︽ᠰᠦ ᠲᠠᠢ ᠪᠤᠷᠬᠠᠨ︾ ᠡᠵᠢ ᠳᠤ ᠪᠠᠨ ᠪᠢᠴᠢᠭᠰᠡᠨ ᠢᠯᠡ ᠵᠠᠬᠢᠳᠠᠯ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2022/8/17
ᠬᠦᠨᠲᠦᠲᠦ ᠡᠵᠢ ᠮᠢᠨᠢ᠄       ᠰᠠᠶᠢᠨ ᠪᠠᠶᠢᠨ᠎ᠠ ᠤᠤ︖ ᠭᠡᠵᠤ ᠠᠯᠤᠰ ᠲᠤ ᠰᠠᠭᠤᠭ᠎ᠠ ᠡᠵᠢ ᠲᠡᠨ ᠳᠤ ᠪᠠᠨ ᠠᠯᠠᠭ᠎ᠠ ᠴᠢᠨᠡᠭᠡᠨ ᠴᠠᠭᠠᠰᠤᠨ ᠲᠡᠭᠡᠷ᠎ᠡ ᠠᠯᠲᠠ ᠬᠠᠲᠠᠭ ᠢᠶᠠᠨ ᠲᠡᠯᠭᠡᠨ ᠠᠮᠤᠷ ᠡᠷᠢᠨ ᠵᠤᠯᠭᠠᠵᠤ ᠪᠠᠶᠢᠨ᠎ᠠ᠃       ᠦᠨᠦᠲᠦᠷ ᠪᠤᠯ ᠬᠦᠦ ᠶᠢᠨ ᠴᠢᠨᠢ ᠲᠦᠷᠦᠭᠰᠡᠨ ᠡᠲᠦᠷ ᠤᠨ ᠪᠠᠶᠠᠷ᠃ ᠡᠨᠡ ᠡᠲᠦᠷ ᠢ ᠡᠵᠢ ᠮᠢᠨᠢ ᠲᠠ ᠭᠡᠨ ᠠᠴᠠ ᠴᠦ ᠢᠯᠡᠬᠦᠦ ᠰᠠᠶᠢᠨ ᠴᠡᠭᠡᠵᠢᠯᠡᠵᠦ ᠪᠠᠶᠢᠬᠤ ᠨᠢ ᠯᠠᠪᠲᠠᠢ ᠶᠤᠮ᠃ ︽ᠦᠨᠦᠲᠦᠷ ᠪᠤᠯ ᠮᠢᠨᠤ ᠬᠦᠦ ᠶᠢᠨ ᠲᠦᠷᠦᠭᠰᠡᠨ ᠡᠲᠦᠷ᠂ ᠡᠵᠢ ᠨᠢ ᠰᠠᠶᠢᠬᠠᠨ ᠠᠮᠲᠠᠲᠠᠢ ᠬᠤᠭᠤᠯᠠ ᠬᠢᠵᠦ ᠢᠲᠡᠬᠦᠯᠦᠶ᠎ᠡ︾ ᠭᠡᠵᠤ ᠪᠠᠭ᠎ᠠ ᠪᠠᠶᠢᠬᠤ ᠳᠤ ᠵᠢᠯ ᠪᠦᠷᠢ ᠶᠢᠨ ᠡᠨᠡ ᠡᠲᠦᠷ ᠢ ᠡᠵᠢ ᠲᠡᠨ ᠤ ᠬᠢᠭᠰᠡᠨ ᠠᠮᠲᠠᠲᠤ ᠬᠤᠭᠤᠯᠠᠨ ᠤ ᠱᠠᠩᠨᠠᠯ ᠲᠠᠢ ᠦᠩᠭᠡᠷᠡᠭᠡᠲᠡᠭ ᠪᠠᠶᠢᠯ᠎ᠠ᠃ ᠡᠨᠡ ᠵᠢᠯ᠂ ᠮᠢᠨᠤ ᠲᠦᠷᠦᠭᠰᠡᠨ ᠡᠲᠦᠷ ᠢ ᠮᠡᠲᠡᠭᠰᠡᠨ ᠨᠠᠶᠢᠵᠢ ᠨᠦᠭᠦᠳ᠂ ᠬᠠᠮᠲᠤ ᠠᠵᠢᠯᠯᠠᠭᠰᠠᠳ᠄ ︽ᠲᠦᠷᠦᠭᠰᠡᠨ ᠡᠲᠦᠷ ᠢᠶᠠᠨ ᠶᠠᠭᠠᠬᠢᠵᠤ ᠪᠡᠯᠡᠭᠯᠡᠬᠦ ᠪᠤᠢ︖︾ ᠭᠡᠵᠤ ᠦᠷᠯᠦᠭᠡ ᠠᠯᠪᠠᠨ ᠭᠡᠷ ᠲᠤ ᠢᠷᠡᠭᠰᠡᠨ ᠠᠴᠠ ᠠᠪᠤᠭᠠᠳ ᠠᠰᠠᠭᠤᠬᠤ ᠪᠠᠷ ᠢᠶᠠᠨ ᠪᠤᠯᠤᠭᠰᠠᠨ᠃ ᠵᠠᠷᠢᠮ ᠨᠢ ᠪᠠᠰᠠ ᠴᠠᠬᠢᠮ ᠮᠡᠲᠡᠭᠡ ᠪᠠᠷ ᠲᠦᠷᠦᠭᠰᠡᠨ ᠡᠲᠦᠷ ᠤᠨ ᠰᠠᠶᠢᠨ ᠰᠠᠶᠢᠬᠠᠨ ᠤ ᠪᠡᠯᠭᠡᠲᠡᠯ ᠢᠶᠠᠨ ᠲᠡᠪᠰᠢᠬᠦᠯᠦᠭᠰᠡᠨ᠃ ᠲᠡᠶᠢᠮᠦ ᠡ᠂ ᠬᠦᠦ ᠴᠢᠨᠢ ᠪᠢ ᠤᠶᠢᠷ᠎ᠠ ᠶᠢᠨ ᠵᠢᠯ ᠬᠦᠷᠲᠡᠯ᠎ᠠ ᠨᠠᠶᠢᠵᠢ ᠨᠦᠬᠦᠳ ᠢᠶᠠᠨ ᠴᠤᠭᠯᠠᠭᠤᠯᠤᠨ ᠲᠦᠷᠦᠭᠰᠡᠨ ᠡᠲᠦᠷ ᠢᠶᠠᠨ ᠪᠡᠯᠡᠭᠯᠡᠵᠦ ᠪᠠᠶᠢᠭᠰᠠᠨ ᠶᠤᠮ᠃      ᠤᠬᠢᠯᠠᠵᠤ ᠪᠠᠶᠠᠷᠯᠠᠵᠤ ᠶᠠᠪᠤᠲᠠᠭ ᠬᠤᠷᠸ᠎ᠠ ᠳᠤ ᠤᠬᠠᠭᠠᠷᠠᠵᠤ ᠰᠡᠭᠡᠭᠡᠷᠡᠵᠦ ᠶᠠᠪᠤᠬᠤ ᠶᠢ ᠲᠡᠭᠡᠲᠦᠯᠡᠲᠡᠭ ᠤᠴᠢᠷ ᠲᠠᠢ᠃ ᠬᠦᠦ ᠴᠢᠨᠢ ᠦᠷ᠎ᠡ ᠲᠠᠢ ᠪᠤᠯᠤᠭᠰᠠᠨ ᠢ ᠰᠤᠨᠤᠰᠤᠭᠠᠳ ᠡᠵᠢ ᠲᠠᠨ ᠤ ᠮᠠᠩᠨᠠᠢ ᠳᠤ ᠰᠠᠭᠤᠭᠰᠠᠨ ᠠᠲᠤᠷᠢᠶ᠎ᠠ ᠠᠴᠠ ᠭᠡᠲᠦ ᠨᠢ ᠠᠷᠴᠢᠭᠲᠠᠭᠰᠠᠨ ᠢ ᠠᠯᠢ ᠬᠤᠶᠢᠨ᠎ᠠ ᠨᠢ ᠰᠠᠶ᠋ᠢ ᠤᠯᠵᠤ ᠮᠡᠲᠡᠵᠡᠢ᠃ ᠡᠵᠢ ᠬᠦᠮᠦᠨ ᠤ ᠠᠭᠤᠤ ᠶᠡᠭᠡ ᠭᠡᠲᠡᠭ ᠢ ᠦᠪᠡᠷ ᠢᠶᠠᠨ ᠦᠷ᠎ᠡ ᠲᠠᠢ ᠪᠤᠯᠤᠭᠠᠳ ᠰᠠᠶ᠋ᠢ ᠤᠬᠠᠭᠠᠷᠠᠭᠰᠠᠨ ᠶᠤᠮ᠃ ᠲᠡᠶᠢᠮᠦ ᠳᠤ ᠪᠠᠨ ᠤᠬᠠᠭᠠᠨ ᠲᠦᠬᠦᠭᠡ ᠦᠭᠡᠢ ᠶᠠᠪᠤᠭᠰᠠᠨ ᠲᠡᠷᠡ ᠤᠯᠠᠨ ᠡᠲᠦᠷ ᠬᠤᠨᠤᠭ ᠢ ᠡᠷᠬᠢᠴᠡᠬᠦᠯᠦᠨ ᠪᠤᠲᠤᠬᠤ ᠳᠤ ᠨᠡᠲᠡ ᠶᠢ ᠤᠬᠠᠭᠠᠨ ᠦᠭᠡᠢ ᠤᠰᠤᠨ ᠲᠡᠨᠡᠭ ᠭᠡᠵᠤ ᠭᠡᠯᠡᠬᠦ ᠳᠤ ᠢᠯᠡᠬᠦᠲᠡᠮᠡᠷ ᠭᠠᠵᠠᠷ ᠦᠭᠡᠢ ᠠᠵᠠᠢ᠃      ᠠᠩᠬ᠎ᠠ ᠲᠤᠮᠲᠠᠲᠤ ᠳᠤ ᠭᠡᠲᠦᠶᠢᠪᠡᠷ ᠮᠢᠨᠤ ᠰᠤᠷᠤᠯᠭ᠎ᠠ ᠲᠤᠰ ᠤᠨ ᠤ ᠲᠦᠷᠪᠡᠨ ᠠᠩᠬᠢ ᠳᠤ ᠪᠠᠨ ᠲᠡᠭᠡᠬᠦᠷ ᠶᠠᠪᠤᠲᠠᠭ ᠴᠦ ︽ᠭᠡᠷᠡᠭ ᠤᠨ ᠲᠦᠷᠦᠬᠦᠦ ᠭᠡᠩᠭᠡᠷᠭᠡᠨ ᠲᠤᠬᠢᠭᠤᠷ︾ ᠭᠡᠵᠤ ᠮᠠᠲᠠ᠃ ᠰᠤᠷᠤᠯᠭ᠎ᠠ ᠰᠠᠶᠢᠨ ᠲᠡᠭᠡᠷ᠎ᠡ ᠪᠠᠨ ᠭᠡᠷᠡᠭ ᠵᠠᠷᠭᠤ ᠲᠠᠲᠠᠲᠠᠭ ᠠᠴᠠ ᠪᠠᠭᠰᠢ ᠨᠠᠷ ᠤᠨ ᠢᠶᠠᠨ ᠲᠤᠯᠤᠭᠠᠢ ᠶᠢᠡᠪᠡᠳᠭᠡᠲᠡᠭ ︽ᠰᠠᠶᠢᠨ ᠡᠷ᠎ᠡ︾ ᠪᠠᠶᠢᠵᠠᠢ᠃ ᠤᠲᠠᠬᠤ ᠦᠭᠡᠢ ᠤᠲᠠᠬᠤ ᠦᠭᠡᠢ ᠭᠡᠷᠡᠭ ᠭᠠᠷᠭᠠᠴᠢᠬᠠᠭᠰᠠᠨ ᠡᠵᠢ ᠲᠡᠨ ᠢᠶᠠᠨ ᠪᠠᠭᠰᠢ ᠪᠠᠷ ᠲᠠᠭᠤᠲᠠᠭᠤᠯᠤᠨ ᠵᠠᠩᠨᠠᠭᠤᠯᠲᠠᠭ ᠪᠠᠶᠢᠭᠰᠠᠨ᠃ ᠠᠩᠬ᠎ᠠ ᠬᠤᠶᠠᠷ ᠤᠨ ᠲᠤᠤᠷ᠎ᠠ ᠬᠤᠭᠤᠴᠠᠭ᠎ᠠ ᠰᠤᠷᠭᠠᠭᠤᠯᠢ ᠡᠬᠢᠯᠡᠭᠡᠳ ᠲᠡᠮᠡᠢ ᠤᠲᠠᠭ᠎ᠠ ᠦᠭᠡᠢ ᠪᠠᠶᠢᠬᠤ ᠳᠤ ᠪᠠᠰᠠ ᠯᠠ ᠪᠦᠲᠦᠬᠦᠨ ᠲᠤᠯᠤᠭᠠᠶᠢᠯᠠᠵᠤ ᠭᠡᠷᠡᠭ ᠲᠠᠲᠠᠴᠢᠬᠠᠯ᠎ᠠ᠃ ᠲᠤᠬᠠᠢ ᠶᠢᠨ ᠦᠶ᠎ᠡ ᠮᠡᠨ ᠤ ᠬᠢᠨᠢ ᠲᠡᠷᠭᠡ ᠤᠨᠤᠭ᠎ᠠ ᠨᠡᠪᠲᠡᠷᠡᠲᠡᠭ ᠦᠭᠡᠢ ᠪᠤᠶᠢᠲᠠ ᠪᠦᠭᠯᠡᠬᠦᠦ ᠠᠭᠤᠯᠠᠨ ᠳᠤ ᠰᠠᠭᠤᠲᠠᠭ᠃ ᠭᠡᠬᠦ ᠳᠤ ᠭᠡᠲᠦᠨ ᠡᠲᠦᠷ ᠪᠤᠯᠤᠯ ᠦᠭᠡᠢ ᠪᠠᠭᠰᠢ ᠨᠠᠲᠠ ᠶᠢ ᠠᠯᠪᠠᠨ ᠭᠡᠷ ᠲᠤ ᠪᠠᠨ ᠲᠠᠭᠤᠲᠠᠬᠤ ᠳᠤ ᠡᠵᠢ ᠲᠡ ᠮᠢᠨᠢ ᠢᠷᠡᠴᠢᠭᠡᠭᠡᠳ ᠪᠠᠶᠢᠯ᠎ᠠ᠃ ᠡᠨᠡᠬᠦ ᠴᠢᠮᠡᠭᠡ ᠶᠢ ᠠᠷᠤ ᠭᠡᠷ ᠲᠤ ᠪᠠᠶᠢᠭ᠎ᠠ ᠡᠵᠢ ᠲᠠᠨ ᠳᠤ ᠶᠠᠭᠠᠬᠢᠵᠤ ᠬᠦᠷᠭᠡᠵᠦ ᠦᠭᠬᠦᠭᠰᠡᠨ ᠢ ᠪᠢ ᠪᠤᠲᠤᠵᠤ ᠤᠯᠤᠭ᠎ᠠ ᠦᠭᠡᠢ᠂ ᠵᠤᠷᠢᠭᠯᠠᠭᠠᠳ ᠠᠰᠠᠭᠤᠵᠤ ᠴᠢᠲᠠᠭ᠎ᠠ ᠦᠭᠡᠢ ᠤᠲᠤ ᠪᠤᠯᠵᠠᠢ᠃ ᠪᠠᠭᠰᠢ ᠶᠢᠨ ᠠᠯᠪᠠᠨ ᠭᠡᠷ ᠲᠤ ᠰᠤᠷᠭᠠᠭᠤᠯᠢ ᠶᠢᠨ ᠵᠠᠬᠢᠷᠤᠯ᠂ ᠠᠩᠬᠢ ᠶᠢᠨ ᠡᠷᠬᠢᠯᠡᠭᠴᠢ ᠪᠦᠷ ᠪᠠᠶᠢᠯᠴᠠᠯ᠎ᠠ᠃ ᠰᠢᠬᠦᠮᠵᠢᠯᠡᠯ ᠠᠷᠤ ᠠᠷᠤ ᠠᠴᠠ ᠪᠠᠨ ᠰᠤᠪᠤᠷᠠᠵᠤ᠂ ᠦᠭᠡᠨ ᠤ ᠲᠤᠰᠤᠯᠲᠠ ᠶᠢᠨ ᠤᠯᠠᠩᠬᠢ ᠨᠢ ᠡᠵᠢ ᠲᠡᠨ ᠠᠴᠠ ᠰᠠᠯᠤᠭ᠎ᠠ ᠦᠭᠡᠢ᠃ ᠲᠡᠭᠡᠬᠦ ᠳᠤ ᠠ ᠦᠰᠦᠭ ᠲᠠᠨᠢᠬᠤ ᠦᠭᠡᠢ ᠡᠵᠢ ᠲᠡ ᠮᠢᠨᠢ ᠄ ︽ᠪᠦᠷ ᠪᠢᠲᠠ ᠭᠡᠤᠭᠡᠳ ᠢᠶᠠᠨ ᠰᠠᠶᠢᠨ ᠰᠤᠷᠭᠠᠭᠰᠠᠨ ᠦᠭᠡᠢ᠂ ᠬᠤᠵᠢᠮ ᠢᠯᠡᠬᠦᠤ ᠰᠠᠶᠢᠨ ᠰᠤᠷᠭᠠᠶ᠎ᠠ︾ ᠭᠡᠵᠤ ᠲᠠᠪᠲᠠᠵᠤ ᠯᠠ ᠪᠠᠶᠢᠯ᠎ᠠ᠃ ᠪᠢ ᠭᠡᠵᠤ ᠡᠶᠢᠮᠦᠷᠬᠦ ᠰᠢᠬᠦᠮᠵᠢᠯᠡᠯ ᠳᠤ ᠲᠠᠳᠴᠢᠬᠠᠭᠰᠠᠨ ᠬᠠᠭᠤᠴᠢᠨ ᠭᠠᠷ ᠶᠤᠮ ᠪᠤᠯᠬᠤᠷ ᠲᠡᠮᠡᠢ ᠯᠠ ᠶᠠᠭᠤᠮ᠎ᠠ ᠪᠤᠯᠭᠠᠭᠰᠠᠨ ᠦᠭᠡᠢ᠃ ᠬᠠᠪᠤᠷ ᠤᠨ ᠲᠦᠯ ᠲᠤᠰᠬᠤ ᠶᠠᠭᠠᠷᠠᠯᠲᠠᠢ ᠴᠠᠭ ᠲᠠᠭᠠᠷᠠᠭᠰᠠᠨ ᠪᠤᠯᠬᠤᠷ ᠡᠵᠢ ᠲᠠ ᠮᠢᠨᠢ ᠲᠠᠷᠤᠶᠢᠬᠠᠨ ᠪᠤᠴᠠᠬᠤ ᠪᠤᠯᠤᠯ᠎ᠠ᠃ ︽ᠬᠦᠦ ᠮᠢᠨᠢ ᠨᠤᠮ ᠢ ᠨᠢ ᠰᠤᠷ᠂ ᠨᠤᠮᠤᠬᠠᠨ ᠢ ᠨᠢ ᠴᠦ ᠰᠤᠷ ᠡ︕ ᠡᠵᠢ ᠨᠢ ᠲᠤᠬᠠᠢ  ᠶᠢᠨ ᠦᠶ᠎ᠡ ᠵᠦᠢᠯ ᠵᠦᠢᠯ ᠤᠨ ᠰᠢᠯᠲᠠᠭᠠᠨ ᠠᠴᠠ ᠪᠤᠯᠵᠤ ᠰᠤᠷᠭᠠᠭᠤᠯᠢ ᠰᠤᠶᠤᠯ ᠤᠨ ᠮᠦᠷ ᠢ ᠬᠦᠭᠡᠭᠡᠵᠦ ᠴᠢᠲᠠᠭ᠎ᠠ ᠦᠭᠡᠢ᠂ ᠮᠠᠨ ᠤ ᠬᠢᠨ ᠠᠴᠠ ᠰᠤᠶᠤᠯ ᠲᠠᠢ ᠮᠡᠲᠡᠯᠭᠡ ᠲᠠᠢ ᠬᠦᠮᠦᠨ ᠭᠠᠷᠬᠤ ᠶᠢ ᠲᠤᠩ ᠬᠦᠰᠡᠲᠡᠭ᠂ ᠡᠵᠢ ᠨᠢ ᠶᠠᠪᠤᠯ᠎ᠠ᠂ ᠪᠠᠭᠰᠢ ᠶᠢᠨ ᠢᠶᠠᠨ ᠦᠭᠡ ᠶᠢ ᠰᠠᠶᠢᠨ ᠰᠤᠨᠤᠰ ᠡ︕︾ ᠭᠡᠳ ᠪᠡᠶ᠎ᠡ ᠡᠷᠬᠢᠬᠦ ᠳᠤᠨᠢ ᠡᠵᠢ ᠲᠠᠨ ᠤ ᠬᠤᠶᠠᠷ ᠨᠢᠲᠦᠨ ᠳᠤ ᠨᠢᠯᠪᠤᠰᠤ ᠮᠡᠯᠲᠡᠭᠡᠨᠡᠵᠦ ᠪᠠᠶᠢᠬᠤ ᠶᠢ ᠪᠢ ᠲᠤᠪ ᠲᠤᠲᠤᠬᠠᠨ ᠤᠯᠵᠤ ᠬᠠᠷᠠᠭᠰᠠᠨ᠃ ᠪᠢ ᠶᠠᠭᠤ ᠴᠦ ᠭᠡᠯᠡᠵᠦ ᠴᠢᠲᠠᠭ᠎ᠠ ᠦᠭᠡᠢ ᠤᠷᠭᠤᠭ᠎ᠠ ᠮᠤᠲᠤ ᠶᠤᠮ ᠰᠢᠭ᠋ ᠬᠦᠲᠡᠯᠦᠯ ᠦᠭᠡᠢ ᠤᠷᠤᠨ ᠳᠤ ᠪᠠᠨ ᠵᠤᠭᠰᠤᠭᠰᠠᠭᠠᠷ ᠬᠤᠴᠤᠷᠤᠭᠰᠠᠨ᠃ ᠠᠮᠢᠲᠤᠷᠠᠯ ᠤᠨ ᠬᠠᠲᠠᠭᠤ ᠪᠡᠷᠭᠡ ᠤᠨ ᠵᠢᠯ ᠤᠳ ᠲᠤ ᠮᠠᠨ  ᠤ ᠠᠬ᠎ᠠ ᠲᠡᠬᠦᠦ ᠲᠦᠷᠪᠡᠬᠦᠯᠡ ᠶᠢ ᠬᠦᠮᠦᠨ ᠤ ᠵᠡᠷᠭᠡ ᠳᠤ ᠬᠦᠷᠭᠡᠬᠦ ᠭᠡᠵᠤ ᠡᠵᠢ ᠮᠢᠨᠢ ᠲᠠ ᠠᠮᠢᠲᠤᠷᠠᠯ ᠳᠤ ᠪᠠᠨ ᠪᠠᠭ᠎ᠠ ᠴᠦ ᠭᠡᠰᠡᠨ ᠨᠡᠮᠡᠬᠦᠷᠢ ᠪᠤᠯᠤᠭᠠᠰᠠᠢ ᠭᠡᠵᠤ ᠨᠠᠮᠤᠷ ᠤᠨ ᠬᠠᠲᠤᠯᠠᠩ ᠪᠤᠯᠬᠤ ᠪᠠᠷ ᠨᠠᠷᠠ ᠪᠢᠲᠡᠬᠦᠦ ᠪᠠᠷ ᠭᠠᠷᠴᠤ ᠨᠠᠷᠠ ᠰᠢᠩᠭᠡᠲᠡᠯ᠎ᠡ ᠪᠠᠨ ᠪᠤᠷᠪᠢ ᠨᠤᠭᠤᠷᠠᠯ ᠦᠭᠡᠢ ᠠᠵᠢᠯᠯᠠᠨ᠂ ᠲᠦᠮᠦᠰᠤ᠂ ᠴᠠᠭᠠᠨ ᠨᠤᠭᠤᠭ᠎ᠠ᠂ ᠯᠤᠤᠪᠠᠩ ᠤᠯᠲᠠᠭ ᠪᠤᠯ ᠢᠮᠠᠭ᠎ᠠ ᠰᠠᠮᠨᠠᠬᠤ ᠤᠯᠠᠷᠢᠯ ᠪᠤᠯᠬᠤ ᠪᠠᠷ ᠲᠦᠷᠪᠡᠨ ᠲᠠᠪᠤᠨ ᠵᠠᠭᠤᠨ ᠢᠮᠠᠭ᠎ᠠ ᠶᠢ ᠪᠠᠷᠤᠭ ᠯᠠ ᠲᠠ ᠭᠠᠭᠴᠠᠭᠠᠷ ᠢᠶᠠᠨ ᠰᠠᠮᠨᠠᠵᠤ ᠲᠠᠭᠤᠰᠬᠤ  ᠳᠤ ᠭᠡᠲᠦᠢ ᠶᠡᠭᠡ ᠶᠠᠲᠠᠷᠠᠵᠤ ᠵᠦᠲᠡᠷᠡᠭᠰᠡᠨ ᠴᠦ ᠨᠢᠯᠪᠤᠰᠤ ᠤᠨᠠᠭᠠᠵᠤ ᠦᠵᠡᠭᠡ ᠦᠭᠡᠢ᠃ ᠡᠵᠢ ᠬᠦᠮᠦᠨ ᠦᠷ᠎ᠡ ᠶᠢᠨ ᠢᠶᠠᠨ ᠲᠦᠯᠦᠭᠡ ᠰᠡᠳᠬᠢᠯ ᠢᠶᠠᠷ ᠤᠨᠠᠲᠠᠭ ᠤᠨ ᠤᠴᠢᠷ ᠢ ᠲᠠᠨ ᠤ ᠨᠢᠯᠪᠤᠰᠤ ᠨᠠᠲᠠ ᠭᠡᠯᠡᠭᠰᠡᠨ ᠪᠢᠯᠡ᠃ ᠮᠥᠨ ᠯᠠ ᠲᠡᠷᠡ ᠦᠶ᠎ᠡ ᠠᠴᠠ ᠡᠬᠢᠯᠡᠨ ᠬᠢᠴᠢᠶᠡᠯ ᠰᠤᠷᠤᠯᠭ᠎ᠠ ᠳᠤ ᠪᠠᠨ ᠰᠢᠮᠲᠠᠨ᠂ ᠰᠤᠶᠤᠯ ᠲᠠᠢ ᠮᠤᠩᠭᠤᠯ ᠪᠤᠯᠬᠤ ᠭᠡᠵᠤ ᠴᠢᠷᠮᠠᠶᠢᠵᠤ ᠡᠬᠢᠯᠡᠭᠰᠡᠨ ᠶᠤᠮ᠃       ᠤᠲᠤ ᠲᠡᠷᠡ ᠦᠶ᠎ᠡ ᠪᠠᠨ ᠡᠷᠬᠢᠴᠡᠬᠦᠯᠦᠨ ᠪᠤᠲᠤᠬᠤ ᠳᠤ ᠡᠵᠢ ᠮᠢᠨᠢ ᠡᠭᠡᠯ ᠵᠢᠷ ᠤᠨ ᠮᠦᠷᠲᠡᠭᠡᠨ ᠠᠭᠤᠤ ᠶᠡᠭᠡ ᠪᠠᠶᠢᠵᠠᠢ᠃ ᠵᠤᠨ ᠤ ᠠᠮᠠᠷᠠᠯᠲᠠ ᠪᠠᠷ ᠤᠨ ᠨᠢᠭᠡᠴᠡ ᠳᠤ ᠪᠠᠨ ᠲᠡᠷᠢᠬᠦᠯᠡᠭᠰᠡᠨ ᠪᠠᠶᠠᠷ ᠤᠨ ᠴᠢᠮᠡᠭᠡ ᠲᠠᠢ ᠬᠠᠷᠢᠬᠤ ᠳᠤ ᠡᠵᠢ ᠲᠠ ᠮᠢᠨᠢ ᠪᠠᠶᠠᠷᠯᠠᠭᠰᠠᠨ ᠭᠡᠲᠡᠭ ᠢ ᠭᠡᠯᠡᠬᠦ ᠶᠢᠨ ᠠᠷᠭ᠎ᠠ ᠦᠭᠡᠢ᠃ ︽ᠮᠢᠨᠤ ᠬᠦᠦ ᠪᠤᠯᠵᠤ ᠪᠠᠶᠢᠨ᠎ᠠ᠂ ᠡᠵᠢ ᠨᠢ ᠴᠢᠨᠤ ᠨᠡᠷ᠎ᠡ ᠶᠢ ᠪᠢᠴᠢᠵᠦ ᠴᠢᠲᠠᠬᠤ ᠪᠤᠯᠤᠭᠰᠠᠨ ᠡ︾ ᠭᠡᠵᠤ ᠮᠤᠰᠢᠭᠠᠢ ᠬᠠᠵᠠᠭᠠᠢ ᠪᠤᠯᠪᠠᠴᠤ ᠵᠦᠪ ᠪᠢᠴᠢᠯ᠎ᠠ᠃ ᠮᠢᠨᠤ ᠴᠡᠭᠡᠵᠢᠯᠡᠵᠦ ᠪᠠᠶᠢᠬᠤ ᠪᠠᠷ ᠲᠠ ᠦᠪᠡᠷ ᠤᠨ ᠨᠡᠷ᠎ᠡ ᠪᠠᠨ ᠴᠦ ᠪᠢᠴᠢᠵᠦ ᠴᠢᠲᠠᠲᠠᠭ ᠦᠭᠡᠢ᠂ ᠭᠡᠬᠦ ᠳᠤ ᠮᠢᠨᠤ ᠨᠡᠷ᠎ᠡ ᠶᠢ ᠲᠠᠨᠢᠵᠤ ᠪᠢᠴᠢᠵᠦ ᠴᠢᠲᠠᠬᠤ ᠪᠤᠯᠤᠭᠰᠠᠨ ᠨᠢ ᠲᠤᠩ ᠭᠠᠶᠢᠬᠠᠯᠲᠠᠢ᠂ ᠴᠠᠭᠠᠨ ᠲᠤᠯᠤᠭᠠᠢ ᠰᠤᠷᠤᠭ᠎ᠠ ᠦᠭᠡᠢ ᠡᠵᠢ ᠲᠠ ᠮᠢᠨᠢ ᠨᠢᠭᠡ ᠦᠰᠦᠭ ᠢ ᠲᠠᠨᠢᠵᠤ ᠪᠢᠴᠢᠵᠦ ᠰᠤᠷᠬᠤ ᠭᠡᠵᠤ ᠭᠡᠲᠦᠢ ᠴᠢᠷᠮᠠᠶᠢᠭᠰᠠᠨ ᠢ ᠪᠢ ᠲᠦᠰᠦᠪᠯᠡᠬᠦᠶ᠎ᠡ ᠪᠡᠷᠭᠡ᠃ ᠡᠵᠢ ᠲᠠᠨ ᠤ ᠦᠷ᠎ᠡ ᠪᠠᠨ ᠭᠡᠰᠡᠨ ᠬᠠᠶᠢᠷ᠎ᠠ ᠨᠠᠲᠠ ᠳᠤ ᠲᠤᠩ ᠶᠡᠭᠡ ᠢᠲᠡᠭᠡᠯ ᠬᠦᠴᠦᠨ ᠢ ᠤᠯᠭᠤᠭᠰᠠᠨ ᠶᠤᠮ᠃       ᠡᠵᠢ ᠡ᠂ ᠤᠲᠤ ᠲᠠ ᠮᠢᠨᠢ ᠵᠢᠷᠡ ᠶᠢᠨ ᠲᠠᠪᠠᠭ᠎ᠠ ᠶᠢ ᠲᠠᠪᠠᠨ ᠲᠠᠰ ᠬᠠᠷ᠎ᠠ ᠦᠰᠦᠨ ᠳᠤ ᠴᠢᠨᠢ ᠮᠦᠩᠬᠦᠨ ᠬᠢᠷᠠᠭᠤ ᠤᠨᠠᠵᠤ ᠪᠤᠭᠤᠷᠤᠯᠲᠠᠯ᠎ᠠ᠃ ᠭᠡᠬᠦ ᠳᠤ ᠭᠤᠴᠢᠨ ᠵᠢᠯ ᠤᠨ ᠡᠮᠦᠨᠡᠬᠢ ᠲᠡᠨ ᠤ ᠮᠢᠨᠢ ᠦᠷ᠎ᠡ ᠠᠴᠠ ᠪᠠᠨ ᠨᠢᠭᠤᠵᠤ ᠤᠨᠠᠭᠠᠭᠰᠠᠨ ᠨᠢᠯᠪᠤᠰᠤ ᠨᠡᠲᠡ ᠳᠤ ᠲᠤᠩ ᠶᠡᠭᠡ ᠨᠦᠯᠦᠭᠡ ᠪᠤᠯᠵᠤ᠂ ᠬᠦᠦ ᠴᠢᠨᠢ ᠤᠲᠤ ᠬᠦᠮᠦᠨ ᠤ ᠠᠮᠢᠲᠤᠷᠠᠯ ᠤᠨ ᠲᠡᠷᠲᠡᠩ ᠵᠠᠮ ᠢᠶᠠᠷ ᠲᠠᠨ ᠤ ᠪᠠᠨ ᠪᠢᠴᠢᠵᠦ ᠴᠢᠲᠠᠲᠠᠭ  ᠭᠠᠭᠴᠠᠬᠠᠨ ᠦᠰᠦᠭ ᠢ ᠴᠢᠨᠢ ᠭᠤᠲᠤᠭᠠᠯ ᠦᠭᠡᠢ ᠱᠠᠩᠨᠠᠯ ᠬᠦᠬᠢᠬᠦᠯᠦᠯ ᠤᠨ ᠲᠡᠪᠲᠡᠷ ᠢᠶᠠᠷ ᠮᠢᠯᠢᠶᠠᠯᠭᠠᠵᠤ᠂ ᠲᠦᠮᠡᠨ ᠤ ᠲᠤᠮᠲᠠ ᠪᠠᠨ ᠪᠡᠶ᠎ᠡ ᠪᠡᠷᠲᠡᠮ ᠰᠡᠳᠬᠢᠯ ᠬᠠᠩᠬᠤᠯᠠᠭᠤᠨ ᠶᠠᠪᠤᠨ᠎ᠠ ᠁       ᠡᠨᠡ ᠬᠤᠷᠸ᠎ᠠ ᠳᠤ ᠪᠢ ᠤᠬᠢᠯᠡᠨ ᠪᠠᠶᠢᠵᠤ ᠡᠵᠢ ᠲᠠᠨ ᠤ ᠪᠠᠨ ᠤᠤᠭᠠᠨ ᠬᠦᠦ ᠨᠢ ᠪᠤᠯᠵᠤ ᠵᠠᠶᠠᠭᠠᠭᠰᠠᠨ ᠨᠢ ᠠᠵᠠ ᠶᠢᠨ ᠲᠡᠭᠷᠢ ᠨᠠᠲᠠ ᠶᠢ ᠢᠪᠡᠭᠡᠵᠡᠢ᠃ ᠲᠡᠷᠡ ᠵᠢᠯ ᠤᠨ ᠲᠡᠷᠡ ᠮᠦᠴᠡ ᠳᠤ᠂ ᠡᠵᠢ ᠮᠢᠨᠢ ᠲᠠ ᠦᠷ᠎ᠡ ᠲᠠᠢ ᠪᠤᠯᠬᠤ ᠭᠡᠵᠤ ᠡᠨᠡᠯᠦᠨ ᠵᠤᠪᠠᠵᠤ ᠶᠠᠪᠤᠭᠰᠠᠨ ᠪᠤᠯ ᠲᠡᠬᠦᠨ ᠠᠴᠠ ᠬᠤᠶᠢᠰᠢ ᠲᠡᠷᠡ ᠡᠲᠦᠷ ᠨᠢ ᠮᠢᠨᠤ ᠲᠦᠷᠦᠭᠰᠡᠨ ᠡᠲᠦᠷ ᠤᠨ ᠪᠠᠶᠠᠷ ᠪᠤᠯᠵᠤ ᠲᠡᠮᠲᠡᠭᠯᠡᠭᠲᠡᠨ ᠪᠡᠯᠡᠭᠯᠡᠭᠲᠡᠬᠦ ᠪᠤᠯᠤᠭᠰᠠᠨ ᠪᠠᠶᠢᠯ᠎ᠠ᠃ ᠡᠨᠡ ᠵᠢᠯ ᠪᠢ ᠲᠦᠷᠦᠭᠰᠡᠨ ᠡᠲᠦᠷ ᠤᠨ ᠪᠠᠶᠠᠷ ᠢᠶᠠᠨ ᠪᠡᠯᠡᠭᠯᠡᠭᠡ ᠦᠭᠡᠢ᠂ ᠬᠠᠷᠢᠨ ᠪᠢᠷ ᠴᠠᠭᠠᠰᠤ ᠪᠠᠨ ᠭᠠᠷᠭᠠᠨ ᠪᠤᠭᠤᠷᠤᠯ ᠡᠵᠢ ᠲᠡᠨ ᠳᠤ ᠪᠠᠨ ᠡᠨᠡᠬᠦ ᠵᠡᠬᠢᠶ᠎ᠡ ᠶᠢ ᠪᠢᠴᠢᠨ ᠲᠦᠷᠦᠭᠰᠡᠨ ᠡᠲᠦᠷ ᠢᠶᠠᠨ ᠲᠡᠮᠲᠡᠭᠯᠡᠨ ᠦᠩᠭᠡᠷᠡᠭᠡᠵᠦ ᠪᠠᠶᠢᠭ᠎ᠠ ᠨᠢ ᠡᠨᠡ ᠠᠵᠠᠢ᠃ ᠬᠦᠦ ᠴᠢᠨᠢ ᠪᠢ ᠲᠦᠴᠢ ᠦᠩᠭᠡᠷᠡᠭᠡᠳ ᠤᠷᠤᠶᠢᠲᠡᠨ ᠤᠬᠠᠭᠠᠷᠠᠵᠤ ᠪᠠᠶᠢᠭ᠎ᠠ ᠳᠤ ᠡᠵᠢ ᠮᠢᠨᠢ ᠲᠠ ᠠᠭᠤᠴᠢᠯᠠᠬᠤ ᠪᠤᠯᠪᠠᠤ︖       ᠪᠤᠷᠬᠠᠨ ᠰᠢᠲᠦᠲᠡᠭ ᠦᠭᠡᠢ ᠨᠠᠲᠡ ᠳᠤ ᠪᠠᠨ ᠪᠤᠷᠬᠠᠨ ᠪᠤᠯᠵᠤ ᠰᠢᠲᠦᠭᠲᠡᠭᠰᠡᠨ ᠪᠤᠭᠤᠷᠤᠯ ᠡᠵᠢ ᠮᠢᠨᠢ᠂ ᠦᠷ᠎ᠡ ᠶᠢᠨ ᠢᠶᠠᠨ ᠰᠠᠶᠢᠨ ᠢᠶᠠᠷ ᠦᠲᠡᠯᠡᠭᠡ ᠨᠠᠰᠤ ᠴᠢᠨᠢ ᠵᠤᠯ ᠵᠢᠷᠭᠠᠯ ᠲᠠᠢ ᠪᠠᠶᠢᠬᠤ ᠶᠢ ᠬᠦᠰᠡᠨ ᠵᠦᠩᠨᠡᠶ᠎ᠡ᠃      ᠡᠵᠢ ᠮᠢᠨᠢ ᠲᠠ ᠤᠷᠲᠤ ᠨᠠᠰᠤᠯᠠᠵᠤ ᠤᠲᠠᠭᠠᠨ ᠵᠢᠷᠭᠠᠭᠠᠷᠠᠢ︕                ᠪᠠᠶᠠᠷᠲᠡᠢ                       ᠡᠬᠦᠨ᠎ᠡ᠄ ᠮᠡᠬᠦᠰ ᠬᠦᠦ ᠴᠢᠨᠢ ᠪᠦᠭᠡ ᠠᠴᠠ ᠮᠡᠨᠲᠦᠴᠢᠯᠡᠨ ᠶᠤᠰᠤᠯᠠᠪᠠ                                  2015 ᠤᠨ ᠤ   8 ᠰᠠᠷ᠎ᠠ ᠶᠢᠨ 1 ᠤ ᠡᠲᠦᠷ               ᠪᠠ᠊ ᠪᠦᠬᠡ ᠶᠢᠨ ︽ᠬᠠᠶᠢᠷ᠎ᠠ ᠪᠠᠷ ᠢᠪᠢᠯᠬᠦ ᠬᠤᠷᠸ᠎ᠠ︾ ᠭᠡᠬᠦ ᠮᠡᠳᠡᠭᠡᠯᠡᠯ ᠤᠨ ᠤᠷᠠᠨ ᠵᠤᠬᠢᠶᠠᠯ ᠤᠨ ᠲᠡᠭᠦᠪᠦᠷᠢ ᠠᠴᠠ ᠪᠠᠭᠤᠯᠭᠠᠪᠠ 
ᠢᠷᠡᠯᠲᠡ᠄ ᠤᠷᠠᠳ ᠤᠨ ᠲᠤᠮᠳᠠᠳᠤ ᠬᠤᠰᠢᠭᠤᠨ ᠤ ᠵᠠᠰᠠᠭ ᠤᠨ ᠤᠷᠳᠤᠨ ᠤ ᠮᠤᠩᠭᠤᠯ ᠰᠦᠯᠵᠢᠶ᠎ᠡ