ᠰᠤᠮᠤᠨ ᠤ ᠨᠠᠮ ᠤᠨ ᠬᠤᠷᠢᠶᠠᠨ ᠤ ᠱᠦᠵᠢ  — ᠬᠡᠷᠡᠯᠳᠦ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2022/4/7
      ᠦᠷᠭᠡᠨ ᠲᠠᠷᠲᠠᠩ ᠬᠠᠶᠢᠷ ᠲᠡᠪᠢᠰᠦᠭᠰᠡᠨ ᠵᠠᠮ ᠢᠶᠠᠷ ᠴᠠᠭᠠᠨ ᠦᠩᠭᠡ ᠶᠢᠨ ᠵᠢᠵᠢᠭ ᠮᠠᠰᠢᠨ ᠠᠭᠤᠯᠠᠨ ᠠᠮᠠ ᠶᠢᠨ ᠵᠠᠮ ᠢᠶᠠᠷ ᠲᠠᠪᠬᠢᠨ ᠭᠠᠷᠴᠤ ᠢᠷᠡᠯ᠎ᠠ᠃ ᠡᠮᠦᠨ᠎ᠡ ᠡᠲᠦᠷ ᠨᠢ ᠰᠢᠷᠦᠬᠦᠨ ᠪᠤᠷᠤᠭᠠᠨ ᠴᠢᠳᠬᠤᠯᠠᠭᠰᠠᠨ ᠢᠶᠠᠷ ᠦᠨᠦᠲᠦᠷ ᠦᠷᠯᠦᠭᠡ ᠶᠢᠨ ᠠᠭᠤᠷ ᠠᠮᠢᠰᠬᠤᠯ ᠤᠨᠴᠠᠭᠠᠢ ᠴᠢᠬᠢᠭᠯᠢᠭ ᠰᠠᠶᠢᠬᠠᠨ ᠪᠠᠶᠢᠵᠤ᠂ ᠪᠤᠷᠤᠪᠲᠤᠷ ᠴᠢᠷᠠᠢ ᠲᠠᠢ᠂ ᠬᠠᠷ᠎ᠠ ᠨᠢᠲᠦᠨ ᠰᠢᠯ ᠵᠡᠬᠦᠭᠰᠡᠨ ᠲᠦᠴᠢ ᠭᠠᠷᠤᠢ ᠨᠠᠰᠤᠨ ᠤ ᠡᠷ᠎ᠡ᠄       ︿︿  ᠴᠡᠩᠭᠡᠷ ᠴᠡᠩᠭᠡᠷ ᠡᠬᠦᠯᠡᠨ ᠠᠴᠠ ᠨᠢ       ᠴᠢᠬᠢᠭ ᠬᠤᠷ᠎ᠠ ᠨᠢ ᠤᠷᠤᠲᠠᠭ ᠶᠤᠮ ᠬᠦ᠋       ᠴᠢᠩ ᠴᠦ ᠰᠡᠳᠬᠢᠯ ᠨᠢ ᠵᠠᠩ ᠢᠶᠠᠷ ᠢᠶᠠᠨ ᠪᠠᠶᠢᠪᠠᠯ       ᠴᠢᠭᠯᠡᠭᠡᠳ ᠢᠷᠡᠲᠡᠭ ᠶᠤᠮ ᠬᠦ᠋﹀﹀ ᠭᠡᠵᠤ ᠪᠠᠭ᠎ᠠ ᠮᠠᠰᠢᠨ ᠢᠶᠠᠨ ᠪᠠᠷᠢᠬᠤ ᠶᠢᠨ ᠲᠠᠭᠠᠤ ᠳᠠᠭᠤᠯᠠᠴᠢᠬᠠᠭᠰᠠᠨ ᠶᠠᠪᠤᠨ᠎ᠠ᠃ ᠲᠡᠭᠡᠬᠦ ᠳᠤ ᠡᠰᠡᠷᠬᠦ ᠲᠠᠯ᠎ᠠ ᠠᠴᠠ ᠨᠢ ᠬᠠᠷ᠎ᠠ ᠦᠩᠭᠡ ᠶᠢᠨ ᠭᠡᠭᠡᠷᠡᠯᠠᠨ ᠲᠠᠪᠬᠢᠬᠤ ᠮᠠᠰᠢᠨ ᠭᠠᠷᠴᠤ ᠢᠷᠡᠬᠦ ᠳᠤ ᠬᠤᠶᠠᠷ ᠮᠠᠰᠢᠨ ᠡᠰᠡᠷᠬᠦᠯᠡᠨ ᠵᠤᠭᠰᠤᠯ᠎ᠠ᠃     —— ᠭᠡ᠊ ᠱᠦᠵᠢ ᠰᠠᠶᠢᠨ ᠤᠤ︖ ᠲᠠᠶᠠᠭᠠᠷ ᠰᠠᠶᠢᠨ ᠪᠠᠶᠢᠨ᠎ᠠ ᠤᠤ︖  ᠡᠶᠢᠮᠦ ᠡᠷᠲᠡ ᠲᠠᠨᠠᠷ ᠶᠠᠭᠤ ᠭᠡᠵᠤ ᠶᠠᠭᠠᠷᠠᠵᠤ ᠶᠠᠪᠤᠨ᠎ᠠ︖ ᠭᠡᠵᠤ ᠪᠤᠶᠠᠨᠲᠤ ᠮᠠᠰᠢᠨ ᠠᠴᠠ ᠪᠠᠨ ᠪᠠᠭᠤᠨ ᠮᠠᠨᠲᠦᠴᠢᠯᠠᠯ᠎ᠠ᠃      —— ᠰᠠᠶᠢᠨ ᠰᠠᠶᠢᠨ᠂ ᠰᠠᠶᠢᠨ ᠤᠤ︖ ᠦᠴᠦᠭᠡᠲᠦᠷ ᠤᠨ ᠪᠤᠷᠤᠭᠠᠨ ᠰᠠᠶᠢᠨ ᠤᠷᠤᠭᠰᠠᠨ ᠤᠤ︖      ᠠᠭᠤᠯᠠᠨ ᠤ ᠦᠶᠡᠷ ᠶᠡᠭᠡ ᠪᠠᠭᠤᠯ᠎ᠠ᠂ ᠵᠠᠮ ᠶᠠᠮᠠᠷ ᠪᠤᠯᠤᠭᠰᠠᠨ ᠪᠤᠯ︖ ᠪᠤᠷᠤᠭᠠᠨ ᠳᠤ ᠮᠠᠯᠴᠢᠳ ᠤᠨ ᠪᠠᠶᠢᠰᠢᠩ ᠬᠠᠰᠢᠶ᠎ᠠ ᠶᠠᠭᠠᠬᠢᠵᠤ ᠪᠠᠶᠢᠭ᠎ᠠ ᠪᠤᠯᠪᠠᠤ ᠭᠡᠲᠡᠭ ᠢ ᠦᠵᠡᠬᠦ  ᠭᠡᠵᠤ ᠡᠷᠲᠡᠯᠡᠨ ᠶᠠᠪᠤᠭ᠎ᠠ ᠨᠢ ᠡᠨᠡ᠃      ᠨᠢᠲᠦᠨ ᠰᠢᠯ ᠲᠠᠢ᠂ ᠲᠠᠰ ᠬᠠᠷ᠎ᠠ ᠬᠦᠮᠦᠰᠭᠡ ᠲᠠᠢ᠂ ᠦᠷᠭᠡᠨ ᠰᠢᠭ ᠴᠢᠷᠠᠢ ᠲᠠᠢ᠂ ᠮᠢᠬ᠎ᠠ ᠮᠠᠷᠢᠶ᠎ᠠ ᠨᠢ ᠲᠡᠩᠴᠡᠭᠰᠡᠨ ᠲᠡᠭᠰᠢᠭᠡᠨ ᠰᠠᠶᠢᠬᠠᠨ ᠪᠡᠶ᠎ᠡ ᠲᠠᠢ᠂ ᠡᠶᠢᠮᠦ ᠡᠷᠲᠡ ᠢᠩᠬᠢᠵᠦ ᠶᠠᠭᠠᠷᠠᠵᠤ ᠶᠠᠪᠤᠭ᠎ᠠ ᠡᠨᠡ ᠬᠦᠮᠦᠨ ᠢ ᠭᠡᠷᠡᠯᠲᠦ ᠭᠡᠲᠡᠭ᠃ ᠬᠤᠯᠤᠰᠤᠲᠠᠢ ᠰᠤᠮᠤᠨ ᠤ ᠨᠠᠮ ᠤᠨ ᠬᠤᠷᠢᠶᠠᠨ ᠤ ᠱᠦᠵᠢ ᠶᠢᠨ ᠲᠤᠰᠢᠶᠠᠯ ᠲᠠᠢ᠂ ᠲᠦᠴᠢᠨ ᠭᠡᠲᠦᠲᠡᠢ ᠬᠢᠯᠠᠷᠠᠭᠰᠠᠨ ᠡᠷ᠎ᠡ ᠡ᠃      —— ᠪᠤᠷᠤᠭᠠᠨ ᠰᠠᠶᠢᠨ ᠤᠷᠤᠯ᠎ᠠ᠂ ᠡᠨᠡ ᠬᠠᠪᠤᠷ ᠤᠨ ᠰᠠᠶᠢᠬᠠᠨ ᠨᠠᠷᠠᠨ ᠳᠤ ᠤᠲᠠᠬᠤ ᠦᠭᠡᠢ ᠨᠢᠯᠬ᠎ᠠ ᠡᠪᠡᠰᠤ ᠰᠤᠭᠤᠷᠠᠵᠤ ᠤᠷᠭᠤᠬᠤ ᠪᠠᠶᠢᠬ᠎ᠠ ᠳ᠋ᠠ᠃  ᠵᠠᠮ ᠴᠦ ᠶᠡᠭᠡ ᠰᠠᠶᠢᠨ ᠪᠠᠶᠢᠨ᠎ᠠ᠃      —— ᠲᠠᠪᠠᠭᠠᠨ ᠤ ᠵᠠᠮ ᠦᠶᠡᠷ ᠲᠤ ᠡᠪᠲᠡᠭᠲᠡᠭᠰᠡᠨ ᠦᠭᠡᠢ ᠪᠤᠯ ᠪᠤᠰᠤᠳ ᠭᠡᠰᠡᠭ ᠨᠢ ᠠᠰᠠᠭᠤᠲᠠᠯ ᠦᠭᠡᠢ ᠪᠠᠶᠢᠬᠤ ᠶᠤᠰᠤᠲᠠᠢ᠃      ——  ᠰᠠᠨᠠᠭ᠎ᠠ ᠵᠤᠪᠠᠭᠰᠠᠨ ᠤ ᠭᠡᠷᠡᠭ ᠠᠯᠠᠭ᠎ᠠ᠂ ᠲᠦᠷᠦᠬᠦᠤ ᠭᠡᠲᠦᠨ ᠵᠢᠯ ᠪᠠᠶᠢᠭᠰᠠᠨ ᠪᠤᠯ ᠡᠶᠢᠮᠦ ᠰᠢᠷᠦᠬᠦᠨ ᠪᠤᠷᠤᠭᠠᠨ ᠳᠤ ᠲᠠᠪᠠᠭᠠᠨ ᠤ ᠵᠠᠮ ᠮᠠᠰᠢᠨ ᠶᠠᠪᠤᠬᠤ ᠶᠢ ᠪᠤᠤ ᠭᠡᠯᠡ ᠶᠠᠪᠠᠭᠠᠨ ᠶᠠᠪᠤᠬᠤ ᠳᠤ ᠴᠦ ᠬᠦᠴᠢᠷ ᠪᠠᠶᠢᠲᠠᠭ ᠢ ᠲᠠ ᠰᠠᠶᠢᠨ ᠮᠠᠲᠠᠨ᠎ᠠ᠂ ᠤᠲᠤ ᠴᠦ ᠲᠡᠷᠡ ᠪᠦᠬᠦᠨ ᠲᠡᠤᠭᠡ ᠪᠤᠯᠵᠠᠢ᠃      —— ᠵᠠ ᠵᠠ᠂ ᠲᠡᠭᠡᠪᠡᠯ ᠶᠡᠭᠡ ᠰᠠᠶᠢᠨ ᠪᠠᠶᠢᠨ᠎ᠠ᠂ ᠲᠡᠭᠡᠪᠡᠯ ᠪᠢᠲᠠ ᠶᠠᠪᠤᠶ᠎ᠠ᠂ ᠤᠴᠢᠷ ᠪᠠᠶᠢᠪᠠᠯ ᠤᠲᠠᠰᠤ ᠪᠠᠷ ᠬᠠᠷᠢᠯᠴᠠᠵᠤ ᠪᠠᠶᠢᠶ᠎ᠠ᠂ ᠪᠠᠶᠡᠷᠲᠡᠢ᠃ ᠭᠡᠳ ᠰᠤᠮᠤᠨ ᠤ ᠭᠡᠲᠦᠬᠦᠯᠡ ᠮᠠᠰᠢᠨ ᠳᠠᠭᠠᠨ ᠭᠠᠷᠴᠤ ᠠᠭᠤᠯᠠᠨ ᠵᠢᠯᠠᠭ᠎ᠠ ᠤᠷᠤᠭᠤ ᠰᠤᠨᠤᠯᠵᠠᠭᠰᠠᠨ ᠵᠠᠮ ᠢᠶᠠᠷ ᠲᠠᠪᠬᠢᠵᠦ ᠤᠲᠤᠯ᠎ᠠ᠃ᠬᠠᠨᠠᠷᠠᠨ ᠬᠦᠭᠯᠡᠷᠡᠭᠰᠡᠨ ᠬᠠᠯᠢᠯ ᠬᠠᠲᠠ ᠲᠡᠭᠷᠢ ᠪᠠᠭᠠᠨᠠᠲᠠᠵᠤ᠂ ᠤᠮᠤᠭᠲᠤ ᠪᠦᠷᠬᠦᠳ ᠤᠨ ᠵᠢᠬᠦᠷ ᠢ ᠴᠦ ᠬᠤᠭᠤᠯᠴᠢᠮᠠᠷ ᠰᠠᠨᠠᠭᠲᠠᠨ᠎ᠠ᠃ ᠪᠤᠯᠠᠭ ᠲᠠᠢ ᠤᠰᠤ ᠲᠠᠢ ᠪᠠᠶᠢᠭᠰᠠᠨ ᠭᠤᠤᠯ ᠠᠯᠢ ᠭᠡᠲᠦᠶᠢᠨᠢ ᠬᠠᠲᠠᠨ ᠰᠢᠷᠬᠢᠵᠦ ᠰᠢᠷ᠎ᠠ ᠰᠠᠶᠢᠷ ᠦᠯᠡᠲᠡᠵᠦ᠂ ᠦᠶᠡᠷ ᠤᠨ ᠵᠠᠮ ᠪᠤᠯᠵᠠᠢ᠃ ᠭᠤᠤᠯ ᠤᠨ ᠬᠤᠶᠠᠷ ᠬᠦᠪᠡᠭᠡᠨ ᠤ ᠭᠡᠰᠡᠭ ᠪᠤᠰᠤᠭ ᠨᠤᠭᠤᠭᠠᠨ ᠵᠦᠯᠭᠡ ᠠᠮᠢᠵᠢᠷᠠᠯ ᠤᠨ ᠬᠦᠴᠦᠨ ᠢᠶᠠᠨ ᠠᠯᠲᠠᠵᠤ᠂ ᠦᠷᠭᠡᠨ ᠰᠢᠭ ᠭᠠᠵᠠᠷ ᠨᠢ ᠲᠡᠷᠭᠡᠨ ᠵᠠᠮ ᠵᠤᠷᠠᠶᠢᠵᠤ ᠬᠠᠷᠠᠭᠲᠠᠨ᠎ᠠ᠃ ᠰᠢᠷ᠎ᠠ ᠰᠠᠶᠢᠷ ᠤᠨ ᠭᠤᠤᠯ  ᠢᠶᠠᠷ ᠬᠤᠨᠢᠨ ᠴᠢᠨᠡᠭᠡᠨ ᠦᠭᠡᠷ ᠤᠨ ᠴᠢᠨᠡᠭᠡᠨ ᠬᠦᠭᠡ ᠴᠢᠯᠠᠭᠤ ᠠᠲᠡ ᠲᠡᠨᠲᠡ ᠦᠭᠡᠢ ᠲᠦᠩᠬᠦᠶᠢᠵᠦ᠂ ᠬᠤᠶᠠᠷ ᠲᠠᠯ᠎ᠠ ᠶᠢᠨ ᠠᠭᠤᠯᠠᠨ ᠠᠴᠠ ᠦᠩᠭᠦᠷᠢᠲᠦᠨ ᠪᠠᠭᠤᠭᠰᠠᠨ ᠬᠠᠲᠠ ᠴᠢᠯᠠᠭᠤ ᠵᠠᠷᠢᠮ ᠭᠡᠰᠡᠭ ᠰᠢᠷ᠎ᠠ ᠰᠠᠶᠢᠷ ᠢ ᠦᠵᠡᠭᠲᠡᠬᠦ ᠦᠭᠡᠢ ᠪᠤᠯᠲᠠᠯ᠎ᠠ ᠲᠠᠷᠤᠭᠲᠠᠵᠠᠢ᠃ ᠡᠨᠡ ᠭᠠᠵᠠᠷ ᠢ ᠬᠤᠶᠠᠷ ᠪᠤᠭᠲᠠ ᠶᠢᠨ ᠠᠮᠠ ᠭᠡᠲᠡᠭ᠃       ᠡᠪᠦᠯ ᠤᠨ ᠡᠲᠦᠷ ᠭᠡᠵᠤ ᠦᠨᠡᠨ ᠤᠬᠤᠷ ᠠᠵᠠᠢ᠂ ᠨᠢᠲᠦ ᠢᠷᠮᠡᠬᠦ ᠶᠢᠨ ᠵᠠᠭᠤᠷ᠎ᠠ ᠲᠡᠭᠷᠢ ᠲᠦᠬᠦᠷᠡᠩ ᠤᠲᠤᠨ ᠮᠡᠴᠢᠳ ᠲᠦᠭᠡᠭᠡᠴᠢᠭᠰᠡᠨ ᠪᠠᠶᠢᠯ᠎ᠠ᠃ ᠡᠪᠦᠯ  ᠤᠨ ᠡᠬᠢᠨ ᠰᠠᠷ᠎ᠠ ᠶᠢᠨ ᠲᠡᠭᠷᠢ ᠭᠡᠵᠤ ᠬᠦᠪᠦᠩ ᠬᠤᠪᠴᠠᠰᠤ ᠡᠮᠦᠰᠦᠭᠰᠡᠨ ᠴᠦ ᠪᠡᠶ᠎ᠡ ᠴᠡᠴᠡᠷᠡᠵᠦ᠂ ᠭᠠᠷ ᠪᠡᠭᠡᠷᠡᠬᠦ ᠨᠢ ᠬᠠᠯᠠᠲᠠᠢ᠃      —— ᠵᠠ ᠤᠲᠤ ᠨᠢᠭᠡ ᠦᠵᠡᠶ᠎ᠡ  ᠪᠢ ᠯᠠᠪᠠᠷ ᠢᠶᠠᠨ ᠲᠤᠤᠭᠠᠷᠤᠭᠤᠯᠬᠤ ᠳᠤ ᠴᠢ ᠲᠦᠯᠬᠢᠭᠡᠷᠡᠢ︕      —— ᠵᠠ ᠭᠡᠳ ᠬᠤᠷᠢ ᠯᠠ ᠰᠠᠶ᠋ᠢ ᠦᠩᠭᠡᠷᠡᠵᠦ ᠪᠠᠶᠢᠭ᠎ᠠ ᠲᠦᠯᠦᠪᠲᠡᠢ ᠦᠨᠲᠦᠷ ᠪᠡᠶᠡᠷᠭᠡᠭ ᠵᠠᠯᠠᠭᠤ ᠬᠠᠷᠢᠭᠤ ᠦᠴᠢᠯ᠎ᠡ᠃       ᠠᠴᠢᠶ᠎ᠠ ᠬᠦᠨᠲᠦ ᠮᠠᠰᠢᠨ ᠬᠠᠷ᠎ᠠ ᠤᠲᠤᠭ᠎ᠠ ᠪᠠᠭᠠᠬᠢᠭᠤᠯᠤᠨ ᠤᠭᠰᠢᠵᠤ ᠠᠪᠤᠭᠰᠠᠨ ᠢᠶᠠᠨ ᠲᠤᠷᠤᠭᠰᠢ ᠯᠠᠭ ᠭᠡᠲᠡᠯ᠎ᠡ ᠰᠠᠭᠤᠵᠤ᠂ ᠭᠡᠢ ᠡᠷᠬᠢᠯᠲᠦᠭᠰᠡᠨ ᠬᠦᠷᠲᠦ  ᠶᠢ ᠨᠢ ᠲᠠᠭᠠᠯᠲᠤᠨ ᠤᠰᠤ ᠮᠦᠰᠤ ᠠᠷᠤ ᠠᠴᠠ ᠨᠢ ᠲᠦᠯᠬᠢᠭᠡ ᠡᠷ᠎ᠡ ᠶᠢ ᠵᠠᠶᠢᠯᠠᠵᠤ ᠵᠠᠪᠲᠤᠬᠤ ᠠᠴᠠ ᠡᠮᠦᠨ᠎ᠡ ᠦᠪᠴᠢ ᠪᠡᠶ᠎ᠡ ᠶᠢ ᠨᠤᠷᠭᠠᠵᠤ ᠠᠮᠵᠢᠯ᠎ᠠ᠃ ᠬᠦᠪᠡᠭᠡᠨ  ᠠᠴᠠ ᠪᠠᠨ ᠡᠬᠢᠯᠡᠵᠦ ᠢᠷᠮᠡᠭᠯᠡᠨ ᠬᠦᠯᠲᠡᠭᠰᠡᠨ ᠭᠤᠤᠯ ᠤᠨ ᠮᠦᠰᠤ ᠠᠴᠢᠶ᠎ᠠ ᠬᠦᠨᠲᠦ ᠮᠠᠰᠢᠨ ᠤ ᠬᠤᠶᠢᠲᠦ ᠬᠦᠷᠲᠦ ᠨᠢ ᠲᠤᠭᠤᠯᠵᠤ ᠠᠮᠵᠢᠭ᠎ᠠ ᠦᠭᠡᠢ ᠳᠤᠨᠢ ᠴᠦᠮᠦᠷᠡᠭᠰᠡᠨ ᠪᠠᠶᠢᠵᠠᠢ᠃      —— ᠡᠨᠡ ᠰᠦᠨᠢ ᠴᠦ ᠬᠤᠶᠠᠭᠤᠯᠠ ᠪᠠᠨ ᠦᠢᠯᠡ ᠪᠠᠨ ᠦᠵᠡᠬᠦ ᠡ ᠭᠡᠳ ᠪᠤᠶᠠᠨᠲᠤ ᠮᠠᠰᠢᠨ ᠠᠴᠠ ᠪᠠᠨ ᠡᠷᠬᠦᠬᠦᠷ ᠢᠶᠠᠨ ᠠᠪᠤᠭᠠᠳ ᠦᠰᠦᠷᠦᠨ ᠪᠠᠭᠤᠯ᠎ᠠ᠃ ᠮᠠᠰᠢᠨ ᠤ ᠲᠤᠭᠤᠤᠷ ᠱᠠᠭᠠᠶᠢᠬᠤ ᠳᠤ ᠬᠤᠶᠢᠲᠦ ᠬᠤᠶᠠᠷ ᠬᠦᠷᠲᠦ ᠨᠢ ᠪᠦᠷ ᠮᠦᠰᠤᠨ ᠳᠤ ᠤᠨᠠᠵᠤ᠂ ᠲᠡᠩᠭᠡᠯᠢᠭ ᠨᠢ ᠭᠤᠤᠯ ᠤᠨ ᠬᠦᠪᠡᠭᠡᠨ ᠳᠤ ᠲᠡᠩᠨᠡᠭᠲᠡᠭᠰᠡᠨ ᠠᠴᠠ ᠬᠤᠶᠠᠷ ᠬᠦᠷᠲᠦ ᠨᠢ ᠬᠤᠭᠤᠰᠤᠨ ᠡᠷᠬᠢᠬᠦ ᠠᠴᠠ ᠴᠠᠭᠠᠰᠢ ᠦᠭᠡᠢ ᠪᠤᠯᠴᠢᠬᠠᠭᠰᠠᠨ ᠪᠠᠶᠢᠪᠠ᠃ ᠬᠤᠶᠠᠭᠤᠯᠠ ᠡᠷᠬᠦᠬᠦᠷ ᠢᠶᠠᠨ ᠲᠤᠬᠢᠷᠠᠭᠤᠯᠵᠤ ᠲᠠᠯᠪᠢᠭᠠᠳ ᠪᠤᠶᠠᠨᠲᠤ ᠶᠠᠰᠤ ᠶᠠᠩᠬᠢᠨᠠᠮ᠎ᠠ ᠭᠤᠤᠯ ᠤᠨ ᠤᠰᠤᠨ ᠳᠤ ᠤᠷᠤᠯ᠎ᠠ᠃ ᠲᠠᠭᠠᠵᠤ ᠶᠠᠪᠤᠭ᠎ᠠ ᠲᠠᠭᠤ ᠴᠦᠭᠡᠨ ᠲᠠᠢ ᠵᠢᠭᠠᠬᠠᠨ ᠵᠠᠯᠠᠭᠤ ᠶᠡᠭᠡ ᠪᠠᠭ᠎ᠠ ᠴᠢᠯᠠᠭᠤ ᠶᠢ ᠲᠡᠬᠦᠨ ᠠᠪᠴᠢᠷᠠᠵᠤ ᠬᠦᠷᠲᠦᠨ ᠤ ᠬᠢᠨᠢ ᠲᠤᠭᠤᠤᠷ ᠬᠢᠵᠦ᠂ ᠬᠤᠶᠠᠭᠤᠯᠠ ᠭᠡᠴᠢᠨᠡᠨ ᠬᠦᠴᠦᠯᠡᠭᠰᠡᠨ ᠴᠦ ᠮᠠᠰᠢᠨ ᠢᠶᠠᠨ ᠭᠠᠷᠭᠠᠵᠤ ᠴᠢᠲᠠᠭ᠎ᠠ ᠦᠭᠡᠢ᠃        —— ᠵᠢᠭᠠᠬᠠᠨ ᠵᠠᠯᠠᠭᠤ ᠶᠠᠲᠠᠷᠠᠯ᠎ᠠ ᠪᠢᠵᠠ︖ ᠨᠠᠭᠠᠰᠢ ᠪᠠᠨ ᠰᠠᠭᠤ᠂ ᠲᠦᠷ ᠠᠮᠠᠷᠠᠭᠠᠳ ᠲᠡᠬᠢᠨ ᠤᠷᠤᠯᠲᠤᠵᠤ ᠦᠵᠡᠶ᠎ᠡ ᠭᠡᠳ ᠲᠠᠮᠠᠬᠢ ᠪᠠᠨ ᠭᠠᠷᠭᠠᠨ ᠬᠤᠶᠠᠭᠤᠯᠠ ᠪᠠᠨ ᠲᠠᠮᠠᠬᠢᠯᠠᠯ᠎ᠠ᠃      —— ᠠᠶᠢᠯ ᠤᠨ ᠠᠬ᠎ᠠ ᠡ᠂ ᠤᠤᠯ ᠨᠢ ᠲᠡᠭᠡᠭᠡᠳ ᠮᠦᠨ ᠡᠶᠢᠮᠦ ᠵᠠᠮ ᠲᠠᠢ ᠪᠠᠶᠢᠭᠰᠠᠨ ᠤᠤ︖      —— ᠶᠡᠭᠡᠴᠤᠤᠯ ᠤᠨ ᠭᠡᠯᠡᠬᠦ ᠪᠠᠷ᠂ ᠲᠡᠷᠡ ᠦᠶ᠎ᠡ ᠳᠤ ᠭᠤᠯᠢᠷ ᠪᠤᠲᠠᠭ᠎ᠠ᠂ ᠠᠮᠢᠲᠤᠷᠠᠯ ᠤᠨ ᠡᠳ᠋ᠯᠡᠯ ᠭᠡᠷᠡᠭᠰᠡᠯ ᠢᠶᠠᠨ ᠲᠡᠮᠡᠭᠡ  ᠪᠠᠷ ᠲᠡᠭᠡᠭᠡᠲᠡᠭ ᠪᠠᠶᠢᠭᠰᠠᠨ᠂ ᠡᠪᠡᠰᠤ ᠪᠤᠷᠲᠤᠭ᠎ᠠ ᠬᠤᠲᠠᠯᠲᠤᠨ ᠠᠪᠬᠤ ᠶᠢ ᠮᠡᠲᠡᠲᠡᠭ ᠦᠭᠡᠢ ᠪᠠᠶᠢᠯ᠎ᠠ᠂ ᠰᠡᠬᠦᠯᠡᠷ ᠨᠢ ᠮᠤᠷᠢᠨ ᠬᠠᠰᠠᠭ ᠲᠦᠩᠭᠡᠭᠡᠳ ᠶᠠᠪᠤᠬᠤ ᠲᠠᠢ ᠪᠤᠯᠤᠭᠰᠠᠨ᠃ ᠬᠤᠷ᠎ᠠ ᠲᠤᠨᠤᠲᠠᠰᠤᠨ ᠤ ᠴᠦᠭᠡᠷᠡᠬᠦ ᠶᠢ ᠲᠠᠭᠠᠯᠲᠤᠨ ᠬᠦᠮᠦᠰ ᠰᠠᠶ᠋ᠢ ᠡᠪᠡᠰᠤ ᠪᠤᠷᠲᠤᠭ᠎ᠠ ᠠᠪᠬᠤ ᠪᠤᠯᠤᠭᠰᠠᠨ ᠢᠶᠠᠷ ᠵᠠᠮ ᠴᠢᠬᠤᠯᠠ ᠲᠠᠢ ᠪᠤᠯᠵᠤ᠂ ᠡᠨᠡ ᠵᠠᠮ ᠰᠤᠮᠤ᠂ ᠭᠠᠴᠠᠭ᠎ᠠ᠂ ᠠᠷᠠᠳ ᠤᠳ ᠵᠢᠯ ᠵᠢᠯ ᠵᠠᠰᠠᠲᠠᠭ ᠴᠦ ᠦᠶᠠᠷ ᠤᠨ ᠵᠠᠮ ᠲᠠᠭᠠᠤ ᠵᠠᠰᠠᠭᠰᠠᠨ ᠪᠤᠯᠬᠤᠷ ᠠᠮᠢ ᠨᠠᠰᠤ ᠨᠢ ᠤᠬᠤᠷ ᠪᠠᠶᠢᠲᠠᠭ᠃ ᠬᠡᠵᠢᠶ᠎ᠠ ᠨᠢᠭᠡ ᠰᠠᠶᠢᠬᠠᠨ ᠵᠠᠮ  ᠲᠠᠢ ᠪᠤᠯᠪᠠᠯ ᠪᠢᠲᠡ ᠴᠦ ᠲᠡᠬᠢᠨ ᠢᠩᠬᠢᠵᠦ ᠦᠢᠯᠡ ᠪᠠᠨ ᠪᠠᠷᠠᠵᠤ ᠦᠰᠤ ᠪᠠᠨ ᠲᠤᠭᠠᠯᠠᠬᠤ ᠭᠡᠷᠡᠭ ᠦᠭᠡᠢ ᠪᠤᠯᠴᠢᠬᠠᠨ᠎ᠠ᠃      —— ᠲᠡᠭᠡᠭᠡᠳ ᠶᠠᠭᠤ ᠭᠡᠵᠤ ᠵᠡᠬᠦᠨ ᠵᠠᠮ ᠢᠶᠠᠷ ᠲᠡᠭᠡᠭᠡᠬᠦ ᠦᠭᠡᠢ ᠶᠤᠮ ᠳ᠋ᠠ︖      —— ᠵᠡᠬᠦᠨ ᠵᠠᠮ ᠨᠢ ᠭᠡᠲᠦ ᠲᠤᠭᠤᠷᠢᠭᠤ᠂ ᠪᠠᠷᠤᠭ ᠬᠤᠶᠠᠷ ᠵᠠᠭᠤ ᠭᠠᠷᠤᠢ ᠢᠯᠡᠬᠦᠦ ᠶᠠᠪᠤᠨ᠎ᠠ᠂ ᠵᠠᠮ ᠵᠠᠭᠤᠷ᠎ᠠ ᠡᠯᠡᠰᠤ ᠶᠡᠭᠡᠲᠡᠢ ᠲᠡᠭᠡᠷ᠎ᠡ ᠪᠠᠨ ᠡᠩᠬᠦᠯ ᠲᠤᠩᠬᠤᠯ ᠠᠷᠪᠢᠨ᠂ ᠲᠡᠷᠡ ᠮᠦᠷᠲᠡᠭᠡᠨ ᠡᠨᠡ ᠵᠢᠯ ᠤᠨ ᠪᠠᠶᠢᠲᠠᠯ ᠢᠶᠠᠷ ᠦᠵᠡᠬᠦ ᠳᠤ ᠤᠤᠯ ᠰᠤᠮᠤᠨ ᠤ ᠵᠡᠬᠦᠨ ᠲᠠᠯ᠎ᠠ ᠶᠢᠨ ᠦᠷᠭᠡᠨ ᠰᠠᠶᠢᠷ ᠢ ᠦᠩᠭᠡᠷᠡᠨ᠎ᠡ ᠭᠡᠲᠡᠭ ᠴᠢᠨᠢ ᠪᠠᠶᠢᠲᠠᠭ ᠦᠭᠡᠢ ᠭᠡᠷᠡᠭ᠃ ᠵᠠ᠂ ᠤᠲᠤ ᠬᠤᠶᠠᠭᠤᠯᠠ ᠪᠠᠨ ᠨᠢᠭᠡ ᠤᠬᠠᠭᠠᠨ ᠭᠠᠷᠭᠠᠵᠤ ᠦᠵᠡᠶ᠎ᠡ ᠭᠡᠳ ᠦᠨᠲᠡᠰᠬᠢᠨ ᠪᠤᠰᠤᠯ᠎ᠠ᠃    ᠬᠤᠶᠠᠭᠤᠯᠠ ᠴᠠᠭ ᠭᠠᠷᠤᠢ ᠤᠷᠤᠯᠲᠤᠭᠠᠳ ᠵᠦᠭ ᠭᠠᠷᠤᠭ᠎ᠠ ᠦᠭᠡᠢ᠂ ᠵᠢᠭᠠᠬᠠᠨ ᠵᠠᠯᠠᠭᠤ ᠴᠦ ᠶᠠᠲᠠᠷᠠᠵᠤ ᠵᠦᠲᠡᠷᠡᠬᠦ ᠶᠢᠨ ᠲᠡᠭᠡᠷ᠎ᠡ ᠦᠯᠦᠰᠴᠤ ᠤᠮᠲᠠᠭᠠᠰᠬᠤ ᠲᠠᠪᠬᠤᠴᠠᠭᠰᠠᠨ ᠠᠴᠠ ᠦᠴᠦᠭᠡᠨ ᠴᠦ ᠲᠡᠮᠢᠷ ᠲᠡᠩᠭᠡᠭᠡ ᠦᠭᠡᠢ ᠪᠤᠯᠵᠠᠢ᠃     —— ᠬᠤᠶᠠᠭᠤᠯᠠ ᠡᠨᠡ ᠰᠦᠨᠢ ᠴᠦ ᠬᠦᠲᠡᠭᠡ ᠬᠤᠨᠤᠬᠤ ᠨᠢ᠂ ᠵᠠ ᠶᠠᠭᠠᠬᠢᠬᠤᠪ ᠪᠤᠢ᠂ ᠴᠢ ᠵᠢᠭᠠᠠᠬᠨ ᠲᠦᠯᠦᠭᠡ ᠮᠤᠲᠤ ᠲᠡᠬᠦᠭᠡᠳ ᠢᠷ᠎ᠡ᠂ ᠲᠦᠲᠡᠭ ᠨᠤᠴᠤᠭᠠᠵᠤ ᠲᠤᠯᠠᠭᠠᠴᠠᠬᠤ ᠦᠭᠡᠢ ᠪᠤᠯ ᠬᠤᠶᠠᠭᠤᠯᠠ ᠮᠦᠰᠤ ᠪᠤᠯᠤᠨ᠎ᠠ ᠳ᠋ᠠ︕ ᠭᠡᠳ ᠭᠠᠷ ᠭᠡᠷᠡᠯᠲᠦᠬᠦᠯᠦᠭᠴᠢ ᠪᠠᠨ ᠦᠭᠬᠦᠯ᠎ᠡ᠃     ᠬᠠᠭᠤᠷᠠᠢ ᠲᠦᠯᠡᠭᠡ ᠲᠦᠷᠡᠯᠵᠡᠨ ᠠᠰᠠᠵᠤ᠂ ᠬᠠᠲᠠᠭᠰᠠᠨ ᠬᠤᠵᠤᠤᠯ᠎ᠠ ᠶᠢᠨ ᠲᠠᠰ ᠨᠢᠰ ᠭᠡᠵᠤ ᠦᠰᠤᠷᠦᠭᠰᠠᠨ ᠴᠤᠭ ᠨᠢᠭᠤᠷ ᠴᠢᠷᠠᠢ ᠳᠤ ᠬᠦᠷᠬᠦᠯᠡᠷ ᠪᠠᠭ᠎ᠠ ᠵᠢᠮᠵᠢᠬᠢᠨᠡᠨ ᠡᠪᠡᠳᠭᠡᠨ᠎ᠡ᠃ ᠰᠦᠨᠢ ᠲᠤᠮᠲᠠ ᠦᠩᠭᠡᠷᠡᠵᠦ ᠪᠠᠶᠢᠭᠰᠠᠨ ᠢᠶᠠᠷ ᠬᠦᠢᠲᠡᠨ ᠭᠡᠲᠡᠭ ᠨᠢ ᠠᠷᠭ᠎ᠠ ᠦᠭᠡᠢ᠂ ᠲᠦᠲᠡᠭ ᠭᠠᠯ ᠳᠠᠭᠠᠨ ᠠᠯᠢ ᠪᠤᠯᠬᠤ ᠪᠠᠷ ᠤᠶᠢᠷᠠᠲᠤᠵᠤ ᠰᠠᠭᠤᠨ᠎ᠠ᠃ ᠪᠤᠶ᠋ᠨᠨᠲᠤ ᠮᠠᠰᠢᠨ ᠳᠠᠭᠠᠨ ᠪᠠᠶᠢᠭᠰᠠᠨ ᠪᠤᠤᠪᠤ᠂ ᠬᠦᠯᠲᠡᠬᠦ ᠰᠢᠬᠠᠭᠰᠠᠨ ᠯᠤᠩᠬᠤ ᠲᠠᠢ ᠤᠰᠤ ᠪᠠᠨ ᠭᠠᠷᠭᠠᠨ ᠬᠤᠶᠠᠭᠤᠯᠠ ᠲᠦᠩᠭᠡᠰᠬᠢᠭᠡᠳ  ᠦᠯ ᠢᠶᠠᠨ ᠲᠠᠷᠤᠯ᠎ᠠ᠃     —— ᠤᠲᠤ ᠬᠤᠶᠠᠷ ᠭᠤᠷᠪᠠᠨ ᠴᠠᠭ ᠪᠤᠯᠪᠠᠯ ᠦᠷ ᠴᠠᠶᠢᠴᠢᠬᠠᠨ᠎ᠠ᠃ ᠲᠡᠭᠡᠪᠡᠯ ᠨᠢᠭᠡ ᠠᠷᠭ᠎ᠠ ᠤᠯᠲᠠᠨ᠎ᠠ᠃ ᠲᠠᠭᠠᠷᠠᠵᠤ ᠪᠠᠶᠢᠪᠠᠯ ᠴᠠᠭᠠᠲᠤᠬᠢ ᠬᠤᠵᠤᠤᠯ᠎ᠠ ᠪᠠᠨ ᠬᠢᠴᠢᠭᠡ᠃     —— ᠲᠠ ᠤᠤᠯ ᠨᠢ ᠢᠩᠬᠢᠵᠦ ᠬᠦᠲᠡᠭᠡ ᠬᠤᠨᠤᠵᠤ ᠪᠠᠶᠢᠭᠰᠠᠨ ᠤᠤ︖     —— ᠡᠶᠢᠮᠦ ᠤᠴᠢᠷ ᠵᠦᠩᠲᠡᠭᠡᠨ ᠭᠠᠷᠤᠨ᠎ᠠ᠃ ᠬᠤᠲᠠᠯ ᠭᠡᠯᠡᠬᠦ ᠶᠤᠮ ᠪᠤᠯ ᠡᠨᠡ ᠵᠠᠮ ᠲᠠᠭᠡᠷ᠎ᠡ ᠨᠠᠰᠤᠨ ᠠᠴᠠ ᠪᠠᠨ ᠤᠯᠠᠨ ᠬᠤᠨᠤᠭᠰᠠᠨ ᠪᠠᠶᠢᠬ᠎ᠠ᠃ ᠵᠤᠨ ᠳᠠᠭᠠᠨ ᠪᠤᠯ ᠶᠠᠭᠠᠬᠢᠬᠤ ᠪᠤᠢ ᠭᠠᠶᠢᠭᠤᠢ ᠳ᠋ᠠ᠂ ᠡᠪᠤᠯ ᠳᠡᠭᠡᠨ ᠬᠠᠯᠠ ᠲᠠᠢ ᠪᠠᠶᠢᠲᠠᠭ ᠨᠢ ᠭᠡᠴᠡᠭᠦᠦ᠃     ᠬᠦᠯᠢᠶᠡᠭᠰᠡᠨ ᠬᠦᠮᠦᠨ ᠳᠤ ᠴᠠᠭ ᠤᠲᠠᠭᠠᠨ ᠭᠡᠭᠴᠢ ᠦᠨᠡᠨ ᠦᠭᠡ ᠪᠠᠶᠢᠵᠠᠢ᠃ ᠵᠢᠭᠠᠬᠠᠨ ᠵᠠᠯᠠᠭᠤ ᠭᠡᠳᠡᠭ ᠵᠡᠬᠦᠷᠮᠡᠭᠯᠡᠨ ᠭᠡᠰᠡᠭ ᠲᠠᠭᠠᠷᠠᠨ ᠰᠡᠷᠠᠵᠤ ᠦᠤᠷ ᠴᠠᠶᠢᠬᠤ ᠶᠢ ᠬᠦᠯᠢᠶᠡᠵᠦ ᠶᠠᠲᠠᠨ᠎ᠠ᠃ ᠭᠡᠲᠦᠢ ᠤᠲᠠᠭᠰᠠᠨ ᠢ ᠪᠤᠤ ᠮᠡᠲᠡ᠂ ᠠᠭᠤᠯᠠᠨ ᠲᠤᠯᠤᠭᠠᠢ ᠪᠦᠷᠲᠦᠯᠵᠡᠨ ᠶᠠᠭᠤ ᠴᠦ ᠭᠡᠰᠡᠨ ᠦᠤᠷ ᠭᠡᠭᠡᠷᠡᠵᠦ ᠡᠬᠢᠯᠡᠯ᠎ᠡ᠃ ᠪᠦᠬᠦᠯᠢ ᠰᠦᠨᠢ ᠨᠤᠶᠢᠷ ᠦᠭᠡᠢ ᠦᠩᠭᠡᠷᠡᠭᠡᠭᠰᠡᠨ ᠬᠤᠶᠠᠭᠤᠯᠠ ᠲᠦᠬᠦᠷᠡᠩ ᠮᠠᠰᠢᠨ ᠠᠴᠢᠭᠰᠡᠨ ᠪᠤᠷᠲᠤᠭ᠎ᠠ ᠪᠠᠨ ᠰᠢᠭᠤᠳᠠᠢ ᠰᠢᠭᠤᠳᠠᠢ ᠪᠠᠷ ᠪᠠᠭᠤᠯᠭᠠᠵᠤ ᠪᠠᠶᠢᠬᠤ ᠳᠤ ᠭᠠᠴᠠᠭᠠᠨ ᠤ ᠱᠦᠵᠢ ᠭᠡᠰᠢᠭᠲᠦ ᠬᠤᠶᠠᠷ ᠬᠦᠮᠦᠨ ᠲᠠᠭᠠᠭᠤᠯᠤᠨ ᠪᠤᠷᠲᠤᠭ᠎ᠠ ᠲᠡᠭᠡᠭᠡᠬᠦ ᠪᠠᠷ ᠪᠠᠭᠤᠵᠤ ᠢᠷᠡᠬᠦ ᠲᠠᠢ ᠲᠠᠭᠠᠷᠠᠯᠲᠤᠵᠠᠢ᠃ ᠲᠡᠲᠡ ᠭᠤᠷᠪᠠᠭᠤᠯᠠ ᠶᠠᠲᠠᠷᠠᠵᠤ ᠵᠦᠲᠡᠷᠡᠭᠰᠡᠨ ᠬᠤᠶᠠᠭᠤᠯᠠ ᠶᠢ ᠬᠠᠪᠰᠤᠷᠤᠨ ᠭᠡᠰᠡᠭ ᠪᠤᠷᠲᠤᠭ᠎ᠠ ᠶᠢ ᠪᠠᠭᠤᠯᠭᠠᠭᠰᠠᠨ ᠤ ᠲᠠᠷᠠᠭ᠎ᠠ ᠮᠠᠰᠢᠨ ᠢᠶᠠᠷ ᠮᠦᠰᠤᠨ ᠳᠤ ᠤᠨᠠᠭᠰᠠᠨ ᠮᠠᠰᠢᠨ ᠢ ᠨᠢ ᠲᠠᠲᠠᠵᠤ ᠭᠠᠷᠭᠠᠯ᠎ᠠ᠃      —— ᠲᠠ ᠭᠡᠲᠦᠬᠦᠯᠡ ᠢᠷᠡᠭᠰᠡᠨ ᠨᠢ ᠰᠠᠶᠢᠨ ᠪᠤᠯᠤᠯ᠎ᠠ᠂ ᠦᠭᠡᠢ ᠶᠤᠮ ᠪᠤᠯ ᠬᠤᠶᠠᠭᠤᠯᠠ ᠪᠠᠭ᠎ᠠ ᠦᠲᠡ ᠪᠤᠯᠬᠤ ᠳᠤ ᠴᠦ ᠭᠠᠷᠭᠠᠵᠤ ᠲᠡᠶᠢᠯᠬᠦ ᠦᠭᠡᠢ ᠪᠠᠶᠢᠬ᠎ᠠ ᠳ᠋ᠠ ᠭᠡᠵᠤ ᠪᠤᠶᠠᠨᠲᠤ ᠪᠠᠶᠠᠷᠯᠠᠨ ᠭᠡᠯᠡᠯ᠎ᠠ᠃      —— ᠵᠠ ᠵᠠ᠂ ᠮᠠᠨᠤᠰ ᠴᠦ ᠡᠷᠲᠡᠭᠡᠨ ᠵᠠᠮ ᠳᠠᠭᠠᠨ ᠤᠷᠤᠶ᠎ᠠ᠂ ᠴᠠᠭᠠᠰᠢ ᠨᠢ ᠠᠰᠠᠭᠤᠲᠠᠯ ᠦᠭᠡᠢ ᠭᠡᠳ ᠭᠡᠲᠦᠬᠦᠯᠡ ᠵᠠᠮ ᠵᠠᠮ ᠳᠠᠭᠠᠨ ᠤᠷᠤᠯ᠎ᠠ᠃       ᠡᠨᠡᠬᠦ ᠠᠭᠤᠯᠠᠨ ᠵᠠᠮ ᠨᠢ ᠠᠷᠪᠠᠨ ᠲᠤᠯᠤᠭᠠᠨ ᠨᠤᠭᠤᠯᠤᠭ᠎ᠠ ᠲᠠᠢ ᠪᠠᠶᠢᠵᠤ᠂ ᠪᠦᠬᠦ ᠤᠷᠲᠤ ᠨᠢ ᠠᠷᠪᠠᠨ ᠬᠤᠶᠠᠷ ᠭᠤᠷᠪᠠᠨ ᠺᠢᠯᠤᠮᠧᠲᠷ ᠤᠷᠲᠤ ᠪᠠᠶᠢᠲᠠᠭ᠃ ᠬᠤᠶᠠᠷ ᠪᠤᠭᠲᠠ ᠶᠢᠨ ᠠᠮᠠ ᠪᠠᠷ ᠲᠤᠲᠤᠭᠰᠢ ᠪᠠᠨ ᠶᠠᠪᠤᠭᠠᠳ ᠬᠠᠨ ᠠᠭᠤᠯᠠ ᠤᠰᠤᠨ ᠴᠦᠬᠦᠷᠦᠮ ᠢ ᠦᠩᠭᠡᠷᠡᠭᠰᠡᠭᠡᠷ ᠲᠠᠩᠨᠠᠬᠦᠯ ᠤᠨ ᠭᠤᠤᠯ ᠳᠤ ᠬᠦᠷᠲᠡᠭ᠃ ᠡᠨᠡ ᠭᠤᠤᠯ ᠳᠤ ᠲᠡᠭᠡᠷ᠎ᠡ ᠭᠠᠷᠠᠭ ᠤᠨ ᠡᠮᠦᠨ᠎ᠡ ᠡᠪᠡᠰᠤ ᠲᠡᠭᠡᠭᠡᠭᠰᠡᠨ ᠮᠠᠰᠢᠨ ᠰᠢᠬᠢᠳᠴᠦ᠂ ᠬᠤᠶᠠᠷ ᠮᠠᠰᠢᠨ ᠢᠶᠠᠷ ᠲᠠᠲᠠᠭᠤᠯᠵᠤ ᠪᠠᠶᠢᠮᠠᠨᠵᠢᠨ ᠰᠠᠶ᠋ᠢ ᠭᠠᠷᠤᠭᠰᠠᠨ᠃ ᠲᠡᠭᠡᠭᠡᠳ ᠲᠤᠬᠠᠢ ᠶᠢᠨ ᠭᠠᠵᠠᠷ ᠤᠨ ᠮᠠᠯᠴᠢᠳ ᠬᠤᠭᠤᠰᠤᠨ ᠮᠠᠰᠢᠨ ᠪᠠ ᠪᠠᠭ᠎ᠠ ᠠᠴᠢᠶᠠᠲᠡᠢ ᠮᠠᠰᠢᠨ ᠢᠶᠠᠷ ᠭᠡᠲᠦ ᠤᠲᠠᠭ᠎ᠠ ᠲᠤᠭᠤᠯᠤᠭᠤᠯᠵᠤ ᠲᠠᠷᠤᠰᠢᠭᠤᠯᠤᠭᠰᠠᠨ  ᠢᠶᠠᠷ ᠶᠠᠪᠤᠵᠤ ᠪᠤᠯᠬᠤ ᠪᠤᠯᠵᠠᠢ ᠁      2013 ᠤᠨ ᠳᠤ᠂ ᠬᠤᠯᠤᠰᠤᠲᠠᠢ ᠰᠤᠮᠤᠨ ᠤ ᠨᠠᠮ ᠤᠨ ᠬᠤᠷᠢᠶᠠᠨ ᠤ ᠱᠦᠵᠢ ᠭᠡᠷᠡᠯᠲᠦ᠂ ᠰᠤᠮᠤᠨ ᠲᠠᠷᠤᠭ᠎ᠠ ᠮᠠᠯᠴᠢᠨᠬᠦᠦ ᠪᠠᠷ ᠲᠤᠯᠤᠭᠠᠶᠢᠯᠠᠭᠤᠯᠤᠭᠰᠠᠨ ᠰᠢᠨ᠎ᠡ ᠨᠢᠭᠡ ᠬᠤᠭᠤᠴᠠᠭᠠᠨ ᠤ ᠤᠲᠤᠷᠢᠳᠬᠤ ᠪᠠᠭ ᠨᠢ ᠲᠤᠬᠠᠢ ᠶᠢᠨ ᠭᠠᠵᠠᠷ ᠤᠨ ᠠᠵᠤ ᠠᠬᠤᠢ ᠶᠢᠨ ᠬᠦᠭᠵᠢᠯᠲᠡ᠂ ᠠᠷᠠᠳ ᠤᠨ ᠠᠮᠢᠲᠤᠷᠠᠯ ᠤᠨ ᠰᠠᠶᠢᠵᠢᠷᠠᠯᠲᠠ  ᠶᠢ ᠨᠦᠯᠦᠭᠡᠯᠡᠵᠦ ᠪᠠᠶᠢᠬᠤ ᠵᠠᠮ ᠬᠠᠷᠢᠯᠴᠠᠭ᠎ᠠ ᠲᠦᠬᠦᠮ ᠦᠭᠡᠢ ᠠᠰᠠᠭᠤᠲᠠᠯ ᠢ ᠰᠢᠢᠳᠪᠦᠷᠢᠯᠠᠬᠦ ᠶᠢᠨ ᠲᠤᠰᠠᠲᠠ᠂ ᠭᠡᠲᠦ ᠤᠲᠠᠭᠠᠨ ᠤ ᠶᠠᠷᠢᠯᠴᠡᠨ ᠰᠤᠲᠤᠯᠬᠤ ᠬᠤᠷᠠᠯ  ᠢ ᠬᠢᠵᠦ᠂ ᠬᠠᠩᠭᠠᠢ ᠨᠤᠲᠤᠭ ᠤᠨ 1500 ᠭᠠᠷᠤᠢ ᠮᠠᠯᠴᠢᠨ ᠲᠦᠮᠡᠨ ᠵᠠᠮ ᠲᠠᠢ ᠪᠤᠯᠬᠤ ᠬᠦᠰᠡᠯ ᠵᠡᠬᠦᠲᠦ ᠶᠢ ᠲᠡᠷᠭᠡᠯᠰᠢᠬᠦᠯᠬᠦ ᠪᠠᠷ ᠬᠤᠰᠢᠭᠤᠨ ᠤ ᠵᠠᠮ ᠬᠠᠷᠢᠯᠴᠠᠭᠠᠨ ᠤ ᠲᠤᠪᠴᠢᠶ᠎ᠡ᠂ ᠵᠠᠰᠠᠮᠠᠯ ᠵᠠᠮ ᠤᠨ ᠰᠠᠯᠪᠤᠷᠢ ᠳᠤ ᠬᠦᠷᠴᠦ ᠪᠠᠶᠢᠲᠠᠯ ᠤᠨ ᠬᠠᠷᠢᠭᠤ ᠮᠡᠲᠡᠬᠦᠯᠦᠯᠲᠡ ᠬᠢᠵᠦ ᠲᠡᠲᠡᠨ ᠤ ᠲᠡᠮᠵᠢᠯᠭᠡ ᠶᠢ ᠬᠦᠰᠡᠯ᠎ᠠ᠃       —— ᠬᠤᠯᠤᠰᠤᠲᠠᠢ ᠰᠤᠮᠤᠨ ᠤ ᠬᠠᠩᠭᠠᠢ ᠨᠤᠲᠤᠭ ᠭᠡᠲᠡᠭ ᠨᠢ ᠤᠤᠯ ᠤᠨ ᠬᠠᠩᠭᠠᠶᠢᠭᠤᠪᠢ ᠰᠤᠮᠤ ᠶᠢᠨ ᠨᠤᠲᠤᠭ ᠲᠡᠪᠢᠰᠭᠡᠷ ᠢ ᠵᠢᠭᠠᠵᠤ᠂ ᠶᠡᠷᠦᠩᠭᠡᠢ ᠲᠠᠯᠠᠪᠠᠢ ᠨᠢ 156 ᠲᠦᠮᠡᠨ ᠮᠤ᠋᠂ 580 ᠡᠷᠦᠭᠡ ᠮᠠᠯᠴᠢᠳ ᠠᠲᠡ ᠠᠵᠤ ᠲᠦᠷᠦᠨ ᠠᠮᠢᠲᠤᠷᠠᠵᠤ ᠪᠠᠶᠢᠲᠠᠭ᠃ ᠲᠤᠰ ᠭᠠᠵᠠᠷ ᠤᠷᠤᠨ ᠨᠢ ᠵᠡᠬᠦᠨ ᠲᠠᠯ᠎ᠠ ᠪᠠᠷ ᠢᠶᠠᠨ ᠤᠩᠭᠤᠨ ᠪᠠᠯᠭᠠᠰᠤ ᠲᠠᠢ ᠬᠦᠷᠰᠢᠯᠠᠵᠤ᠂ ᠡᠮᠦᠨ᠎ᠡ ᠲᠠᠯ᠎ᠠ ᠪᠠᠷ ᠬᠤᠶᠠᠷ ᠪᠤᠭᠲᠠ ᠶᠢᠨ ᠠᠭᠤᠯᠠ ᠪᠠᠷ ᠬᠦᠷᠢᠶᠠᠯᠡᠭᠲᠡᠨ᠂ ᠪᠠᠷᠠᠭᠤᠨ ᠲᠠᠯ᠎ᠠ ᠪᠠᠷ ᠤᠷᠠᠳ ᠤᠨ ᠬᠤᠶᠢᠲᠤ ᠬᠤᠰᠢᠭᠤ ᠲᠠᠢ ᠵᠬᠠᠯᠠᠨ᠂ ᠤᠮᠠᠷᠠᠰᠢ ᠴᠤᠩᠵᠢ ᠪᠠᠯᠭᠠᠰᠤ ᠲᠠᠢ ᠬᠠᠶᠠᠭ᠎ᠠ ᠨᠡᠶᠢᠯᠡᠵᠦ ᠪᠠᠶᠢᠲᠠᠭ᠃ ᠠᠲᠡᠬᠢ ᠮᠠᠯᠴᠢᠳ ᠲᠤᠰ ᠭᠠᠵᠠᠷ ᠤᠷᠤᠨ ᠠᠴᠠ ᠭᠠᠲᠠᠭᠰᠢ ᠭᠠᠷᠬᠤ  ᠳᠤ ᠤᠩᠭᠤᠨ ᠪᠠᠯᠭᠠᠰᠤ ᠪᠠᠷ ᠲᠡᠮᠵᠢᠨ ᠬᠤᠰᠢᠭᠤᠨ ᠲᠦᠪ ᠬᠦᠷᠬᠦ ᠪᠤᠶᠤ ᠬᠤᠶᠠᠷ ᠪᠤᠭᠲᠠ ᠶᠢᠨ ᠠᠮᠠ ᠪᠠᠷ ᠭᠠᠷᠬᠤ ᠬᠤᠶᠠᠷᠬᠠᠨ ᠵᠠᠮ ᠲᠠᠢ ᠪᠠᠶᠢᠵᠤ᠂ ᠬᠤᠶᠠᠷ ᠪᠤᠭᠲᠠ ᠶᠢᠨ ᠠᠮᠠ ᠶᠢ ᠳᠤᠬᠠᠢ ᠶᠢᠨ ᠭᠠᠵᠠᠷ ᠤᠨ ᠮᠠᠯᠴᠢᠳ《 ᠠᠮᠢᠨ ᠰᠤᠲᠠᠰᠤ 》ᠭᠡᠲᠡᠭ ᠪᠠᠶᠢᠨ᠎ᠠ᠃ ᠲᠤᠰ《 ᠠᠮᠢᠨ ᠰᠤᠲᠠᠰᠤ 》 ᠨᠢ ᠪᠡᠷᠭᠡ ᠪᠠᠷᠲᠠᠭ᠎ᠠ ᠶᠡᠭᠡᠲᠡᠢ᠂ ᠭᠤᠤ ᠵᠢᠯᠠᠭ᠎ᠠ ᠤᠯᠠᠨᠲᠡᠢ᠂ ᠤᠯᠠᠩᠬᠢ ᠭᠡᠰᠡᠭ ᠵᠠᠮ ᠨᠢ ᠦᠶᠡᠷ ᠤᠨ ᠵᠠᠮ ᠢ ᠠᠰᠢᠭᠯᠠᠭᠰᠠᠨ ᠪᠠᠶᠢᠬᠤ ᠳᠤ᠂ ᠤᠩᠭᠤᠨ ᠵᠠᠮ ᠤᠨ ᠠᠮᠠ ᠨᠢ ᠡᠯᠡᠰᠤ ᠶᠡᠭᠡᠲᠡᠢ ᠡᠩᠬᠦᠯ ᠲᠤᠩᠬᠤᠯ ᠠᠷᠪᠢᠨ ᠪᠠᠶᠢᠲᠠᠭ ᠠᠴᠠ ᠪᠤᠷᠤᠭᠠᠨ ᠤ ᠤᠯᠠᠷᠢᠯ ᠪᠤᠶᠤ ᠡᠪᠤᠯ ᠤᠨ ᠤᠯᠠᠷᠢᠯ ᠴᠠᠰᠤ ᠤᠷᠤᠭᠰᠠᠭᠠᠷ ᠯᠠ ᠵᠠᠮ ᠬᠠᠮᠢᠭ᠎ᠠ ᠪᠠᠶᠢᠬᠤ ᠶᠢ ᠭᠠᠲᠠᠨᠠᠬᠢ ᠶᠢᠨ ᠬᠦᠮᠦᠨ ᠢ ᠪᠤᠤ ᠭᠡᠯᠡ᠂ ᠲᠤᠬᠠᠢ ᠶᠢᠨ ᠭᠠᠵᠠᠷ ᠤᠨ ᠮᠠᠯᠴᠢᠳ ᠤᠯᠬᠤ ᠳᠤ ᠴᠦ ᠬᠦᠴᠢᠷ ᠪᠠᠶᠢᠲᠠᠭ ᠰᠢᠤ ᠭᠡᠵᠤ ᠰᠤᠮᠤᠨ ᠤ ᠨᠠᠮ ᠤᠨ ᠬᠤᠷᠢᠶᠠᠨ ᠤ ᠱᠦᠵᠢ ᠭᠡᠷᠡᠯᠲᠦ ᠭᠡᠯᠡᠯ᠎ᠠ᠃      ——  ᠬᠠᠩᠭᠠᠢ ᠨᠤᠲᠤᠭ ᠤᠨ ᠮᠠᠯᠴᠢᠳ ᠡᠶᠢᠮᠦᠷᠬᠦᠦ ᠵᠠᠮ ᠲᠠᠢ ᠨᠤᠲᠤᠭ ᠲᠤ ᠦᠶ᠎ᠡ ᠶᠢᠨ ᠦᠶ᠎ᠡ ᠰᠠᠭᠤᠷᠢᠰᠢᠨ ᠠᠮᠢᠲᠤᠷᠠᠭᠰᠠᠭᠠᠷ ᠢᠷᠡᠭᠰᠡᠨ ᠪᠢᠯᠡ᠃ ᠬᠤᠷ᠎ᠠ ᠪᠤᠷᠤᠭᠠᠨ ᠤ ᠬᠤᠮᠰᠠᠳᠠᠯ ᠢ ᠲᠠᠭᠠᠯᠲᠤᠨ ᠭᠠᠩ ᠬᠠᠭᠰᠠᠷᠠᠭᠠᠨ ᠦᠷᠬᠦᠯᠵᠢᠯᠡᠵᠦ᠂ ᠵᠢᠯ ᠪᠦᠷᠢ ᠮᠠᠯᠴᠢᠳ ᠡᠪᠡᠰᠤ ᠪᠤᠷᠲᠤᠭ᠎ᠠ ᠬᠤᠲᠠᠯᠲᠤᠨ ᠠᠪᠬᠤ ᠳᠤ ᠵᠠᠷᠤᠴᠠᠭᠤᠯᠬᠤ ᠲᠡᠭᠡᠭᠡᠪᠦᠷᠢ ᠶᠢᠨ ᠦᠨ᠎ᠡ ᠨᠢ ᠮᠠᠯᠴᠢᠨ ᠲᠦᠮᠡᠨ ᠳᠤ ᠶᠡᠭᠡᠭᠡᠨ ᠲᠠᠷᠤᠭᠠᠰᠤ ᠪᠤᠯᠵᠤ᠂ ᠠᠮᠢᠲᠤᠷᠠᠯ ᠤᠨ ᠰᠠᠶᠢᠵᠢᠷᠠᠯᠲᠠ ᠰᠠᠨᠠᠭᠰᠠᠨ ᠠᠴᠠ ᠭᠠᠲᠠᠭᠤᠷ ᠤᠲᠠᠭᠠᠨ ᠪᠤᠯᠤᠭᠰᠠᠨ ᠪᠠᠶᠢᠨ᠎ᠠ᠃ ᠤᠨᠴᠠᠭᠠᠶᠢᠯᠠᠨ ᠴᠠᠭᠠᠨ ᠵᠤᠳ ᠪᠤᠯᠤᠭᠰᠠᠨ ᠤ ᠲᠠᠷᠠᠭ᠎ᠠ᠂ ᠪᠦᠬᠦ ᠬᠠᠩᠭᠠᠢ ᠨᠤᠲᠤᠭ ᠨᠡᠯᠦᠭᠡᠷ ᠶᠡᠭᠡ ᠴᠠᠰᠤᠨ ᠳᠤ ᠲᠠᠷᠤᠭᠲᠠᠵᠤ᠂ ᠲᠤᠰᠠᠯᠠᠨ ᠠᠪᠤᠷᠠᠬᠤ ᠲᠡᠷᠭᠡ ᠤᠨᠤᠭ᠎ᠠ ᠬᠢᠭᠡᠳ ᠬᠦᠮᠦᠨ ᠤᠷᠤᠵᠤ ᠲᠡᠶᠢᠯᠬᠦ ᠦᠭᠡᠢ ᠮᠦᠷᠲᠡᠭᠡᠨ ᠭᠠᠮᠰᠢᠭᠲᠠᠭᠰᠠᠨ ᠤᠷᠤᠨ ᠤ ᠤᠯᠠᠨ ᠲᠦᠮᠡᠨ ᠪᠠ ᠮᠠᠯ ᠰᠦᠷᠦᠭ ᠴᠦ ᠭᠠᠷᠴᠤ ᠢᠷᠡᠵᠦ ᠲᠡᠶᠢᠯᠬᠦ ᠦᠭᠡᠢ ᠠᠴᠠ《 ᠲᠤᠰᠠᠭᠠᠷᠯᠠᠭᠰᠠᠨ ᠶᠢᠷᠲᠢᠨᠴᠦ 》ᠪᠤᠯᠵᠤ᠂ ᠬᠦᠮᠦᠨ ᠮᠠᠯ ᠤᠨ ᠠᠮᠢ ᠨᠠᠰᠤ᠂ ᠡᠳ᠋ ᠬᠦᠷᠦᠩᠭᠡ ᠶᠢᠨ ᠠᠮᠤᠷ ᠲᠦᠪᠰᠢᠨ  ᠳᠤ ᠲᠤᠩ ᠶᠡᠭᠡ ᠰᠦᠷᠲᠡᠬᠦᠯᠦᠯ ᠪᠤᠯᠤᠭᠰᠠᠨ ᠪᠠᠶᠢᠨ᠎ᠠ᠃ ᠲᠡᠷᠭᠡ ᠤᠨᠤᠭ᠎ᠠ ᠨᠡᠪᠲᠡᠷᠡᠵᠦ ᠪᠤᠯᠬᠤ ᠵᠠᠮ ᠲᠠᠢ ᠪᠤᠯᠬᠤ ᠨᠢ ᠬᠠᠩᠭᠠᠢ ᠨᠤᠲᠤᠭ ᠤᠨ ᠮᠠᠯᠴᠢᠨ ᠲᠦᠮᠡᠨ ᠤ ᠮᠠᠨᠢ ᠬᠦᠰᠡᠯ ᠪᠤᠯᠤᠭᠰᠠᠨ ᠪᠠᠶᠢᠨ᠎ᠠ᠃ ᠸᠴᠢᠷ ᠲᠠᠷᠤᠭ᠎ᠠ ᠠᠷᠭ᠎ᠠ ᠪᠤᠲᠤᠵᠤ ᠦᠭᠬᠦ ᠤᠤ︖ ᠠᠲᠡᠬᠢ ᠮᠠᠯᠴᠢᠳ ᠵᠠᠮ ᠦᠭᠡᠢ ᠦᠨᠡᠨ ᠬᠦᠴᠢᠷ᠂ ᠲᠤᠩ ᠭᠦᠭᠡᠷᠦᠬᠦᠢ ᠭᠡᠵᠤ ᠰᠤᠮᠤᠨ ᠲᠠᠷᠤᠭ᠎ᠠ ᠮᠠᠯᠴᠢᠨᠬᠦᠦ ᠨᠦᠬᠦᠪᠦᠷᠢᠯᠡᠨ ᠶᠠᠷᠢᠯ᠎ᠠ᠃      —— ᠬᠤᠶᠠᠷ ᠲᠠᠷᠤᠭ᠎ᠠ ᠶᠢᠨ ᠶᠠᠷᠢᠶᠠᠨ ᠠᠴᠠ ᠵᠠᠮ ᠦᠭᠡᠢ ᠮᠠᠯᠴᠢᠳ ᠤᠨ ᠬᠦᠴᠢᠷᠲᠡᠯ ᠢ ᠤᠶᠢᠯᠠᠭᠠᠨ ᠮᠠᠲᠠᠯ᠎ᠠ᠃ ᠮᠠᠯᠴᠢᠨ ᠲᠦᠮᠡᠨ ᠤ ᠬᠦᠰᠡᠯ ᠡᠷᠡᠮᠡᠯᠵᠡᠯ ᠢ ᠴᠦ ᠮᠡᠲᠡᠵᠦ ᠪᠠᠶᠢᠨ᠎ᠠ᠃ ᠲᠤᠰ ᠭᠡᠰᠡᠭ ᠵᠠᠮ ᠢ ᠵᠢᠯ ᠤᠨ ᠡᠬᠢᠨ ᠤ ᠵᠠᠮ ᠵᠠᠰᠠᠬᠤ ᠲᠦᠰᠦᠯ ᠳᠤ ᠤᠷᠤᠭᠤᠯᠤᠭᠰᠠᠨ ᠦᠭᠡᠢ᠂ ᠲᠤᠰᠬᠠᠢ ᠲᠤᠬᠢᠷᠠᠭᠤᠯᠤᠭᠰᠠᠨ ᠪᠡᠯᠡ ᠮᠦᠩᠬᠦ ᠦᠭᠡᠢ ᠪᠤᠶᠤ ᠪᠡᠯᠡᠳᠭᠡᠯ ᠪᠡᠯᠡ ᠮᠦᠩᠬᠦ ᠴᠦ ᠪᠠᠶᠢᠬᠤ ᠦᠭᠡᠢ᠂ ᠭᠡᠪᠡᠴᠦ ᠪᠢᠲᠡ ᠬᠠᠮᠲᠤ ᠪᠠᠷ ᠢᠶᠠᠨ ᠴᠢᠷᠮᠠᠶᠢᠵᠤ ᠪᠠᠶᠢᠭᠠᠳ ᠡᠨᠡ ᠡᠪᠤᠯ ᠮᠠᠯᠴᠢᠳ ᠡᠪᠡᠰᠤ ᠪᠤᠷᠲᠤᠭ᠎ᠠ ᠲᠡᠭᠡᠭᠡᠬᠦ ᠠᠴᠠ ᠡᠮᠦᠨ᠎ᠡ ᠡᠨᠡ ᠵᠠᠮ ᠢ ᠨᠡᠪᠲᠡᠷᠡᠬᠦᠯᠬᠦ ᠠᠷᠭ᠎ᠠ ᠬᠢᠶ᠎ᠡ ᠭᠡᠵᠤ ᠪᠠᠶᠢᠲᠠᠯ ᠢ ᠤᠶᠢᠯᠠᠭᠠᠭᠰᠠᠨ ᠬᠤᠰᠢᠭᠤᠨ ᠤ ᠵᠠᠰᠠᠮᠠᠯ ᠵᠠᠮ ᠤᠨ ᠰᠠᠯᠪᠤᠷᠢ ᠶᠢᠨ ᠲᠠᠷᠤᠭ᠎ᠠ ᠤᠳᠬᠤᠨ᠋ᠧᠴᠢᠷ ᠢᠩᠬᠢᠵᠦ ᠭᠡᠯᠡᠬᠦ ᠶᠢ ᠰᠤᠨᠤᠰᠤᠭᠰᠠᠨ ᠬᠤᠶᠠᠷ ᠲᠠᠷᠤᠭ᠎ᠠ ᠶᠢᠨ ᠰᠡᠳᠬᠢᠯ ᠳᠤ ᠡᠬᠦᠯᠡ ᠰᠠᠷᠨᠢᠵᠦ ᠨᠠᠷᠠ ᠭᠠᠷᠬᠤ ᠰᠢᠭ᠋ ᠪᠤᠯᠵᠠᠢ᠃       ᠲᠠᠯ᠎ᠠ ᠲᠠᠯ᠎ᠠ ᠠᠴᠠ ᠪᠠᠨ ᠠᠷᠭ᠎ᠠ ᠪᠦᠬᠦᠨ ᠢ ᠰᠦᠪᠡᠭᠴᠢᠯᠡᠨ ᠲᠤᠬᠠᠢ ᠶᠢᠨ ᠭᠠᠵᠠᠷ ᠤᠨ ᠮᠠᠯᠴᠢᠳ ᠤᠨ《 ᠠᠮᠢᠨ ᠰᠤᠲᠠᠰᠤ 》 ᠪᠤᠯᠤᠭᠰᠠᠨ ᠡᠨᠡ ᠵᠠᠮ ᠢ ᠵᠠᠰᠠᠵᠤ ᠡᠬᠢᠯᠡᠭᠰᠡᠨ ᠪᠠᠶᠢᠨ᠎ᠠ᠃ ᠵᠠᠰᠠᠮᠠᠯ ᠵᠠᠮ ᠤᠨ ᠰᠠᠯᠪᠤᠷᠢ ᠨᠢ ᠲᠡᠭᠡᠲᠦ ᠱᠠᠲᠤᠨ ᠠᠴᠠ ᠲᠡᠮᠵᠢᠯᠭᠡ ᠤᠯᠬᠤ᠂ ᠭᠠᠵᠠᠷ ᠤᠷᠤᠨ ᠤ ᠡᠳ᠋ ᠤᠨ ᠵᠠᠰᠠᠭ ᠠᠴᠠ ᠲᠡᠮᠵᠢᠬᠦ᠂ ᠵᠠᠮ ᠬᠠᠷᠢᠯᠴᠠᠭᠠᠨ ᠤ ᠰᠠᠯᠠᠭ᠎ᠠ ᠮᠦᠴᠢᠷ ᠠᠴᠠ ᠲᠡᠮᠵᠢᠬᠦ᠂ ᠵᠠᠮ ᠵᠠᠰᠠᠭ᠎ᠠ ᠠᠵᠤ ᠠᠬᠤᠶᠢᠯᠠᠯ ᠠᠴᠠ ᠪᠠᠭ᠎ᠠ ᠭᠡᠰᠡᠭ ᠢ ᠲᠦᠷ ᠤᠷᠤᠯᠠᠨ ᠲᠦᠯᠦᠬᠦ ᠵᠡᠷᠭᠡ ᠲᠠᠯ᠎ᠠ ᠲᠠᠯ᠎ᠠ  ᠶᠢᠨ ᠲᠡᠮᠵᠢᠯᠭᠡ ᠲᠤᠰᠠᠯᠠᠮᠵᠢ ᠪᠠᠷ 1340 ᠲᠦᠮᠡᠨ ᠲᠦᠬᠦᠷᠢᠭ ᠤᠨ ᠪᠠᠯᠠ ᠬᠤᠷᠠᠮᠲᠤᠭᠤᠯᠤᠨ᠂ ᠪᠡᠯᠡ ᠮᠦᠩᠬᠦ ᠪᠠᠶᠢᠬᠤ ᠦᠭᠡᠢ ᠠᠰᠠᠭᠤᠲᠠᠯ ᠢ ᠰᠢᠢᠳᠪᠦᠷᠢᠯᠡᠭᠰᠡᠨ ᠪᠠᠶᠢᠨ᠎ᠠ᠃ ᠵᠠᠰᠠᠮᠠᠯ ᠵᠠᠮ ᠤᠨ ᠰᠠᠯᠪᠤᠷᠢ ᠶᠢᠨ ᠠᠵᠢᠯᠴᠢᠨ ᠠᠵᠢᠯᠲᠠᠨ ᠠᠭᠤᠯᠠᠨ ᠭᠠᠵᠠᠷ ᠵᠠᠮ ᠵᠠᠰᠠᠭᠰᠠᠨ ᠲᠤᠷᠰᠢᠯᠭ᠎ᠠ ᠦᠭᠡᠢ᠂ ᠭᠠᠵᠠᠷ ᠤᠨ ᠪᠠᠶᠢᠴᠡ ᠶᠢ ᠬᠦᠢᠴᠡᠳ ᠬᠠᠶᠢᠨ ᠰᠢᠨᠵᠢᠬᠦ ᠴᠠᠭ ᠬᠤᠮᠰᠠ ᠪᠠᠶᠢᠲᠡᠯ ᠳᠤ᠂ ᠨᠢᠭᠡ ᠲᠠᠯ᠎ᠠ ᠪᠠᠷ ᠵᠠᠰᠠᠨ ᠨᠢᠭᠡ ᠲᠠᠯ᠎ᠠ ᠪᠠᠷ ᠰᠤᠲᠤᠯᠤᠯᠲᠠ ᠬᠢᠵᠦ᠂ ᠠᠯᠢᠪᠠ ᠬᠦᠴᠢᠷ ᠪᠡᠷᠭᠡᠰᠢᠶᠡᠯ ᠢ ᠨᠢᠭᠡᠳ ᠨᠢᠭᠡ  ᠪᠠᠷ ᠢᠯᠠᠨ ᠲᠠᠪᠠᠯ᠎ᠠ᠃ ᠬᠦᠴᠢᠷ ᠪᠡᠷᠭᠡ ᠤᠷᠴᠢᠨ ᠲᠤᠭᠤᠷᠢᠨ ᠳᠤ ᠴᠢᠷᠮᠠᠶᠢᠨ ᠠᠵᠢᠯᠯᠠᠵᠤ ᠪᠠᠶᠢᠭ᠎ᠠ ᠵᠠᠮ ᠵᠠᠰᠠᠭᠰᠠᠳ ᠢ ᠬᠠᠷᠠᠭᠰᠠᠨ ᠤᠶᠢᠷ᠎ᠠ ᠬᠠᠪᠢ ᠶᠢᠨ ᠮᠠᠯᠴᠢᠳ ᠰᠠᠶᠢᠨ ᠲᠤᠷ᠎ᠠ ᠠᠴᠠ ᠪᠠᠨ ᠬᠢᠵᠦ ᠪᠤᠯᠬᠤ ᠠᠵᠢᠯ ᠢ ᠨᠢ ᠬᠠᠮᠵᠢᠯᠴᠠᠨ᠂ ᠲᠠᠲᠠᠭᠰᠠᠨ ᠲᠤᠤᠷ ᠢᠶᠠᠨ ᠦᠪᠡᠷᠲᠡᠭᠡᠨ ᠲᠠᠰᠤᠯᠤᠨ ᠵᠠᠮ ᠲᠠᠯᠪᠢᠨ ᠦᠭᠴᠦ᠂ ᠬᠠᠶᠢᠷ ᠴᠢᠯᠠᠭᠤ  ᠪᠠᠨ ᠦᠨ᠎ᠡ ᠲᠦᠯᠦᠪᠦᠷᠢ ᠦᠭᠡᠢ ᠦᠭᠬᠦᠭᠰᠡᠨ ᠪᠠ ᠤᠯᠠᠨ ᠲᠦᠮᠡᠨ ᠪᠡᠯᠴᠢᠭᠡᠷ ᠲᠡᠭᠡᠷ᠎ᠡ ᠨᠢ ᠵᠠᠮ ᠵᠠᠰᠠᠬᠤ ᠶᠢ ᠵᠦᠪᠰᠢᠶᠡᠷᠡᠨ ᠲᠡᠮᠵᠢᠭᠰᠡᠨ ᠠᠴᠠ ᠵᠠᠮ ᠵᠠᠰᠠᠬᠤ ᠬᠤᠷᠲᠤᠴᠠ ᠢᠯᠡᠳᠲᠡ ᠪᠤᠯᠵᠠᠢ᠃      ᠭᠤᠷᠪᠠᠨ ᠰᠠᠷ᠎ᠠ ᠭᠠᠷᠤᠢ ᠶᠢᠨ ᠪᠠᠴᠢᠮ ᠶᠠᠭᠠᠷᠠᠯᠲᠡᠢ ᠠᠵᠢᠯᠯᠠᠬᠤ ᠪᠠᠷ ᠲᠡᠮᠵᠢᠨ ᠤᠩᠭᠤᠨ ᠪᠠᠯᠭᠠᠰᠤ ᠠᠴᠠ ᠬᠤᠶᠠᠷ ᠪᠤᠭᠲᠠ ᠶᠢᠨ ᠠᠮᠠ ᠬᠦᠷᠬᠦ 90.56 ᠺᠢᠯᠦᠮᠧᠲᠷ ᠤᠷᠲᠦ᠂ 15 ᠮᠧᠲᠷ ᠦᠷᠭᠡᠨ ᠂  ᠲᠤᠰᠤᠨ  ᠵᠠᠮ  ᠲᠡᠪᠢᠰᠬᠦ  ᠰᠠᠭᠤᠷᠢ ᠲᠠᠢ ᠬᠠᠶᠢᠷ ᠴᠢᠯᠠᠭᠤᠨ ᠵᠠᠮ ᠠᠰᠢᠭᠯᠠᠯᠲᠠ ᠳᠤ ᠤᠷᠤᠯ᠎ᠠ᠃ ᠲᠡᠩᠨᠡᠬᠦᠯ ᠤᠨ ᠭᠤᠤᠯ᠂ ᠤᠤᠯ ᠰᠤᠮᠤᠨ ᠤ ᠵᠡᠬᠦᠨ ᠲᠡᠯ᠎ᠠ ᠶᠢᠨ ᠦᠷᠭᠡᠨ ᠰᠠᠶᠢᠷ ᠵᠡᠷᠭᠡ ᠦᠶᠡᠷ ᠤᠨ ᠵᠠᠮ ᠢ ᠪᠦᠬᠦᠨ ᠢᠶᠠᠷ ᠨᠢ ᠴᠢᠯᠠᠭᠤ ᠪᠠᠷ ᠲᠡᠪᠢᠰᠦᠨ ᠱᠦᠢᠨᠢ ᠪᠠᠷ ᠦᠩᠭᠡᠯᠡᠭᠰᠡᠨ  ᠠᠴᠠ ᠦᠶᠡᠷ ᠤᠨ ᠤᠰᠤ ᠶᠢ ᠠᠶᠤᠬᠤ ᠪᠠᠨ ᠪᠤᠯᠢᠵᠠᠢ᠃ ᠭᠡᠰᠡᠭ ᠮᠠᠯᠴᠢᠳ《 ᠬᠠᠩᠭᠠᠢ ᠨᠤᠲᠤᠭ ᠤᠨ ᠮᠠᠯᠴᠢᠳ ᠲᠤ ᠲᠡᠪᠢᠰᠦᠭᠰᠡᠨ ᠪᠠᠶᠠᠵᠢᠯ ᠤᠨ ᠵᠠᠮ 》ᠭᠡᠵᠤ ᠭᠡᠯᠡᠬᠦ ᠳᠤ᠂ ᠨᠡᠩ ᠴᠦ ᠵᠠᠷᠢᠮ ᠮᠠᠯᠴᠢᠳ《 ᠬᠠᠩᠭᠠᠢ ᠨᠤᠲᠤᠭ ᠲᠤ ᠨᠡᠪᠲᠡᠷᠡᠭᠰᠡᠨ ᠠᠮᠢ ᠨᠠᠰᠤᠨ ᠤ ᠱᠤᠭᠤᠮ ᠮᠦᠨ 》ᠭᠡᠵᠤ ᠭᠡᠯᠡᠵᠦ ᠪᠠᠶᠢᠯ᠎ᠠ᠃      —— ᠤᠲᠤ ᠡᠨᠡ ᠵᠠᠮ ᠭᠤᠶᠤ ᠪᠤᠯᠤᠭᠰᠠᠨ᠂ ᠭᠤᠷᠪᠠᠨ ᠴᠠᠭ ᠶᠠᠪᠤᠲᠠᠭ ᠵᠠᠮ ᠤᠲᠤ ᠴᠠᠭ ᠬᠠᠭᠠᠰ ᠶᠠᠪᠤᠪᠠᠯ ᠪᠤᠯᠴᠢᠬᠠᠨ᠎ᠠ᠃ ᠡᠪᠡᠰᠤ ᠪᠤᠷᠲᠤᠭ᠎ᠠ ᠲᠡᠭᠡᠭᠡᠬᠦ ᠴᠦ ᠲᠡᠷᠡ᠂ ᠬᠤᠰᠢᠭᠤ ᠤᠷᠤᠬᠤ ᠳᠤ ᠴᠦ ᠲᠠᠷᠡ ᠲᠤᠩ ᠲᠦᠬᠦᠮ ᠪᠤᠯᠤᠭᠰᠠᠨ ᠰᠢᠤ ᠭᠡᠵᠤ ᠪᠤᠶᠠᠨᠲᠤ ᠲᠤᠭᠲᠤᠯᠤᠭᠰᠠᠨ ᠰᠡᠳᠬᠢᠯᠭᠡ ᠪᠠᠨ ᠲᠠᠷᠤᠵᠤ ᠶᠠᠲᠠᠮ᠎ᠠ ᠭᠡᠯᠡᠯ᠎ᠠ᠃       —— ᠮᠠᠨ ᠤ ᠭᠠᠴᠠᠭᠠᠨ ᠳᠤ 205 ᠡᠷᠦᠭᠡ ᠲᠠᠢ᠂ ᠵᠠᠮ ᠰᠠᠶᠢᠨ ᠪᠤᠯᠤᠭᠰᠠᠨ ᠠᠴᠠ ᠮᠠᠯᠴᠢᠳ ᠲᠤ ᠶᠡᠭᠡ ᠲᠦᠬᠦᠮ ᠦᠵᠡᠬᠦᠯᠵᠡᠢ᠃ ᠤᠲᠤ ᠮᠠᠨ ᠤ ᠭᠠᠴᠠᠭᠠᠨ ᠤ 97% ᠠᠴᠠ ᠲᠡᠭᠡᠭᠰᠢ ᠠᠶᠢᠯ ᠪᠦᠷ ᠪᠠᠭ᠎ᠠ ᠮᠠᠰᠢᠨ ᠲᠠᠢ ᠪᠤᠯᠤᠭᠰᠠᠨ ᠰᠢᠤ᠂ ᠵᠠᠮ ᠲᠠᠢ ᠯᠠ ᠪᠤᠯ ᠪᠠᠶᠠᠵᠢᠨ᠎ᠠ ᠭᠡᠵᠤ ᠡᠨᠡᠬᠦᠭᠡᠨ ᠳᠤ ᠪᠠᠶᠢᠬ᠎ᠠ ᠤᠴᠢᠷ ᠭᠡᠵᠤ ᠬᠤᠯᠤᠰᠤᠲᠠᠢ ᠭᠠᠴᠠᠭᠠᠨ ᠤ ᠱᠦᠵᠢ ᠭᠡᠰᠢᠭᠲᠦ ᠶᠠᠷᠢᠵᠦ ᠪᠠᠶᠢᠭᠰᠠᠨ ᠨᠢ ᠤᠨᠤᠭᠠᠵᠤ ᠭᠡᠯᠡᠭᠰᠡᠨ ᠦᠭᠡ ᠪᠠᠶᠢᠵᠠᠢ᠃       ᠪᠦᠬᠦ ᠤᠯᠤᠰ ᠢᠶᠠᠷ ᠢᠶᠠᠨ《 ᠲᠤᠮᠲᠠᠲᠤ ᠶᠢᠨ ᠵᠡᠬᠦᠲᠦ》 ᠢᠶᠠᠨ ᠪᠡᠶᠡᠯᠡᠬᠦᠯᠬᠦ ᠭᠡᠵᠤ ᠴᠢᠷᠮᠠᠶᠢᠵᠤ ᠪᠠᠶᠢᠭ᠎ᠠ ᠴᠠᠭ ᠲᠤ᠂ ᠤᠷᠠᠳ ᠤᠨ ᠲᠤᠮᠲᠠᠲᠤ ᠬᠤᠰᠢᠭᠤᠨ  ᠤ ᠬᠤᠯᠤᠰᠤᠲᠠᠢ ᠰᠤᠮᠤᠨ ᠤ ᠬᠠᠩᠭᠠᠢ ᠨᠤᠲᠤᠭ ᠲᠤ ᠬᠡᠴᠢᠨᠡᠨ ᠦᠶ᠎ᠡ ᠶᠢᠨ ᠮᠠᠯᠴᠢᠳ ᠤᠨ《 ᠬᠠᠩᠭᠠᠢ ᠨᠤᠲᠤᠭ ᠤᠨ ᠵᠡᠬᠦᠲᠦ 》 ᠨᠢ ᠦᠨᠡᠨ ᠪᠤᠯᠤᠨ ᠲᠡᠷᠭᠡᠯᠰᠢᠬᠦ  ᠳᠤ᠂ ᠮᠠᠯᠴᠢᠳ ᠤᠨ ᠴᠢᠷᠠᠢ ᠳᠤ ᠪᠠᠶᠠᠰᠤᠯ ᠤᠨ ᠢᠨᠢᠶᠡᠲᠦ ᠲᠤᠲᠤᠷᠠᠨ᠂ ᠬᠠᠩᠭᠠᠢ ᠨᠤᠲᠤᠭ ᠤᠨ ᠮᠠᠯᠴᠢᠳ ᠤᠨ ᠪᠠᠶᠠᠵᠢᠨ ᠴᠢᠨᠡᠭᠡᠯᠢᠭᠵᠢᠬᠦ ᠢᠲᠡᠪᠬᠢᠵᠢᠯ ᠢ ᠲᠠᠶᠢᠴᠢᠯᠠᠭᠰᠠᠨ ᠪᠠᠶᠢᠨ᠎ᠠ᠃ ᠲᠤᠰ ᠵᠠᠮ ᠤᠨ ᠨᠡᠪᠲᠡᠷᠡᠭᠰᠡᠨ ᠨᠢ ᠲᠤᠬᠠᠢ ᠶᠢᠨ ᠭᠠᠵᠠᠷ ᠤᠨ ᠮᠠᠯᠴᠢᠨ ᠲᠦᠮᠡᠨ ᠤ ᠦᠢᠯᠡᠳᠪᠦᠷᠢᠯᠡᠯ ᠠᠮᠢᠲᠤᠷᠠᠯ ᠳᠤ ᠲᠤᠩ ᠤᠯᠠᠨ ᠲᠦᠬᠦᠮ ᠨᠦᠬᠦᠴᠡᠯ ᠬᠠᠩᠭᠠᠭᠰᠠᠨ ᠢᠶᠠᠷ ᠪᠠᠷᠠᠬᠤ ᠦᠭᠡᠢ᠂ ᠬᠠᠩᠭᠠᠢ ᠨᠤᠲᠤᠭ ᠤᠨ ᠮᠠᠷᠭᠠᠰᠢ ᠶᠢᠨ ᠬᠦᠭᠵᠢᠯᠲᠡ ᠳᠤ ᠦᠷᠭᠡᠨ ᠲᠡᠷᠲᠡᠩ ᠵᠠᠮ ᠢ ᠨᠡᠭᠡᠭᠡᠵᠦ ᠦᠭᠬᠦᠭᠰᠡᠨ  ᠨᠢ ᠯᠠᠪᠲᠠᠢ ᠶᠤᠮ᠃                           ᠰᠤᠷᠪᠤᠯᠵᠢᠯᠠᠭᠴᠢ᠂ ᠵᠤᠬᠢᠶᠠᠯᠴᠢ ᠪᠠ᠊ ᠪᠦᠭᠡ
ᠢᠷᠡᠯᠲᠡ᠄ ᠤᠷᠠᠳ ᠤᠨ ᠲᠤᠮᠳᠠᠳᠤ ᠬᠤᠰᠢᠭᠤᠨ ᠤ ᠵᠠᠰᠠᠭ ᠤᠨ ᠤᠷᠳᠤᠨ ᠤ ᠮᠤᠩᠭᠤᠯ ᠰᠦᠯᠵᠢᠶ᠎ᠡ