᠡᠯᠡᠮᠡᠭᠳᠡᠨ ᠰᠤᠴᠢᠵᠤ᠂ ᠦᠩᠭᠦᠯᠴᠡᠭ ᠢᠶᠠᠨ ᠬᠠᠭᠠᠷᠠᠲᠠᠯ᠎ᠠ ᠠᠶᠤᠭᠠᠳ ᠭᠤᠯᠵᠢᠢᠨ ᠤᠨᠠᠵᠤ ᠦᠬᠦᠴᠢᠭᠡᠭᠰᠡᠨ ᠭᠡᠨ᠎ᠡ᠃    ᠰᠡᠴᠡᠨ ᠮᠡᠷᠭᠡᠨ ᠤᠬᠠᠭᠠᠨᠲᠤ ᠠᠩᠴᠢᠨ ᠬᠦᠦ ᠶᠠᠭᠠᠯᠳᠠᠢ ᠲᠠᠯ᠎ᠠ ᠨᠤᠲᠤᠭ ᠤᠨ ᠲᠦᠯᠦᠭᠡ ᠪᠤᠭ ᠴᠢᠳᠬᠦᠷ ᠢ ᠠᠷᠢᠯᠭᠠᠵᠤ ᠦᠭᠭᠦᠭᠰᠡᠨ ᠠᠴᠠ ᠬᠤᠶᠢᠰᠢ᠂ ᠲᠠᠯ᠎ᠠ ᠨᠤᠲᠤᠭ ᠤᠨ ᠠᠷᠠᠳ ᠲᠦᠮᠡᠨ ᠳᠠᠬᠢᠵᠤ ᠳᠠᠷᠤᠯᠠᠯ ᠠᠮᠰᠠᠬᠤ ᠦᠭᠡᠢ ᠪᠤᠯᠵᠤ᠂ ᠠᠮᠤᠷ ᠵᠢᠮᠦᠷ ᠠᠵᠤ ᠲᠦᠷᠦᠨ ᠠᠮᠢᠳᠤᠷᠠᠬᠤ ᠪᠤᠯᠤᠭᠰᠠᠨ ᠭᠡᠨ᠎ᠡ᠃
ᠢᠷᠡᠯᠲᠡ᠄ ᠤᠷᠠᠳ ᠤᠨ ᠲᠤᠮᠳᠠᠳᠤ ᠬᠤᠰᠢᠭᠤᠨ ᠤ ᠵᠠᠰᠠᠭ ᠤᠨ ᠤᠷᠳᠤᠨ ᠤ ᠮᠤᠩᠭᠤᠯ ᠰᠦᠯᠵᠢᠶ᠎ᠡ