ᠰᠢᠷᠭ᠎ᠠ   ᠶᠢᠨ  ᠠᠶᠢᠯ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2021/4/9
ᠪᠡ᠊ ᠪᠦᠭᠡ                           ᠰᠢᠷᠭ᠎ᠠ   ᠶᠢᠨ  ᠠᠶᠢᠯ                  ᠬᠦᠩᠭᠡᠨ ᠮᠠᠰᠢᠨ ᠢᠶᠠᠷ ᠲᠠᠯ᠎ᠠ ᠵᠦᠰᠦᠭᠰᠡᠨ ᠬᠦᠲᠡᠭᠡ ᠶᠢᠨ ᠨᠠᠷᠢᠬᠠᠨ ᠴᠠᠷᠲᠠᠮᠠᠯ ᠵᠠᠮ ᠢᠶᠠᠷ ᠲᠠᠪᠬᠢᠭᠤᠯᠬᠤ ᠳᠤ᠂ ᠵᠠᠮ ᠤᠨ ᠬᠤᠶᠠᠷ ᠲᠠᠯ᠎ᠠ ᠪᠠᠷ ᠰᠦᠷᠦᠭ ᠰᠦᠷᠦᠭ ᠮᠠᠯ ᠨᠡᠯᠡᠶᠢᠨ ᠪᠡᠯᠴᠢᠵᠦ᠂ ᠨᠤᠮᠢᠨ ᠨᠤᠭᠤᠭᠠᠨ ᠭᠡᠪᠢᠰᠤᠨ ᠳᠤ ᠦᠩᠭᠡ ᠶᠢᠨ ᠴᠡᠴᠡᠭ ᠠᠯᠠᠭᠯᠠᠨ ᠲᠡᠯᠭᠡᠷᠡᠭᠰᠡᠨ ᠴᠦ ᠭᠡᠮᠡᠷ᠃ ᠲᠤᠬᠢᠯᠢᠭ ᠰᠠᠶᠢᠬᠠᠨ ᠮᠠᠯᠴᠢᠳ ᠤᠨ ᠰᠠᠭᠤᠷᠢᠰᠢᠯ ᠬᠠᠷᠠᠭᠠᠨ ᠳᠤ ᠦᠷᠲᠦᠨ᠂ ᠲᠠᠯ᠎ᠠ ᠶᠢᠨ ᠠᠶᠢᠯ ᠲᠠᠪᠠᠲᠠᠢ ᠠᠮᠤᠭᠤᠯᠠᠩ᠃ ᠲᠠᠨᠢᠯ ᠲᠠᠰᠤᠯᠬᠠᠨ ᠲᠤᠪᠤ ᠲᠤᠯᠤᠭᠠᠳ ᠬᠠᠷᠠᠭᠠᠨ ᠦᠵᠦᠬᠦᠷ ᠮᠤᠬᠤᠭᠤᠭᠠᠭᠰᠠᠨ ᠴᠦ ᠬᠠᠷᠠᠴᠠᠨ ᠳᠤ ᠲᠤᠯᠠᠭᠠᠬᠠᠨ᠃ ᠴᠡᠴᠡᠭ ᠤᠨ ᠦᠨᠦᠷ ᠬᠠᠩᠬᠤᠯᠤᠭᠰᠠᠨ ᠨᠤᠭᠤᠭᠠᠨ ᠰᠠᠯᠬᠢ ᠪᠠᠷ ᠨᠢ ᠦᠯᠢᠶᠡᠯᠭᠡᠵᠦ ᠶᠠᠪᠤᠬᠤ ᠳᠤ ᠤᠷᠮ᠎ᠠ ᠰᠡᠷᠬᠦᠵᠦ᠂ ᠪᠠᠭ᠎ᠠ ᠶᠢᠨ ᠦᠶ᠎ᠡ ᠡᠷᠭᠡ ᠦᠭᠡᠢ ᠡᠷᠢᠭᠲᠡᠨ᠎ᠡ᠃             ᠬᠠᠷᠠᠭᠠᠨ ᠳᠤ ᠲᠤᠲᠤᠷᠠᠭ᠎ᠠ ᠬᠦᠲᠦᠯ ᠢ ᠰᠢᠷᠭ᠎ᠠ ᠶᠢᠨ ᠬᠦᠲᠦᠯ ᠭᠡᠲᠡᠭ᠃ ᠡᠷᠲᠡ ᠤᠷᠢᠲᠤ ᠳᠤ ᠰᠦᠷᠦᠭ ᠰᠦᠷᠦᠭ ᠰᠢᠷᠭ᠎ᠠ ᠠᠲᠤᠭᠤ ᠡᠨᠡ ᠬᠦᠲᠦᠯ ᠢᠶᠠᠷ ᠪᠠᠶᠢᠩᠭᠤ ᠤᠰᠤᠨ ᠳᠤ ᠪᠠᠨ ᠢᠷᠡᠲᠡᠭ ᠠᠴᠠ ᠰᠢᠷᠭ᠎ᠠ ᠶᠢᠨ ᠬᠦᠲᠦᠯ ᠭᠡᠵᠤ᠂  ᠲᠡᠷᠡᠰᠦᠲᠡᠢ ᠬᠦᠨᠲᠡᠢ ᠶᠢ ᠰᠢᠷᠭ᠎ᠠ ᠶᠢᠨ ᠬᠦᠨᠲᠡᠢ ᠭᠡᠵᠤ᠂ ᠴᠠᠭᠠᠨ᠎ᠠ ᠨᠢ ᠤᠷᠤᠰᠴᠤ ᠪᠠᠶᠢᠭ᠎ᠠ ᠨᠠᠷᠢᠬᠠᠨ ᠭᠤᠤᠯ ᠢ ᠰᠢᠷᠭ᠎ᠠ ᠶᠢᠨ ᠭᠤᠤᠯ ᠭᠡᠵᠤ ᠨᠡᠷᠡᠯᠡᠭᠰᠡᠨ ᠶᠤᠮ ᠡ ᠭᠡᠵᠤ ᠨᠠᠰᠤᠲᠠᠶᠢᠴᠤᠳ ᠬᠠᠭᠤᠴᠢᠯᠠᠲᠠᠭ᠃ ᠡᠨᠡ ᠬᠦᠲᠦᠯ ᠤᠨ ᠡᠩᠭᠡᠷ  ᠲᠤ ᠮᠠᠨ ᠤ ᠬᠢ ᠭᠡᠵᠤ ᠭᠡᠤᠭᠡᠳ ᠤᠯᠠᠨ ᠲᠠᠢ ᠠᠶᠢᠯ᠂ ᠨᠡᠶᠢᠲᠡ ᠶᠢᠨ ᠰᠦᠷᠦᠭ ᠢ ᠬᠠᠷᠢᠭᠤᠯᠤᠨ ᠭᠠᠭᠴᠨ ᠲᠠᠰᠤᠯᠭ᠎ᠠ ᠦᠮᠦᠭᠡᠷ ᠪᠠᠶᠢᠰᠢᠩ ᠳᠤ ᠰᠠᠭᠤᠲᠠᠭ ᠪᠠᠶᠢᠭᠰᠠᠨ᠂ ᠵᠠᠩᠰᠢᠯ ᠢᠶᠠᠷ ᠬᠦᠮᠦᠰ ᠮᠠᠨ ᠤ ᠬᠢ ᠶᠢ ᠰᠢᠷᠭ᠎ᠠ ᠶᠢᠨ ᠠᠶᠢᠯ ᠭᠡᠲᠡᠭ᠃ ᠤᠨ ᠤᠲᠠᠭᠰᠠᠨ‌ᠢᠰᠡᠭᠡᠢ ᠪᠦᠷᠢᠶᠡᠰᠤ ᠲᠠᠢ ᠭᠡᠷ ᠮᠢᠨᠢ ᠲᠠᠯᠠᠨ ᠨᠦᠭᠦᠭᠡᠰᠤ ᠪᠠᠷ ᠲᠦᠬᠦᠷᠦᠭᠰᠡᠨ ᠢᠶᠠᠷ ᠪᠠᠷᠢᠭᠠᠲᠠ ᠠᠴᠠ ᠡᠨᠡ ᠪᠠᠶᠢᠰᠢᠩ ᠢ ᠪᠠᠷᠢᠵᠤ ᠦᠭᠬᠦᠭᠡᠳ ᠠᠲᠡ ᠨᠡᠬᠦᠯᠭᠡᠭᠰᠡᠨ ᠰᠠᠨ᠃ ᠬᠤᠲᠠ ᠶᠢᠨ ᠵᠠᠬ᠎ᠠ ᠳᠤ᠂ ᠮᠠᠯ ᠤᠨ ᠪᠡᠯᠴᠢᠭᠡᠷ ᠲᠤ ᠬᠤᠷᠠᠭ᠎ᠠ ᠢᠰᠢᠭᠡ᠂ ᠬᠤᠲᠠᠴᠢ ᠨᠤᠬᠠᠢ ᠪᠠᠷ ᠬᠠᠨᠢ ᠪᠠᠨ ᠪᠤᠯᠭᠠᠵᠤ᠂ ᠤᠷᠭ᠎ᠠ ᠲᠠᠰᠢᠭᠤᠷ ᠢᠶᠠᠷ ᠪᠢᠷ ᠢᠶᠠᠨ ᠪᠤᠯᠭᠠᠭᠰᠠᠨ ᠠᠪᠤ ᠡᠵᠢ ᠳᠤ ᠮᠢᠨᠢ ᠰᠤᠷᠭᠠᠭᠤᠯᠢ ᠶᠢᠨ ᠪᠤᠱᠤᠭ᠎ᠠ ᠠᠯᠬᠤᠵᠤ ᠦᠰᠦᠭ ᠨᠢᠲᠦᠯᠡᠬᠦ ᠬᠤᠪᠢ ᠵᠠᠶᠠᠭ᠎ᠠ ᠪᠠᠶᠢᠭ᠎ᠠ ᠦᠭᠡᠢ᠃ ᠦᠷ᠎ᠡ ᠭᠡᠤᠭᠡᠳ ᠮᠢᠨᠢ ︽ᠡᠷᠲᠡᠮ ᠨᠤᠮ ᠲᠠᠢ ᠪᠤᠯᠤᠭ︾ ᠭᠡᠰᠡᠨ ᠦᠪᠡᠷ ᠤᠨ ᠬᠦᠰᠠᠯ  ᠢᠶᠠᠨ ᠦᠷ᠎ᠡ ᠳᠡᠭᠡᠨ ᠨᠠᠶᠢᠲᠠᠨ᠂ ᠠᠮᠢᠲᠤᠷᠠᠯ ᠢᠶᠠᠨ ᠭᠡᠵᠤ ᠦᠤᠷ ᠤᠨ ᠭᠡᠭᠡ ᠲᠠᠢ ᠤᠷᠤᠯᠲᠤᠨ ᠪᠤᠰᠴᠤ᠂ ᠦᠲᠡᠰᠢ ᠶᠢᠨ ᠪᠦᠷᠦᠢ ᠪᠠᠷ ᠬᠦᠯ ᠢᠶᠠᠨ ᠠᠮᠠᠷᠠᠭᠠᠲᠠᠭ ᠮᠠᠯᠴᠢᠨ ᠬᠦᠮᠦᠨ ᠭᠡᠭᠴᠢ ᠨᠠᠷᠠ ᠰᠠᠷᠠ ᠡᠭᠡᠯᠵᠢᠯᠡᠭᠰᠡᠨ ᠨᠠᠪᠴᠢᠲᠤ ᠲᠠᠯ᠎ᠠ ᠶᠢᠨ᠂ ᠵᠠᠭᠡᠷ᠎ᠠ ᠬᠤᠯᠠᠨ ᠰᠦᠷᠦᠭᠯᠡᠭᠰᠡᠨ ᠰᠢᠷᠭᠠᠯ ᠭᠤᠪᠢ ᠶᠢᠨ᠂ ᠠᠷᠭᠠᠯᠢ ᠶᠠᠩᠬᠢᠷ ᠬᠠᠷᠠᠶᠢᠭᠰᠠᠨ ᠬᠦᠭᠡᠮᠲᠦᠭ ᠠᠭᠤᠯᠠ ᠶᠢᠨ ᠦᠨᠢᠲᠡ ᠶᠢᠨ ᠡᠵᠡᠨ ᠪᠠᠶᠢᠬᠤ ᠤᠴᠢᠷᠲᠠᠢ᠃ ᠠᠪᠤ ᠡᠵᠢ ᠶᠢᠨ ᠢᠶᠠᠨ ᠬᠦᠰᠡᠯ ᠮᠦᠷᠦᠭᠡᠲᠦᠯ ᠢ ᠴᠡᠭᠡᠵᠢᠨ ᠳᠤ ᠪᠠᠨ ᠪᠠᠲᠤ ᠴᠡᠭᠡᠵᠢᠯᠡᠵᠦ᠂ ︽ᠡᠷᠲᠡᠮ ᠨᠤᠮ ᠲᠠᠢ ᠪᠤᠯᠤᠨ᠎ᠠ︾ ᠭᠡᠵᠤ ᠦᠪᠡᠷ ᠤᠨ ᠪᠡᠶ᠎ᠡ ᠳᠤ ᠪᠠᠨ ᠡᠷᠴᠢ ᠵᠤᠷᠢᠭ ᠬᠦᠪᠴᠢᠯᠡᠨ᠂ ᠲᠠᠯ᠎ᠠ ᠶᠢᠨ ᠰᠢᠷ᠎ᠠ ᠵᠠᠮ ᠢᠶᠠᠷ ᠲᠤᠭ᠎ᠠ ᠦᠭᠡᠢ ᠤᠲᠠᠭ᠎ᠠ ᠶᠠᠪᠤᠭᠰᠠᠨ ᠪᠠᠭ᠎ᠠ ᠶᠢᠨ ᠨᠠᠰᠤ ᠮᠢᠨᠢ ᠦᠴᠦᠭᠡᠲᠦᠷᠭᠡᠨ ᠰᠢᠭ ᠰᠠᠨᠠᠭᠲᠠᠨ᠎ᠠ᠃            ᠰᠢᠷᠭ᠎ᠠ ᠶᠢᠨ ᠬᠦᠲᠦᠯ ᠢ ᠲᠠᠪᠠᠭᠠᠳ ᠭᠠᠷᠪᠠᠯ ᠤᠴᠢᠬᠤ ᠭᠡᠵᠤ ᠪᠠᠶᠢᠭ᠎ᠠ ᠭᠠᠵᠠᠷ ᠤᠨ ᠬᠠᠭᠠᠰ ᠵᠠᠮ ᠢ ᠡᠪᠬᠡᠬᠦ ᠪᠤᠯᠤᠨ᠎ᠠ᠃ ᠡᠨᠡ ᠵᠠᠮ ᠢᠶᠠᠷ ᠶᠠᠪᠤᠭ᠎ᠠ ᠦᠭᠡᠢ ᠤᠨ ᠤᠲᠠᠵᠠᠢ᠃ ᠨᠡᠯᠢᠶᠡᠳ ᠲᠤᠭᠤᠷᠢᠤ ᠪᠤᠯᠪᠠᠴᠤ ᠪᠠᠭ᠎ᠠ ᠶᠢᠨ ᠨᠤᠲᠤᠭ ᠢᠶᠠᠨ ᠬᠠᠷᠠᠶ᠎ᠠ ᠭᠡᠵᠤ ᠡᠨᠡ ᠵᠠᠮ ᠢᠶᠠᠷ ᠲᠤᠰᠬᠠᠶᠢᠯᠠᠨ ᠶᠠᠪᠤᠵᠤ ᠪᠠᠶᠢᠭ᠎ᠠ ᠨᠢ ᠡᠨᠡ ᠪᠢᠯᠡ᠃ ᠬᠦᠲᠦᠯ ᠲᠡᠭᠡᠷ᠎ᠡ ᠭᠠᠷᠴᠤ ᠮᠠᠰᠢᠨ ᠠᠴᠠ ᠪᠠᠨ ᠪᠠᠭᠤᠯ᠎ᠠ᠃ ᠤᠷᠢᠬᠠᠨ ᠰᠠᠯᠬᠢ ᠪᠠᠷ ᠨᠢ ᠬᠠᠴᠠᠷ ᠢᠶᠠᠨ ᠢᠯᠪᠢᠬᠦᠯᠵᠦ᠂ ᠴᠡᠪᠡᠷ ᠠᠭᠠᠷ ᠢ ᠠᠮᠢᠰᠬᠤᠨ ᠬᠤᠯᠠ  ᠶᠢᠨ ᠪᠠᠷ᠎ᠠ ᠶᠢ ᠰᠢᠷᠲᠡᠬᠦ ᠳᠤ ᠬᠠᠷᠠᠴᠠ ᠲᠤᠩᠭᠠᠯᠠᠭᠰᠢᠨ᠂ ᠴᠡᠭᠡᠵᠢ ᠠᠭᠤᠵᠢᠷᠠᠨ᠎ᠠ᠃ ᠰᠡᠮᠡᠷᠭᠡᠢ ᠬᠠᠨᠴᠤᠢ ᠪᠠᠷ ᠢᠶᠠᠨ ᠨᠢᠰᠤ ᠪᠠᠨ ᠠᠷᠴᠢᠴᠢᠬᠠᠭᠰᠠᠨ ᠪᠠᠭ᠎ᠠ ᠨᠠᠰᠤ ᠪᠠᠨ ᠡᠨᠡ ᠨᠤᠲᠤᠭ ᠲᠤ ᠰᠢᠩᠭᠡᠭᠰᠡᠨ ᠶᠤᠮ᠃ ᠠᠬ᠎ᠠ ᠲᠡᠬᠦᠦ ᠭᠡᠲᠦᠬᠦᠯᠡ ᠪᠠᠨ ᠠᠶᠢᠯ ᠭᠡᠷ ᠪᠤᠯᠵᠤ᠂ ᠬᠤᠨᠢ ᠢᠮᠠᠭ᠎ᠠ ᠬᠠᠷᠢᠭᠤᠯᠵᠤ ᠪᠠᠶᠢᠨ᠎ᠠ ᠭᠡᠵᠤ ᠲᠤᠭᠯᠠᠵᠤ ᠪᠠᠶᠢᠭᠰᠠᠨ ᠶᠡᠭᠡ ᠪᠠᠭ᠎ᠠ ᠪᠦᠨᠲᠦᠭᠡᠷ ᠪᠦᠨᠲᠦᠭᠡᠷ ᠴᠠᠭᠠᠨ ᠴᠢᠯᠠᠭᠤᠳ ᠰᠤᠪᠤᠷᠠᠭᠰᠠᠨ᠂ ᠰᠦᠷᠦᠭᠯᠡᠭᠰᠡᠨ ᠶᠤᠰᠤᠭᠠᠷ ᠢᠶᠠᠨ ᠪᠠᠶᠢᠵᠤ᠂ ᠤᠨ ᠵᠢᠯ ᠤᠨ ᠡᠯᠡᠭᠡᠯᠲᠠ ᠳᠤ ᠰᠢᠷᠤᠢ ᠲᠤᠭᠤᠰᠤᠨ ᠳᠤ ᠬᠠᠭᠠᠰ ᠨᠢ ᠪᠤᠯᠠᠭᠲᠠᠵᠠᠢ᠃ ᠡᠷᠲᠡᠨᠢ ᠨᠢ ᠪᠤᠯᠤᠭᠰᠠᠨ ᠨᠤᠲᠤᠭ ᠤᠨ ᠮᠢᠨᠢ ᠴᠢᠯᠠᠭᠤ ᠡᠭᠡ ᠭᠠᠵᠠᠷ ᠤᠨ ᠢᠶᠠᠨ ᠬᠦᠷᠦᠰᠦᠨ ᠳᠤ ᠲᠠᠨᠠᠨ ᠴᠠᠭᠠᠨ ᠰᠢᠬᠢᠳᠭᠡᠭᠡᠷᠢ ᠪᠤᠯᠤᠨ ᠭᠢᠯᠠᠯᠵᠠᠵᠤ᠂ ︽ᠡᠨᠡ ᠪᠤᠯ ᠮᠢᠨᠤ ᠨᠤᠲᠤᠭ︾ ᠭᠡᠵᠤ ᠭᠡᠯᠡᠵᠦ ᠪᠠᠶᠢᠭ᠎ᠠ ᠴᠦ ᠶᠤᠮ ᠰᠢᠭ᠋᠃ ᠠᠯᠢ ᠡᠰᠡᠬᠦᠯ᠎ᠠ ᠦᠪᠡᠷ ᠢ ᠨᠢ ᠬᠤᠨᠢ ᠢᠮᠠᠭ᠎ᠠ ᠪᠤᠯᠭᠠᠨ ᠲᠤᠭᠯᠠᠵᠤ ᠪᠠᠶᠢᠭᠰᠠᠨ ᠠᠶᠢᠯ ᠤᠨ ᠲᠦᠢᠳᠭᠡᠷ ᠭᠡᠤᠭᠡᠳ ᠢ ᠰᠠᠨᠠᠨ ᠰᠠᠨᠠᠨ ᠰᠡᠬᠦᠷᠡᠰᠤ ᠠᠯᠲᠠᠨ ᠬᠦᠯᠢᠶᠡᠭᠰᠡᠨ ᠴᠦ ᠪᠠᠶᠢᠵᠤ ᠮᠡᠲᠡᠨ᠎ᠠ᠃ ᠲᠡᠬᠦᠨ ᠤ ᠪᠠᠷᠠᠭᠤᠨ ᠲᠠᠯ᠎ᠠ ᠳᠤᠨᠢ ᠭᠡᠲᠦᠨ ᠭᠡᠰᠡᠭ ᠱᠠᠭᠠᠵᠠᠩ ᠤᠨ ᠭᠡᠯᠲᠡᠷᠭᠡᠢ ᠴᠤᠬᠤᠶᠢᠵᠤ ᠬᠠᠷᠠᠭᠲᠠᠨ᠎ᠠ᠃ ᠪᠤᠷᠭᠠᠰᠤᠨ ︽ᠮᠤᠷᠢ︾ ᠪᠠᠨ ᠱᠤᠩ ᠲᠡᠭᠡᠷ᠎ᠠ ᠤᠶᠠᠴᠢᠬᠠᠭᠠᠳ ︽ᠭᠡᠷ︾ ᠲᠤ ᠤᠷᠤᠬᠤ ᠳᠤ᠂ ᠵᠠᠷᠭᠡᠯᠠᠳᠡᠭᠡ ᠠᠶᠢᠯ ᠤᠨ ᠰᠠᠯᠠᠭ᠎ᠠ ᠭᠡᠵᠢᠭᠡ ᠲᠠᠢ ᠵᠢᠭᠠᠬᠠᠨ ᠦᠬᠢᠨ᠄ ︽ᠦᠨᠦᠲᠦᠷ ᠴᠦ ᠬᠠᠯᠠᠭᠤᠨ ᠪᠠᠶᠢᠨ᠎ᠠ᠂ ᠮᠠᠯ ᠳᠤ ᠶᠠᠪᠤᠭᠠᠳ ᠶᠠᠲᠠᠷᠠᠵᠤ ᠤᠮᠲᠠᠭᠠᠰᠤᠭᠰᠠᠨ ᠪᠡᠶᠢᠯᠬᠦᠢ᠂ ᠬᠦᠷᠦᠭᠡᠭᠰᠡᠨ ᠴᠠᠢ ᠠᠴᠠ ᠤᠤᠭᠤᠭᠠᠷᠠᠢ︾ ᠭᠡᠵᠤ ᠭᠡᠷ ᠤᠨ ᠡᠵᠡᠭᠲᠡᠢ ᠪᠠᠷ ᠠᠪᠤᠷᠢᠯᠡᠨ᠂ ᠴᠤᠮᠴᠤᠶᠢᠵᠤ ᠰᠠᠭᠤᠴᠢᠬᠠᠭᠠᠳ︽ᠱᠠᠭᠠᠵᠠᠩ︾ ᠲᠦᠬᠦᠷᠡᠩ ᠴᠠᠢ ᠠᠶᠠᠭᠠᠯᠠᠵᠤ ᠦᠭᠬᠦᠨ᠎ᠡ᠂ ᠦᠩᠭᠡᠷᠡᠭᠰᠡᠨ ᠢᠶᠠᠨ ᠡᠷᠬᠢᠴᠡᠬᠦᠯᠦᠭᠰᠡᠨ ᠨᠠᠲᠠ ᠳᠤ ᠦᠳᠭᠡᠨ ᠬᠠᠷ᠎ᠠ ᠴᠠᠢ ᠠᠮᠲᠠᠯᠠᠭᠲᠠᠵᠤ᠂ ᠬᠤᠭᠤᠯᠠᠢ ᠬᠠᠲᠠᠨ᠎ᠠ᠃ ᠰᠤᠨᠤᠰᠤᠯᠲᠠ ᠪᠠᠷ ᠰᠠᠯᠠᠭ᠎ᠠ ᠭᠡᠵᠢᠭᠡ ᠲᠠᠢ ᠠᠶᠢᠯ ᠤᠨ ᠦᠬᠢᠨ᠂ ᠰᠤᠭᠤ ᠰᠢᠭ᠋ ᠭᠠᠩᠭᠠᠩ ᠪᠤᠯᠵᠤ᠂ ᠬᠠᠷᠢ ᠬᠦᠷᠦᠨ ᠲᠤ ᠠᠵᠢᠯᠯᠠᠨ ᠬᠠᠨᠢ ᠶᠢᠨ ᠵᠠᠶᠠᠭ᠎ᠠ ᠲᠦᠰᠢᠭᠰᠡᠨ ᠭᠡᠨ᠎ᠡ ᠁          ᠰᠢᠷᠭ᠎ᠠ ᠶᠢᠨ ᠬᠦᠲᠦᠯ ᠤᠨ ᠡᠩᠭᠡᠷ ᠲᠤ᠂ ᠤᠯᠠᠭᠠᠨ ᠲᠤᠭᠤᠰᠬᠠᠨ ᠪᠠᠶᠢᠰᠢᠩ ᠲᠡᠪᠬᠡᠶᠢᠵᠦ᠂ ᠪᠠᠶᠢᠰᠢᠩ ᠤᠨ ᠵᠡᠬᠦᠨ ᠲᠠᠯ᠎ᠠ ᠳᠤ ᠲᠤᠮᠤ ᠬᠤᠷᠤᠭ᠎ᠠ᠂ ᠡᠪᠡᠰᠤᠨ ᠬᠦᠷᠢᠶ᠎ᠠ ᠵᠢᠭᠲᠡᠷᠡᠨ ᠦᠷᠬᠦᠯᠵᠢᠯᠠᠵᠢ᠃ ᠪᠠᠶᠢᠰᠢᠩ ᠤᠨ ᠪᠠᠷᠠᠭᠤᠨ ᠬᠤᠶᠢᠨ᠎ᠠ ᠰᠡᠯᠬᠢᠨ ᠤ ᠬᠦᠴᠦ ᠪᠠᠷ ᠴᠠᠬᠢᠯᠭᠠᠨ ᠭᠠᠷᠭᠠᠬᠤ ᠮᠠᠰᠢᠨ ᠪᠤᠰᠬᠠᠭᠲᠠᠵᠤ᠂ ᠬᠦᠷᠢᠶᠠᠨ ᠳᠤ ᠪᠠᠨ ᠨᠡᠷᠠᠨ ᠤ ᠭᠡᠷᠡᠯ ᠢᠶᠠᠷ ᠴᠠᠬᠢᠯᠭᠠᠨ ᠭᠠᠷᠭᠠᠬᠤ ᠮᠠᠰᠢᠨ ᠲᠠᠯᠪᠢᠵᠠᠢ᠃ ᠭᠡᠷᠡᠭᠯᠡᠭᠡᠨ ᠤ ᠵᠦᠢᠯᠡᠰ ᠢᠶᠠᠨ ᠲᠤᠬᠢᠲᠠᠢ ᠤᠷᠤᠨ ᠳᠤᠨᠢ ᠵᠤᠬᠢᠰᠲᠠᠢ ᠲᠠᠯᠪᠢᠭᠰᠠᠨ ᠨᠢ ᠠᠵᠢᠯᠴᠢ ᠬᠦᠲᠡᠯᠮᠦᠷᠢᠴᠢ ᠠᠶᠢᠯ ᠭᠡᠰᠡᠨ ᠨᠢ ᠢᠯᠡᠭᠡᠨ ᠲᠤᠲᠤᠬᠠᠨ᠃ ᠬᠦᠮᠦᠷᠭᠡ ᠶᠢᠨ ᠡᠬᠦᠲᠡᠨ ᠳᠤ ᠦᠷᠭᠡᠨ ᠬᠦᠷᠲᠦ ᠲᠠᠢ ᠲᠡᠷᠭᠡᠨ ᠤ ᠰᠢᠨᠡᠭᠡᠨ ᠮᠦᠷ ᠳᠤᠷᠠᠶᠢᠨ᠎ᠠ᠃ ᠭᠡᠷ ᠲᠤᠨᠢ ᠬᠦᠮᠦᠨ ᠦᠭᠡᠢ ᠰᠢᠭ᠂ ᠨᠠᠮ ᠵᠢᠮ᠃ ᠡᠨᠡ ᠠᠶᠢᠯ ᠨᠢ ᠮᠠᠨ ᠤ ᠬᠢ ᠪᠢᠰᠢ᠂ ᠠᠲᠡ ᠠᠴᠠ ᠨᠡᠬᠦᠵᠦ ᠶᠠᠪᠤᠭᠠᠳ ᠨᠢᠭᠡᠨᠲᠡ ᠲᠦᠴᠢ ᠰᠢᠬᠠᠮ ᠵᠢᠯ ᠪᠤᠯᠴᠢᠬᠠᠭᠰᠠᠨ᠂ ᠬᠠᠷᠢᠨ ᠦᠭᠡᠷ᠎ᠡ ᠠᠶᠢᠯ ᠢᠷᠡᠭᠡᠳ ᠰᠠᠭᠤᠵᠤ ᠪᠠᠶᠢᠭ᠎ᠠ ᠶᠤᠮ᠃ ᠮᠠᠨ ᠤ ᠬᠢ ᠢᠮᠠᠭ᠎ᠠ ᠬᠠᠷᠢᠭᠤᠯᠲᠠᠭ ᠠᠴᠠ ᠠᠭᠤᠯᠠᠨ ᠳᠤ ᠵᠤᠬᠢᠷᠠᠨ᠎ᠠ ᠭᠡᠳ ᠠᠭᠤᠯᠠᠨ ᠳᠤ ᠨᠡᠬᠦᠯᠭᠡᠭᠰᠡᠨ ᠶᠤᠮ᠃ ᠱᠠᠩᠲᠠ ᠲᠠᠢ ᠲᠤᠬᠤᠢ ᠳᠤ ᠤᠷᠭᠤᠵᠤ ᠪᠠᠶᠢᠭᠰᠠᠨ ᠠᠷᠪᠠᠭᠠᠳ ᠬᠠᠶᠢᠯᠠᠰᠤ ᠲᠤᠮᠤᠷᠠᠨ ᠨᠠᠪᠴᠢ ᠨᠠᠮᠠᠭ᠎ᠠ ᠨᠢ ᠰᠦᠭᠯᠡᠶᠢᠵᠦ᠂ ᠰᠠᠯᠠᠭᠠᠨ ᠲᠡᠭᠡᠷ᠎ᠡ ᠨᠢ ᠭᠡᠲᠦ ᠭᠡᠲᠦᠨ ᠱᠠᠭᠠᠵᠠᠭᠠᠢ ᠡᠬᠦᠷ ᠢᠶᠠᠨ ᠵᠠᠰᠠᠵᠠᠢ᠃ ᠰᠢᠷᠭ᠎ᠠ ᠶᠢᠨ ᠬᠦᠨᠲᠡᠢ ᠳᠤ ᠦᠭᠡᠷ ᠪᠡᠯᠴᠢᠵᠦ᠂ ᠴᠠᠭᠠᠨ᠎ᠠ ᠨᠢ ᠬᠤᠨᠢᠳ ᠴᠠᠶᠢᠯᠵᠠᠨ᠎ᠠ᠃ ᠪᠠᠭ᠎ᠠ ᠶᠢᠨ ᠰᠠᠭᠤᠵᠤ ᠪᠠᠶᠢᠭᠰᠠᠨ ᠰᠢᠷᠤᠢ ᠶᠢᠨ ᠪᠠᠶᠢᠰᠢᠩ ᠢ ᠪᠤᠤ ᠭᠡᠯᠡ᠂ ᠪᠠᠭᠤᠷᠢ ᠨᠢ ᠴᠦ ᠬᠠᠷᠠᠭᠲᠠᠬᠤ ᠪᠠᠨ ᠪᠤᠯᠢᠵᠤ᠂ ᠪᠠᠭ᠎ᠠ ᠨᠠᠰᠤᠨ ᠤ ᠲᠤᠷᠠᠰᠤᠮᠵᠢ ᠯᠠ ᠤᠭᠤᠷᠠᠭ ᠲᠠᠷᠢᠬᠢᠨ ᠳᠤ ᠦᠨᠢᠲᠡ ᠰᠡᠶᠢᠯᠦᠭᠲᠡᠨ ᠦᠯᠡᠲᠡᠵᠡᠢ᠃           ᠮᠠᠰᠢᠨ ᠤ ᠲᠠᠭᠤᠨ ᠢᠶᠠᠷ ᠰᠠᠯᠠᠭ᠎ᠠ ᠭᠡᠵᠢᠭᠡ ᠲᠠᠢ ᠲᠤᠯᠤᠭ᠎ᠠ ᠨᠠᠢᠮᠠᠨ ᠨᠠᠰᠤᠨ ᠤ ᠦᠬᠢᠨ ᠬᠦᠶᠦᠨ ᠭᠠᠷᠴᠤ ᠢᠷᠡᠯ᠎ᠠ᠃ ᠬᠤᠷᠴᠠ ᠨᠠᠷᠠᠨ ᠤ ᠭᠡᠷᠡᠯ ᠳᠤ ᠬᠠᠷᠠᠴᠠ ᠨᠢ ᠬᠠᠯᠲᠤᠷᠢᠨ ᠲᠤᠯᠤᠭᠠᠢ ᠪᠠᠨ ᠭᠡᠯᠵᠢᠢᠯᠭᠡᠵᠤ ᠨᠠᠲᠠ ᠶᠢ ᠦᠵᠡᠭᠰᠡᠨ ᠢᠶᠠᠨ᠄ ᠮᠦᠮᠦ ᠡ᠂ ᠮᠦᠮᠦ ᠡ᠂ ᠮᠠᠨ ᠤ ᠳᠤ ᠬᠦᠮᠦᠨ ᠢᠷᠡᠯ᠎ᠡ ᠭᠡᠳ ᠭᠡᠷ ᠲᠤ ᠪᠠᠨ ᠤᠷᠤᠴᠢᠬᠠᠯ᠎ᠠ᠃ ᠵᠠᠷᠭᠡᠯᠠᠳᠡᠭᠡ ᠠᠶᠢᠯ ᠤᠨ ᠰᠠᠯᠠᠭ᠎ᠠ ᠭᠡᠵᠢᠭᠡ ᠲᠠᠢ ᠵᠢᠭᠠᠬᠠᠨ ᠦᠬᠢᠨ ᠲᠠᠢ ᠶᠠᠭᠠᠬᠢᠭᠰᠠᠨ ᠲᠦᠰᠦᠭᠡᠲᠡᠢ ᠪᠤᠢ︖ ᠶᠠᠮᠠᠷ ᠰᠠᠲᠤᠨ ᠨᠢ ᠪᠤᠯᠲᠠᠭ ᠪᠤᠯᠡ︖ ᠭᠡᠵᠤ ᠲᠠᠭᠠᠮᠠᠭᠯᠠᠵᠤ ᠪᠠᠶᠢᠲᠠᠯ᠎ᠠ ᠡᠬᠦᠲᠡ ᠨᠡᠭᠡᠭᠡᠭᠲᠡᠨ ᠲᠦᠴᠢᠭᠡᠳ ᠨᠠᠰᠤᠨ ᠤ ᠪᠦᠰᠡᠬᠦᠢ᠄  ᠲᠠ ᠰᠠᠶᠢᠨ ᠤᠤ︖ ᠭᠡᠵᠤ ᠮᠡᠨᠲᠦᠴᠢᠯᠡᠯ᠎ᠡ᠃ ᠰᠠᠶᠢᠨ ᠰᠠᠶᠢᠨ᠂ ᠲᠠ ᠰᠠᠶᠢᠨ ᠤᠤ ᠭᠡᠵᠤ ᠬᠠᠷᠢᠭᠤ ᠮᠡᠨᠲᠦᠴᠢᠯᠡᠵᠦ᠂ ᠵᠠᠷᠭᠡᠯᠠᠳᠡᠭᠡ ᠠᠶᠢᠯ ᠤᠨ ᠰᠠᠯᠠᠭ᠎ᠠ ᠭᠡᠵᠢᠭᠡ ᠲᠠᠢ ᠵᠢᠭᠠᠬᠠᠨ ᠦᠬᠢᠨ ᠤ ᠲᠦᠷᠢ ᠲᠡᠬᠢᠨ ᠲᠠᠷᠢᠬᠢᠨ ᠳᠤ ᠡᠷᠬᠢᠯᠲᠤᠯ᠎ᠠ ᠂ ᠬᠠᠷᠢ ᠳᠤ ᠬᠠᠨᠢ ᠶᠢᠨ ᠵᠠᠶᠠᠭ᠎ᠠ ᠲᠦᠰᠢᠭᠰᠡᠨ ᠭᠡᠵᠤ ᠰᠤᠨᠤᠰᠤᠭᠰᠠᠨ ᠮᠠᠨᠢ ᠪᠤᠷᠤᠭᠤᠲᠠᠭ᠎ᠠ ᠪᠤᠯ ᠤᠤ⁈           ᠲᠤᠰᠤ ᠬᠦᠪᠪᠦᠭᠰᠡᠨ ᠰᠦ ᠲᠠᠢ ᠴᠠᠢ ᠪᠠᠷ ᠠᠶᠠᠨ ᠤ ᠶᠠᠲᠠᠷᠠᠭ᠎ᠠ ᠪᠠᠨ ᠲᠠᠶᠢᠯᠵᠤ᠂ ᠬᠠᠲᠠᠭᠠᠭᠰᠠᠨ ᠮᠢᠬ᠎ᠠ ᠬᠠᠭᠤᠷᠠᠭᠰᠠᠨ ᠠᠮᠤ ᠪᠠᠷ ᠦᠯᠦᠰᠦᠭᠰᠡᠨ ᠬᠤᠲᠤᠭᠤᠲᠤ ᠪᠠᠨ ᠮᠢᠯᠢᠶᠠᠯ᠎ᠠ᠃ ᠨᠠᠰᠤ ᠪᠠᠷ ᠲᠡᠬᠦᠦ ᠬᠦᠮᠦᠨ ᠤ ᠪᠦᠰᠡᠬᠦᠢ ᠶᠢᠨ ᠤᠷᠤᠭᠤᠯ ᠠᠮᠠ ᠠᠴᠠ ᠨᠢ ᠲᠠᠲᠠᠵᠤ᠂ ᠬᠤᠯᠠ ᠤᠶᠢᠷ᠎ᠠ᠂ ᠦᠩᠭᠡᠷᠡᠭᠰᠡᠨ ᠤᠲᠤ ᠭᠡᠵᠤ ᠯᠠ ᠶᠠᠷᠢᠶ᠎ᠠ ᠲᠡᠯᠭᠡᠯ᠎ᠡ᠃ ᠶᠠᠷᠢᠯᠴᠠᠭᠠᠨ ᠤ ᠲᠤᠮᠲᠠ ᠠᠴᠠ ᠵᠠᠷᠭᠡᠯᠠᠳᠡᠭᠡ ᠠᠶᠢᠯ ᠤᠨ ᠰᠠᠯᠠᠭ᠎ᠠ ᠭᠡᠵᠢᠭᠡ ᠲᠠᠢ ᠵᠢᠭᠠᠬᠠᠨ ᠦᠬᠢᠨ ᠡᠨᠡ ᠪᠦᠰᠡᠬᠦᠢ ᠶᠢᠨ ᠭᠤᠷᠪᠠᠲᠤᠭᠠᠷ ᠡᠭᠡᠴᠢ ᠭᠡᠰᠡᠨ ᠢ ᠮᠡᠲᠡᠯ᠎ᠠ᠃ ᠲᠡᠮ ᠤᠨ ᠦᠭᠡ ᠴᠦ ᠬᠠᠶᠠ ᠳᠤ ᠪᠠᠨ ᠦᠨᠡᠨ ᠪᠠᠶᠢᠲᠠᠭ ᠯᠠ ᠶᠤᠮ ᠪᠠᠶᠢᠨ᠎ᠠ᠃ ᠡᠨᠡ ᠠᠶᠢᠯ ᠮᠠᠨ ᠤ ᠬᠢ ᠨᠡᠬᠦᠵᠦ ᠶᠠᠪᠤᠭᠰᠠᠨ ᠤ ᠲᠠᠷᠠᠭ᠎ᠠ ᠬᠠᠪᠤᠷ ᠨᠢ ᠠᠲᠡ ᠨᠡᠬᠦᠨ ᠢᠷᠡᠭᠡᠳ ᠤᠲᠤ ᠪᠤᠯᠲᠠᠯ᠎ᠠ ᠰᠠᠭᠤᠵᠤ ᠪᠠᠶᠢᠭ᠎ᠠ ᠠᠵᠠᠢ᠃ ᠠᠪᠤ ᠡᠵᠢ ᠨᠢ ᠪᠤᠷᠬᠠᠨ ᠪᠤᠯᠵᠤ᠂ ᠬᠠᠮᠤᠭ ᠤᠨ ᠪᠠᠭ᠎ᠠ ᠬᠠᠮᠠᠷ ᠤᠨ ᠦᠵᠦᠬᠦᠷ ᠪᠤᠯᠤᠭᠰᠠᠨ ᠢᠶᠠᠷ ᠨᠤᠲᠤᠭ ᠢᠶᠠᠨ ᠰᠡᠬᠢᠵᠦ ᠰᠠᠭᠤᠭ᠎ᠠ ᠨᠢ ᠡᠨᠡ ᠪᠠᠶᠢᠵᠠᠢ᠃ ᠶᠡᠭᠡ ᠰᠤᠷᠭᠠᠭᠤᠯᠢ ᠶᠢᠨ ᠰᠢᠯᠭᠠᠯᠲᠠ ᠶᠢ ᠰᠡᠷᠬᠦᠭᠡᠭᠰᠡᠨ ᠤᠨ ᠵᠢᠯ  ᠤᠳ ᠲᠤ ᠲᠦᠷᠦᠭᠰᠡᠨ ᠪᠤᠯᠬᠤᠷ᠂ ᠠᠵᠠ ᠶᠢᠨ ᠲᠡᠭᠷᠢ ᠨᠤᠮ ᠤᠨ ᠴᠠᠭᠠᠨ ᠪᠤᠶᠠᠨ ᠡᠭᠡᠴᠢ ᠲᠡᠬᠦᠦ ᠲᠠᠪᠤᠭᠤᠯᠠ ᠶᠢ ᠢᠪᠡᠭᠡᠵᠦ᠂ ᠶᠡᠭᠡ ᠡᠭᠡᠴᠢ᠂ ᠬᠤᠶᠠᠲᠤᠭᠠᠷ ᠡᠭᠡᠴᠢ  ᠨᠢ ᠤᠯᠤᠰ ᠤᠨ ᠠᠯᠪᠠᠲᠠᠨ ᠢᠶᠠᠷ᠂ ᠪᠠᠭ᠎ᠠ ᠡᠭᠡᠴᠢ ᠨᠢ ᠬᠤᠪᠢ ᠶᠢᠨ ᠵᠢᠵᠢᠭ ᠦᠢᠯᠡᠳᠪᠦᠷᠢ ᠲᠠᠢ᠂ ᠠᠵᠢᠯ ᠦᠢᠯᠡᠰ ᠨᠢ ᠠᠮᠵᠢᠯᠲᠠ ᠲᠦᠬᠦᠷᠠᠩ᠂ ᠪᠠᠶᠠᠨ ᠲᠠᠩᠰᠤᠭ ᠠᠮᠢᠲᠤᠷᠠᠵᠤ ᠪᠠᠶᠢᠭ᠎ᠠ ᠶᠤᠮ ᠪᠠᠶᠢᠨ᠎ᠠ᠃            ᠠᠵᠢᠯᠴᠢ ᠬᠦᠮᠦᠨ ᠳᠤ ᠠᠮᠢᠲᠤᠷᠠᠯ ᠦᠭᠡᠲᠡᠷᠭᠡᠭ ᠪᠠᠶᠢᠲᠠᠭ᠃ ᠡᠲᠡᠨ ᠤ ᠬᠢ ᠪᠠᠶᠢᠰᠢᠩ ᠢᠶᠠᠨ ᠮᠤᠩᠭᠤᠯ ᠤᠭᠠᠯᠵᠠ ᠲᠠᠢ ᠬᠠᠨ᠎ᠠ ᠶᠢᠨ ᠴᠠᠭᠠᠰᠤ ᠪᠠᠷ ᠴᠢᠮᠠᠨ᠂ ᠲᠤᠯᠠᠭᠠᠮᠵᠢ‌ᠵᠢᠨ ᠭᠡᠰᠡᠭ ᠢᠶᠠᠨ ᠦᠯᠵᠡᠢ ᠵᠠᠩᠬᠢᠶ᠎ᠠ ᠰᠡᠭᠡᠭᠡ ᠲᠠᠢ ᠮᠤᠲᠤ ᠪᠠᠷ ᠪᠦᠷᠢᠵᠦ᠂ ᠠᠲᠠᠷ ᠲᠤ ᠪᠠᠨ ᠪᠤᠯᠤᠷ ᠬᠢᠴᠡᠲᠠᠢ ᠡᠯᠬᠦᠭᠡᠷ ᠳ᠋ᠧᠩ ᠲᠡᠭᠦᠵᠢᠯᠡᠵᠡᠢ᠃ ᠬᠦᠯᠲᠡᠭᠡᠬᠦᠷ᠂ ᠲᠧᠯᠸᠢᠰ ᠭᠡᠳ ᠨᠢᠲᠤᠨ ᠳᠤ ᠲᠤᠷᠤᠭᠰᠠᠨ ᠪᠦᠬᠦᠲᠡ ᠬᠠᠮᠤᠭ ᠰᠢᠨ᠎ᠠ ᠭᠡᠯᠪᠡᠷᠢ ᠶᠢᠨ ᠬᠢ ᠪᠠᠶᠢᠵᠤ᠂ ᠪᠠᠷᠠᠭᠤᠨ ᠭᠡᠷᠡᠮ ᠢᠶᠠᠨ ᠤᠷᠠᠨ ᠪᠢᠴᠢᠯᠭᠡ ᠶᠢᠨ ᠪᠦᠲᠦᠭᠡᠯ ᠢᠶᠠᠷ ᠶᠠᠩᠵᠤᠯᠠᠨ᠂ ᠬᠤᠶᠢᠨ᠎ᠠ ᠭᠡᠷᠡᠮ ᠳᠤ ᠪᠠᠨ ᠪᠤᠭᠲᠠ ᠡᠵᠡᠨ ᠤ ᠬᠦᠷᠦᠭ ᠢ ᠲᠠᠬᠢᠭᠰᠠᠨ ᠪᠠᠶᠢᠯ᠎ᠠ᠃ ᠨᠠᠷᠠ ᠰᠠᠷᠠᠨ ᠤ ᠤᠷᠴᠢᠯ ᠰᠤᠯᠢᠭᠲᠠᠯ ᠢᠶᠠᠷ ᠡᠲᠦᠷ ᠬᠤᠨᠤᠭ ᠡᠭᠡᠯᠵᠢᠯᠡᠵᠦ᠂ ᠨᠠᠪᠴᠢ ᠴᠡᠴᠡᠭ ᠤᠨ ᠵᠤᠯᠭᠠᠷᠠᠯ ᠴᠡᠴᠡᠭᠯᠡᠯ ᠢᠶᠠᠷ ᠤᠨ ᠵᠢᠯ ᠤᠯᠠᠷᠢᠵᠤ᠂ ᠨᠡᠶᠢᠭᠡᠮ ᠤᠨ ᠬᠦᠭᠵᠢᠯ ᠪᠠᠲᠠᠷᠠᠯ ᠢᠶᠠᠷ ᠲᠦᠮᠡᠨ ᠤ ᠠᠮᠢᠲᠤᠷᠠᠯ ᠬᠦᠷᠦᠩᠭᠡᠵᠢᠨ ᠦᠩᠭᠡᠵᠢᠲᠡᠭ ᠰᠠᠨ᠃ ᠭᠠᠭᠴᠠ ᠲᠠᠰᠤᠯᠭ᠎ᠠ ᠰᠢᠪᠠᠷ ᠪᠠᠶᠢᠰᠢᠩ ᠳᠤ ᠰᠢᠬᠠᠯᠲᠤᠨ᠂ ᠶᠠᠭᠤᠮ᠎ᠠ ᠪᠤᠯᠭᠠᠨ ᠢᠶᠠᠷ ᠲᠤᠲᠠᠭᠲᠠᠵᠤ᠂ ᠵᠢᠯ ᠪᠤᠯᠭᠠᠨ ᠤ ᠪᠠᠷᠢᠭᠠᠲᠠ ᠶᠢᠨ ᠭᠡᠰᠢᠬᠦᠳ ᠤᠨ ᠬᠤᠷᠠᠯ ᠢᠶᠠᠷ ᠰᠡᠳᠬᠢᠯ ᠢᠶᠠᠨ ᠠᠷᠭᠠᠲᠠᠨ᠂ ᠬᠤᠪᠢᠨ ᠤ ᠭᠡᠰᠡᠨ ᠬᠦᠷᠦᠩᠭᠡ ᠦᠭᠡᠢ ᠲᠡᠷᠡ ᠬᠤᠯᠠ ᠶᠢᠨ ᠪᠤᠷᠤ ᠡᠲᠦᠷ ᠰᠢᠷ᠎ᠠ ᠬᠤᠨᠤᠭ ᠡᠷᠬᠢᠯᠲᠡ ᠦᠭᠡᠢ ᠵᠠᠮᠬᠠᠷᠠᠵᠠᠢ᠃ ᠲᠡᠷᠡ ᠴᠠᠭ ᠤᠨ ᠵᠢᠷᠭᠠᠯ ᠵᠤᠪᠠᠯ ᠢ ᠦᠩᠭᠡᠷᠡᠬᠦᠯᠵᠦ ᠢᠷᠡᠭᠰᠡᠨ ᠬᠦᠮᠦᠰ ᠤᠨ ᠦᠷ᠎ᠡ ᠬᠤᠶᠢᠴᠢᠰ ᠲᠤ ᠪᠠᠨ ᠰᠤᠷᠭᠠᠯ ᠬᠠᠶᠢᠷᠠᠯᠠᠬᠤ ᠦᠨᠢᠲᠡ ᠶᠢᠨ ᠰᠠᠲᠤᠪ ᠪᠤᠯᠵᠤ ᠬᠤᠴᠤᠷᠴᠠᠢ᠃ ︽ᠬᠠᠭᠤᠴᠢᠨ ᠶᠠᠭᠤᠮ᠎ᠠ ᠤᠯᠠ ᠪᠤᠯᠵᠤ ᠰᠢᠨ᠎ᠠ ᠶᠠᠭᠤᠮ᠎ᠠ ᠵᠤᠯᠠ ᠪᠤᠯᠤᠨ᠎ᠠ︾ ᠭᠡᠭᠴᠢ ᠡᠨᠡ ᠪᠠᠶᠢᠬ᠎ᠠ᠃           ᠬᠦᠮᠦᠨ ᠴᠠᠭ ᠦᠶ᠎ᠠ ᠶᠢ ᠰᠤᠩᠭᠤᠬᠤ ᠡᠷᠭᠡ ᠪᠠᠶᠢᠲᠠᠭ ᠦᠭᠡᠢ᠂ ᠴᠠᠭ ᠦᠶ᠎ᠠ ᠯᠠ ᠬᠦᠮᠦᠨ ᠤ ᠠᠮᠢᠲᠤᠷᠠᠯ ᠢ ᠨᠦᠯᠦᠭᠡᠯᠡᠲᠡᠭ ᠰᠠᠨ᠃ ᠰᠢᠨ᠎ᠠ ᠮᠢᠩᠭᠠᠨ ᠰᠢᠨ᠎ᠠ ᠵᠠᠭᠤᠨ ᠳᠤ ᠰᠢᠨ᠎ᠠ ᠴᠠᠭ ᠦᠶ᠎ᠡ ᠶᠢᠨ ᠰᠠᠶᠢᠨ ᠰᠠᠶᠢᠬᠠᠨ ᠢ ᠬᠦᠷᠲᠡᠨ᠎ᠠ ᠭᠡᠭᠴᠢ ᠶᠠᠭᠤᠲᠠᠢ ᠠᠵᠠᠲᠠᠢ᠂ ᠶᠠᠭᠤᠲᠠᠢ ᠵᠢᠷᠭᠠᠯᠲᠠᠢ᠃           ᠡᠶᠢᠮᠦ ᠯᠠ ᠰᠠᠶᠢᠬᠠᠨ ᠨᠤᠲᠤᠭ ᠠᠴᠠ ᠲᠡᠶᠢᠮᠦ ᠯᠠ ᠰᠤᠲᠤᠨ ᠬᠦᠮᠦᠨ ᠢ ᠵᠠᠶᠠᠭᠠᠲᠠᠭ  ᠶᠤᠮ  ᠪᠠᠶᠢᠬ᠎ᠠ  ᠳ᠋ᠠ  ᠂ ᠨᠤᠲᠤᠭ ᠨᠢ ᠲᠡᠨᠢᠭᠡᠷ ᠪᠠᠶᠢᠲᠠᠭ ᠠᠴᠠ ᠬᠦᠮᠦᠨ ᠨᠢ ᠭᠡᠲᠡᠭᠡᠷ ᠪᠠᠶᠢᠲᠠᠭ ᠭᠡᠭᠴᠢ ᠦᠨᠡᠨ ᠦᠭᠡ᠃ ᠬᠤᠲᠠ ᠳᠤ ᠯᠠ ᠪᠠᠶᠢᠲᠠᠭ ᠪᠦᠬᠦᠨ ᠤᠲᠤ ᠬᠦᠲᠡᠭᠡ ᠳᠤ ᠴᠦ ᠠᠪ ᠠᠲᠠᠯᠢᠠᠬᠨ ᠪᠠᠶᠢᠨ᠎ᠠ᠃ ᠴᠠᠭ ᠦᠶ᠎ᠡ  ᠶᠢᠨ ᠤᠷᠤᠰᠬᠠᠯ ᠨᠡᠶᠢᠭᠡᠮ ᠤᠨ ᠬᠦᠭᠵᠢᠯᠲᠡ ᠭᠡᠵᠤ ᠨᠢᠭᠡ ᠪᠤᠲᠤᠬᠤ ᠳᠤ ᠦᠨᠡᠨ ᠠᠶᠤᠮᠰᠢᠭᠲᠠᠢ ᠴᠦ ᠶᠤᠮ ᠤᠤ︖ ᠶᠢᠰᠦᠨ ᠲᠦᠷᠦᠯ ᠳᠤ ᠪᠠᠨ ᠪᠤᠲᠤᠵᠤ ᠤᠯᠤᠭ᠎ᠠ ᠦᠭᠡᠢ ᠵᠦᠢᠯᠡᠰ ᠨᠢᠭᠡ ᠮᠡᠲᠡᠬᠦ ᠳᠤ ᠯᠠ ᠬᠠᠵᠠᠭᠤ ᠳᠤ ᠴᠢᠨᠢ ᠢᠷᠡᠴᠢᠭᠡᠭᠰᠡᠨ ᠨᠢ ᠭᠠᠶᠢᠬᠠᠯᠲᠠᠢ᠃ ᠪᠠᠭ᠎ᠠ ᠪᠠᠶᠢᠬᠤ ᠳᠤ ᠴᠠᠭᠠᠨ ᠰᠠᠷ᠎ᠠ ᠶᠢ ᠬᠤᠷᠤᠭᠤ ᠲᠠᠷᠤᠨ ᠬᠦᠯᠢᠶᠡᠲᠡᠭ ᠴᠠᠭ ᠮᠦᠴᠡ ᠪᠠᠶᠢᠭᠰᠠᠨ᠃ ᠲᠦᠷᠦᠯ ᠰᠠᠲᠤᠨ᠂ ᠠᠶᠢᠯ ᠬᠦᠷᠰᠢ ᠭᠡᠵᠤ ᠢᠯᠭᠠᠯ ᠦᠭᠡᠢ ᠠᠮᠤᠷ ᠡᠷᠢᠨ ᠰᠦᠬᠦᠷᠡᠨ ᠵᠤᠯᠭᠠᠵᠤ ᠪᠠᠶᠢᠭ᠎ᠠ ᠴᠦ ᠭᠡᠤᠭᠡᠳ  ᠤᠨ ᠰᠠᠨᠠᠭ᠎ᠠ ︽ᠬᠤᠪᠢ︾ ᠲᠡᠭᠡᠷ᠎ᠡ ᠯᠠ ᠲᠤᠭᠲᠠᠲᠠᠭ ᠪᠠᠶᠢᠭᠰᠠᠨ᠃ ᠢᠯᠡᠬᠦᠦ ᠭᠡᠲᠦᠨ ᠰᠢᠬᠢᠷ ᠪᠠᠶᠢᠬᠤ ᠪᠤᠯ ᠤᠤ ᠭᠡᠵᠤ ᠬᠤᠶᠠᠷ ᠭᠠᠷ ᠲᠤ ᠪᠠᠭᠲᠠᠮ᠎ᠠ ᠦᠭᠡᠢ ᠤᠭᠤᠲᠠ ᠲᠠᠢ ︽ᠬᠤᠪᠢ︾ ᠪᠠᠨ ᠶᠡᠭᠡ ᠬᠦᠮᠦᠨ ᠠᠴᠠ ᠨᠢᠭᠤᠵᠤ ᠦᠵᠡᠬᠦ ᠳᠤ ᠬᠤᠶᠠᠷᠬᠠᠨ ᠰᠢᠬᠢᠷ᠂ ᠨᠡᠯᠢᠶᠡᠳ ᠲᠤᠭᠠᠨ ᠤ ᠬᠠᠷ᠎ᠠ ᠴᠢᠪᠠᠭ᠎ᠠ᠂ ᠭᠠᠭᠴᠠ ᠡᠯᠵᠢᠭᠡᠨ ᠴᠢᠬᠢ ᠠᠴᠠ ᠪᠤᠰᠤᠳ ᠨᠢ ᠪᠦᠷ ᠯᠠ ︽ᠡᠭᠦᠯᠡᠨ ᠪᠤᠭᠤᠷᠰᠤᠭ︾ ᠪᠠᠶᠢᠲᠠᠭ᠂ ᠪᠠᠷᠤᠭ ᠯᠠ ᠠᠶᠢᠯ ᠪᠤᠯᠭᠠᠨ ᠤ ᠦᠭᠬᠦᠭᠰᠡᠨ ᠬᠤᠪᠢ ᠨᠢ ᠠᠲᠠᠯᠢᠪᠲᠤᠷ᠃ ᠰᠢᠬᠢᠷ ᠢᠶᠠᠨ ᠭᠡᠲᠦ ᠰᠢᠮᠡᠭᠰᠡᠨ ᠢᠶᠠᠨ ᠴᠠᠭᠠᠰᠳ ᠳᠤᠨᠢ ᠲᠠᠬᠢᠨ ᠪᠤᠭᠤᠴᠢᠬᠠᠭᠠᠳ ᠬᠠᠷᠮᠠᠯᠠᠴᠢᠬᠠᠲᠠᠭ ᠲᠡᠷᠡ ᠦᠶ᠎ᠡ ᠪᠠᠨ ᠪᠢ ᠲᠤᠷᠠᠰᠬᠤ ᠲᠤᠷᠠᠲᠠᠢ᠂ ᠰᠢᠬᠢᠷ ᠨᠢ ᠲᠠᠩᠴᠤ ᠠᠮᠲᠠᠲᠠᠢ ᠶᠤᠮ ᠡ︕           ᠭᠠᠲᠠᠭᠰᠢ ᠬᠠᠷᠠᠬᠤ ᠳᠤ ᠪᠤᠭ ᠮᠠᠯ ᠤᠳ ᠰᠢᠷᠭ᠎ᠠ ᠶᠢᠨ ᠬᠦᠨᠲᠡᠢ ᠶᠢᠨ ᠡᠮᠦᠨ᠎ᠡ ᠪᠠᠶᠢᠭ᠎ᠠ ᠵᠢᠵᠢᠭ ᠲᠤᠪᠤᠷᠴᠠᠭ ᠢᠶᠠᠷ ᠬᠤᠲᠠ ᠤᠷᠤᠭᠤ ᠪᠠᠨ ᠭᠡᠯᠬᠢᠶ᠎ᠠ ᠭᠡᠯᠬᠢᠶ᠎ᠠ ᠰᠤᠨᠲᠤᠷ ᠰᠢᠭ᠋ ᠴᠤᠪᠤᠷᠠᠯᠲᠤᠵᠤ᠂ ᠦᠲᠡᠯᠡᠬᠦ ᠴᠠᠭ ᠪᠤᠯᠵᠤ ᠪᠠᠶᠢᠭ᠎ᠠ ᠠᠵᠠᠢ᠃ ᠦᠷᠦᠮ᠎ᠡ ᠲᠠᠢ ᠠᠮᠤ᠂ ᠲᠤᠰᠤ ᠲᠠᠢ ᠴᠠᠢ ᠤᠤᠭᠤᠭᠰᠠᠨ ᠠᠴᠠ ᠪᠡᠶ᠎ᠡ ᠨᠤᠵᠤᠭᠤᠷᠠᠨ‌ᠨᠤᠶᠢᠷ ᠬᠦᠷᠴᠦ ᠪᠠᠶᠢᠪᠠᠴᠣ ᠬᠠᠷ᠎ᠠ ᠬᠦᠮᠦᠨ ᠨᠢ ᠡᠵᠡᠬᠦᠢ ᠠᠶᠢᠯ ᠳᠤ ᠦᠲᠡ ᠶᠢᠨ ᠠᠮᠠᠷᠠᠯᠲᠠ   ᠪᠠᠨ ᠠᠪᠴᠢᠮᠠᠷ  ᠪᠢᠰᠢ ᠯᠠ  ᠳ᠋ᠠ  ᠂ ᠮᠠᠰᠢᠨ ᠢᠶᠠᠨ ᠭᠠᠯᠯᠠᠨ ᠵᠠᠮ ᠢᠶᠠᠨ ᠬᠦᠭᠡᠭᠡᠬᠦ ᠯᠠ ᠭᠡᠷᠡᠭᠲᠡᠢ ᠪᠤᠯᠵᠠᠢ᠃            — ᠦᠲᠠ ᠭᠤᠤᠯᠯᠠᠵᠤ ᠬᠠᠯᠠᠭᠤᠨ ᠪᠠᠶᠢᠨ᠎ᠠ᠂ ᠠᠬ᠎ᠠ ᠠᠮᠠᠷᠠᠭᠠᠳ ᠶᠠᠪᠤᠯ ᠳ᠋ᠠ︕            — ᠵᠠᠮ ᠬᠤᠯᠠ ᠪᠠᠶᠢᠨ᠎ᠠ᠂ ᠠᠪᠤ ᠡᠵᠢ ᠮᠢᠨᠢ ᠨᠠᠲᠠ ᠶᠢ ᠬᠦᠯᠢᠶᠠᠵᠤ ᠪᠠᠶᠢᠬᠤ᠂ ᠪᠠᠶᠠᠷᠲᠠᠢ ᠭᠡᠳ ᠵᠠᠮ ᠳᠤ ᠪᠠᠨ ᠤᠷᠤᠯ᠎ᠠ᠃            ᠰᠢᠷᠭ᠎ᠠ ᠶᠢᠨ ᠭᠤᠤᠯ ᠤᠨ ᠬᠦᠪᠡᠭᠡᠨ ᠳᠤ ᠢᠷᠡᠯ᠎ᠠ᠃ ᠡᠪᠤᠲᠦᠭ ᠲᠠᠪᠠᠮ᠎ᠠ ᠤᠰᠤ ᠲᠠᠢ ᠰᠢᠷᠭ᠎ᠠ ᠶᠢᠨ ᠭᠤᠤᠯ ᠱᠠᠭᠠᠨᠲᠤ ᠬᠦᠷᠦᠮ᠎ᠡ ᠦᠭᠡᠢ ᠤᠰᠤ ᠲᠠᠢ ᠪᠤᠯᠵᠤ᠂ ᠭᠡᠷ ᠤᠨ ᠪᠦᠰᠡᠯᠡᠬᠦᠷ ᠭᠡᠮᠡᠷᠭᠡᠨ ᠬᠠᠷᠠᠭᠲᠠᠨ᠎ᠠ᠃ ᠵᠤᠨ ᠤ ᠬᠠᠯᠠᠭᠤᠨ ᠪᠤᠯᠬᠤ ᠪᠠᠷ ᠠᠬ᠎ᠠ ᠲᠡᠬᠦᠦ ᠭᠡᠲᠦᠬᠦᠯᠡ ᠪᠠᠨ ᠰᠠᠯᠠᠭ᠎ᠠ ᠤᠷᠤᠰᠬᠠᠯ ᠢ ᠨᠢ ᠬᠠᠰᠢᠵᠤ ᠪᠠᠶᠢᠭᠠᠳ ᠤᠰᠤ ᠤᠮᠪᠠᠲᠠᠭ ᠪᠠᠶᠢᠭᠰᠠᠨ ᠶᠤᠮ᠃ ︽ᠨᠠᠮᠤᠷ ᠭᠤᠤᠯ ᠤᠨ ᠤᠰᠤᠨ ᠳᠤ ᠤᠷᠤᠪᠠᠯ ᠰᠢᠷᠪᠤᠰᠤ ᠲᠠᠲᠠᠨ᠎ᠠ︾ ᠭᠡᠵᠤ ᠡᠵᠢ ᠦᠷᠬᠦᠯᠵᠢ ᠦᠬᠦᠯᠡᠲᠡᠭ ᠪᠤᠯᠬᠤ  ᠪᠠᠷ ᠪᠢᠲᠠ ᠭᠡᠲᠦᠬᠦᠯᠡ ᠴᠦ ᠠᠶᠤᠭᠠᠳ ᠦᠭᠡ ᠪᠠᠷ ᠪᠠᠶᠢᠲᠠᠭ᠃ ᠡᠪᠤᠯ ᠪᠤᠯᠬᠤ ᠪᠠᠷ ᠨᠢ ᠰᠢᠷᠭ᠎ᠠ ᠶᠢᠨ ᠭᠤᠤᠯ ᠡᠷᠬᠢ ᠪᠠᠨ ᠲᠠᠯᠠᠨ ᠲᠠᠰ ᠬᠦᠯᠲᠡᠵᠦ᠂ ᠮᠠᠯ ᠤᠨᠤᠭ᠎ᠠ ᠭᠤᠤᠯ ᠲᠤᠭᠤᠯᠵᠤ ᠲᠡᠶᠢᠯᠬᠦ ᠦᠭᠡᠢ ᠪᠤᠯᠲᠠᠭ ᠠᠴᠠ ᠤᠭᠤᠲᠠ ᠪᠠᠷ ᠡᠯᠡᠰᠤ ᠰᠢᠷᠤᠢ ᠵᠦᠭᠡᠭᠡᠨ ᠬᠠᠷᠠᠤ ᠭᠠᠷᠭᠠᠲᠠᠭ ᠁             ᠤᠰᠤᠨ ᠳᠤ ᠢᠷᠡᠵᠦ ᠪᠤᠢ ᠮᠠᠯ ᠢ ᠪᠤᠤ ᠦᠷᠬᠦᠭᠡᠴᠢᠭᠡᠶ᠎ᠡ ᠭᠡᠳ ᠭᠤᠤᠯ ᠤᠨ ᠤᠰᠤ ᠠᠴᠠ ᠨᠢ ᠵᠤᠯᠠᠢ ᠳᠤ ᠪᠠᠨ ᠱᠠᠪᠰᠢᠵᠤ᠂ ᠰᠢᠷᠭ᠎ᠠ ᠶᠢᠨ ᠠᠶᠢᠯ ᠢ ᠡᠷᠬᠢᠵᠦ ᠬᠠᠷᠠᠨ ᠬᠠᠷᠠᠭᠰᠠᠭᠠᠷ ᠵᠠᠮ ᠢᠶᠠᠨ ᠡᠯᠬᠦᠯ᠎ᠡ᠃
ᠢᠷᠡᠯᠲᠡ᠄ ᠤᠷᠠᠳ ᠤᠨ ᠲᠤᠮᠳᠠᠳᠤ ᠬᠤᠰᠢᠭᠤᠨ ᠤ ᠵᠠᠰᠠᠭ ᠤᠨ ᠤᠷᠳᠤᠨ ᠤ ᠮᠤᠩᠭᠤᠯ ᠰᠦᠯᠵᠢᠶ᠎ᠡ