ᠪᠠᠷᠢᠭᠠᠲᠠ ᠶᠢᠨ ᠰᠤᠷᠭᠠᠭᠤᠯᠢ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2021/3/24
         ᠲᠠᠷᠠᠭ ᠠᠶᠢᠷᠠᠭ ᠤᠨ ᠱᠠᠩᠳᠠᠭᠤᠨ ᠦᠨᠦᠷ ᠬᠠᠩᠬᠤᠯᠵᠤ ᠲᠠᠯ᠎ᠠ ᠨᠤᠲᠤᠭ ᠲᠤ ᠲᠠᠩᠰᠤᠭ ᠨᠠᠮᠤᠷ ᠰᠠᠭᠠᠲᠠᠯ᠎ᠠ᠃ ᠬᠦᠩᠭᠡᠨ ᠨᠤᠶᠢᠷ ᠲᠠᠢ ᠰᠤᠷᠭᠠᠭᠤᠯᠢ ᠶᠢᠨ ᠬᠦᠷᠢᠶ᠎ᠡ ᠬᠦᠯ ᠤᠨ ᠦᠢᠮᠡᠭᠡᠨ ᠳᠤ ᠰᠡᠷᠢᠴᠢᠭᠡᠯ᠎ᠡ᠃ ᠴᠡᠴᠡᠭ ᠬᠤᠸᠠᠷ ᠵᠤᠯᠭᠠᠷᠠᠬᠤ ᠨᠢ ᠵᠤᠯᠭᠠᠷᠠᠵᠤ ᠬᠤᠷᠪᠤᠶᠢᠬᠤ ᠨᠢ ᠬᠤᠷᠪᠤᠶᠢᠭᠰᠠᠨ ᠴᠦ ᠵᠢᠭᠠᠨ ᠰᠤᠷᠭᠠᠬᠤ ᠠᠰᠠᠷ  ᠤᠨ ᠡᠮᠦᠨᠡᠬᠢ ᠲᠤᠷᠠᠰᠬᠠᠯ ᠤᠨ ᠬᠦᠰᠢᠶᠡᠨ ᠤ ᠬᠤᠶᠠᠷ ᠲᠠᠯ᠎ᠠ ᠳᠤ ᠤᠷᠭᠤᠭᠰᠠᠨ ᠪᠤᠯᠪᠠᠷᠠᠢ ᠦᠷ᠎ᠡ ᠠᠮᠢᠵᠢᠷᠠᠯ ᠤᠨ ᠤᠶᠠᠩᠭ᠎ᠠ ᠲᠠᠢ ᠮᠠᠷᠭᠠᠰᠢ ᠪᠠᠨ ᠵᠡᠬᠦᠲᠦᠯᠡᠵᠦ᠂ ᠰᠢᠷᠭᠠᠯ ᠨᠠᠮᠤᠷ ᠤᠨ ᠰᠢᠵᠢᠷ ᠲᠤᠶᠠᠭᠠᠨ ᠳᠤ ᠪᠦᠪᠡᠶᠢᠯᠡᠭᠲᠡᠨ ᠠᠲᠡ ᠲᠡᠨᠲᠡ ᠦᠭᠡᠢ ᠵᠤᠮᠠᠯᠵᠠᠨ ᠮᠦᠰᠢᠶᠡᠨ᠎ᠡ᠃ ᠴᠢᠨᠠᠭᠰᠢᠯᠠᠭᠠᠳ ᠵᠢᠭᠲᠡ ᠲᠠᠷᠢᠭᠰᠠᠨ ᠤᠨᠵᠢᠭᠠᠷ ᠤᠲᠠᠨ ᠤ ᠲᠤᠤᠭᠤᠷ ᠠᠯᠬᠤᠯᠠᠬᠤ ᠳᠤ ᠨᠠᠪᠴᠢ ᠨᠠᠮᠠᠭ᠎ᠠ ᠨᠢ ᠬᠠᠴᠠᠷ ᠱᠦᠷᠬᠦᠭᠡᠨ ᠦᠩᠭᠡᠷᠡᠬᠦ ᠳᠤ ᠡᠵᠢ ᠶᠢᠨ ᠮᠢᠨᠢ ᠡᠨᠡᠷᠢᠩᠬᠦᠢ  ᠢᠯᠪᠢᠯᠲᠡ  ᠰᠢᠭ  ᠰᠠᠨᠠᠭᠲᠠᠨ᠎ᠠ  ᠃        ᠦᠨᠲᠦᠷ ᠲᠡᠭᠷᠢ ᠠᠴᠠ ᠦᠩ ᠲᠡᠯᠡᠭᠡᠢ ᠳᠤ ᠬᠦᠷᠲᠡᠯ᠎ᠠ ᠠᠮᠢᠰᠬᠤᠯ ᠤᠨ ᠵᠠᠢ᠂ ᠦᠴᠦᠭᠡᠲᠦᠷ ᠠᠴᠠ ᠦᠨᠦᠲᠦᠷ ᠪᠤᠯᠲᠠᠯ᠎ᠠ ᠲᠤᠭ ᠭᠡᠬᠦ ᠶᠢᠨ ᠵᠠᠢ᠃ ᠭᠡᠤᠭᠡᠳ  ᠠᠴᠠ ᠭᠡᠤᠭᠡᠳ ᠤᠨ ᠠᠪᠤ ᠪᠤᠯᠬᠤ ᠭᠡᠭᠴᠢ ᠠᠮᠢ ᠨᠠᠰᠤᠨ ᠤ ᠦᠷᠬᠦᠯᠵᠢᠯᠡᠯ᠂ ᠬᠦᠭᠵᠢᠨ᠎ᠡ᠂ ᠬᠤᠪᠢᠷᠠᠨ᠎ᠠ᠂ ᠮᠠᠨᠲᠤᠨ᠎ᠠ᠂ ᠮᠦᠬᠦᠨ᠎ᠡ ᠭᠡᠭᠴᠢ ᠬᠤᠷᠸ᠎ᠠ ᠶᠢᠨ ᠵᠢᠮ᠎ᠠ᠃        ᠵᠤᠨ ᠤ ᠬᠠᠯᠠᠭᠤᠨ ᠳᠤ ᠲᠤᠷ᠎ᠠ ᠲᠠᠢ ᠲᠤᠷ᠎ᠠ ᠦᠭᠡᠢ ᠪᠤᠴᠠᠵᠤ᠂ ᠵᠤᠰᠠᠯᠠᠩ ᠤᠨ ᠪᠦᠷᠦᠢ ᠨᠠᠮᠤᠷᠵᠢᠶᠠᠨ ᠳᠤ ᠰᠢᠩᠭᠡᠬᠦ ᠳᠤ᠂ ᠲᠠᠷᠭᠤ ᠰᠠᠶᠢᠲᠠᠢ ᠮᠠᠯ ᠰᠦᠷᠦᠭ ᠲᠤᠭᠳᠠᠭᠤᠬᠠᠨ‌ᠢᠲᠡᠰᠢᠯᠡᠨ᠎ᠡ᠃ ᠠᠶᠢᠯ ᠤᠨ ᠡᠬᠦᠲᠡᠨ ᠳᠤ ᠬᠠᠲᠠᠭᠠᠭᠰᠠᠨ ᠠᠭᠠᠷᠤᠤᠯ ᠬᠤᠷᠤᠳ ᠪᠠᠭᠰᠢᠷᠠᠨ ᠲᠡᠯᠭᠡᠷᠡᠭᠰᠡᠨ ᠲᠠᠭᠠᠨ᠎ᠠ ᠶᠢᠨ ᠴᠡᠴᠡᠭ ᠰᠢᠭ ᠰᠢᠩᠭᠡᠬᠦ ᠨᠠᠷᠠᠨ ᠤ ᠤᠯᠠᠪᠢᠷ ᠲᠤᠶᠠᠭᠠᠨ ᠳᠤ ᠰᠢᠵᠢᠷᠳᠡᠨ᠂ ᠠᠩᠬᠢᠯᠤᠮ᠎ᠠ ᠰᠠᠶᠢᠬᠠᠨ ᠦᠨᠦᠷ ᠨᠢ ᠬᠤᠯᠠ ᠶᠢᠨ ᠬᠤᠯᠠ ᠠᠴᠠ ᠬᠠᠩᠬᠤᠯᠵᠤ᠂ ᠬᠠᠶᠢᠴᠢᠨ ᠵᠢᠬᠦᠷ ᠲᠠᠢ ᠬᠠᠷᠢᠶᠠᠴᠠᠢ ᠲᠦᠷᠦᠭᠰᠡᠨ ᠨᠤᠲᠤᠭ ᠠᠴᠠ ᠪᠠᠨ ᠰᠠᠯᠵᠤ ᠲᠦᠪᠲᠡᠯ ᠦᠭᠡᠢ ᠲᠡᠭᠡᠬᠦᠷ ᠲᠤᠭᠤᠤᠷ ᠬᠠᠯᠢᠨ ᠨᠢᠰᠬᠦ ᠳᠤ᠂ ᠰᠤᠶᠤᠯ ᠨᠤᠮ ᠤᠨ ᠰᠤᠯᠤᠩᠭᠠᠨ ᠡᠭᠡᠰᠢᠭ ᠴᠤᠤᠷᠢᠶᠠᠲᠤᠨ᠂ ᠪᠠᠶᠠᠨ ᠲᠠᠩᠰᠤᠭ᠂ ᠬᠦᠰᠡᠯ ᠰᠢᠩᠭᠡᠭᠰᠡᠨ ᠰᠠᠶᠢᠬᠠᠨ ᠤᠯᠠᠷᠢᠯ ᠪᠤᠯᠵᠤ ᠪᠠᠶᠢᠭ᠎ᠠ ᠠᠵᠠᠢ᠃ ᠠᠮᠢᠲᠤᠷᠠᠯ ᠠᠵᠢᠯ ᠳᠤ ᠡᠷᠲᠡ ᠤᠬᠠᠭᠠᠷᠠᠭᠰᠠᠨ ᠬᠦᠲᠡᠭᠡ  ᠶᠢᠨ ᠭᠡᠤᠭᠡᠳ ᠭᠡᠵᠤ ᠨᠢᠰᠤᠩᠬᠠᠢ ᠬᠠᠮᠠᠷ ᠲᠠᠢ᠂ ᠴᠤᠭᠤᠷᠬᠠᠢ ᠦᠮᠦᠲᠦ ᠲᠠᠢ᠂ ᠰᠢᠯᠪᠤᠷᠬᠠᠢ ᠡᠪᠦᠲᠦᠭ ᠲᠠᠢ᠂ ᠪᠤᠷᠭᠠᠰᠤᠨ ᠮᠤᠷᠢ ᠲᠠᠢ ᠴᠦ ᠠᠪᠤ ᠡᠵᠢ ᠪᠠᠨ ᠬᠠᠪᠰᠤᠷᠤᠨ ᠢᠰᠢᠭᠡ ᠬᠤᠷᠠᠭᠠᠨ ᠳᠤ ᠶᠠᠪᠤᠬᠤ᠂ ᠬᠤᠨᠢ ᠢᠮᠠᠭ᠎ᠠ ᠪᠠᠨ ᠡᠷᠬᠢᠬᠦᠯᠬᠦ᠂ ᠠᠷᠭᠠᠯ ᠲᠦᠯᠡᠰᠢ ᠲᠡᠬᠦᠬᠦ᠂ ᠠᠶᠠᠭ᠎ᠠ ᠱᠠᠭᠠᠵᠠᠩ ᠤᠬᠢᠶᠠᠬᠤ᠂ ᠠᠬ᠎ᠠ ᠡᠭᠡᠴᠢ ᠨᠢ ᠲᠡᠬᠦᠦ ᠨᠠᠷ ᠢᠶᠠᠨ ᠬᠠᠷᠠᠬᠤ ᠵᠡᠷᠭᠡ ᠠᠵᠢᠯ ᠳᠤ ᠴᠢᠲᠠᠬᠤ ᠶᠢᠨ ᠴᠢᠨᠡᠭᠡ ᠪᠠᠷ ᠲᠠᠮ ᠲᠤᠰᠠ ᠪᠤᠯᠵᠤ ᠵᠠᠩᠨᠠᠭᠤᠯᠴᠢᠬᠠᠭᠰᠠᠨ᠂ ᠢᠨᠢᠶᠡᠴᠢᠭᠡᠭᠰᠡᠨ᠂ ᠦᠨᠦᠰᠦᠭᠦᠯᠴᠢᠬᠡᠭᠰᠡᠨ‌‍ᠬᠦ᠋ᠶᠦᠵᠦ ᠯᠠ ᠪᠠᠶᠢᠲᠠᠭ᠃ ᠬᠦᠯ ᠳᠤ ᠤᠷᠤᠬᠤ ᠠᠴᠠ ᠠᠪᠤᠭᠠᠳ ᠡᠵᠢ ᠶᠢᠨ ᠢᠶᠠᠨ ᠨᠤᠶᠢᠲᠠᠨ ᠬᠤᠷᠮᠤᠢ ᠳᠤ ᠡᠯᠬᠦᠭᠲᠡᠨ ᠬᠤᠷᠠᠭ᠎ᠠ ᠢᠰᠢᠭᠡ  ᠲᠠᠢ ᠨᠠᠶᠢᠵᠠᠷᠬᠠᠵᠤ᠂ ᠤᠬᠠᠭ᠎ᠠ ᠤᠷᠤᠬᠤ ᠠᠴᠠ ᠡᠬᠢᠯᠡᠨ ᠠᠪᠤ ᠶᠢᠨ ᠬᠠᠯᠠ ᠲᠠᠢ ᠬᠠᠶᠢᠷ᠎ᠠ ᠳᠤ ᠨᠤᠮᠯᠠᠭᠲᠠᠨ ᠬᠠᠲᠠ ᠴᠢᠯᠠᠭᠤ ᠲᠠᠢ ᠦᠶᠡᠷᠭᠡᠵᠦ ᠶᠠᠪᠤᠭᠰᠠᠨ ᠪᠠᠯᠴᠢᠷ ᠪᠠᠭ᠎ᠠ ᠨᠠᠰᠤ ᠮᠢᠨᠢ ᠬᠤᠷ᠎ᠠ ᠶᠢᠨ ᠲᠠᠷᠠᠭᠠᠬᠢ ᠰᠤᠯᠤᠩᠭ᠎ᠠ ᠰᠢᠭ᠋ ᠨᠢᠭᠡ ᠮᠡᠲᠡᠬᠦ ᠳᠤ ᠯᠠ ᠠᠯᠠᠭ᠎ᠠ ᠪᠤᠯᠴᠢᠬᠠᠵᠠᠢ᠃         — ᠮᠢᠨᠤ ᠬᠦᠦ ᠤᠲᠠᠬᠤ ᠦᠭᠡᠢ ᠰᠤᠷᠭᠠᠭᠤᠯᠢ ᠳᠤ ᠰᠠᠭᠤᠵᠤ ᠪᠢᠴᠢᠭ ᠦᠵᠡᠨ᠎ᠡ ᠰᠢᠤ᠂ ᠲᠡᠭᠡᠭᠡᠳ ᠶᠡᠭᠡ ᠡᠷᠲᠡᠮ ᠨᠤᠮ ᠰᠤᠷᠤᠨ᠎ᠠ ᠳ᠋ᠠ ᠭᠡᠵᠤ  ︿︿ᠠ﹀﹀ ᠦᠰᠦᠭ ᠲᠠᠨᠢᠬᠤ ᠦᠭᠡᠢ ᠡᠵᠢ ᠮᠢᠨᠢ ᠰᠦ ᠬᠦᠭᠡᠷᠡᠬᠦᠯᠬᠦ ᠶᠢᠨ ᠲᠠᠭᠠᠤ ᠡᠨᠡᠷᠢᠩᠬᠦᠢ ᠬᠠᠷᠠᠴᠠ ᠬᠠᠶᠢᠷᠠᠯᠠᠨ ᠢᠨᠢᠶᠡᠮᠰᠦᠭᠯᠡᠬᠦ ᠳᠤ         — ᠬᠠᠲᠠᠭᠠᠭᠰᠠᠨ ᠦᠷᠦᠮ᠎ᠡ ᠠᠴᠠ ᠠᠮᠲᠠᠲᠠᠢ ᠤᠤ︖ ᠭᠡᠵᠤ ᠲᠤᠯᠤᠭᠠᠢ ᠪᠠᠨ ᠮᠠᠭᠠᠵᠢᠨ ᠰᠢᠯᠦᠰᠤ ᠪᠠᠨ ᠵᠠᠯᠬᠢᠯᠠᠨ ᠠᠰᠠᠭᠤᠪᠠᠯ         — ᠠᠮᠲᠠᠲᠠᠢ ᠠᠮᠲᠠᠲᠠᠢ᠂ ᠰᠢᠬᠢᠷ ᠪᠤᠷᠠᠮ ᠠᠴᠠ ᠴᠦ ᠠᠮᠲᠠᠲᠠᠢ᠂ ᠬᠦᠦ ᠮᠢᠨᠢ ᠰᠤᠷᠭᠠᠭᠤᠯᠢ ᠳᠤ ᠰᠠᠭᠤᠭᠰᠠᠭᠠᠷ ᠮᠡᠲᠡᠴᠢᠭᠡᠨ᠎ᠡ ᠁          ᠰᠤᠷᠭᠠᠭᠤᠯᠢ ᠳᠤ ᠰᠠᠭᠤᠨ ᠡᠷᠲᠡᠮ ᠨᠤᠮ ᠰᠤᠷᠴᠤ ᠤᠯᠠᠨ ᠰᠠᠶᠢᠬᠠᠨ ᠦᠶ᠎ᠠ ᠶᠢᠨ ᠨᠠᠶᠢᠵᠠ ᠲᠠᠢ ᠪᠤᠯᠤᠨ᠎ᠠ ᠭᠡᠬᠦ ᠠᠴᠠ ᠪᠠᠶᠠᠷᠯᠠᠵᠤ ᠬᠦᠭᠰᠡᠲᠡᠭ ᠴᠦ ᠭᠠᠷᠠᠭ ᠠᠪᠤ ᠡᠵᠢ ᠲᠠᠢ ᠪᠠᠨ ᠠᠭᠤᠯᠵᠠᠵᠤ ᠲᠡᠶᠢᠯᠬᠦ ᠦᠭᠡᠢ ᠪᠤᠯᠬᠤ ᠶᠤᠮ ᠪᠠᠶᠢᠨ᠎ᠠ ᠭᠡᠰᠡᠨ ᠢ ᠪᠤᠲᠤᠬᠤ ᠪᠦᠷᠢ ᠬᠤᠷᠠᠭ᠎ᠠ ᠢᠰᠢᠭᠡ ᠲᠠᠢ ᠪᠠᠨ᠂ ᠬᠠᠯᠲᠠᠷ ᠨᠤᠬᠠᠢ ᠲᠠᠢ ᠪᠠᠨ ᠨᠤᠤᠷᠠᠯᠲᠤᠨ ᠡᠲᠦᠷ ᠬᠤᠨᠤᠭ ᠢ ᠦᠩᠭᠡᠷᠡᠬᠡᠬᠦ ᠨᠢ ᠨᠡᠩ ᠴᠦ ᠰᠠᠶᠢᠬᠠᠨ ᠰᠠᠨᠠᠭᠲᠠᠨ᠎ᠠ᠃          ᠭᠠᠯᠠᠭᠤ ᠭᠠᠩᠭᠠᠨᠠᠭᠰᠠᠨ ᠲᠡᠷᠡ ᠨᠠᠮᠤᠷ ᠡᠵᠢ ᠮᠠᠩᠨᠠᠢ ᠶᠢ ᠮᠢᠨᠢ ᠦᠨᠦᠰᠤᠨ         — ᠮᠢᠨᠤ ᠬᠦᠦ ᠰᠠᠶᠢᠨ ᠰᠤᠷᠲᠠᠭ ᠶᠤᠮ ᠰᠢᠤ᠂ ᠪᠠᠭᠰᠢ ᠶᠢᠨ ᠢᠶᠠᠨ ᠦᠭᠡ ᠶᠢ ᠰᠤᠨᠤᠰ᠂ ᠬᠠᠮᠲᠤ ᠨᠦᠬᠦᠳ ᠲᠠᠢ ᠪᠠᠨ ᠭᠡᠷᠡᠬᠦᠯ ᠵᠤᠲᠤᠭᠠᠨ ᠬᠢᠵᠦ ᠪᠤᠯᠬᠤ ᠦᠭᠡᠢ ᠰᠢᠤ᠂ ᠤᠬᠠᠭᠠᠨ ᠲᠠᠢ ᠪᠠᠶᠢᠭᠠᠷᠠᠢ᠂ ᠡᠵᠢ ᠨᠢ ᠭᠠᠷᠠᠭ ᠤᠨ ᠵᠢᠷᠭᠤᠭᠠᠨ ᠳᠤ ᠪᠤᠯᠤᠭᠰᠠᠭᠠᠷ ᠤᠴᠢᠵᠤ ᠲᠤᠰᠤᠨ᠎ᠠ ᠰᠢᠤ ᠭᠡᠬᠦ ᠳᠤ         — ᠵᠠ ᠤᠲᠤ ᠬᠦᠲᠡᠯᠦᠶ᠎ᠡ᠂ ᠤᠷᠤᠶᠢᠲᠠᠬᠤ ᠨᠢ ᠭᠡᠳ ᠠᠪᠤ ᠮᠢᠨᠢ ᠬᠠᠱᠠᠩ ᠭᠡᠭᠡᠷ ᠢᠶᠠᠷ ᠨᠠᠲᠠ ᠶᠢ ᠪᠠᠷᠢᠭᠠᠲᠠ ᠶᠢᠨ ᠰᠤᠷᠭᠠᠭᠤᠯᠢ ᠳᠤ ᠬᠦᠷᠭᠡᠪᠡ᠃ ᠬᠤᠷᠠᠭ᠎ᠠ ᠢᠰᠢᠭᠡᠨ ᠤ ᠪᠠᠯᠴᠢᠭᠡᠷ ᠠᠴᠠ ᠬᠤᠯᠠᠲᠠᠭ᠎ᠠ ᠦᠭᠡᠢ ᠨᠠᠲᠠ ᠶᠠᠭᠤ ᠪᠦᠬᠦᠨ ᠲᠤᠩ ᠬᠠᠴᠢᠨ ᠰᠤᠨᠢᠨ ᠬᠠᠷᠠᠭᠲᠠᠭᠰᠠᠨ᠃ ᠲᠡᠷᠲᠡᠭᠡ ᠳᠤ ᠬᠠᠷᠠᠭᠲᠠᠬᠤ ᠦᠨᠲᠦᠷ ᠠᠭᠤᠯᠠ ᠶᠢ ᠲᠡᠭᠷᠢ ᠶᠢᠨ ᠬᠠᠶᠠᠭ᠎ᠠ ᠭᠡᠵᠤ ᠪᠤᠲᠤᠭᠰᠠᠨ ᠮᠠᠨᠢ ᠪᠤᠷᠤᠭᠤᠲᠠᠯ᠎ᠠ ᠭᠡᠰᠡᠨ ᠢ ᠰᠤᠷᠭᠠᠭᠤᠯᠢ ᠳᠤ ᠶᠠᠪᠤᠬᠤ ᠵᠠᠮ ᠵᠠᠭᠤᠷ᠎ᠠ ᠪᠠᠨ ᠠᠩᠬᠠᠯᠠᠨ ᠤᠬᠠᠭᠠᠷᠠᠯ᠎ᠠ᠃ ᠬᠤᠶᠠᠷ ᠴᠠᠭ ᠰᠢᠬᠠᠮ ᠶᠠᠪᠤᠭᠠᠳ ᠪᠠᠷᠢᠭᠠᠲᠠ ᠶᠢᠨ ᠰᠤᠷᠭᠠᠭᠤᠯᠢ ᠳᠤ ᠬᠦᠷᠴᠦ ᠪᠢᠯᠡ᠃         ᠪᠠᠷᠢᠭᠠᠲᠠ ᠶᠢᠨ ᠰᠤᠷᠭᠠᠭᠤᠯᠢ ᠭᠡᠵᠤ ᠵᠢᠵᠢᠭᠭᠡᠨ ᠬᠦᠷᠢᠶ᠎ᠡ ᠲᠦᠷᠪᠡᠨ ᠮᠦᠷ ᠪᠠᠶᠢᠰᠢᠩ ᠲᠠᠢ᠂ ᠡᠮᠦᠨ᠎ᠡ ᠪᠠᠶᠢᠭ᠎ᠠ ᠬᠤᠶᠠᠷ ᠮᠦᠷ ᠪᠠᠶᠢᠰᠢᠩ ᠨᠢ ᠠᠩᠬᠢ ᠶᠢᠨ ᠭᠡᠷ᠂ ᠠᠷᠤ ᠲᠠᠯ᠎ᠠ ᠳᠤᠨᠢ ᠪᠠᠶᠢᠭ᠎ᠠ ᠨᠢᠭᠡ ᠮᠦᠷ ᠤᠷᠲᠤ ᠪᠠᠶᠢᠰᠢᠩ ᠤᠨ ᠬᠠᠮᠤᠭ ᠪᠠᠷᠠᠭᠤᠨ ᠦᠵᠦᠬᠦᠷ ᠤᠨ ᠭᠡᠷ ᠨᠢ ᠨᠤᠮ ᠤᠨ ᠰᠠᠩ ᠭᠡᠯᠡᠲᠡᠢ᠂ ᠨᠤᠮ ᠤᠨ ᠰᠠᠩ ᠭᠡᠬᠦ ᠤᠬᠠᠭᠲᠠᠬᠤᠨ ᠮᠢᠨᠤ ᠤᠭᠤᠷᠠᠭ ᠲᠠᠷᠢᠬᠢᠨ ᠳᠤ ᠦᠨᠲᠦᠰᠦᠯᠡᠭᠰᠡᠨ ᠲᠡᠷᠡ ᠴᠠᠭ ᠠᠴᠠ ᠪᠠᠷᠢᠭᠠᠲᠠ ᠶᠢᠨ ᠰᠤᠷᠭᠠᠭᠤᠯᠢ ᠶᠢᠨ ᠪᠢᠴᠢᠬᠠᠨ ᠨᠤᠮ ᠤᠨ ᠦᠷᠦᠭᠡ ᠨᠢ ᠮᠢᠨᠤ ᠤᠷᠤᠭᠰᠠᠨ ᠬᠠᠮᠤᠭ ᠠᠩᠬᠠᠨ ᠤ ᠨᠤᠮ ᠤᠨ ᠰᠠᠩ ᠯᠠ ᠭᠡᠵᠤ ᠦᠵᠡᠲᠡᠭ᠃ ᠪᠠᠷᠢᠭᠠᠲᠠ ᠶᠢᠨ ᠰᠤᠷᠭᠠᠭᠤᠯᠢ ᠶᠢᠨ ᠨᠤᠮ ᠤᠨ ᠰᠠᠩ ᠳᠤ ᠲᠡᠮᠡᠢ ᠤᠯᠠᠨ ᠨᠤᠮ ᠭᠡᠵᠤ ᠪᠠᠶᠢᠲᠠᠭ ᠦᠭᠡᠢ᠂ ᠲᠤᠭ᠎ᠠ ᠲᠠᠢ ᠭᠡᠲᠦᠨ ᠨᠤᠮ ᠨᠢ ᠴᠦ ᠡᠭᠡ ᠰᠤᠶᠤᠯ ᠳᠤ ᠪᠠᠨ ᠬᠠᠶᠢᠷᠠᠲᠠᠢ ᠬᠦᠮᠦᠰ ᠬᠤᠶᠢᠴᠢ ᠦᠶ᠎ᠠ ᠳᠤ ᠪᠠᠨ ᠦᠯᠡᠲᠡᠭᠡᠭᠰᠡᠨ ᠦᠪ ᠪᠠᠶᠢᠬ᠎ᠠ ᠭᠡᠵᠤ ᠤᠲᠤ ᠳᠤ ᠬᠦᠷᠲᠡᠯ᠎ᠡ ᠪᠢ ᠲᠡᠭᠡᠵᠦ ᠪᠤᠲᠤᠲᠠᠭ ᠰᠠᠨ᠃ ᠦᠰᠦᠭ ᠨᠢᠲᠦᠯᠡᠬᠦ ᠴᠢᠲᠡᠪᠤᠷᠢ ᠲᠠᠢ ᠪᠤᠯᠤᠭᠰᠠᠨ ᠦᠶ᠎ᠡ ᠠᠴᠠ ᠡᠨᠡ ᠵᠢᠵᠢᠭᠭᠡᠨ ᠨᠤᠮ ᠤᠨ ᠰᠠᠩ ᠳᠤ ᠪᠠᠶᠢᠭᠰᠠᠨ ︿︿ᠲᠠᠯ᠎ᠠ ᠨᠤᠲᠤᠭ ᠤᠨ ᠲᠦᠲᠡᠭ ᠤᠨ ᠭᠠᠯ﹀﹀᠂ ︿︿ᠪᠠᠯᠭᠠᠨᠰᠠᠩ ᠤᠨ ᠦᠯᠢᠭᠡᠷ﹀﹀᠂ ︿︿ᠭᠤᠷᠪᠠᠨ ᠤᠯᠤᠰ ᠤᠨ ᠦᠯᠢᠭᠡᠷ﹀﹀᠂︿︿ᠪᠢᠴᠢᠬᠠᠨ ᠪᠠᠭᠠᠲᠤᠷ ᠢᠥᠢ ᠯᠠᠢ﹀﹀ ᠮᠠᠲᠤ ᠶᠢᠨ ᠨᠤᠮ ᠢᠶᠠᠷ ᠤᠶᠤᠨ ᠢᠶᠠᠨ ᠤᠮᠲᠠᠯᠠᠵᠤ ᠶᠠᠪᠤᠭᠰᠠᠨ ᠪᠠᠭ᠎ᠠ ᠶᠢᠨ ᠨᠠᠰᠤ ᠮᠢᠨᠢ ᠲᠠᠨᠲᠠ ᠪᠠᠶᠢᠭ᠎ᠠ ᠶᠤᠮ᠃ ᠲᠡᠷᠡᠭᠠᠯᠠᠭᠠᠳ ᠲᠤᠭᠤᠭᠠᠨ ᠭᠡᠷ ᠪᠤᠢ᠂ ᠠᠲᠡ ᠪᠢ ᠲᠠᠨᠢᠵᠤ ᠮᠡᠲᠡᠬᠦ ᠦᠭᠡᠢ ᠤᠯᠠᠨ ᠭᠡᠤᠭᠡᠳ ᠲᠠᠢ ᠨᠢᠭᠡ ᠲᠤᠭᠤᠭᠠᠨ ᠠᠴᠠ ᠬᠤᠭᠤᠯᠠ ᠢᠲᠡᠵᠦ᠂ ᠦᠨᠲᠡᠭᠡᠨ ᠠᠴᠠ  ᠪᠠᠨ ᠰᠠᠶ᠋ᠢᠬᠠᠨ ᠨᠡᠪᠴᠢᠨ ᠭᠠᠷᠤᠭᠰᠠᠨ ᠬᠠᠷᠢᠶᠠᠴᠠᠢ ᠶᠢᠨ ᠵᠤᠯᠵᠠᠭ᠎ᠠ ᠰᠢᠭ᠋ ᠲᠠᠭᠤ ᠪᠤᠯᠢᠶᠠᠯᠲᠤᠨ ᠵᠢᠷᠬᠢᠵᠦ ᠶᠠᠪᠤᠭᠰᠠᠨ ᠶᠤᠮ᠃ ᠲᠡᠬᠦᠨ ᠤ ᠲᠠᠷᠠᠭᠠᠬᠠᠨ ᠨᠠᠭᠠᠯᠲᠤᠭᠠᠳ ᠡᠷᠡᠭᠲᠡᠢ ᠡᠮᠡᠭᠲᠡᠢ ᠬᠤᠶᠠᠷ ᠲᠤᠮᠤ ᠪᠠᠶᠢᠷᠢ ᠶᠢᠨ ᠭᠡᠷ ᠲᠠᠢ᠂ ᠪᠡᠶᠢᠷᠢ ᠶᠢᠨ ᠭᠡᠷ ᠤᠨ ᠵᠠᠬᠦᠨ ᠪᠠᠷᠠᠭᠤᠨ ᠬᠤᠶᠠᠷ ᠲᠠᠯ᠎ᠠ ᠳᠤᠨᠢ ᠦᠷᠬᠦᠢ ᠮᠤᠲᠤᠨ ᠬᠠᠨᠵᠤ ᠲᠠᠢ᠂ ᠬᠤᠶᠠᠷ ᠮᠤᠲᠤᠨ ᠬᠠᠨᠵᠤᠨ ᠤ ᠲᠤᠮᠲᠠᠬᠢ ᠵᠠᠢ ᠳᠤ ᠲᠤᠯᠠᠭᠠᠯᠭ᠎ᠠ ᠳᠤ ᠵᠤᠷᠢᠭᠤᠯᠤᠯᠲᠠ ᠲᠠᠢ ᠲᠤᠮᠤ ᠲᠠᠮᠤᠷ ᠲᠤᠯᠭ᠎ᠠ ᠲᠠᠯᠪᠢᠵᠠᠢ᠂ ᠭᠡᠷ ᠠᠴᠠ ᠪᠠᠨ ᠡᠬᠦᠷᠴᠦ ᠢᠷᠡᠭᠰᠡᠨ ᠢᠰᠡᠭᠡᠢ  ᠪᠠᠨ ᠲᠠᠪᠢᠰᠪᠡᠯ ᠤᠷᠤ ᠪᠤᠯᠴᠢᠬᠠᠲᠠᠭ ᠪᠠᠶᠢᠭᠰᠠᠨ᠃ ᠠᠷᠪᠠᠨ ᠵᠢᠯ ᠪᠠᠶᠢᠷᠢ ᠳᠤ ᠰᠠᠭᠤᠭᠰᠠᠨ ᠰᠤᠷᠤᠭᠴᠢ ᠶᠢᠨ ᠠᠮᠢᠲᠤᠷᠠᠯ ᠢᠶᠠᠨ ᠢᠩᠬᠢᠵᠦ ᠯᠠ ᠮᠡᠲᠡᠬᠦ ᠮᠡᠲᠡᠬᠦ ᠦᠭᠡᠢ  ᠶᠢᠨ ᠬᠤᠭᠤᠷᠤᠨᠲᠤ ᠡᠬᠢᠯᠡᠭᠰᠡᠨ ᠰᠠᠨ᠃ ᠨᠠᠶᠠᠭᠠᠳ ᠤᠨ ᠤ ᠡᠬᠢ ᠪᠤᠯᠬᠤ ᠳᠤ ᠦᠭᠡᠷᠡᠴᠢᠯᠠᠯᠲᠡ ᠨᠡᠭᠡᠭᠡᠯᠲᠡ ᠭᠡᠵᠤ ᠷᠠᠳᠢᠤ᠋ ᠳᠤ ᠦᠷᠬᠦᠯᠵᠢ ᠶᠠᠷᠢᠭᠲᠠᠵᠤ᠂ ᠨᠡᠶᠢᠭᠡᠮ ᠬᠦᠭᠵᠢᠨ ᠠᠷᠠᠳ ᠤᠨ ᠠᠮᠢᠲᠤᠷᠠᠯ ᠰᠠᠶᠢᠵᠢᠷᠠᠵᠤ ᠡᠬᠢᠯᠡᠭᠰᠡᠨ ᠪᠠᠶᠢᠨ᠎ᠠ᠃ ᠲᠧᠯᠸᠢᠰ ᠭᠡᠲᠡᠭ ᠶᠠᠭᠤᠮ᠎ᠠ ᠶᠡᠭᠡ ᠶᠡᠭᠡ ᠬᠤᠲᠠ ᠪᠠᠷ ᠲᠦᠭᠡᠮᠡᠯᠵᠢᠵᠦ ᠡᠬᠢᠯᠡᠭᠰᠡᠨ ᠴᠦ ᠪᠤᠶᠢᠲᠠ ᠪᠦᠭᠯᠡᠬᠦᠦ ᠬᠦᠲᠡᠭᠡ ᠨᠤᠲᠤᠭ ᠲᠤ ᠬᠠᠷᠢᠨ ᠡᠲᠦᠷ ᠤᠨ ᠤᠲᠤ ᠰᠢᠭ᠋ ᠪᠠᠶᠢᠭᠰᠠᠨ᠃ ᠨᠠᠲᠠ ᠶᠢ ᠪᠢᠴᠢᠭ ᠦᠵᠡᠬᠦ ᠳᠤ ᠮᠠᠨ ᠤ ᠪᠠᠷᠢᠭᠠᠲᠠ ᠳᠤ ᠲᠧᠯᠸᠢᠰ ᠲᠠᠢ ᠠᠶᠢᠯ ᠭᠡᠵᠤ ᠪᠠᠶᠢᠭ᠎ᠠ ᠦᠭᠡᠢ᠃ ᠪᠠᠶᠢᠷᠢ ᠳᠤ ᠰᠠᠭᠤᠭ᠎ᠠ ᠰᠤᠷᠤᠭᠴᠢᠳ ᠤᠨ ᠲᠤᠲᠤᠷ᠎ᠠ ᠦᠯᠢᠭᠡᠷ ᠮᠡᠲᠡᠲᠡᠭ ᠭᠡᠤᠭᠡᠳ ᠭᠡᠲᠦ ᠪᠠᠶᠢᠲᠠᠭ᠃ ᠤᠷᠤᠢ ᠤᠷᠤᠨ ᠳᠤ ᠪᠠᠨ ᠤᠷᠤᠭᠰᠠᠭᠠᠷ ᠯᠠ         — ᠡᠷᠲᠡ ᠤᠷᠢᠲᠤ ᠶᠢᠨ ᠴᠠᠭ ᠲᠤ ᠭᠡᠨ᠎ᠡ᠂ ᠡᠯᠵᠢᠭᠡᠨ ᠬᠠᠭᠠᠨ ᠤ ᠦᠶ᠎ᠡ ᠳᠤ ᠭᠡᠨ᠎ᠡ᠂ ᠰᠦᠨ ᠲᠠᠯᠠᠢ ᠶᠢ ᠱᠠᠯᠪᠠᠭ ᠲᠡᠲᠦᠢ ᠪᠠᠶᠢᠬᠤ ᠳᠤ᠂ ᠰᠦᠮᠪᠦᠷ ᠠᠭᠤᠯᠠ ᠶᠢ ᠲᠤᠪᠤ ᠲᠡᠲᠦᠢ ᠪᠠᠶᠢᠬᠤ ᠳᠤ᠂ ᠡᠪᠦᠭᠡ ᠠᠪᠤ ᠲᠦᠷᠦᠭᠡ ᠦᠭᠡᠢ ᠪᠠᠶᠢᠬᠤ ᠳᠤ᠂ ᠦᠪᠡᠷ ᠤᠨ ᠠᠪᠤ ᠶᠢ ᠦᠯᠦᠭᠡᠢ ᠲᠠᠢ ᠪᠠᠶᠢᠬᠤ ᠳᠤ ᠁ ᠭᠡᠳ ᠭᠡᠨ ᠨᠢᠭᠡᠨ ᠨᠢ ᠠᠪᠤ ᠡᠵᠢ ᠪᠠ ᠨᠠᠰᠤᠲᠠᠶᠢᠴᠤᠳ ᠠᠴᠠ ᠰᠤᠨᠤᠰᠤᠭᠰᠠᠨ ᠦᠯᠢᠭᠡᠷ ᠢᠶᠠᠨ ᠶᠠᠷᠢᠵᠦ᠂ ᠤᠶᠢᠳᠬᠠᠷᠲᠠᠢ ᠴᠠᠭ ᠢ ᠨᠦᠭᠴᠢᠭᠡᠵᠦ ᠪᠠᠶᠢᠭᠰᠠᠨ ᠠᠴᠠ ᠪᠠᠨ ᠪᠦᠬᠦᠲᠡᠭᠡᠷ ᠢᠶᠠᠨ ᠪᠦᠷ ᠠᠮᠲᠠᠨ ᠳᠤᠨᠢ ᠤᠷᠤᠵᠤ᠂ ᠭᠠᠷᠠᠭ ᠤᠨ ᠵᠢᠷᠭᠤᠭᠠᠨ ᠳᠤ ᠬᠠᠷᠢᠬᠤ ᠪᠦᠷᠢ ᠠᠪᠤ ᠡᠵᠢ ᠨᠠᠰᠤᠲᠠᠶᠢᠴᠤᠳ ᠢᠶᠠᠷ ᠦᠯᠢᠭᠡᠷ ᠶᠠᠷᠢᠭᠤᠯᠤᠨ ᠴᠡᠭᠡᠵᠢᠯᠡᠴᠢᠭᠡᠭᠡᠳ ᠪᠠᠶᠢᠷᠢ ᠶᠢᠨ ᠨᠦᠬᠦᠳ ᠲᠤ ᠪᠠᠨ ᠶᠠᠷᠢᠵᠦ ᠦᠭᠲᠡᠭ ᠪᠠᠶᠢᠯ᠎ᠠ᠃ ᠠᠷᠪᠠᠨ ᠨᠢᠭᠡ ᠬᠤᠶᠠᠷ ᠲᠠᠢ ᠭᠡᠤᠭᠡᠳ ᠶᠤᠮ ᠳ᠋ᠠ᠂ ᠰᠤᠷᠭᠠᠭᠤᠯᠢ ᠳᠤ ᠪᠠᠨ ᠤᠴᠢᠬᠤ ᠳᠤ ᠴᠡᠭᠡᠵᠢᠯᠡᠭᠰᠡᠨ ᠦᠯᠢᠭᠡᠷ ᠢᠶᠠᠨ ᠨᠢᠭᠡ ᠭᠡᠰᠡᠭ ᠢ ᠨᠢ ᠮᠡᠷᠲᠠᠴᠢᠬᠠᠭᠰᠠᠨ ᠢ ᠪᠤᠷᠤᠭᠤᠰᠢᠶᠠᠬᠤ ᠶᠢᠨ ᠠᠷᠭ᠎ᠠ ᠦᠭᠡᠢ᠂ ᠶᠠᠷᠢᠵᠦ ᠪᠠᠶᠢᠭᠰᠠᠭᠠᠷ ᠪᠤᠲᠤᠵᠤ ᠤᠯᠬᠤ ᠪᠠᠨ ᠪᠤᠯᠴᠢᠬᠠᠨ᠎ᠠ᠂ ︿︿ᠲᠡᠭᠡᠭᠡᠳ︖ ᠲᠡᠭᠡᠭᠡᠳ ᠶᠠᠭᠤᠪᠤᠯᠪᠠᠤ︖﹀﹀ ᠭᠡᠵᠤ ᠠᠮᠲᠠᠷᠬᠠᠨ ᠰᠤᠨᠤᠰᠤᠭᠰᠠᠨ ᠪᠠᠶᠢᠷᠢ ᠶᠢᠨ ᠨᠦᠬᠦᠳ ᠤᠬᠤᠴᠢᠯᠠᠨ ᠠᠰᠠᠭᠤᠭᠠᠳ ᠵᠤᠭᠰᠤᠬᠤ ᠦᠭᠡᠢ ᠪᠤᠯᠬᠤ ᠪᠠᠷ ᠨᠢ ᠠᠷᠭ᠎ᠠ ᠶᠠᠲᠠᠬᠤ ᠳᠤ  ᠪᠠᠨ ᠵᠤᠬᠢᠶᠠᠵᠤ ᠶᠠᠷᠢᠨ᠎ᠠ᠃ ᠠᠯᠢᠶ᠎ᠠ ᠲᠦᠢᠳᠭᠡᠷ ᠨᠢᠭᠡ ᠨᠢ ᠴᠢᠳᠬᠦᠷ ᠰᠢᠮᠨᠤ ᠶᠢᠨ ᠦᠯᠢᠭᠡᠷ ᠶᠠᠷᠢᠵᠦ ᠪᠠᠶᠢᠬᠤ ᠬᠤᠭᠤᠷᠤᠨᠲᠤ᠂ ᠬᠤᠯᠠᠭᠠᠶᠢᠴᠢ ᠪᠠᠷ  ᠴᠤᠩᠬᠤ ᠶᠢ ᠲᠤᠭᠰᠢᠴᠢᠬᠠᠭᠠᠳ         — ᠭᠠᠲᠠᠨ᠎ᠠ ᠠᠷᠪᠠᠨ ᠬᠤᠶᠠᠷ ᠲᠤᠯᠤᠭᠠᠢ ᠲᠠᠢ ᠠᠲᠠᠭᠠᠷ ᠬᠠᠷ᠎ᠠ ᠮᠠᠩᠭᠤᠰ ᠢᠷᠡᠭᠰᠡᠨ ᠲᠦᠯᠦᠪ ᠲᠠᠢ᠂ ᠴᠤᠩᠬᠤ ᠲᠤᠭᠰᠢᠵᠤ ᠪᠠᠶᠢᠨ᠎ᠠ᠂ ᠤᠲᠤ ᠪᠢᠲᠡᠨ  ᠢ ᠢᠲᠡᠬᠦ ᠶᠤᠮ ᠪᠠᠶᠢᠨ᠎ᠠ ᠭᠡᠵᠤ ᠠᠵᠢᠭ ᠴᠦ  ᠦᠭᠡᠢ  ᠠᠪᠤᠷᠢᠯᠠᠬᠤ   ᠳᠤ  ᠂ ᠵᠢᠷᠦᠭᠡ ᠪᠠᠭ᠎ᠠ ᠲᠠᠢ ᠨᠢᠭᠡ ᠨᠢ ᠬᠦᠨᠵᠢᠯᠠ ᠪᠠᠷ ᠢᠶᠠᠨ ᠲᠤᠯᠤᠭᠠᠢ ᠪᠠᠨ ᠪᠦᠲᠡᠭᠡᠨ᠂ ᠲᠡᠭᠡᠷ᠎ᠡ ᠠᠮᠢᠰᠬᠤᠬᠤ ᠠᠴᠠ ᠪᠠᠨ ᠴᠦ ᠠᠶᠤᠵᠤ ᠲᠠᠭᠤ ᠴᠢᠮᠡᠭᠡ ᠭᠠᠷᠭᠠᠯ ᠦᠭᠡᠢ ᠠᠲᠤᠷᠢᠨ ᠭᠡᠪᠲᠡᠨ᠎ᠠ᠂ ᠡᠨᠡ ᠪᠦᠬᠦᠨ ᠤᠲᠤ ᠴᠦ ᠭᠡᠰᠡᠨ ᠪᠤᠲᠤᠯ ᠳᠤ ᠲᠤᠲᠤᠬᠠᠨ᠃ ᠦᠯᠢᠭᠡᠷ ᠲᠤᠮᠤᠭ ᠢᠶᠠᠷ ᠰᠦᠯᠡᠭᠲᠡᠭᠰᠡᠨ ᠪᠠᠶᠢᠷᠢ ᠶᠢᠨ ᠮᠢᠨᠢ ᠤᠨᠢ ᠨᠢᠷᠤᠭᠤ ᠨᠢ ᠬᠦᠷᠲᠡᠯ᠎ᠠ ᠦᠯᠢᠭᠡᠷ ᠶᠠᠷᠢᠵᠤ ᠪᠠᠶᠢᠭ᠎ᠠ ᠶᠤᠮ ᠰᠢᠭ᠋ ᠰᠠᠨᠠᠭᠲᠠᠨ᠎ᠠ᠃ ᠲᠡᠶᠢᠮᠦ ᠳᠤ ᠪᠠᠨ ᠮᠢᠨᠤ ᠵᠤᠬᠢᠶᠠᠨ ᠪᠢᠴᠢᠯᠭᠡ ᠶᠢᠨ ᠲᠤᠷ᠎ᠠ ᠰᠤᠨᠢᠷᠬᠠᠯ ᠤᠨ ᠵᠢᠵᠢᠭ ᠭᠤᠷᠤᠬ᠎ᠠ ᠡᠨᠡ ᠪᠠᠶᠢᠷᠢ ᠠᠴᠠ ᠪᠤᠷᠬᠢᠯᠤᠭᠰᠠᠨ ᠦᠯᠢᠭᠡᠷ ᠤᠨ ᠪᠤᠯᠠᠭ ᠠᠴᠠ ᠡᠬᠢ ᠡᠬᠦᠰᠪᠦᠷᠢ ᠠᠪᠤᠭᠰᠠᠨ ᠭᠡᠵᠤ ᠭᠡᠯᠡᠬᠦ ᠳᠤ ᠠᠬᠠᠲᠠᠮᠠᠷ ᠦᠭᠡᠢ᠃         ᠡᠷᠡᠭᠲᠡᠢ ᠡᠮᠡᠭᠲᠡᠢ ᠰᠤᠷᠤᠭᠴᠢ ᠶᠢᠨ ᠪᠠᠶᠢᠷᠢ ᠶᠢᠨ ᠵᠡᠬᠦᠨ ᠲᠠᠯ᠎ᠠ ᠶᠢᠨ ᠭᠤᠷᠪᠠᠨ ᠲᠠᠰᠤᠯᠭ᠎ᠠ ᠭᠡᠷ ᠨᠢ ᠪᠠᠭᠰᠢ ᠶᠢᠨ ᠪᠠᠶᠢᠷᠢ ᠪᠠ ᠠᠯᠪᠠᠨ ᠭᠡᠷ᠂ ᠪᠠᠷᠠᠭᠤᠨ ᠲᠠᠯ᠎ᠠ ᠶᠢᠨ ᠨᠢᠭᠡ ᠮᠦᠷ ᠪᠠᠶᠢᠰᠢᠩ ᠨᠢ ᠰᠠᠩ ᠬᠦᠮᠦᠷᠭᠡ ᠲᠦᠯᠦᠪ ᠲᠠᠢ᠃ ᠠᠩᠬᠢ ᠶᠢᠨ ᠭᠡᠷ ᠤᠨ ᠡᠮᠦᠨ᠎ᠡ ᠲᠠᠯ᠎ᠠ ᠳᠤ ᠪᠤᠯᠠᠭᠰᠠᠨ ᠱᠤᠩ ᠲᠡᠭᠡᠷ᠎ᠡ ᠲᠤᠭᠤᠭ᠎ᠠ ᠭᠡᠯᠪᠡᠷᠢ  ᠲᠠᠢ ᠲᠠᠮᠦᠷ ᠡᠯᠬᠦᠵᠦ᠂ ᠬᠠᠵᠠᠭᠤ ᠳᠤᠨᠢ ᠤᠬᠤᠷᠬᠠᠨ ᠲᠠᠮᠤᠷ ᠮᠠᠨᠴᠤᠷᠭ᠎ᠠ ᠭᠤᠬᠠᠲᠠᠨ  ᠲᠠᠯᠪᠢᠵᠠᠢ᠂ ᠡᠨᠡ ᠨᠢ ᠰᠤᠷᠤᠭᠴᠢ ᠪᠢᠲᠠᠨ ᠤ ᠵᠠᠬᠢᠷᠲᠠᠭ ᠬᠤᠩᠬᠤ᠂ ᠪᠠᠷᠢᠭᠠᠲᠠ ᠶᠢᠨ ᠰᠤᠷᠭᠠᠭᠤᠯᠢ ᠶᠢᠨ ᠬᠤᠩᠬᠤᠨ ᠲᠠᠭᠤᠨ ᠤᠲᠤ ᠴᠦ ᠭᠡᠰᠡᠨ ᠴᠢᠬᠢᠨ ᠳᠤ ᠬᠠᠩᠬᠢᠨᠠᠬᠤ ᠰᠢᠭ᠋ ᠰᠠᠨᠠᠭᠲᠠᠨ᠎ᠠ᠃  ᠬᠤᠩᠬᠤᠨ ᠤ ᠵᠡᠬᠦᠨ ᠲᠠᠯ᠎ᠠ ᠳᠤ ᠦᠨᠲᠦᠷ ᠨᠠᠷᠢᠬᠠᠨ ᠨᠠᠷᠠᠰᠤᠨ ᠮᠤᠲᠤ ᠪᠤᠰᠬᠠᠨ ᠲᠡᠭᠡᠷ᠎ᠡ ᠲᠠᠯ᠎ᠠ ᠳᠤ ᠭᠤᠯᠭᠤᠭᠤᠷ ᠬᠦᠷᠲᠦ ᠲᠠᠭᠠᠷᠠᠭᠤᠯᠵᠠᠢ᠂ ᠡᠨᠡ ᠨᠢ ᠲᠤᠭ ᠤᠨ ᠡᠰᠢ᠂ ᠭᠠᠷᠠᠭ ᠤᠨ ᠨᠢᠭᠡᠨ ᠪᠤᠯᠭᠠᠨ ᠳᠤ ᠤᠯᠤᠰ ᠤᠨ ᠲᠤᠭ ᠮᠠᠨᠲᠤᠭᠤᠯᠲᠠᠭ᠃ ᠰᠦᠯᠲᠡ ᠲᠠᠭᠤᠨ ᠤ ᠬᠠᠪᠰᠤᠷᠭᠠᠯ ᠬᠦᠭᠵᠢᠮ ᠪᠠᠶᠢᠲᠠᠭ ᠦᠭᠡᠢ ᠶᠢᠨ ᠬᠠᠷᠠᠭ᠎ᠠ ᠪᠠᠷ ᠪᠠᠭᠰᠢ ᠰᠤᠷᠤᠭᠴᠢᠳ ᠰᠢᠭᠤᠳ ᠤᠯᠤᠰ ᠤᠨ ᠰᠦᠯᠲᠠ ᠲᠠᠭᠤᠤ ᠪᠠᠨ ᠲᠠᠭᠤᠯᠠᠵᠤ ᠤᠯᠤᠰ ᠤᠨ ᠲᠤᠭ ᠢᠶᠠᠨ ᠮᠠᠨᠲᠤᠭᠤᠯᠲᠠᠭ ᠪᠠᠶᠢᠭᠰᠠᠨ᠂ ᠤᠯᠤᠰ ᠤᠨ ᠰᠦᠯᠲᠡ ᠲᠠᠭᠤᠤ ᠨᠢ ᠮᠢᠨᠤ ᠪᠦᠷᠢᠨ ᠪᠦᠲᠦᠨ ᠲᠠᠭᠤᠯᠠᠵᠤ ᠴᠢᠲᠠᠭᠰᠠᠨ ᠬᠠᠮᠤᠭ ᠠᠩᠬᠠᠨ ᠤ ᠲᠠᠭᠤᠤ ᠪᠤᠯᠤᠭᠰᠠᠨ ᠪᠢᠯᠡ᠃ ᠲᠡᠬᠦᠨ ᠤ ᠡᠮᠦᠨ᠎ᠡ ᠲᠠᠯ᠎ᠠ ᠳᠤ ᠰᠠᠭᠰᠤᠨ ᠪᠦᠮᠪᠦᠭᠡ ᠶᠢᠨ ᠦᠷᠦᠭᠡᠰᠤᠨ ᠵᠢᠶᠠᠰᠠ ᠲᠠᠢ᠂ ᠲᠡᠮᠢᠷ ᠤᠨ ᠲᠠᠯᠠᠪᠤᠷ ᠭᠡᠵᠤ ᠪᠠᠶᠢᠲᠠᠭ ᠦᠭᠡᠢ᠃ ᠨᠠᠭᠠᠳᠴᠤ ᠲᠤᠭᠯᠠᠬᠤ ᠠᠴᠠ ᠡᠯᠡᠭᠲᠡᠭᠡᠳ ᠦᠩᠭᠡ ᠨᠢ ᠮᠡᠲᠡᠭᠲᠡᠬᠦ ᠦᠭᠡᠢ ᠪᠤᠯᠤᠭᠰᠠᠨ ᠭᠠᠭᠴᠠ ᠰᠠᠭᠰᠤᠨ ᠪᠦᠮᠪᠦᠭᠡ ᠲᠠᠢ᠂ ᠦᠭᠡᠷ᠎ᠡ ᠨᠠᠭᠠᠳᠴᠤ ᠲᠤᠭᠯᠠᠴᠢᠮᠠᠷ ᠲᠠᠮᠢᠷ ᠤᠨ ᠬᠦᠲᠡᠯᠭᠡᠭᠡᠨ ᠤ ᠪᠠᠭᠠᠵᠢ ᠭᠡᠷᠡᠭᠰᠡᠯ ᠭᠡᠵᠤ ᠠᠯᠠᠭ᠎ᠠ᠃ ᠪᠠᠷᠢᠭᠠᠲᠠ ᠶᠢᠨ ᠰᠤᠷᠭᠠᠭᠤᠯᠢ ᠨᠢ ᠵᠦᠪᠭᠡᠨ ᠨᠢᠭᠡ ᠠᠴᠠ ᠲᠦᠷᠪᠡᠲᠦᠭᠡᠷ ᠤᠨ ᠪᠤᠯᠲᠠᠯ᠎ᠠ ᠰᠤᠷᠤᠭᠴᠢ ᠡᠯᠰᠡᠵᠦ᠂ ᠤᠨ ᠪᠦᠷᠢ ᠨᠢᠭᠡᠭᠡᠨ ᠠᠩᠬᠢ ᠲᠠᠢ᠂ ᠨᠡᠶᠢᠲᠡ ᠵᠢᠷᠠ ᠰᠢᠬᠠᠮ ᠰᠤᠷᠤᠭᠴᠢ ᠲᠠᠢ᠂ ᠡᠬᠦᠨ  ᠳᠤ ᠠᠷᠪᠡ ᠰᠢᠬᠠᠮ ᠪᠤᠰᠤᠳ ᠦᠨᠲᠦᠰᠦᠲᠡᠨ   ᠤ  ᠭᠡᠤᠭᠡᠳ  ᠪᠠᠶᠢᠵᠤ  ᠂ ᠲᠠᠪᠤᠲᠤᠭᠠᠷ ᠤᠨ ᠪᠤᠯᠬᠤ ᠳᠤ ᠰᠤᠮᠤᠨ ᠤ ᠰᠤᠷᠭᠠᠭᠤᠯᠢ ᠳᠤ ᠬᠦᠷᠴᠦ ᠪᠢᠴᠢᠭ ᠦᠵᠡᠲᠡᠭ ᠪᠠᠶᠢᠪᠠ᠃          ᠠᠭᠤᠯᠠᠨ ᠮᠤᠬᠤᠷ ᠲᠤ ᠭᠠᠭᠴᠠ ᠲᠠᠰᠤᠯᠭ᠎ᠠ ᠴᠢᠯᠠᠭᠤ ᠪᠠᠷ ᠪᠠᠷᠢᠭᠰᠠᠨ ᠪᠠᠶᠢᠰᠢᠩ ᠳᠤ ᠦᠰᠦᠭᠰᠡᠨ ᠨᠠᠲᠠ ᠳᠤ ᠠᠪᠴᠦ ᠭᠡᠯᠡᠪᠡᠯ ᠪᠠᠷᠢᠭᠠᠲᠠ ᠶᠢᠨ ᠰᠤᠷᠭᠠᠭᠤᠯᠢ ᠭᠡᠵᠤ ᠲᠤᠮᠤ ᠪᠠᠷᠢᠯᠭ᠎ᠠ ᠲᠠᠢ ᠰᠠᠶᠢᠬᠠᠨ ᠭᠠᠵᠠᠷ ᠪᠠᠶᠢᠯ᠎ᠠ᠃ ᠠᠩᠬᠢ ᠶᠢᠨ ᠠᠷᠪᠠᠨ ᠭᠡᠲᠦᠨ ᠨᠦᠬᠦᠳ ᠲᠠᠢ ᠪᠠᠨ ︿︿ᠠ ᠡ ᠢ﹀﹀ ᠭᠡᠳ ᠠᠶᠠᠯᠭᠤ ᠲᠠᠲᠠᠨ ᠤᠩᠰᠢᠵᠦ᠂ ᠠᠴᠤᠭ ᠰᠢᠯᠪᠢ ᠨᠢᠷᠤᠭᠤ ᠭᠡᠵᠤ ᠪᠢᠴᠢᠬᠦ ᠳᠤ ᠰᠠᠨᠠᠭ᠎ᠠ ᠪᠠᠷ ᠵᠠᠷᠤᠭᠲᠠᠬᠤ ᠦᠭᠡᠢ ᠬᠠᠷᠠᠨᠲᠠ ᠳᠤ ᠤᠴᠠᠭᠠᠷᠲᠠᠨ᠂ ᠮᠠᠭᠤᠬᠠᠢ ᠪᠢᠴᠢᠭᠰᠡᠨ ᠦᠰᠦᠭ  ᠢᠶᠠᠨ ᠵᠠᠰᠠᠬᠤ ᠭᠡᠵᠤ ᠱᠤᠭᠤᠮᠲᠤ ᠴᠠᠭᠠᠰᠤ ᠪᠠᠨ ᠤᠷᠠᠭᠲᠠᠲᠠᠯ᠎ᠠ ᠪᠠᠯᠠᠯᠵᠤ ᠶᠠᠪᠤᠭᠰᠠᠨ ᠡᠲᠦᠷ ᠬᠤᠨᠤᠭ ᠰᠡᠳᠬᠢᠯ ᠳᠤ ᠮᠦᠩᠭᠡ ᠬᠤᠨᠤᠭᠰᠢᠵᠠᠢ᠃ ᠦᠲᠡ ᠶᠢᠨ ᠬᠤᠶᠢᠨ᠎ᠠ ᠶᠢᠨ ᠬᠢᠴᠢᠶᠡᠯ ᠪᠠᠭᠤᠭᠰᠠᠨ ᠤ ᠲᠠᠷᠠᠭ᠎ᠠ ᠭᠡᠷ ᠤᠨ ᠲᠠᠰᠬᠠᠯ ᠲᠠᠭᠠᠭᠠᠯᠭᠠᠪᠤᠷᠢ ᠭᠡᠵᠤ ᠪᠠᠶᠢᠲᠠᠭ ᠦᠭᠡᠢ᠂ ᠰᠤᠷᠬᠤ ᠠᠭᠤᠯᠭ᠎ᠠ ᠴᠦᠭᠡᠨ ᠠᠴᠠ ᠬᠢᠴᠢᠶᠠᠯ ᠲᠡᠭᠡᠷ᠎ᠡ ᠪᠦᠬᠦᠨ ᠢ ᠤᠭᠤᠷᠠᠭ ᠲᠠᠷᠢᠬᠢᠨ ᠳᠤ ᠪᠠᠨ ᠰᠢᠩᠭᠡᠴᠢᠭᠡᠲᠡᠭ᠂ ᠡᠷᠭᠡ ᠲᠤᠷ᠎ᠡ ᠪᠠᠷ ᠲᠤᠭᠯᠠᠭᠰᠠᠨ ᠵᠤᠯ ᠵᠢᠷᠭᠠᠯᠲᠤ ᠰᠠᠶᠢᠬᠠᠨ ᠴᠠᠭ ᠦᠶ᠎ᠠ ᠪᠠᠶᠢᠭᠰᠠᠨ᠃ ᠬᠢᠴᠢᠶᠡᠯ ᠰᠤᠷᠤᠯᠭ᠎ᠠ ᠳᠤ ᠪᠠᠨ ᠶᠠᠭᠠᠷᠠᠵᠤ ᠪᠠᠶᠢᠭ᠎ᠠ ᠭᠡᠤᠭᠡᠳ ᠤᠳ ᠢ ᠬᠠᠷᠠᠬᠤ ᠪᠤᠯᠭᠠᠨ ᠪᠠᠭ᠎ᠠ ᠶᠢᠨ ᠨᠠᠰᠤ ᠮᠢᠨᠢ ᠦᠪᠡᠷ ᠤᠨ ᠡᠷᠭᠡ ᠦᠭᠡᠢ ᠡᠷᠢᠭᠲᠡᠨ᠎ᠡ᠃ ᠤᠲᠤ ᠴᠦ ᠭᠡᠰᠡᠨ ᠪᠢ ᠭᠡᠤᠭᠡᠳ ᠨᠠᠰᠤ ᠪᠠᠨ ᠪᠤᠲᠤᠬᠤ ᠤᠷᠮ᠎ᠠ ᠲᠠᠢ᠂ ᠬᠠᠲᠠᠭᠰᠠᠨ ᠮᠠᠨᠲᠤᠤ ᠬᠡᠮᠯᠡᠴᠢᠬᠡᠭᠰᠡᠨ᠂ ᠬᠦᠢᠲᠡᠨ ᠤᠰᠤ ᠵᠠᠯᠬᠢᠯᠠᠴᠢᠬᠠᠭᠰᠠᠨ᠂ ᠦᠰᠦ ᠨᠢ ᠰᠢᠷᠢᠯᠲᠦᠨ᠂ ᠭᠠᠷ ᠨᠢ ᠰᠠᠭᠠᠷᠢᠳᠤᠨ᠂ ᠨᠦᠬᠦᠭᠡᠰᠤ ᠲᠠᠢ ᠦᠮᠦᠲᠦ᠂ ᠤᠩᠭᠤᠷᠬᠠᠢ ᠬᠤᠩᠰᠢᠶᠠᠷ ᠲᠠᠢ ᠱᠠᠬᠠᠢ ᠡᠮᠦᠰᠴᠦ ᠪᠠᠶᠢᠭᠰᠠᠨ ᠴᠦ ᠰᠡᠳᠬᠢᠯ ᠤᠨ ᠲᠠᠷᠤᠭᠠᠰᠤ ᠭᠡᠵᠤ ᠠᠯᠠᠭ᠎ᠠ᠃ ᠭᠡᠲᠡᠰᠤ ᠦᠯᠦᠰᠬᠦᠯᠡᠩ ᠰᠠᠨᠠᠭ᠎ᠠ ᠴᠠᠳᠬᠤᠯᠠᠩ ᠭᠡᠤᠭᠡᠳ ᠨᠠᠰᠤ ᠮᠢᠨᠢ ᠡᠨᠡ ᠲᠦᠷᠦᠯ ᠳᠤ ᠪᠠᠨ ᠠᠬᠢᠭᠠᠳ ᠢᠷᠡᠬᠦ ᠠᠴᠠ ᠦᠩᠭᠡᠷᠡᠵᠦ  ᠳ᠋ᠠ  ᠂  ᠭᠦᠭᠡᠷᠦᠬᠦᠢ  ︕           ᠭᠡᠤᠭᠡᠳ ᠭᠡᠵᠤ ᠨᠠᠭᠠᠳᠴᠤ ᠲᠤᠭᠯᠠᠬᠤ ᠲᠤᠮᠲᠠ ᠪᠠᠨ ᠬᠢᠴᠢᠶᠡᠯ ᠲᠡᠭᠡᠷ᠎ᠡ ᠠᠴᠠ ᠤᠯᠵᠤ ᠰᠤᠷᠲᠠᠭ ᠦᠭᠡᠢ ᠲᠡᠷᠡ ᠤᠯᠠᠨ ᠵᠦᠢᠯᠡᠰ ᠢ ᠤᠯᠵᠤ ᠰᠤᠷᠲᠠᠭ ᠤᠴᠢᠷᠲᠠᠢ᠃ ᠨᠡᠩ ᠴᠦ ᠨᠠᠭᠠᠲᠤᠮ ᠲᠤᠭᠯᠠᠭᠠᠮ ᠢᠶᠠᠷ ᠲᠠᠮᠵᠢᠨ ᠤᠬᠠᠭᠠᠨ ᠢᠶᠠᠨ ᠲᠡᠯᠡᠵᠦ᠂ ᠤᠶᠤᠨ ᠢᠶᠠᠨ ᠰᠡᠯᠪᠢᠲᠡᠭ ᠰᠠᠨ᠃ ᠨᠠᠭᠠᠲᠤᠮ ᠲᠤᠭᠯᠠᠭᠠᠮ ᠤᠨ ᠪᠠᠭᠠᠵᠢ ᠭᠡᠷᠡᠭᠰᠡᠯ ᠢᠶᠠᠷ ᠲᠤᠲᠠᠭᠰᠠᠨ ᠪᠠᠷᠢᠭᠠᠲᠠ ᠶᠢᠨ ᠰᠤᠷᠭᠠᠭᠤᠯᠢ ᠳᠤ ᠪᠠᠭ᠎ᠠ ᠶᠢᠨ ᠨᠠᠰᠤ ᠮᠢᠨᠢ ᠦᠭᠡᠷ᠎ᠡ ᠨᠢᠭᠡ ᠦᠩᠭᠡ ᠪᠠᠷ ᠰᠤᠯᠤᠩᠭᠠᠷᠠᠭᠰᠠᠨ᠃ ᠬᠢᠴᠢᠶᠡᠯ ᠤᠨ ᠵᠠᠪᠰᠠᠷᠯᠠᠭ᠎ᠠ ᠳᠤ ᠡᠮᠡᠭᠲᠡᠢ ᠰᠤᠷᠤᠭᠴᠢᠳ ᠰᠤᠨᠲᠠᠭ ᠬᠠᠷᠠᠶᠢᠵᠤ ᠲᠤᠭᠯᠠᠨ᠎ᠠ᠂ ᠭᠡᠤᠭᠡᠨᠴᠤᠳ ᠶᠡᠷᠦ ᠨᠢ ᠦᠶ᠎ᠡ ᠦᠭᠡᠢ ᠰᠢᠨᠵᠢᠲᠡᠢ᠂ ᠨᠦᠬᠦᠭᠡ ᠡᠲᠡᠭᠡᠳ ᠨᠢ ᠲᠤᠯᠤᠭᠠᠢ ᠲᠡᠭᠡᠷ᠎ᠡ ᠪᠠᠨ ᠲᠠᠲᠠᠭᠰᠠᠨ ᠰᠤᠨᠲᠠᠭ ᠢ ᠬᠦᠯ ᠢᠶᠠᠷ ᠢᠶᠠᠨ ᠡᠯᠬᠦᠭᠡᠳ ᠠᠪᠤᠨ᠎ᠠ᠂ ᠰᠤᠨᠲᠠᠭ ᠢᠶᠠᠨ ᠠᠯᠲᠠᠭᠤᠯᠤᠯ ᠦᠭᠡᠢ ᠲᠤᠭᠲᠠᠭᠰᠠᠨ ᠬᠦᠲᠡᠯᠦᠯ ᠢ ᠰᠤᠷᠮᠠᠭᠠᠢ ᠬᠢᠬᠦ ᠨᠢ ᠪᠦᠵᠢᠭ ᠦᠰᠦᠷᠴᠦ ᠪᠠᠶᠢᠭ᠎ᠠ ᠶᠤᠮ ᠰᠢᠭ᠋ ᠭᠤᠶᠤ ᠬᠠᠷᠠᠭᠲᠠᠨ᠎ᠠ᠃ ᠲᠡᠭᠡᠬᠦ ᠳᠤ ᠡᠷᠡᠭᠲᠡᠢ ᠰᠤᠷᠤᠭᠴᠢᠳ ᠬᠠᠨᠴᠤᠢ ᠪᠠᠷ ᠢᠶᠠᠨ ᠬᠦᠯᠦᠰᠤ ᠨᠢᠰᠤ ᠪᠠᠨ ᠵᠦᠯᠬᠦᠴᠢᠭᠡᠭᠰᠡᠨ ᠂ ᠰᠢᠯ ᠪᠦᠮᠪᠦᠭᠡ ᠨᠢᠰᠠᠯᠤᠨ ᠨᠠᠭᠠᠳᠬᠤ ᠪᠤᠶᠤ ᠭᠠᠭᠴᠠᠬᠠᠨ ᠰᠠᠭᠰᠤᠨ ᠪᠦᠮᠪᠦᠭᠡ ᠪᠠᠨ ᠪᠤᠯᠢᠶᠠᠯᠲᠤᠨ ᠲᠤᠭᠯᠠᠨ᠎ᠠ᠂ ᠵᠠᠷᠢᠮ ᠨᠢ ᠪᠦᠭᠡ ᠪᠠᠷᠢᠯᠲᠤᠵᠤ ᠪᠠᠶᠢᠨ᠎ᠠ ᠭᠡᠳ ᠨᠤᠴᠤᠯᠲᠤᠨ᠂ ᠡᠩᠭᠡᠷ ᠤᠨ ᠬᠢᠨᠢ ᠲᠠᠪᠤᠨ ᠲᠤᠪᠴᠢ ᠨᠢ ᠪᠠᠷᠤᠭ ᠪᠠᠶᠢᠬᠤ ᠦᠭᠡᠢ ᠪᠤᠯᠵᠠᠢ᠂ ᠪᠠᠶᠠᠷ ᠪᠠᠶᠠᠰᠬᠤᠯᠠᠩ ᠲᠠᠢ ᠭᠡᠲᠡᠭ ᠨᠢ ᠬᠠᠯᠲᠠᠷ ᠪᠤᠯᠤᠭᠰᠠᠨ ᠨᠢᠭᠤᠷ ᠴᠢᠷᠠᠢ ᠳᠤᠨᠢ ᠢᠯᠡᠭᠡᠨ ᠲᠤᠲᠤᠬᠠᠨ ᠪᠢᠴᠢᠭᠲᠡᠨ᠎ᠡ᠃ ᠡᠷᠡᠭᠲᠡᠢ ᠡᠮᠡᠭᠲᠡᠢ ᠰᠤᠷᠤᠭᠴᠢ ᠭᠡᠵᠤ ᠢᠯᠭᠠᠯ ᠦᠭᠡᠢ ᠦᠪᠡᠷ ᠤᠨ ᠭᠡᠰᠡᠨ ᠠᠷᠪᠠᠭᠠᠳ ᠱᠠᠭ᠎ᠠ ᠲᠠᠢ ᠪᠠᠶᠢᠲᠠᠭ᠃ ᠤᠯᠠᠨ ᠦᠩᠭᠡ ᠶᠢᠨ ᠪᠤᠲᠤᠭ ᠢᠶᠠᠷ ᠰᠢᠷᠲᠡᠨ ᠪᠤᠲᠤᠭᠰᠠᠨ ᠢᠶᠠᠷ ᠵᠦᠢᠯ ᠤᠨ ᠴᠡᠴᠡᠭ ᠲᠡᠯᠭᠡᠷᠡᠭᠰᠡᠨ ᠰᠢᠭ ᠰᠠᠶᠢᠬᠠᠨ ᠬᠠᠷᠠᠭᠲᠠᠲᠠᠭ ᠨᠢ ᠭᠠᠶᠢᠬᠠᠯᠲᠠᠢ᠃ ᠲᠠᠪᠤᠭᠤᠯᠠ ᠭᠤᠷᠪᠠᠭᠤᠯᠠ ᠪᠠᠨ ᠨᠡᠶᠢᠯᠡᠭᠡᠳ ᠢᠰᠡᠭᠡᠢ ᠲᠠᠪᠢᠰᠦᠭᠰᠡᠨ ᠮᠤᠲᠤᠨ ᠬᠠᠨᠵᠤᠨ ᠲᠡᠭᠡᠷ᠎ᠡ ᠵᠠᠪᠢᠯᠠᠬᠤ ᠨᠢ ᠵᠠᠪᠢᠯᠠᠵᠤ ᠴᠤᠮᠴᠤᠶᠢᠬᠤ ᠨᠢ ᠴᠤᠮᠴᠤᠶᠢᠴᠢᠬᠠᠭᠠᠳ ᠱᠠᠭ᠎ᠠ ᠲᠤᠭᠯᠠᠬᠤ ᠨᠢ ᠶᠡᠭᠡ ᠯᠡ ᠬᠦᠭᠵᠢᠶᠡᠨ ᠲᠠᠢ ᠪᠠᠶᠢᠲᠠᠭ᠃ ᠤᠯᠠᠩᠬᠢ ᠳᠤ ᠪᠠᠨ ᠲᠠᠪᠤᠨ ᠱᠠᠭ᠎ᠠ ᠪᠠᠨ ᠢᠰᠡᠭᠡᠢ ᠳᠤ ᠤᠷᠬᠢᠵᠦ᠂ ᠨᠢᠭᠡ ᠱᠠᠭ᠎ᠠ ᠪᠠᠷ ᠨᠢ ᠠᠷᠭᠠᠢ ᠪᠤᠯᠭᠠᠨ ᠂ ᠢᠵᠢᠯ ᠵᠢᠰᠦᠮ ᠢᠶᠠᠷ ᠨᠢ ᠬᠠᠮᠤᠵᠤ ᠠᠪᠤᠭᠠᠳ ᠠᠷᠪᠠ ᠬᠤᠷᠢ ᠭᠡᠬᠦᠴᠢᠯᠡᠨ ᠨᠡᠮᠡᠵᠦ᠂ ᠭᠡᠲᠦ ᠤᠲᠠᠭᠠᠨ ᠤ ᠡᠭᠡᠯᠵᠢ ᠪᠠᠷ ᠲᠡᠮᠵᠢᠨ ᠲᠤᠭᠲᠠᠭᠰᠠᠨ ᠲᠤᠭᠠᠨ ᠳᠤ ᠬᠦᠷᠭᠡᠨ᠎ᠡ᠃ ᠲᠤᠭᠲᠠᠭᠰᠠᠨ ᠲᠤᠭᠠᠨ ᠳᠤ ᠬᠦᠷᠦᠭᠰᠡᠨ ᠤ ᠲᠠᠷᠠᠭ᠎ᠠ ᠲᠠᠪᠤᠨ ᠱᠠᠭ᠎ᠠ ᠪᠠᠨ ᠤᠷᠬᠢᠵᠦ᠂ ᠨᠢᠭᠡ ᠢᠮᠠᠭ᠎ᠠ ᠪᠠᠭᠤᠪᠠᠯ ᠠᠷᠪᠡ ᠭᠡᠵᠤ ᠲᠤᠭᠠᠴᠠᠲᠠᠭ ᠪᠠᠶᠢᠨ᠎ᠠ᠃ ᠲᠡᠬᠢᠨ ᠨᠢᠭᠡ ᠱᠠᠭ᠎ᠠ ᠪᠠᠷ ᠠᠷᠭᠠᠢ  ᠪᠤᠯᠭᠠᠨ ᠲᠤᠭᠲᠠᠭᠰᠠᠨ ᠲᠤᠭᠠᠨ ᠤ ᠲᠤᠲᠤᠷ᠎ᠠ ᠪᠤᠰᠤᠳ ᠱᠠᠭ᠎ᠠ ᠪᠠᠷ ᠲᠦᠷᠪᠡᠨ ᠬᠤᠨᠢ᠂ ᠲᠦᠷᠪᠡᠨ ᠢᠮᠠᠭ᠎ᠠ᠂ ᠲᠦᠷᠪᠡᠨ ᠮᠤᠷᠢ᠂ ᠲᠦᠷᠪᠡᠨ ᠲᠡᠮᠡᠭᠡ ᠪᠤᠯᠭᠠᠬᠤ ᠪᠠᠷ ᠴᠢᠷᠮᠠᠶᠢᠲᠠᠭ ᠪᠢᠯᠡ᠃ ᠲᠡᠭᠡᠭᠰᠢ ᠰᠢᠲᠡᠭᠰᠡᠨ ᠱᠠᠭ᠎ᠠ ᠪᠠᠨ ᠠᠩᠬᠠᠷᠤᠯ ᠲᠠᠢ ᠬᠠᠷᠠᠬᠤ ᠶᠢᠨ ᠲᠠᠭᠠᠤ  ᠰᠠᠭᠠᠷᠢᠳᠤᠭᠰᠠᠨ ᠵᠢᠭᠠᠬᠠᠨ ᠭᠠᠷ ᠢᠶᠠᠨ ᠪᠤᠱᠢᠭᠤ ᠮᠦᠷᠲᠡᠭᠡᠨ ᠤᠨᠤᠪᠴᠢᠲᠠᠢ ᠪᠠᠷ ᠢᠰᠡᠭᠡᠢ ᠲᠡᠭᠡᠷ᠎ᠡ ᠬᠠᠶᠠᠭᠰᠠᠨ ᠱᠠᠭ᠎ᠠ ᠪᠠᠨ ᠢᠵᠢᠯᠢ ᠵᠢᠰᠦᠮ ᠤᠨ ᠪᠤᠯᠭᠠᠵᠤ ᠡᠷᠬᠢᠬᠦᠯᠬᠦ ᠴᠢᠬᠤᠯᠠ ᠲᠠᠢ᠂ ᠡᠷᠬᠢᠬᠦᠯᠵᠦ ᠪᠠᠷᠠᠭᠰᠠᠨ ᠤ ᠲᠠᠷᠠᠭ᠎ᠠ ᠲᠡᠬᠢᠭᠠᠳ ᠨᠢᠭᠡᠯᠡ ᠲᠡᠭᠡᠷ᠎ᠡ ᠬᠠᠮᠤᠵᠤ ᠠᠪᠬᠤ ᠳᠤ ᠤᠩᠭᠠᠰᠤ ᠪᠤᠲᠠᠷᠠᠵᠤ ᠬᠠᠮᠠᠷ ᠠᠮᠠᠨ ᠳᠤ ᠤᠷᠣᠭᠰᠠᠨ ᠴᠦ ᠪᠠᠷᠢᠭᠠᠲᠠ ᠶᠢᠨ ᠨᠠᠭᠠᠲᠤᠮ ᠳᠤ ᠬᠤᠷᠲᠤᠨ ᠬᠦᠯᠦᠭ ᠲᠠᠢ ᠪᠠᠨ ᠬᠤᠯᠠ ᠶᠢᠨ ᠤᠷᠤᠯᠲᠤᠭᠠᠨ ᠳᠤ ᠲᠡᠷᠢᠬᠦᠯᠦᠭᠰᠡᠨ ᠰᠢᠭ ᠪᠠᠶᠠᠷ ᠪᠠᠭ᠋ᠠᠲᠤᠯ ᠢᠶᠠᠷ ᠪᠢᠯᠬᠠᠮ᠎ᠠ ᠪᠠᠶᠢᠲᠠᠭ᠃ ᠪᠠᠷᠠᠭᠤᠨ ᠠᠶᠢᠯ  ᠤᠨ ᠰᠢᠷᠠᠮᠠᠨ ᠭᠡᠤᠭᠡᠨ ᠤ ᠭᠠᠷ ᠤᠨ ᠬᠤᠷᠤᠭᠤ ᠭᠡᠵᠤ ᠤᠷᠲᠤ ᠮᠦᠷᠲᠡᠭᠡᠨ ᠨᠠᠷᠢᠬᠠᠨ᠂ ᠱᠠᠭ᠎ᠠ ᠨᠢ ᠶᠠᠭ ᠯᠠ ᠲᠡᠬᠦᠨ ᠳᠤ ᠵᠤᠬᠢᠶᠠᠭᠰᠠᠨ ᠲᠤᠭᠯᠠᠭᠠᠮ ᠰᠢᠭ᠋᠃ ᠰᠢᠷᠠᠮᠠᠨ ᠭᠡᠤᠭᠡᠨ ᠡᠴᠦᠰ ᠤᠨ ᠢᠯᠠᠭᠴᠢ ᠪᠤᠯᠤᠭᠰᠠᠨ ᠤᠲᠠᠭ᠎ᠠ ᠨᠢ ᠭᠡᠨ ᠠᠴᠠ ᠴᠦ ᠠᠷᠪᠢᠨ᠃ ᠬᠤᠶᠠᠷ ᠭᠤᠷᠪᠠᠨ ᠵᠢᠯ ᠲᠡᠪᠢᠰᠦᠭᠰᠡᠨ ᠢᠰᠡᠭᠡᠢ ᠳᠤ ᠱᠠᠭ᠎ᠠ ᠲᠤᠭᠯᠠᠭᠰᠠᠭᠠᠷ ᠪᠠᠶᠢᠵᠤ ᠪᠦᠷ ᠨᠦᠭᠡ ᠲᠠᠢ ᠪᠤᠯᠤᠭᠰᠠᠨ ᠪᠠᠶᠢᠲᠠᠭ᠂ ᠲᠡᠷᠡᠬᠦ ᠨᠦᠭᠡ ᠲᠠᠢ ᠢᠰᠡᠭᠡᠢ ᠪᠠᠨ ᠤᠲᠤ ᠴᠦ ᠭᠡᠰᠡᠨ ᠰᠠᠨᠠᠭᠠᠯᠵᠠᠬᠤ ᠲᠤᠷᠠᠲᠠᠢ᠂ ᠲᠠᠠᠳ᠋ᠨ ᠮᠢᠨᠤ ᠭᠡᠤᠭᠡᠳ ᠨᠠᠰᠤᠨ ᠤ ᠤᠩᠭᠤᠨ ᠲᠤᠷᠠᠳᠬᠠᠯ ᠪᠤᠢ᠃ ᠬᠠᠨᠤᠲᠠᠯ᠎ᠠ ᠪᠠᠨ ᠨᠠᠭᠠᠲᠤᠭᠠᠳ ᠪᠦᠷᠦᠢ ᠲᠠᠰᠤᠷᠠᠬᠤ ᠪᠠᠷ ᠨᠢ ᠨᠢᠭᠤᠯᠴᠠᠭ᠎ᠠ ᠲᠤᠭᠯᠠᠵᠤ ᠡᠬᠢᠯᠡᠬᠦ ᠨᠢ ᠲᠡᠷᠡ᠃ ᠨᠢᠭᠡ ᠨᠢ ᠨᠢᠭᠡᠨ ᠳᠤ ᠪᠠᠨ ᠦᠵᠡᠭᠲᠡᠬᠦ ᠦᠭᠡᠢ ᠭᠡᠵᠤ ᠨᠢᠭᠤᠵᠤ ᠪᠤᠯᠬᠤ ᠭᠠᠵᠠᠷ ᠪᠦᠬᠦᠨ ᠢ ᠡᠷᠢᠵᠦ᠂ ᠨᠦᠬᠦᠭᠡ ᠲᠠᠯ᠎ᠠ ᠲᠠᠢ ᠪᠠᠨ ᠤᠶᠤᠨ ᠤᠬᠠᠭᠠᠨ ᠢᠶᠠᠨ ᠦᠵᠡᠯᠴᠡᠨ᠎ᠡ᠃ ᠡᠪᠡᠰᠤ ᠬᠠᠮᠬᠤᠤᠯ ᠦᠰᠤ ᠭᠡᠵᠢᠭᠡᠨ ᠳᠤᠨᠢ ᠨᠠᠭᠠᠯᠲᠤᠵᠤ᠂ ᠵᠤᠯ ᠵᠢᠷᠭᠠᠯᠲᠤ ᠮᠦᠴᠡ ᠳᠤ ᠪᠠᠨ ᠰᠤᠭᠲᠤᠭᠤᠷᠠᠭᠰᠠᠨ ᠤᠩᠭᠤᠷᠬᠠᠢ ᠰᠢᠲᠤ ᠲᠠᠢ ᠭᠡᠤᠭᠡᠳ ᠤᠨ ᠴᠠᠶᠢᠯᠭᠠᠨ ᠢᠨᠢᠶᠡᠲᠦ ᠨᠢᠭᠤᠷ ᠴᠢᠷᠠᠢ ᠳᠤᠨᠢ ᠢᠯᠡᠭᠡᠨ ᠬᠠᠷᠠᠭᠲᠠᠨ᠎ᠠ᠃ ᠬᠦᠮᠦᠨ ᠤ ᠰᠠᠶᠢᠬᠠᠨ ᠭᠡᠵᠤ ᠭᠡᠤᠭᠡᠳ ᠨᠠᠰᠤ ᠡ︕ ᠬᠦᠯᠢᠶᠡᠰᠤ ᠲᠠᠷᠤᠭᠠᠰᠤ ᠦᠭᠡᠢ ᠭᠡᠤᠭᠡᠳ ᠨᠠᠰᠤ ᠲᠠᠢ ᠪᠠᠶᠢᠲᠠᠭ ᠲᠤ ᠪᠠᠨ ᠬᠦᠮᠦᠨ ᠰᠠᠶ᠋ᠢ ᠰᠡᠳᠬᠢᠯ ᠡᠷᠡᠬᠦᠯ ᠦᠰᠲᠡᠭ ᠨᠢ ᠦᠨᠡᠨ᠃            ᠤᠷᠠᠳ ᠤᠨ ᠲᠤᠮᠲᠠᠲᠤ ᠬᠤᠰᠢᠭᠤᠨ ᠤ ᠤᠩᠭᠤᠨ ᠪᠠᠯᠭᠠᠰᠤ ᠶᠢᠨ ᠰᠢᠷᠠᠴᠢᠯᠠᠭᠤ ᠭᠠᠴᠠᠭᠠᠨ ᠤ ᠪᠠᠷᠢᠭᠠᠲᠠ ᠶᠢᠨ ᠰᠤᠷᠭᠠᠭᠤᠯᠢ ᠮᠢᠨᠢ 1970 ᠤᠨ  ᠳᠤ ᠪᠠᠶᠢᠭᠤᠯᠤᠭᠲᠠᠵᠤ᠂ ᠡᠨᠡ ᠨᠤᠲᠤᠭ ᠤᠨ ᠠᠯᠢ ᠤᠯᠠᠨ ᠦᠷᠡᠰ ᠲᠤ ︿︿ᠠ﹀﹀ ᠦᠰᠦᠭ ︿︿ᠠᠷᠠᠪ ᠲᠤᠭ᠎ᠠ﹀﹀ ᠶᠢ ᠲᠠᠨᠢᠭᠤᠯᠤᠨ ᠬᠠᠷᠠᠭ᠎ᠠ ᠤᠷᠤᠭᠤᠯᠵᠤ᠂ ᠤᠬᠠᠭᠠᠨ ᠰᠤᠷᠢᠬᠤ ᠠᠯᠤᠰ ᠤᠨ ᠬᠠᠷᠭᠤᠢ ᠳᠤ ᠠᠷᠤ ᠠᠷᠤ ᠠᠴᠠ ᠨᠢ ᠮᠤᠷᠲᠠᠭᠤᠯᠵᠤ ᠪᠢᠯᠡ᠃ ᠮᠤᠷᠢᠨ ᠨᠢᠷᠤᠭᠤᠨ ᠲᠡᠭᠡᠷᠡᠬᠢ ᠰᠤᠷᠭᠠᠭᠤᠯᠢ ᠠᠴᠠ ᠠᠷᠠᠢ ᠲᠤᠮᠤᠬᠠᠨ ᠪᠠᠷᠢᠭᠠᠲᠠ ᠶᠢᠨ ᠮᠢᠨᠢ ᠰᠤᠷᠭᠠᠭᠤᠯᠢ ᠠᠴᠠ ᠠᠷᠠᠳ ᠤᠨ ᠪᠠᠭᠰᠢ᠂ ᠡᠮᠴᠢ᠂ ᠤᠯᠤᠰ ᠤᠨ ᠠᠯᠪᠠᠲᠠᠨ᠂ ᠨᠠᠶᠢᠷᠠᠭᠤᠯᠤᠭᠴᠢ᠂ ᠵᠤᠬᠢᠶᠠᠯᠴᠢ᠂ ᠰᠤᠷᠪᠤᠯᠵᠢᠯᠠᠭᠴᠢ ᠁ ᠭᠡᠳ ᠠᠯᠢ ᠤᠯᠠᠨ ᠡᠷᠲᠡᠮᠲᠡᠨ ᠴᠢᠲᠠᠪᠦᠷᠢᠲᠠᠨ ᠢ ᠬᠦᠮᠦᠵᠢᠬᠦᠯᠤᠨ᠂ ᠭᠠᠴᠠᠭ᠎ᠠ ᠰᠤᠮᠤ ᠴᠢᠨᠠᠭᠰᠢᠯᠠᠭᠠᠳ ᠤᠷᠠᠳ ᠨᠤᠲᠤᠭ ᠤᠨ ᠠᠯᠲᠠᠷ ᠢ ᠲᠡᠯᠡᠭᠡᠢ ᠶᠢᠨ ᠵᠠᠢ ᠳᠤ ᠡᠷᠬᠦᠵᠤ ᠶᠠᠪᠤᠭᠰᠠᠨ ᠰᠠᠶᠢᠬᠠᠨ ᠲᠡᠤᠭᠡ ᠲᠠᠢ ᠪᠢᠯᠡ᠃ ᠪᠠᠷᠢᠭᠠᠲᠠ ᠶᠢᠨ ᠰᠤᠷᠭᠠᠭᠤᠯᠢ ᠮᠢᠨᠢ ᠴᠠᠭ ᠤᠨ ᠤᠷᠤᠰᠬᠠᠯ᠂ ᠨᠡᠶᠢᠭᠡᠮ ᠤᠨ ᠬᠦᠭᠵᠢᠯᠲᠡ ᠵᠡᠷᠭᠡ ᠤᠯᠠᠨ ᠵᠦᠢᠯ  ᠤᠨ ᠰᠢᠯᠲᠠᠭᠠᠨ ᠠᠴᠠ ᠪᠤᠯᠵᠤ᠂ ᠠᠷᠪᠠᠨ ᠲᠠᠪᠤᠬᠠᠨ ᠵᠢᠯ ᠪᠤᠯᠤᠭᠠᠳ 1985 ᠤᠨ ᠳᠤ ᠲᠡᠤᠭᠡᠲᠦ ᠡᠬᠦᠷᠭᠡ ᠪᠠᠨ ᠠᠮᠵᠢᠯᠲᠠ ᠲᠠᠢ ᠬᠦᠢᠴᠡᠳᠭᠡᠵᠦ᠂ ᠤᠨ ᠵᠢᠯ ᠤᠨ ᠡᠷᠬᠢᠯᠲᠡ ᠶᠢᠨ ᠲᠤᠭᠤᠰᠤᠨ ᠳᠤ ᠪᠤᠯᠠᠭᠲᠠᠬᠤ ᠦᠭᠡᠢ ᠪᠠᠶᠢᠬᠤ ᠶᠢᠨ ᠠᠷᠭ᠎ᠠ ᠦᠭᠡᠢ ᠪᠤᠯᠠᠭᠲᠠᠯ᠎ᠠ᠃           ᠭᠤᠴᠢᠨ ᠵᠢᠯ ᠤᠨ ᠲᠠᠷᠠᠭ᠎ᠠ᠂ ᠨᠤᠲᠤᠭ ᠤᠨ ᠢᠶᠠᠨ ᠵᠢᠱᠢᠶᠡᠴᠢ ᠮᠠᠯᠴᠢᠨ ᠢ ᠰᠤᠷᠪᠤᠯᠵᠢᠯᠠᠬᠤ ᠲᠤᠬᠢᠶᠠᠯ ᠢᠶᠠᠷ ᠭᠡᠤᠭᠡᠳ ᠨᠠᠰᠤᠨ ᠤ ᠪᠠᠨ ᠤᠨᠠᠭᠠᠨ ᠲᠤᠷᠠᠳᠬᠠᠯ ᠳᠤ ᠬᠦᠲᠦᠯᠦᠭᠲᠡᠨ ᠪᠢ ᠪᠠᠷᠢᠭᠠᠲᠠ ᠶᠢᠨ ᠰᠤᠷᠭᠠᠭᠤᠯᠢ ᠳᠤ ᠬᠦᠷᠦᠭᠰᠡᠨ ᠶᠤᠮ᠃ ᠬᠦᠭᠡ ᠲᠡᠭᠷᠢ ᠨᠢ ᠴᠡᠯᠮᠡᠭᠰᠢᠵᠦ᠂ ᠬᠦᠪᠦᠩ ᠡᠬᠦᠯᠡ ᠬᠦᠪᠪᠦᠯᠵᠡᠨ᠂ ᠡᠪᠡᠰᠤ ᠤᠷᠭᠤᠮᠠᠯ ᠰᠢᠷᠠᠯᠠᠨ ᠬᠠᠯᠢᠭᠤᠷᠠᠵᠤ᠂ ᠮᠠᠯ ᠰᠦᠷᠦᠭ ᠲᠡᠪᠠᠲᠡᠢ ᠢᠲᠡᠰᠢᠯᠡᠨ᠂ ᠲᠠᠷᠭᠤᠨ ᠨᠠᠮᠤᠷ ᠤᠨ ᠲᠠᠩᠰᠤᠭ ᠤᠯᠠᠷᠢᠯ ᠭᠡᠵᠤ ᠶᠠᠭᠤᠲᠠᠢ ᠰᠠᠶᠢᠬᠠᠨ ᠴᠠᠭ ᠠᠵᠠᠢ᠃ ᠨᠤᠲᠤᠭ ᠤᠨ ᠢᠶᠠᠨ ᠦᠵᠡᠮᠵᠢ ᠳᠤ ᠰᠤᠭᠲᠤᠭᠤᠷᠠᠵᠤ᠂ ᠴᠡᠪᠡᠷ ᠠᠭᠠᠷ ᠢ ᠨᠢ ᠠᠮᠢᠰᠬᠤᠯᠯᠠᠨ᠂ ᠬᠦᠩᠭᠡᠨ ᠮᠠᠰᠢᠨ ᠢᠶᠠᠷ ᠬᠦᠲᠡᠭᠡ ᠳᠤ ᠰᠤᠨᠤᠯᠵᠠᠭᠰᠠᠨ ᠴᠠᠷᠲᠠᠮᠠᠯ ᠵᠠᠮ ᠢᠶᠠᠷ ᠲᠠᠪᠬᠢᠭᠤᠯᠬᠤ ᠳᠤ ᠰᠠᠨᠠᠭ᠎ᠠ ᠰᠡᠳᠬᠢᠯ ᠲᠠᠯ᠎ᠠ ᠰᠢᠭ᠋ ᠠᠭᠤᠵᠢᠷᠠᠭᠠᠳ ᠶᠠᠪᠤᠴᠢᠬᠠᠨ᠎ᠠ᠃ ᠨᠤᠲᠤᠭ ᠤᠨ ᠬᠦᠮᠦᠰ ᠤᠨ ᠲᠠᠭᠤᠲᠠᠵᠤ ᠲᠠᠰᠤᠭᠰᠠᠨ ᠰᠤᠷᠭᠠᠭᠤᠯᠢ ᠶᠢᠨ ᠬᠤᠲᠤᠭᠤᠷ ᠬᠦᠷᠦᠭᠡᠳ ᠢᠷᠡᠯ᠎ᠡ᠃ ᠠᠲᠡ ᠪᠠᠶᠢᠭᠰᠠᠨ ᠠᠶᠢᠯ ᠤᠳ ᠤᠨ ᠨᠠᠪᠲᠠᠭᠠᠷ ᠰᠢᠪᠠᠷ ᠪᠠᠶᠢᠰᠢᠩ ᠠᠯᠠᠭ᠎ᠠ᠂ ᠪᠤᠲᠤᠯ ᠳᠤ ᠬᠤᠨᠤᠭᠰᠢᠭᠰᠠᠨ ᠰᠤᠷᠭᠠᠭᠤᠯᠢ ᠮᠢᠨᠢ ᠴᠦ ᠠᠯᠠᠭ᠎ᠠ᠂ ᠲᠤᠭᠤᠰᠬᠠᠨ ᠪᠠᠶᠢᠰᠢᠩ ᠲᠠᠷᠢᠶᠠᠨ ᠭᠠᠵᠠᠷ ᠢᠶᠠᠷ ᠰᠤᠯᠢᠭᠲᠠᠵᠠᠢ᠃ ᠡᠷᠲᠡᠮ ᠨᠤᠮ ᠤᠨ  ᠷᠢᠳᠢ ᠰᠢᠳᠢ ᠤᠷᠤᠰᠢᠭᠰᠠᠨ ᠤ ᠬᠢ ᠪᠤᠯᠪᠠᠤ︖ ᠲᠠᠷᠢᠶ᠎ᠠ ᠴᠦ ᠰᠠᠶᠢᠬᠠᠨ ᠤᠷᠭᠤᠵᠠᠢ᠃           ᠰᠢᠷᠠᠯᠠᠭᠰᠠᠨ ᠨᠠᠪᠴᠢᠰ ᠰᠡᠷᠢᠬᠦᠨ ᠨᠠᠮᠤᠷ ᠤᠨ ᠰᠢᠪᠡᠷᠡᠭᠰᠡᠨ ᠪᠤᠷᠤᠭᠠᠨ ᠳᠤ᠂ ᠨᠠᠮᠠᠭᠠᠨ ᠳᠤ ᠪᠠᠨ ᠲᠤᠭᠲᠠᠵᠤ ᠴᠢᠲᠠᠯ ᠦᠭᠡᠢ ᠨᠢᠭᠡ ᠬᠤᠶᠠᠷ ᠢᠶᠠᠷ ᠬᠦᠷᠦᠰᠦᠲᠦ ᠲᠡᠯᠡᠭᠡᠢ ᠶᠢᠨ ᠬᠠᠯᠠᠭᠤᠨ ᠡᠪᠦᠷ ᠲᠤ ᠡᠯᠢᠭᠡᠲᠡᠵᠦ᠂ ᠢᠷᠡᠬᠦ ᠬᠠᠪᠤᠷ ᠤᠨ ᠨᠤᠭᠤᠭᠠᠨ ᠵᠡᠬᠦᠲᠦ ᠲᠠᠢ ᠪᠠᠨ ᠤᠭᠤᠷᠠᠭ ᠰᠢᠮ᠎ᠠ ᠪᠠᠨ ᠬᠠᠷᠠᠮ ᠦᠭᠡᠢ ᠵᠤᠷᠢᠭᠤᠯᠤᠭᠰᠠᠨ ᠦᠨᠲᠦᠰᠦᠨ ᠳᠤ ᠪᠠᠨ ᠠᠭᠤᠰᠤᠨ᠎ᠠ᠃ ᠨᠠᠮᠤᠷ ᠤᠨ ᠰᠠᠯᠬᠢ ᠰᠡᠷᠴᠢᠬᠢᠨᠡᠨ ᠦᠩᠭᠡᠷᠡᠬᠦ ᠪᠠᠷ ᠪᠠᠷᠢᠭᠠᠲᠠ ᠶᠢᠨ ᠰᠤᠷᠭᠠᠭᠤᠯᠢ ᠶᠢᠨ ᠪᠠᠶᠢᠭᠰᠠᠨ ᠭᠠᠵᠠᠷ  ᠲᠤ ᠤᠷᠭᠤᠭᠰᠠᠨ ᠲᠠᠷᠢᠶᠠᠨ ᠠᠴᠠ ᠤᠩᠰᠢᠯᠭ᠎ᠠ ᠶᠢᠨ ᠲᠠᠭᠤᠨ ᠰᠤᠨᠤᠰᠲᠠᠬᠤ ᠰᠢᠭ᠋ ᠪᠤᠯᠬᠤ ᠳᠤ ᠪᠢ ᠦᠪᠡᠷ ᠤᠨ ᠡᠷᠭᠡ ᠦᠭᠡᠢ ᠡᠷᠬᠢᠵᠦ ᠬᠠᠷᠠᠯ᠎ᠠ ᠁
ᠢᠷᠡᠯᠲᠡ᠄ ᠤᠷᠠᠳ ᠤᠨ ᠲᠤᠮᠳᠠᠳᠤ ᠬᠤᠰᠢᠭᠤᠨ ᠤ ᠵᠠᠰᠠᠭ ᠤᠨ ᠤᠷᠳᠤᠨ ᠤ ᠮᠤᠩᠭᠤᠯ ᠰᠦᠯᠵᠢᠶ᠎ᠡ