ᠬᠠᠯᠢᠭᠤᠲᠤ  ᠭᠤᠤᠯ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2020/11/3
   ᠪᠡ᠊ ᠪᠦᠭᠡ                         ᠬᠠᠯᠢᠭᠤᠲᠤ  ᠭᠤᠤᠯ             ︿︿ᠬᠠᠯᠢᠭᠤᠲᠤ ᠭᠤᠤᠯ ᠤᠨ ᠠᠲᠤᠭᠤᠨ ᠤ ᠬᠢᠨᠢ             ᠶᠠᠭᠤᠨ ᠳᠤᠨᠢ ᠪᠤᠯᠪᠠ︖ ᠠ ᠭᠡ ᠭᠡ             ᠠ ᠬᠠ ᠠ ᠬᠠ ᠬᠦ᠋             ᠬᠠᠷᠠᠬᠠᠨ ᠪᠠᠭ᠎ᠠ ᠲᠡᠬᠦᠦ ᠶᠢᠨ ᠢᠶᠠᠨ             ᠶᠠᠭᠤᠨ ᠳᠤᠨᠢ ᠪᠤᠯᠪᠠ︖ ᠠ ᠭᠡ ᠭᠡ             ᠬᠠᠯᠢᠭᠤᠲᠤ ᠭᠤᠤᠯ ᠤᠨ ᠠᠲᠤᠭᠤᠨ ᠤ             ᠬᠠᠲᠤᠷᠢᠭ᠎ᠠ ᠪᠤᠯᠤᠨ ᠰᠠᠶᠢᠪᠤᠷ ᠲᠤᠨᠢ             ᠠ ᠬᠠ ᠠ ᠬᠠ ᠬᠦ᠋             ᠬᠠᠷᠠᠬᠠᠨ ᠪᠠᠭ᠎ᠠ ᠲᠡᠬᠦᠦ ᠶᠢᠨ ᠢᠶᠠᠨ             ᠬᠠᠶᠢᠷ᠎ᠠ ᠪᠤᠯᠤᠨ ᠰᠡᠳᠬᠢᠯ ᠳᠤᠨᠢ ᠬᠦ᠋﹀﹀ ᠭᠡᠬᠦ ᠲᠠᠯᠶᠢᠭᠴᠢ ᠪᠤᠯᠤᠭᠰᠠᠨ‌‍ᠴᠢ᠊ ᠲᠠᠯᠠᠨᠲᠠᠢ ᠭᠤᠸᠠᠢ ᠶᠢᠨ ᠵᠤᠬᠢᠶᠠᠭᠰᠠᠨ ᠡᠨᠡᠬᠦ ᠲᠠᠭᠤᠤ ᠶᠢ ᠤᠷᠠᠳ ᠮᠤᠩᠭᠤᠯᠴᠤᠳ ᠪᠠᠷᠤᠭ ᠪᠦᠬᠦᠨ ᠢᠶᠠᠷ ᠲᠠᠭᠤᠯᠠᠵᠤ ᠴᠢᠲᠠᠬᠤ ᠪᠠᠷ ᠪᠠᠷᠠᠬᠤ ᠦᠭᠡᠢ ᠨᠡᠶᠢᠲᠡ ᠮᠤᠩᠭᠤᠯ ᠳᠤ ᠴᠦ ᠲᠡᠯᠭᠡᠷᠡᠭᠰᠡᠨ ᠪᠠᠶᠢᠲᠠᠭ᠃ ᠬᠠᠯᠢᠭᠤᠲᠤ ᠭᠤᠤᠯ ᠨᠢ ᠤᠷᠠᠳ ᠤᠨ ᠲᠤᠮᠲᠠᠲᠤ ᠬᠤᠰᠢᠭᠤᠨ ᠤ ᠲᠦᠪ — ᠬᠠᠯᠢᠭᠤᠲᠤ ᠪᠠᠯᠭᠠᠰᠤ ᠶᠢᠨ ᠵᠡᠬᠦᠨ ᠲᠠᠯ᠎ᠠ ᠪᠠᠷ ᠬᠤᠶᠢᠨ᠎ᠠ ᠠᠴᠠ ᠡᠮᠦᠨᠡᠰᠢ ᠤᠭᠠᠯᠵᠠᠯᠠᠨ ᠤᠷᠤᠰᠴᠤ᠂ ᠲᠡᠯᠭᠡᠭᠰᠡᠨ ᠴᠡᠩᠭᠡᠷ ᠬᠠᠲᠠᠭ ᠰᠢᠭ᠋ ᠮᠢᠷᠡᠯᠵᠡᠨ᠂ ᠦᠷᠯᠦᠭᠡ ᠶᠢᠨ ᠨᠠᠷᠨ ᠲᠤᠰᠬᠤ ᠪᠠᠷ ᠲᠠᠨ᠎ᠠ ᠰᠤᠪᠤᠳ ᠰᠢᠭ᠋ ᠬᠢᠯᠠᠰ ᠬᠢᠯᠠᠰ ᠬᠠᠷᠠᠭᠲᠠᠨ᠎ᠠ᠃             ᠬᠠᠯᠢᠭᠤᠲᠤ ᠭᠡᠬᠦ ᠨᠡᠷ᠎ᠡ ᠴᠤᠬᠤᠮ ᠭᠡᠵᠢᠶ᠎ᠡ ᠭᠡᠨ ᠦᠭᠬᠦᠭᠰᠡᠨ ᠢ ᠤᠲᠤ   ᠳᠤ ᠮᠡᠲᠡᠬᠦ  ᠬᠦᠮᠦᠨ  ᠠᠯᠠᠭ᠎ᠠ  ᠂ ᠬᠠᠯᠢᠭᠤᠲᠤ ᠭᠡᠬᠦ ᠨᠡᠷ᠎ᠡ ᠶᠢᠨ ᠢᠷᠡᠯᠲᠡ  ᠶᠢᠨ ᠲᠤᠬᠠᠢ ᠨᠠᠰᠤᠲᠠᠶᠢᠴᠤᠳ ᠤᠨ ᠬᠠᠭᠤᠴᠢᠯᠠᠬᠤ ᠪᠠᠷ ᠤᠤᠯ ᠨᠢ ᠡᠨᠡ ᠭᠤᠤᠯ ᠤᠨ ᠤᠷᠤᠰᠬᠠᠯ ᠨᠢ ᠦᠷᠭᠡᠨ ᠤᠰᠤ ᠨᠢ ᠲᠤᠩᠭᠠᠯᠠᠭ ᠪᠠᠶᠢᠵᠤ᠂ ᠬᠤᠶᠠᠷ ᠬᠦᠪᠡᠭᠡ  ᠪᠠᠷ ᠨᠢ ᠬᠤᠯᠤᠰᠤ ᠵᠡᠭᠡᠰᠤ ᠪᠢᠲᠡᠬᠦᠦ ᠤᠷᠭᠤᠨ᠂ ᠲᠡᠮᠡᠭᠡ ᠲᠠᠢ ᠬᠦᠮᠦᠨ ᠤᠷᠤᠬᠤ ᠳᠤ ᠦᠵᠡᠭᠲᠡᠬᠦ ᠪᠠᠨ ᠪᠤᠯᠢᠵᠤ᠂ ᠬᠤᠨ ᠭᠠᠯᠠᠭᠤ  ᠂  ᠲᠤᠭᠤᠷᠤᠤ  ᠂  ᠲᠤᠭᠤᠲᠤᠭ᠂ ᠯᠠᠮ᠎ᠠ ᠭᠠᠯᠠᠭᠤ᠂ ᠲᠠᠤᠯᠠᠢ᠂ ᠬᠤᠯᠠᠨ᠂ ᠵᠡᠭᠡᠷ᠎ᠡ ᠵᠡᠷᠭᠡ ᠭᠡᠭᠡᠷ᠎ᠡ ᠶᠢᠨ ᠠᠮᠢᠲᠠᠨ ᠵᠢᠬᠦᠷᠲᠡᠨ ᠰᠦᠯᠵᠢᠯᠲᠦᠨ᠂ ᠠᠲᠤᠭᠤ ᠮᠠᠯ ᠠᠯᠠᠭᠯᠠᠨ ᠪᠡᠯᠴᠢᠭᠰᠡᠨ ᠴᠡᠩᠭᠡᠯ ᠤᠨ ᠤᠷᠤᠨ ᠪᠠᠶᠢᠭᠰᠠᠨ ᠶᠤᠮ᠃ ᠡᠨᠡ ᠭᠤᠤᠯ ᠳᠤ ᠮᠡᠯᠡᠭᠡᠢ ᠭᠤᠸᠠᠭᠯᠠᠵᠤ᠂ ᠵᠢᠭᠠᠰᠤ ᠴᠤᠯᠬᠢᠨ᠂ ᠵᠢᠷᠠᠭᠠᠬᠠᠢ ᠢᠷᠠᠯᠵᠠᠵᠦ᠂ ᠬᠠᠯᠢᠭᠤ ᠲᠤᠩ ᠤᠯᠠᠨ ᠪᠠᠶᠢᠲᠠᠭ ᠠᠵᠠᠢ᠃ ᠲᠡᠶᠢᠮᠦ ᠳᠤ ᠪᠠᠨ ᠲᠤᠰ ᠨᠤᠲᠤᠭ ᠤᠨ ᠬᠦᠮᠦᠰ ᠬᠠᠯᠢᠭᠤ ᠲᠠᠢ ᠭᠤᠤᠯ ᠭᠡᠵᠦ ᠨᠡᠷᠡᠶᠢᠳᠴᠦ ᠪᠠᠶᠢᠭᠰᠠᠨ ᠢᠶᠠᠨ ᠠᠮᠠ ᠲᠠᠮᠵᠢᠨ ᠤᠯᠠᠷᠢᠨ ᠬᠤᠪᠢᠷᠠᠭᠰᠠᠭᠠᠷ ᠦᠨᠦᠲᠦᠷ ᠪᠤᠯᠬᠤ ᠳᠤ ᠬᠠᠯᠢᠭᠤᠲᠤ ᠭᠤᠤᠯ ᠭᠡᠬᠦ ᠨᠡᠷ᠎ᠡ ᠲᠠᠢ ᠪᠤᠯᠤᠭᠰᠠᠨ ᠭᠡᠨ᠎ᠡ᠃ ᠡᠬᠦᠨ ᠠᠴᠠ ᠭᠠᠲᠠᠨ᠎ᠠ ᠪᠠᠰᠠ ᠡᠷᠳᠡ ᠤᠷᠢᠳᠤ ᠴᠠᠭ ᠲᠤ ᠬᠠᠯᠢᠭᠤᠳᠤ ᠭᠤᠤᠯ ᠳᠤ ᠢᠭᠴᠤ ᠰᠠᠬᠤᠯᠢᠭ ᠬᠤᠯᠤᠰᠤ ᠤᠷᠭᠤᠨ᠂ ᠬᠤᠯᠤᠰᠤᠨ ᠰᠠᠬᠠᠯ ᠨᠢ ᠰᠠᠯᠬᠢᠨ ᠤ ᠠᠶ᠎ᠠ ᠪᠠᠷ ᠨᠠᠶᠢᠭᠤᠬᠤ ᠪᠠᠶᠢᠳᠠᠯ ᠢ ᠵᠢᠭᠠᠵᠤ ᠪᠤᠢ ᠬᠡᠨ᠎ᠡ᠃ ᠦᠭᠡᠷ᠎ᠡ ᠨᠢᠭᠡ ᠬᠡᠯᠡᠯᠭᠡ ᠨᠢ ᠲᠤᠰ ᠨᠤᠲᠤᠭ ᠲᠤ ᠬᠠᠯᠢᠭᠤᠨ ᠠᠲᠤᠭᠤ ᠤᠯᠠᠨ ᠲᠠᠢ ᠪᠠᠶᠢᠵᠤ᠂ ᠡᠲᠡᠭᠡᠷ ᠬᠠᠯᠢᠭᠤᠨ ᠠᠲᠤᠭᠤ ᠨᠢ ᠦᠷᠬᠦᠯᠵᠢ ᠭᠤᠤᠯ ᠤᠨ ᠵᠠᠬ᠎ᠠ ᠪᠠᠷ ᠪᠡᠯᠴᠢᠭᠡᠷᠯᠡᠨ᠂ ᠭᠤᠤᠯ ᠤᠨ ᠤᠰᠤ ᠶᠢ ᠤᠤᠭᠤᠲᠠᠭ ᠠᠴᠠ ᠬᠠᠯᠢᠭᠤᠲᠤ ᠭᠡᠰᠡᠨ ᠨᠡᠷ᠎ᠡ ᠲᠠᠢ ᠪᠤᠯᠤᠯ᠎ᠠ ᠭᠡᠲᠡᠭ᠃ ᠪᠠᠰᠠ ᠨᠢᠭᠡ ᠬᠡᠯᠡᠯᠭᠡ ᠨᠢ ᠬᠠᠢ ᠴᠢᠯᠠᠭᠤ ᠲᠠᠢ ᠭᠠᠵᠠᠷ  ᠢ ᠵᠢᠭᠠᠵᠤ ᠪᠠᠶᠢᠨ᠎ᠠ ᠭᠡᠨ᠎ᠡ᠃            ᠮᠤᠩᠭᠤᠯᠴᠤᠳ ᠶᠡᠷᠦ ᠨᠢ ᠭᠠᠵᠠᠷ ᠤᠰᠤᠨ ᠳᠤ ᠪᠠᠨ ᠨᠡᠷ᠎ᠡ ᠦᠭᠬᠦ ᠳᠤ ᠪᠠᠨ ᠭᠠᠵᠠᠷ ᠤᠨ ᠪᠠᠶᠢᠴᠠ᠂ ᠠᠮᠢᠲᠠᠨ ᠵᠢᠬᠦᠷᠲᠡᠨ ᠤᠷᠭᠤᠮᠠᠯ ᠤᠨ ᠨᠡᠷ᠎ᠡ᠂ ᠠᠭᠤᠷᠬᠠᠢ ᠶᠢᠨ ᠪᠤᠯᠠᠭᠲᠠᠴᠠ ᠭᠡᠬᠦ ᠵᠡᠷᠭᠡ ᠶᠢ ᠦᠨᠲᠦᠰᠦᠯᠡᠨ ᠤᠳᠬ᠎ᠠ ᠠᠭᠤᠯᠭ᠎ᠠ ᠡᠷᠡᠬᠦᠯ ᠰᠠᠷᠠᠭᠤᠯ᠂ ᠪᠡᠯᠭᠡᠲᠡᠯ ᠤᠨ ᠰᠢᠨᠵᠢ ᠲᠠᠢ ᠭᠡᠬᠦ ᠮᠡᠲᠦᠴᠢᠯᠡᠨ ᠤᠯᠠᠨ ᠵᠦᠢᠯ  ᠤᠨ ᠰᠠᠶᠢᠬᠠᠨ ᠨᠡᠷ᠎ᠡ ᠦᠭᠲᠡᠭ ᠲᠡᠤᠭᠡᠨ ᠤᠯᠠᠮᠵᠢᠯᠠᠯ ᠲᠠᠢ᠃ ᠪᠠᠶᠠᠨᠨᠠᠭᠤᠷ᠂ ᠰᠢᠯᠢ ᠶᠢᠨ ᠭᠤᠤᠯ᠂ ᠤᠯᠠᠭᠠᠨᠬᠠᠲᠠ᠂ ᠰᠢᠷᠡᠯᠵᠢ᠂ ᠤᠯᠢᠶᠠᠰᠤᠲᠠᠢ᠂ ᠪᠠᠶ᠋ᠨᠬᠠᠩᠭᠠᠢ᠂ ᠲᠤᠭᠤᠯᠲᠠᠢ᠂ ᠰᠢᠷᠠᠴᠢᠠᠯᠭᠤ᠂ ᠴᠠᠬᠢᠭᠤᠷᠲᠤ᠂ ᠪᠤᠭᠤᠲᠤ᠂ ᠡᠵᠡᠨ ᠬᠤᠷᠤᠭ᠎ᠠ᠂ ᠭᠦᠭᠡᠨᠠᠭᠤᠷ᠂ ᠶᠤᠯᠤ ᠶᠢᠨ ᠠᠮᠠ ᠭᠡᠬᠦ ᠮᠡᠲᠦ ᠶᠢᠨ ᠤᠯᠠᠨ ᠤᠯᠠᠨ ᠰᠠᠶᠢᠬᠠᠨ ᠨᠡᠷ᠎ᠡ ᠮᠤᠩᠭᠤᠯ ᠨᠤᠲᠤᠭ ᠲᠤ ᠬᠠᠶᠠ ᠦᠭᠡᠢ ᠪᠠᠶᠢᠲᠠᠭ᠃ ᠲᠡᠭᠷᠢ ᠪᠠᠨ ᠰᠢᠲᠦᠵᠦ᠂ ᠡᠭᠡ ᠪᠠᠶᠢᠭᠠᠯᠢ ᠳᠤ ᠪᠠᠨ ᠠᠭᠤᠰᠴᠤ᠂ ᠤᠷᠭᠤᠮᠠᠯ ᠠᠮᠢᠲᠠᠨ ᠢᠶᠠᠨ ᠬᠠᠶᠢᠷᠠᠯᠠᠭᠰᠠᠨ ᠰᠤᠶᠤᠯ ᠭᠡᠵᠤ ᠡᠶᠢᠮᠦ ᠯᠠ ᠪᠠᠶᠢᠲᠠᠭ᠃ ᠮᠤᠩᠭᠤᠯ ᠡᠵᠢ ᠶᠢᠨ ᠦᠷ᠎ᠡ ᠨᠢ ᠪᠤᠯᠵᠤ ᠮᠤᠩᠭᠤᠯ ᠨᠤᠲᠤᠭ ᠤᠨ ᠡᠵᠡᠨ ᠨᠢ ᠪᠤᠯᠵᠤ ᠶᠠᠪᠤᠬᠤ ᠭᠡᠵᠤ ᠶᠠᠭᠤᠲᠠᠢ ᠰᠠᠶᠢᠬᠠᠨ ᠵᠢᠷᠭᠠᠯ᠂ ᠶᠠᠮᠠᠷ ᠴᠦ ᠰᠠᠶᠢᠬᠠᠨ ᠠᠵᠠᠲᠠᠢ ᠪᠢᠯᠡ ᠳ᠋ᠠ︕ ᠡᠬᠦᠨ ᠳᠤ ᠪᠠᠨ ᠪᠢ ᠤᠯᠵᠠᠷᠬᠠᠲᠠᠭ ᠰᠠᠨ᠂ ᠤᠮᠤᠭᠰᠢᠲᠠᠭ ᠰᠠᠨ᠂ ᠤᠮᠤᠷᠬᠠᠲᠠᠭ ᠰᠠᠨ᠂ ᠤᠩᠭᠤᠨ ᠰᠢᠲᠦᠭᠡᠨ ᠲᠠᠢ ᠤᠪᠤᠭ᠎ᠠ ᠬᠠᠶᠢᠷᠬᠠᠨ ᠳᠤ ᠨᠢ ᠡᠷᠬᠢᠬᠦ ᠲᠦᠷᠦᠯ ᠢᠶᠠᠨ ᠴᠦ ᠲᠠᠭᠠᠳᠬᠠᠲᠠᠭ ᠰᠠᠨ᠃             ᠤᠷᠠᠳ ᠮᠤᠩᠭᠤᠯᠴᠤᠳ 1648 ᠤᠨ ᠤ ᠡᠮᠦᠨ᠎ᠡ ᠬᠤᠶᠢᠨ᠎ᠠ᠂ ᠮᠤᠨᠢ ᠠᠭᠤᠯᠠ ᠶᠢᠨ ᠭᠤᠷᠪᠠ ᠰᠦᠪᠡ ᠶᠢ ᠰᠠᠬᠢᠬᠤ ᠪᠠᠷ ᠬᠦᠯᠦᠨ ᠪᠤᠶᠢᠷ ᠠᠴᠠ ᠮᠤᠨᠢ ᠠᠭᠤᠯᠠ ᠶᠢᠨ ᠠᠷᠤ ᠦᠪᠦᠷ ᠲᠤ ᠨᠡᠬᠦᠲᠡᠯᠯᠡᠨ ᠢᠷᠡᠵᠦ ᠨᠤᠲᠤᠭᠰᠢᠭᠰᠠᠨ ᠪᠢᠯᠡ᠃ ᠤᠷᠠᠳ ᠨᠤᠲᠤᠭ ᠨᠢ ᠡᠷᠲᠡ ᠲᠡᠭᠡᠲᠦ ᠠᠴᠠ ᠠᠪᠤᠭᠠᠳ ᠬᠤᠷ᠎ᠠ ᠪᠤᠷᠤᠭᠠᠨ ᠲᠡᠭᠰᠢ ᠂ ᠡᠪᠡᠰᠤ ᠤᠷᠭᠤᠮᠠᠯ ᠰᠠᠬᠤᠯᠢᠭ ᠤᠷᠭᠤᠵᠤ᠂ ᠭᠤᠤᠯ ᠮᠦᠷᠡᠨ ᠠᠯᠠᠭᠠᠨ ᠵᠢᠷᠤᠭᠠᠰᠤ ᠰᠢᠭ᠋ ᠰᠦᠯᠵᠢᠯᠲᠦᠨ᠂ ᠨᠠᠭᠤᠷ ᠴᠦᠬᠦᠷᠦᠮ ᠠᠷᠠᠰᠤᠨ ᠵᠤᠲᠤᠭ ᠤᠨ ᠮᠦᠩᠬᠦᠨ ᠲᠤᠪᠤᠷᠤᠤ ᠰᠢᠭ᠋ ᠬᠠᠶᠠ ᠦᠭᠡᠢ ᠮᠡᠯᠮᠡᠯᠵᠡᠵᠦ᠂ ᠤᠰᠤᠨ ᠤ ᠲᠤᠩᠭᠠᠯᠠᠭ᠂ ᠡᠪᠡᠰᠤᠨ ᠤ ᠰᠤᠷᠭᠤᠭ ᠢ ᠡᠷᠢᠵᠦ ᠨᠡᠬᠦᠳᠡᠯᠯᠡᠳᠡᠭ ᠨᠡᠬᠦᠲᠡᠯᠴᠢᠨ ᠦᠨᠲᠦᠰᠦᠲᠡᠨ ᠳᠤ ᠠᠪᠴᠤ ᠭᠡᠯᠡᠪᠡᠯ ᠠᠷᠤ ᠭᠤᠪᠢ ᠶᠢᠨ ᠬᠤᠪᠢᠯᠭᠠᠨ ᠤᠷᠤᠨ ᠭᠡᠵᠤ ᠮᠡᠲᠡ᠃ ᠬᠠᠯᠢᠭᠤᠲᠤ ᠭᠤᠤᠯ ᠨᠢ ᠤᠲᠤ ᠶᠢᠨ ᠤᠷᠠᠳ ᠤᠨ ᠲᠤᠮᠲᠠᠲᠤ ᠬᠤᠰᠢᠭᠤᠨ ᠤ ᠪᠠᠶ᠋ᠬᠠᠤᠯᠠᠭᠠᠨ ᠰᠤᠮᠤ ᠶᠢᠨ ᠰᠢᠷ᠎ᠠ ᠬᠤᠸᠠ ᠭᠡᠲᠡᠭ ᠭᠠᠵᠠᠷ ᠠᠴᠠ ᠡᠬᠢ ᠠᠪᠴᠤ᠂ ᠬᠦᠮᠦᠨ ᠠᠮᠢᠲᠠᠨ᠂ ᠡᠪᠡᠰᠤ ᠤᠷᠭᠤᠮᠠᠯ ᠢᠶᠠᠨ ᠤᠮᠲᠠᠯᠠᠨ 91 ᠺᠢᠯᠤᠮᠧᠲᠷ ᠦᠷᠬᠦᠯᠵᠢᠯᠡᠭᠰᠡᠨ ᠪᠠᠶᠢᠲᠠᠭ ᠁           ᠤᠷᠠᠳ ᠨᠤᠲᠤᠭ ᠨᠠᠶᠢᠷᠠᠮᠲᠠᠯ ᠢᠶᠠᠷ ᠴᠢᠯᠦᠭᠡᠯᠡᠭᠲᠡᠬᠦ ᠦᠶ᠎ᠡ᠂ ᠤᠷᠠᠳ ᠤᠨ ᠲᠤᠮᠲᠠᠲᠤ ᠬᠤᠰᠢᠭᠤᠨ ᠤ ᠵᠠᠰᠠᠭ ᠤᠨ ᠤᠷᠲᠤᠨ ᠨᠢ ᠤᠲᠤ ᠶᠢᠨ ᠬᠤᠯᠤᠰᠤᠲᠠᠢ ᠰᠤᠮᠤᠨ ᠤ ᠪᠤᠮᠪᠠᠲᠠᠢ ᠭᠡᠲᠡᠭ ᠭᠠᠵᠠᠷ ᠪᠠᠶᠢᠭᠰᠠᠨ ᠪᠢᠯᠡ᠃ ᠲᠤᠰ ᠨᠤᠲᠤᠭ ᠨᠢ ᠵᠠᠮ ᠬᠠᠷᠢᠯᠴᠠᠭ᠎ᠠ ᠪᠤᠶᠢᠲᠠ ᠪᠦᠭᠯᠡᠬᠦᠦ᠂ ᠨᠠᠰᠢ ᠴᠠᠰᠢ ᠶᠠᠪᠤᠬᠤ ᠳᠤ ᠲᠤᠩ ᠲᠦᠬᠦᠮ ᠦᠭᠡᠢ ᠲᠤᠯᠠ ᠤᠨᠲᠤᠤ ᠭᠠᠵᠠᠷ ᠰᠤᠩᠭᠤᠨ ᠬᠤᠰᠢᠭᠤᠨ ᠲᠦᠪ ᠢᠶᠠᠨ ᠰᠢᠯᠵᠢᠬᠦᠯᠬᠦ ᠴᠢᠬᠤᠯᠠ ᠲᠠᠢ ᠪᠤᠯᠵᠠᠢ᠃ ᠢᠩᠬᠢᠭᠡᠳ ᠤᠲᠤ ᠶᠢᠨ ᠤᠩᠭᠤᠨ ᠰᠤᠮᠤᠨ ᠤ ᠡᠮᠦᠨ᠎ᠡ ᠲᠠᠯ᠎ᠠ ᠳᠤ ᠪᠠᠶᠢᠭ᠎ᠠ ᠪᠢᠴᠢᠭᠲᠦ ᠶᠢᠨ ᠲᠠᠯ᠎ᠠ ᠡᠷᠭᠡ ᠪᠠᠷᠢᠭᠴᠢᠳ ᠤᠨ ᠬᠠᠷᠠᠭᠠᠨ ᠳᠤ ᠤᠷᠤᠭᠰᠠᠨ ᠪᠠᠶᠢᠨ᠎ᠠ᠃ ᠲᠤᠰ ᠭᠠᠵᠠᠷ ᠬᠤᠶᠢᠨ᠎ᠠ ᠲᠠᠯ᠎ᠠ ᠪᠠᠷ  ᠢᠶᠠᠨ ᠠᠭᠤᠯᠠ ᠲᠠᠢ᠂ ᠲᠠᠯ᠎ᠠ ᠨᠢ ᠲᠡᠯᠭᠡᠭᠰᠡᠨ ᠴᠠᠭᠠᠰᠤ ᠰᠢᠭ᠋ ᠲᠡᠪ ᠲᠡᠭᠰᠢᠭᠡᠨ ᠪᠠᠶᠢᠭᠰᠠᠨ ᠴᠦ ᠤᠰᠤ ᠮᠠᠭᠤᠲᠠᠢ ᠠᠴᠠ ᠪᠤᠯᠵᠤ ᠵᠡᠬᠦᠨᠰᠢᠯᠡᠭᠡᠳ ᠤᠲᠤ ᠶᠢᠨ ᠲᠤᠭᠤᠯᠲᠠᠢ ᠶᠢᠨ ᠲᠠᠯ᠎ᠠ ᠳᠤ ᠢᠷᠡᠵᠦ ᠦᠵᠡᠯ᠎ᠡ᠃ ᠲᠤᠭᠤᠯᠲᠠᠢ ᠶᠢᠨ ᠲᠠᠯ᠎ᠠ ᠨᠢ ᠠᠭᠤᠵᠢᠮ ᠲᠡᠨᠢᠭᠡᠷ ᠪᠠᠶᠢᠵᠤ᠂ ᠬᠠᠯᠢᠭᠤᠲᠤ ᠶᠢᠨ ᠭᠤᠤᠯ ᠵᠡᠬᠦᠨ ᠵᠠᠬ᠎ᠠ ᠪᠠᠷ ᠨᠢ ᠮᠤᠷᠤᠶᠢᠯᠵᠢᠨ ᠤᠷᠤᠰᠴᠤ᠂ ᠡᠮᠦᠨᠡᠰᠢ ᠪᠤᠷᠤᠲᠤᠬᠤᠢ ᠶᠢᠨ ᠲᠠᠯ᠎ᠠ ᠠᠴᠠ ᠤᠶᠢᠷ᠎ᠠ ᠪᠠᠶᠢᠲᠠᠭ ᠢᠶᠠᠷ ᠬᠤᠰᠢᠭᠤᠨ ᠲᠦᠪ ᠢᠶᠠᠨ ᠠᠲᠡ ᠪᠠᠶᠢᠷᠢᠯᠠᠭᠤᠯᠬᠤ ᠳᠤ ᠰᠠᠨᠠᠭᠠᠨ ᠳᠤ ᠨᠡᠶᠢᠴᠡᠮ᠎ᠠ ᠰᠠᠶᠢᠬᠠᠨ ᠭᠠᠵᠠᠷ ᠪᠢᠯᠡ᠃ ᠤᠯᠤᠰ ᠪᠠᠶᠢᠭᠤᠯᠤᠭᠲᠠᠭᠠᠳ ᠤᠲᠠᠭ᠎ᠠ ᠦᠭᠡᠢ ᠪᠠᠶᠢᠭᠰᠠᠨ ᠤᠨ ᠵᠢᠯ ᠤᠳ ᠲᠤ᠂ ᠨᠡᠶᠢᠭᠡᠮ ᠤᠨ ᠪᠠᠶᠢᠲᠠᠯ ᠤᠷᠪᠠᠭᠠᠨ ᠬᠦᠷᠪᠡᠭᠡᠨ ᠲᠠᠢ ᠪᠠᠶᠢᠵᠤ᠂ ᠲᠦᠮᠡᠨ ᠤ ᠰᠡᠳᠬᠢᠯ ᠲᠤᠭᠲᠠᠪᠤᠷᠢᠵᠢᠭ᠎ᠠ ᠦᠭᠡᠢ ᠪᠠᠶᠢᠭᠰᠠᠨ ᠤ ᠬᠠᠷᠠᠭ᠎ᠠ ᠪᠠᠷ ᠡᠨᠡ ᠨᠤᠲᠤᠭ ᠨᠢ ᠭᠡᠲᠦᠢ ᠰᠠᠨᠠᠭᠠᠨ ᠳᠤ ᠨᠡᠶᠢᠴᠡᠵᠦ ᠪᠠᠶᠢᠭᠰᠠᠨ ᠴᠦ ︿︿ᠲᠠᠶᠢᠰᠤᠨ ᠡᠲᠡᠭᠡᠳ﹀﹀ ᠲᠤ ᠠᠷᠠᠢ ᠢᠯᠡ ᠪᠠᠶᠢᠪᠠ᠃ ᠢᠩᠭᠢᠭᠡᠳ ᠬᠤᠶᠢᠰᠢ ᠨᠢ ᠲᠡᠬᠢᠨ ᠠᠷᠪᠠ ᠭᠠᠷᠤᠢ ᠭᠠᠵᠠᠷ ᠤᠬᠤᠷᠢᠨ᠂ ᠤᠲᠤ ᠶᠢᠨ ᠬᠠᠯᠢᠭᠤᠲᠤ ᠶᠢᠨ ᠬᠤᠲᠤᠭᠤᠷ ᠲᠤ ᠰᠢᠯᠵᠢᠬᠦᠯᠦᠭᠰᠡᠨ ᠭᠡᠵᠤ ᠬᠤᠰᠢᠭᠤ ᠪᠠᠶᠢᠭᠤᠯᠬᠤ ᠳᠤ ᠤᠷᠤᠯᠴᠠᠵᠤ ᠪᠠᠶᠢᠭᠰᠠᠨ ᠪᠤᠷᠬᠠᠨ ᠪᠤᠯᠤᠭᠰᠠᠨ ᠨᠠᠭ᠎ᠠ ᠠᠪᠤ ᠮᠢᠨᠢ ᠨᠠᠲᠠ ᠶᠢ ᠪᠠᠭ᠎ᠠ ᠪᠠᠶᠢᠬᠤ ᠳᠤ ᠶᠠᠷᠢᠵᠦ ᠪᠠᠶᠢᠭᠰᠠᠨ ᠰᠠᠨ᠃ ᠭᠠᠲᠠᠨ᠎ᠠ ᠶᠢᠨ ᠬᠦᠮᠦᠨ ᠳᠤ ᠶᠤᠮ ᠪᠤᠯ ᠠᠲᠡ ᠪᠠᠰᠠ ᠡᠶᠢᠮᠤ ᠭᠠᠵᠠᠷ ᠪᠠᠶᠢᠨ᠎ᠠ ᠭᠡᠰᠡᠨ ᠢ ᠮᠡᠲᠡᠬᠦ ᠪᠠᠷ ᠦᠭᠡᠢ ᠪᠢᠲᠡᠬᠦᠦ ᠲᠡᠷᠡᠰᠤ ᠲᠠᠢ ︿︿ᠨᠢᠭᠤᠴᠠᠬᠠᠢ﹀﹀ ᠬᠤᠲᠤᠭᠤᠷ ᠪᠢᠯᠡ᠃ ᠬᠠᠯᠢᠭᠤᠲᠤ ᠭᠤᠤᠯ ᠤᠨ ᠪᠠᠷᠠᠭᠤᠨ ᠲᠠᠨᠵᠢ ᠭᠡᠵᠤ ᠬᠤᠶᠢᠭᠤᠷ ᠢᠶᠠᠨ ᠬᠠᠷ᠎ᠠ ᠤᠪᠤᠭ᠎ᠠ ᠠᠭᠤᠯᠠᠨ ᠤ ᠬᠤᠷᠮᠤᠢ ᠳᠤ ᠬᠦᠷᠴᠤ᠂ ᠵᠡᠬᠦᠨᠰᠢ ᠪᠠᠷᠠᠭᠤᠨᠰᠢ ᠪᠠᠨ 2.8 ᠺᠢᠯᠤᠮᠧᠲᠷ ᠦᠷᠭᠡᠨ᠂ ᠡᠮᠤᠨᠡᠰᠢ ᠤᠮᠠᠷᠠᠰᠢ ᠪᠠᠨ 3 ᠺᠢᠯᠤᠮᠧᠲᠷ ᠤᠷᠳᠤ ᠪᠠᠶᠢᠵᠤ᠂ ᠪᠠᠷᠠᠭᠤᠨ ᠬᠤᠶᠢᠳᠤ ᠲᠠᠯ᠎ᠠ ᠨᠢ ᠦᠨᠳᠤᠷ᠂ ᠵᠡᠬᠦᠨ ᠡᠮᠤᠨ᠎ᠡ ᠨᠢ ᠲᠤᠤᠷ᠎ᠠ᠂ ᠳᠡᠪᠢᠬᠦᠷ ᠤᠨ ᠬᠡᠯᠪᠡᠷᠢ ᠲᠠᠢ᠂ ᠨᠠᠯᠠᠤ ᠶᠢᠨ ᠬᠡᠮᠵᠢᠶ᠎ᠡ ᠨᠢ 12‰᠂ ᠲᠠᠯᠠᠢ ᠶᠢᠨ ᠲᠦᠪᠰᠢᠨ ᠠᠴᠠ ᠳᠡᠭᠡᠭᠰᠢ ᠡᠷᠭᠦᠭᠳᠡᠴᠡ ᠨᠢ 1260 —1300 ᠮᠧᠲᠷ ᠲᠤ ᠪᠠᠶᠢᠵᠤ᠂ ᠳᠤᠮᠳᠠᠴᠢ ᠦᠨᠳᠤᠷ ᠨᠢ 1288.2 ᠮᠧᠲᠷ ᠪᠠᠶᠢᠳᠠᠭ᠃          ᠨᠠᠮᠵᠢᠭᠤᠬᠠᠨ ᠤᠷᠤᠰᠬᠤ ᠬᠠᠯᠢᠭᠤᠲᠤ ᠭᠤᠤᠯ ᠳᠤᠨᠢ ᠤᠮᠲᠠᠯᠠᠭᠲᠠᠵᠤ          ᠨᠠᠬᠢᠯᠵᠠᠨ ᠱᠤᠤᠬᠢᠬᠤ ᠰᠢᠷᠭᠠᠯ ᠲᠡᠷᠡᠰᠦᠨ ᠳᠤᠨᠢ ᠢᠯᠪᠢᠬᠦᠯᠵᠦ          ᠦᠷ ᠤᠨ ᠰᠤᠪᠤᠷᠠᠬᠤ ᠭᠡᠭᠡ ᠪᠠᠷ ᠲᠤᠭᠤᠯ ᠢᠶᠠᠨ ᠲᠡᠲᠡᠵᠦ ᠦᠨᠢᠶ᠎ᠡ ᠪᠠᠨ ᠢᠪᠢᠯᠦᠬᠦᠯᠦᠭᠰᠡᠨ          ᠦᠲᠡᠰᠢ ᠶᠢᠨ ᠲᠠᠰᠤᠷᠠᠬᠤ ᠪᠦᠷᠦᠢ ᠪᠠᠷ ᠮᠠᠯ ᠢᠶᠠᠨ ᠬᠤᠲᠠᠯᠠᠵᠤ ᠬᠦᠯ ᠢᠶᠠᠨ ᠠᠮᠠᠷᠠᠭᠠᠭᠰᠠᠨ ᠬᠤᠶᠠᠷ ᠭᠤᠷᠪᠠᠭ᠋ᠠᠨ ᠮᠠᠯᠴᠢᠨ ᠠᠶᠢᠯ ᠦᠭᠡᠬᠦᠨ ᠴᠠᠭᠠᠨ ᠮᠤᠩᠭᠤᠯ ᠭᠡᠷ ᠲᠠᠢ ᠪᠠᠨ ᠠᠲᠡ ᠰᠠᠭᠤᠵᠤ ᠪᠠᠶᠢᠭᠰᠠᠨ ᠪᠢᠯᠡ᠃          1951 ᠤᠨ᠂ ᠬᠠᠪᠤᠷ ᠤᠨ ᠨᠠᠷᠠᠨ ᠤ ᠬᠠᠯᠠᠭᠤᠨ ᠢᠯᠴᠢᠨ ᠳᠤ ᠬᠦᠷᠰᠢᠭᠰᠡᠨ ᠴᠠᠰᠤ ᠤᠶᠠᠷᠠᠨ ᠬᠠᠶᠢᠯᠵᠤ᠂ ᠭᠤᠤ ᠵᠢᠯᠠᠭ᠎ᠠ ᠪᠠᠷ ᠬᠠᠭᠲᠠ ᠴᠤᠭᠤᠯᠵᠤ ᠨᠢᠯᠬ᠎ᠠ ᠨᠤᠭᠤᠭ᠎ᠠ ᠴᠤᠬᠤᠯᠵᠠᠨ᠂ ᠮᠠᠯᠴᠢᠳ ᠲᠦᠯ ᠲᠤᠰᠤᠭᠠᠳ ᠶᠠᠭᠠᠷᠠᠯᠲᠤᠨ᠎ᠠ᠃ ᠤᠯᠤᠰ ᠪᠠᠶᠢᠭᠤᠯᠤᠭᠲᠠᠭᠠᠳ ᠬᠠᠷᠠᠬᠠᠨ ᠤᠲᠠᠭᠠᠲᠤᠢ ᠤᠴᠢᠷ ᠤᠷᠠᠳ ᠨᠤᠲᠤᠭ  ᠢᠶᠠᠷ ᠬᠤᠪᠴᠠᠰᠤ ᠵᠠᠰᠠᠯ ᠨᠢ ᠡᠲᠡᠭᠡᠳ ᠤᠨᠲᠤᠤ ᠱᠠᠯ ᠲᠠᠨᠢᠬᠤ ᠦᠭᠡᠢ ᠵᠢᠰᠤ ᠪᠤᠷᠤᠭᠤ ᠬᠦᠮᠦᠰ ᠬᠠᠶᠠ ᠶᠠᠪᠤᠬᠤ ᠲᠠᠭᠠᠷᠠᠯᠲᠤᠲᠠᠭ ᠴᠦ ᠶᠠᠮᠠᠷ ᠬᠦᠮᠦᠨ ᠶᠠᠭᠤ ᠭᠡᠵᠤ ᠶᠠᠪᠤᠭ᠎ᠠ ᠶᠢ ᠮᠡᠲᠡᠲᠡᠭ ᠦᠭᠡᠢ ᠪᠠᠶᠢᠯ᠎ᠠ᠃ ᠬᠠᠪᠤᠷ ᠤᠨ ᠠᠭᠤᠷ ᠤᠷᠤᠭᠰᠠᠨ ᠠᠴᠠ ᠨᠠᠰᠢ ᠲᠠᠪᠤ ᠠᠷᠪᠠᠨ ᠮᠤᠷᠢᠲᠠᠢ ᠬᠦᠮᠦᠰ ᠬᠠᠯᠢᠭᠤᠲᠤ ᠶᠢᠨ ᠬᠤᠲᠤᠭᠤᠷ ᠲᠤ ᠭᠡᠲᠦ ᠤᠲᠠᠭ᠎ᠠ ᠢᠷᠡᠵᠦ᠂ ᠬᠠᠯᠢᠭᠤᠲᠤ ᠭᠤᠤᠯ ᠢ ᠦᠭᠰᠦᠭᠡᠳ ᠴᠦ ᠶᠠᠪᠤᠬᠤ ᠶᠤᠮ᠂ ᠬᠠᠷ᠎ᠠ ᠤᠪᠤᠭ᠎ᠠ ᠠᠭᠤᠯᠠ ᠲᠡᠭᠡᠷ᠎ᠡ ᠭᠠᠷᠤᠭᠠᠳ ᠴᠦ ᠬᠠᠷᠠᠬᠤ ᠶᠤᠮ᠂ ᠲᠡᠭᠡᠵᠦ ᠪᠠᠶᠢᠲᠠᠯ᠎ᠠ ᠵᠡᠬᠦᠨᠰᠢ ᠪᠠᠷᠠᠭᠤᠨᠰᠢ ᠴᠦ ᠲᠠᠪᠬᠢᠯᠲᠤᠬᠤ ᠶᠤᠮ᠂ ᠶᠠᠭᠤ ᠪᠤᠯᠵᠤ ᠪᠠᠶᠢᠭ᠎ᠠ ᠶᠢ ᠮᠠᠯᠴᠢᠳ ᠠᠰᠠᠭᠤᠬᠤ ᠵᠤᠷᠢᠭ ᠪᠠᠶᠢᠭ᠎ᠠ ᠦᠭᠡᠢ᠃ ᠬᠠᠪᠤᠷ ᠤᠨ ᠲᠤᠮᠲᠠᠴᠢ  ᠠᠴᠠ ᠡᠬᠢᠯᠡᠨ ᠤᠯᠠᠨ ᠬᠦᠮᠦᠰ ᠢᠷᠡᠵᠡᠭᠡᠨ ᠪᠠᠷᠢᠯᠭ᠎ᠠ ᠶᠢᠨ ᠠᠵᠢᠯ ᠢᠶᠠᠨ ᠡᠬᠢᠯᠡᠬᠦᠯᠵᠦ᠂ ᠲᠤᠰ ᠵᠢᠯ ᠤᠨ ᠠᠷᠪᠠᠨ ᠨᠢᠭᠡᠨ ᠰᠠᠷ᠎ᠠ ᠪᠤᠯᠬᠤ ᠳᠤ ᠬᠤᠶᠠᠷ ᠵᠠᠭᠤ ᠭᠠᠷᠤᠢ ᠬᠦᠮᠦᠨ ᠪᠠᠭᠲᠠᠬᠤ ᠵᠢᠵᠢᠭ ᠲᠤᠰᠬᠤᠨ ᠬᠠᠯᠢᠭᠤᠲᠤ ᠭᠤᠤᠯ ᠤᠨ ᠪᠠᠷᠠᠭᠤᠨ ᠬᠦᠪᠡᠭᠡᠨ ᠳᠤ ᠪᠠᠶᠢᠭᠤᠯᠤᠭᠲᠠᠯ᠎ᠠ᠃ ᠡᠨᠡ ᠨᠢ ᠲᠠ ᠪᠢᠲᠠᠨ ᠤ ᠰᠠᠶᠢᠨ ᠮᠡᠲᠡᠲᠡᠭ  ᠤᠷᠠᠳ   ᠤᠨ  ᠲᠤᠮᠲᠠᠲᠤ  ᠬᠤᠰᠢᠭᠤᠨ   ᠤ  ᠲᠦᠪ — ᠬᠠᠯᠢᠭᠤᠲᠤ ᠪᠠᠯᠭᠠᠰᠤ ᠪᠤᠯᠤᠨ᠎ᠠ᠃          ᠬᠠᠯᠢᠭᠤᠲᠤ ᠨᠢ ᠲᠡᠤᠭᠡᠨ ᠠᠴᠠ ᠠᠪᠤᠭᠠᠳ ᠠᠷᠤ ᠦᠪᠦᠷ ᠢ ᠬᠤᠯᠪᠤᠭᠰᠠᠨ ᠴᠢᠬᠤᠯᠠ ᠭᠠᠵᠠᠷ ᠤᠨ ᠨᠢᠭᠡ ᠭᠡᠲᠡᠭ ᠢ ᠦᠤᠭᠡ ᠲᠡᠤᠭᠡ ᠳᠤ ᠨᠠᠷᠢᠨ ᠲᠠᠮᠲᠡᠭᠯᠡᠵᠦ ᠪᠤᠢ᠃ ᠵᠠᠷᠢᠮ ᠡᠷᠲᠡᠮᠲᠡᠳ ᠤᠷᠲᠤ ᠦᠬᠦᠯᠡᠯ ᠢᠶᠠᠨ ᠰᠤᠨᠢᠨ ᠳᠤ ᠨᠡᠶᠢᠲᠡᠯᠡᠨ᠂ ᠤᠲᠤ ᠦᠶ᠎ᠠ ᠶᠢᠨ ᠦᠨᠲᠦᠰᠦᠲᠡᠨ ᠤ ᠪᠦᠯᠬᠦᠮᠲᠡᠯ ᠤᠨ ︿︿ᠪᠡᠯᠭᠡ ᠲᠡᠮᠲᠡᠭ﹀﹀ ᠪᠤᠯᠤᠭᠰᠠᠨ ᠸᠠᠩ ᠵᠤᠤ ᠵᠢᠶᠦ᠋ᠨ ᠢ ᠮᠤᠲᠤᠨ ᠴᠠᠨ ᠢᠤᠢ ᠬᠠᠲᠤᠨ ᠢᠶᠠᠨ ᠪᠤᠯᠭᠠᠨ ᠪᠠᠭᠤᠯᠭᠠᠵᠤ ᠠᠪᠬᠤ ᠳᠤ ᠪᠠᠨ ᠡᠲᠦᠭᠡ ᠶᠢᠨ ᠤᠷᠠᠳ ᠤᠨ ᠲᠤᠮᠲᠠᠲᠤ ᠬᠤᠰᠢᠭᠤᠨ ᠤ ᠤᠤᠪᠤᠯᠠᠭ ᠤᠨ ᠠᠮᠠ ᠪᠠᠷ ᠲᠠᠮᠵᠢᠨ ᠬᠠᠯᠢᠭᠤᠲᠤ ᠪᠠᠷ ᠲᠠᠭᠠᠷᠢᠵᠤ ᠠᠷᠤ ᠭᠠᠵᠠᠷ ᠮᠤᠷᠲᠠᠭᠰᠠᠨ ᠭᠡᠵᠤ ᠤᠯᠠᠨ ᠲᠠᠯ᠎ᠠ ᠠᠴᠠ ᠨᠤᠲᠠᠯᠠᠯᠲᠠ ᠬᠢᠭᠰᠡᠨ ᠪᠠᠶᠢᠲᠠᠭ᠃ ᠠᠷᠠᠰᠣ ᠨᠤᠤᠰᠤ᠂ ᠴᠠᠢ ᠲᠠᠪᠤᠰᠤ ᠲᠦᠬᠦᠷᠡᠩ ᠠᠴᠢᠭᠰᠠᠨ ᠵᠢᠩ ᠤᠨ ᠴᠤᠪᠤᠭ᠎ᠠ ᠡᠪᠤᠭᠡᠳ ᠤᠨ ᠶᠠᠷᠢᠶᠠᠨ ᠳᠤ ᠬᠠᠶᠠ ᠰᠤᠨᠤᠰᠲᠠᠵᠤ᠂ ᠲᠡᠷᠡ ᠴᠤᠪᠤᠭ᠎ᠠ  ᠪᠠᠷ ᠲᠠᠰ ᠬᠠᠷ᠎ᠠ ᠲᠤᠰᠤᠨ ᠵᠠᠮ ᠲᠡᠭᠷᠢ ᠶᠢᠨ ᠬᠠᠶᠠᠭᠠᠨ ᠳᠤ ᠬᠠᠷᠠᠭᠳᠠᠨ᠎ᠠ᠃ ᠬᠠᠲᠠᠨ ᠬᠤᠩᠬᠢᠯ ᠢᠶᠠᠷ ᠢᠰᠭᠡᠷᠬᠦ ᠰᠠᠯᠬᠢᠨ ᠠᠴᠠ ᠡᠭᠡ ᠪᠠᠶᠢᠭᠠᠯᠢ ᠶᠢᠨ ᠤᠩᠭᠤᠨ ᠡᠭᠡᠰᠢᠭ ᠤᠶᠠᠩᠭᠠᠷᠠᠵᠤ᠂ ᠯᠤᠤᠭᠠᠷ ᠤᠨ ᠬᠤᠩᠬᠤᠨ ᠲᠠᠭᠤᠨ ᠦᠶ᠎ᠠ ᠦᠶ᠎ᠠ ᠰᠤᠨᠤᠰᠲᠠᠬᠤ ᠰᠢᠭ᠋ ᠰᠠᠨᠠᠭᠲᠠᠨ᠎ᠠ᠃          ᠤᠷᠤᠰᠬᠠᠯ ᠨᠢ ᠨᠠᠷᠢᠬᠠᠨ ᠤᠰᠤ ᠨᠢ ᠲᠤᠩᠭᠠᠯᠠᠭ ᠬᠠᠯᠢᠭᠤᠲᠤ ᠭᠤᠤᠯ ᠠᠭᠤᠷᠯᠠᠵᠤ ᠬᠢᠯᠢᠩᠨᠡᠬᠦ ᠴᠠᠭ ᠪᠠᠰᠠ ᠭᠠᠷᠲᠠᠭ᠃ ᠠᠭᠤᠷᠯᠠᠵᠤ ᠬᠢᠯᠢᠩᠨᠡᠬᠦ ᠪᠠᠷ ᠬᠦᠴᠦᠲᠦ ᠠᠷᠰᠯᠠᠨ ᠴᠦ ᠶᠤᠮ ᠰᠢᠭ᠋᠂ ᠤᠷᠤᠭᠰᠠᠨ ᠪᠤᠤᠷ᠎ᠠ ᠴᠦ ᠶᠤᠮ ᠰᠢᠭ᠋ ᠴᠠᠭᠠᠨ ᠬᠦᠭᠡᠰᠤ ᠰᠠᠭᠰᠠᠷᠠᠭᠤᠯᠤᠨ ᠤᠯᠠᠭᠠᠨ ᠢᠶᠠᠷ ᠡᠷᠬᠢᠯᠲᠦᠨ᠂ ᠦᠭᠲᠡᠭᠰᠡᠨ ᠪᠦᠬᠦᠲᠡ ᠶᠢ ᠦᠨᠲᠦᠰᠦ ᠪᠠᠷ ᠨᠢ ᠤᠷᠪᠠᠭᠤᠯᠤᠭᠰᠠᠭᠠᠷ ᠠᠷᠬᠢᠷᠠᠨ ᠲᠠᠪᠠᠯᠭᠠᠯᠠᠨ᠎ᠠ᠃ ᠲᠠᠰ ᠭᠡᠰᠡᠨ ᠲᠠᠪᠤ ᠶᠢᠰᠦ ᠶᠢᠨ ᠬᠦᠢᠲᠡᠨ ᠪᠤᠯᠬᠤ ᠳᠤ ᠬᠠᠯᠢᠭᠤᠲᠤ ᠶᠢᠨ ᠭᠤᠤᠯ ᠡᠷᠬᠢ ᠪᠠᠨ ᠲᠠᠪᠠᠨ ᠲᠡᠯᠡᠷᠡᠨ ᠬᠦᠯᠲᠡᠲᠡᠭ ᠴᠦ ᠠᠮᠢᠲᠠᠨ ᠭᠤᠤᠯᠲᠠᠨ ᠢᠶᠠᠨ ᠣᠮᠲᠠᠯᠠᠬᠤ ᠭᠡᠰᠡᠨ ᠰᠢᠭ ᠨᠠᠮᠤᠭᠤᠬᠠᠨ ᠭᠠᠵᠠᠷ ᠢᠶᠠᠷ ᠬᠠᠷᠠᠵᠠ ᠶᠢᠨ ᠤᠰᠤ ᠨᠢ ᠮᠡᠯᠮᠡᠯᠵᠡᠵᠦ ᠯᠡ ᠪᠠᠶᠢᠲᠠᠭ᠃ ᠭᠠᠩ ᠲᠠᠢ ᠵᠢᠯ ᠬᠠᠯᠢᠭᠤᠲᠤ ᠭᠤᠤᠯ ᠦᠲᠡ ᠶᠢᠨ ᠬᠤᠶᠢᠨ᠎ᠠ ᠪᠤᠯᠬᠤ ᠪᠠᠷ ᠭᠠᠵᠠᠷ ᠤᠨ ᠬᠦᠨ ᠳᠤ ᠨᠢᠭᠤᠭᠲᠠᠨ ᠲᠠᠰᠤᠷᠠᠲᠠᠭ ᠴᠦ ᠦᠷᠯᠦᠭᠡ ᠪᠤᠰᠬᠤ ᠳᠤ ᠤᠤᠯ ᠶᠤᠰᠤᠭᠠᠷ ᠢᠶᠠᠨ ᠤᠷᠤᠰᠬᠤ ᠪᠠᠷ ᠢᠶᠠᠨ ᠤᠷᠤᠰᠤᠨ᠎ᠠ᠃ ᠠᠮᠢ ᠨᠠᠰᠤᠨ ᠤ ᠦᠷᠬᠦᠯᠵᠢᠯᠡᠯ ᠢ ᠡᠭᠡ ᠲᠡᠯᠡᠭᠡᠢ ᠦᠪᠡᠷ ᠤᠨ ᠢᠶᠠᠨ ᠵᠢᠮ᠎ᠠ  ᠪᠠᠷ ᠢᠶᠠᠨ ᠢᠩᠬᠢᠵᠦ ᠵᠤᠬᠢᠴᠠᠭᠤᠯᠲᠠᠭ ᠨᠢ ᠭᠠᠶᠢᠬᠠᠯᠲᠠᠢ᠃ ᠭᠡᠲᠦᠢ ᠡᠶᠢᠮᠦ ᠴᠦ ᠬᠠᠯᠢᠭᠤᠲᠤ ᠪᠠᠯᠭᠠᠰᠤᠨ ᠤ ᠲᠠᠪᠤᠨ ᠲᠦᠮᠡ ᠭᠠᠷᠤᠢ ᠠᠷᠠᠳ ᠲᠤ ᠠᠰᠢᠭ ᠰᠢᠮ᠎ᠡ ᠪᠠᠨ ᠬᠠᠨᠲᠢᠪᠯᠠᠭᠰᠠᠭᠠᠷ ᠤᠲᠤ ᠳᠤ ᠬᠦᠷᠴᠡᠢ᠃          ᠲᠠᠯᠠᠨ ᠵᠢᠯ ᠤᠨ ᠰᠠᠯᠬᠢ ᠪᠤᠷᠤᠭᠠᠨ ᠢ ᠦᠩᠭᠡᠷᠡᠭᠡᠳ ᠦᠨᠦᠲᠦᠷ ᠪᠤᠯᠬᠤ ᠳᠤ᠂ ᠬᠠᠯᠢᠭᠤᠲᠤ ᠭᠤᠤᠯ ᠤᠨ ᠬᠦᠪᠡᠭᠡᠨ ᠳᠤ ᠪᠠᠶᠢᠭᠰᠠᠨ ᠭᠡᠲᠦᠨ ᠮᠠᠯᠴᠢᠨ ᠠᠶᠢᠯ ᠤᠨ ᠪᠠᠭᠤᠷᠢ ᠬᠠᠮᠢᠭ᠎ᠠ ᠪᠠᠶᠢᠬᠤ ᠶᠢ ᠤᠯᠵᠤ ᠬᠠᠷᠠᠭ᠎ᠠ ᠦᠭᠡᠢ᠂ ᠤᠷᠤ ᠲᠠᠰᠤ ᠦᠭᠡᠢ ᠠᠷᠢᠯᠵᠠᠢ᠃ ᠦᠷᠭᠡᠨ ᠲᠠᠷᠲᠠᠩ ᠵᠠᠮ ᠠᠭᠠᠯᠵᠢᠨ ᠲᠤᠤᠷ ᠰᠢᠭ᠋ ᠰᠦᠯᠵᠢᠯᠳᠦᠨ᠂ ᠦᠨᠲᠦᠷ ᠦᠨᠲᠦᠷ ᠠᠰᠠᠷ ᠲᠠᠭᠲᠤ ᠬᠠᠷᠠᠭ᠎ᠠ ᠬᠤᠭᠤᠯᠵᠤ᠂ ᠬᠦᠩᠭᠡᠨ ᠮᠠᠰᠢᠨ ᠨᠠᠰᠢ ᠴᠠᠰᠢ ᠵᠦᠷᠢᠯᠲᠦᠨ᠂ ᠡᠭᠡ ᠤᠷᠤᠨ ᠤ ᠤᠮᠠᠷᠠᠲᠤ ᠬᠢᠯᠢ ᠶᠢᠨ ᠵᠢᠵᠢᠭ ᠪᠠᠯᠭᠠᠰᠤ —— ᠬᠠᠯᠢᠭᠤᠲᠤ ᠮᠢᠨᠢ ᠡᠲᠦᠷ ᠪᠦᠷᠢ ᠦᠭᠡᠷᠡᠴᠢᠯᠡᠭᠲᠡᠵᠦ᠂ ᠰᠠᠷ᠎ᠠ ᠪᠦᠷᠢ ᠰᠢᠨᠡᠴᠢᠯᠡᠭᠲᠡᠵᠦ᠂ ᠬᠦᠭᠵᠢᠯ ᠴᠡᠴᠡᠭᠯᠡᠯ ᠤᠨ ᠤᠶᠠᠩᠭᠠᠨ ᠡᠭᠡᠰᠢᠭ ᠠᠲᠡ ᠠᠴᠠ ᠴᠤᠤᠷᠢᠶᠠᠲᠤᠨ᠎ᠠ᠃ ᠲᠡᠪᠢᠬᠦᠷ ᠭᠡᠯᠪᠡᠷᠢᠲᠡᠢ ᠬᠠᠯᠢᠭᠤᠲᠤ ᠶᠢᠨ ᠬᠤᠲᠤᠭᠤᠷ ᠴᠦ ᠪᠠᠭᠲᠠᠬᠤ ᠪᠠᠨ ᠪᠤᠯᠢᠭᠠᠳ ᠪᠠᠷᠠᠭᠤᠨ ᠲᠠᠪᠰᠡᠭ ᠢᠶᠠᠨ ᠲᠠᠪᠠᠨ ᠤᠩᠭᠤᠨ ᠪᠠᠯᠭᠠᠰᠤ ᠶᠢᠨ ᠬᠠᠷᠠᠴᠢᠯᠠᠭᠤ ᠭᠠᠴᠠᠭᠠᠨ ᠤ ᠲᠦᠪ ᠤᠷᠴᠢᠮ ᠪᠤᠯᠲᠠᠯ᠎ᠠ ᠲᠤᠯᠤᠭ᠎ᠠ ᠨᠠᠢᠮᠠᠨ ᠺᠢᠯᠤᠮᠧᠲᠷ ᠲᠡᠯᠡᠭᠲᠡᠵᠡᠢ᠃ ᠴᠠᠬᠢᠯᠲᠠᠭ ᠴᠡᠴᠡᠭᠯᠡᠨ᠂ ᠴᠡᠩᠭᠡᠯ ᠤᠨ ᠬᠠᠪᠤᠷ ᠰᠠᠭᠠᠲᠠᠬᠤ ᠪᠠᠷ ᠵᠡᠭᠡᠯᠢ ᠶᠢᠨ ᠬᠤᠶᠠᠷ ᠲᠠᠯ᠎ᠠ ᠳᠤ ᠲᠤᠭᠤᠷ ᠤᠨ ᠴᠡᠴᠡᠭ᠂ ᠭᠤᠤᠯᠳᠤ ᠪᠤᠷᠤ ᠶᠢᠨ ᠴᠡᠴᠡᠭ᠂ ᠡᠯᠪᠡᠭᠡᠲᠥ ᠴᠡᠴᠡᠭ᠂ ᠰᠢᠷ᠎ᠠ ᠰᠣᠯᠣᠩᠭ᠎ᠠ ᠴᠡᠴᠡᠭ᠂ ᠰᠠᠷᠭᠠᠢ ᠴᠡᠴᠡᠭ ᠮᠡᠲᠦ ᠶᠢᠨ ᠤᠯᠠᠨ ᠨᠠᠰᠤᠲᠤ ᠮᠤᠲᠤᠯᠢᠭ ᠤᠷᠭᠤᠮᠠᠯ ᠤᠨ ᠴᠠᠭᠠᠨ᠂ ᠰᠢᠷ᠎ᠠ᠂ ᠬᠤᠨᠲᠤᠨ᠂ ᠤᠯᠠᠭᠠᠨ᠂ ᠶᠠᠭᠠᠨ ᠵᠡᠷᠭᠡ ᠵᠦᠢᠯ ᠤᠨ ᠴᠡᠴᠡᠭ ᠦᠩᠭᠡ ᠢᠯᠭᠠᠷᠠᠨ ᠲᠡᠯᠭᠡᠷᠡᠵᠦ᠂ ᠬᠦᠮᠦᠰ ᠤᠨ ᠬᠠᠷᠠᠴᠠ ᠶᠢ ᠦᠪᠡᠷ ᠤᠨ ᠡᠷᠭᠡ ᠦᠭᠡᠢ ᠪᠤᠯᠢᠶ᠋ᠨᠨ᠎ᠠ᠃ ᠭᠡᠲᠦ ᠬᠤᠨᠤᠯ ᠦᠭᠡᠢ ᠤᠲᠠ‌ᠤᠯᠢᠶᠠᠰᠤ᠂ ᠬᠠᠶᠢᠯᠠᠰᠤ᠂ ᠬᠦᠢᠯᠡᠰᠦᠨ ᠮᠤᠲᠤ ᠡᠬᠢᠯᠡᠨ ᠨᠠᠪᠴᠢᠯᠠᠬᠤ ᠪᠠᠷ ᠵᠠᠮ ᠬᠦᠪᠡᠭᠡᠲᠡᠭᠰᠡᠨ ᠬᠠᠷᠠᠪᠲᠤᠷ ᠦᠩᠭᠡ ᠲᠠᠢ ᠨᠠᠷᠠᠰᠤᠨ ᠨᠠᠪᠴᠢ ᠴᠦ ᠤᠷᠢᠨ ᠲᠤᠯᠠᠭᠠᠨ ᠳᠤ ᠦᠩᠭᠡᠵᠢᠨ ᠨᠤᠭᠤᠭᠠᠷᠠᠵᠤ᠂ ᠠᠮᠢ ᠨᠠᠰᠤᠨ ᠤ ᠷᠢᠲᠢ ᠰᠢᠲᠢ ᠶᠢ ᠭᠠᠶᠢᠬᠠᠭᠤᠯᠤᠨ᠂ ᠵᠡᠭᠡᠯᠢ ᠶᠢᠨ ᠵᠠᠬ᠎ᠠ ᠪᠠᠷ ᠲᠦᠬᠦᠷᠡᠩ ᠲᠠᠷᠢᠭᠰᠠᠨ ᠠᠷᠴᠠ ᠶᠢᠨ ᠠᠩᠬᠢᠯᠤᠮ᠎ᠠ ᠰᠠᠶᠢᠬᠠᠨ ᠦᠨᠦᠷ ᠲᠤ ᠴᠡᠭᠡᠵᠢ ᠠᠭᠤᠵᠢᠷᠠᠨ᠎ᠠ᠃ ᠵᠤᠯᠠᠢ ᠠᠴᠠ ᠭᠠᠯ ᠨᠠᠷᠠᠨ ᠲᠦᠭᠡᠨᠡᠭᠰᠡᠨ ᠵᠤᠨ ᠪᠤᠯᠬᠤ ᠪᠠᠷ ᠵᠡᠭᠡᠯᠢ ᠭᠤᠲᠤᠮᠵᠢ ᠦᠪᠴᠢ ᠨᠤᠭᠤᠭᠠᠨ ᠢᠶᠠᠷ ᠬᠤᠴᠢᠭᠲᠠᠵᠤ᠂ ᠲᠤᠭᠯᠬᠠᠤ ᠵᠡᠷᠭᠡᠯᠭᠡᠨ  ᠳᠤ ᠠᠰᠠᠷ ᠲᠠᠭᠲᠤ ᠦᠶ᠎ᠠ ᠬᠤᠯᠠᠲᠠᠵᠤ ᠦᠶ᠎ᠠ ᠤᠶᠢᠷᠠᠲᠤᠨ᠎ᠠ᠂ ᠭᠡᠰᠡᠭ ᠬᠦᠪᠪᠦᠯᠵᠡᠵᠦ ᠭᠡᠰᠡᠭ ᠪᠠᠯᠠᠷᠠᠨ᠎ᠠ᠃ ᠦᠲᠡᠰᠢ ᠶᠢᠨ ᠬᠦᠰᠢᠭᠡ ᠲᠠᠲᠠᠬᠤ ᠶᠢ ᠲᠠᠭᠠᠯᠲᠤᠨ ᠤᠯᠠᠨ ᠵᠦᠢᠯ ᠤᠨ ᠭᠡᠯᠪᠡᠷᠢ ᠲᠠᠢ ᠵᠠᠮ ᠤᠨ ᠳ᠋ᠧᠩ ᠵᠢᠵᠢᠭᠬᠡᠨ ᠬᠠᠯᠢᠭᠤᠲᠤ ᠪᠠᠯᠭᠠᠰᠤ ᠶᠢ ᠭᠤᠶᠤᠯᠠᠨ ᠴᠢᠮᠡᠵᠦ᠂ ᠤᠷᠬᠢᠯᠤᠮᠠᠯ ᠪᠤᠯᠠᠭ ᠨᠢ ᠬᠦᠭᠵᠢᠮ ᠤᠨ ᠴᠤᠬᠢᠯᠭ᠎ᠠ  ᠲᠠᠢ ᠠᠶᠢᠵᠠᠮ ᠨᠡᠶᠢᠯᠡᠬᠦᠯᠦᠨ ᠶᠢᠰᠦᠨ ᠦᠩᠭᠡ ᠪᠠᠷ ᠰᠦᠷᠴᠢᠭᠲᠡᠵᠤ᠂ ᠠᠯᠢᠶ᠎ᠠ ᠭᠡᠤᠭᠡᠳ ᠤᠳ ᠱᠠᠯ ᠨᠤᠷᠤᠭᠰᠠᠨ ᠴᠦ ᠨᠢᠭᠤᠷ ᠲᠦᠬᠦᠷᠡᠩ ᠪᠠᠶᠠᠷ ᠤᠨ ᠮᠦᠰᠢᠶᠡᠲᠦ  ᠲᠠᠢ᠃ ᠲᠠᠪᠤᠨ ᠬᠤᠰᠢᠭᠤ ᠮᠠᠯ ᠨᠢ ᠲᠤᠰᠤᠨ ᠲᠠᠷᠭᠤ ᠠᠪᠴᠤ᠂ ᠲᠠᠪᠤᠨ ᠲᠠᠷᠢᠶ᠎ᠠ ᠡᠯᠪᠡᠭ ᠬᠤᠷᠢᠶᠠᠯᠲᠠ ᠤᠯᠤᠭᠰᠠᠨ ᠲᠠᠩᠰᠤᠭ ᠨᠠᠮᠤᠷ ᠦᠷᠦᠮ᠎ᠡ ᠪᠠᠷ ᠱᠠᠩᠲᠠᠭᠤᠷᠠᠵᠤ ᠢᠷᠡᠬᠦ ᠳᠤ᠂ ᠨᠤᠭᠤᠭᠠᠨ᠂ ᠰᠢᠷ᠎ᠠ᠂ ᠰᠢᠷᠭᠠᠯ᠂ ᠤᠯᠠᠭᠠᠨ᠂ ᠤᠯᠠᠪᠢᠷ᠂ ᠬᠦᠷᠡᠩ ᠦᠩᠭᠡ ᠲᠠᠢ ᠨᠠᠪᠴᠢᠰ ᠦᠩᠭᠡ ᠪᠤᠯᠢᠶᠠᠯᠲᠤᠨ ᠪᠦᠵᠢᠭᠯᠡᠵᠦ᠂ ᠨᠠᠮᠤᠷ ᠤᠨ ᠰᠡᠷᠢᠬᠦᠨ ᠰᠠᠯᠬᠢᠨ ᠳᠤ ᠨᠠᠪᠴᠢ ᠨᠠᠮᠠᠭᠠᠨ ᠲᠡᠭᠡᠷ᠎ᠡ ᠪᠠᠨ ᠲᠤᠭᠲᠠᠵᠤ ᠴᠢᠲᠠᠯ ᠦᠭᠡᠢ ᠨᠢᠭᠡ ᠬᠤᠶᠠᠷ ᠢᠶᠠᠷ ᠢᠶᠠᠨ ᠦᠨᠲᠦᠰᠤ ᠪᠠᠨ ᠲᠡᠷᠡᠯᠡᠨ ᠡᠭᠡ ᠲᠡᠯᠡᠭᠡᠢ ᠳᠤ ᠪᠠᠨ ᠰᠢᠮᠠᠲᠤᠨ᠎ᠠ᠃ ᠡᠨᠡ ᠯᠠ ᠦᠶ᠎ᠠ ᠤᠷᠠᠨ ᠵᠢᠷᠤᠭᠴᠢᠨ᠂ ᠭᠡᠷᠡᠯ ᠵᠢᠷᠤᠭ ᠲᠠᠲᠠᠬᠤ ᠪᠠᠭ᠋ᠠᠲᠠᠢ ᠬᠦᠮᠦᠰ ᠤᠨ ᠵᠢᠷᠭᠠᠯ ᠤᠨ ᠤᠷᠲᠤᠨ ᠪᠤᠯᠲᠠᠭ ᠰᠠᠨ᠃ ᠨᠠᠷᠠ ᠬᠤᠯᠠᠲᠠᠵᠤ ᠬᠦᠢᠲᠡᠨ ᠰᠠᠯᠬᠢ ᠬᠠᠴᠠᠷ ᠵᠦᠰᠦᠭᠰᠡᠨ ᠮᠦᠩᠬᠦᠨ ᠡᠪᠤᠯ ᠬᠠᠨ ᠲᠠᠯᠡᠭᠡᠢ ᠳᠤ ᠮᠤᠷᠢᠯᠠᠬᠤ ᠪᠠᠷ ᠬᠦᠪᠦᠩ ᠴᠠᠰᠤ ᠬᠦᠨᠵᠢᠯᠡ ᠶᠤᠮ ᠰᠢᠭ᠋ ᠭᠦᠢᠲᠡᠨ ᠵᠢᠪᠡᠷ ᠢ ᠬᠠᠯᠬᠠᠯᠠᠨ ᠬᠦᠷᠦᠰᠦᠲᠤ ᠲᠡᠯᠡᠭᠡᠢ ᠪᠠᠨ ᠬᠤᠴᠢᠵᠤ᠂ ᠬᠠᠷ᠎ᠠ ᠤᠪᠤᠭ᠎ᠠ ᠠᠭᠤᠯᠠᠨ ᠤ ᠦᠪᠦᠷ ᠲᠤ ᠪᠦᠪᠡᠶᠢᠯᠡᠭᠲᠡᠭᠰᠡᠨ ᠬᠠᠯᠢᠭᠤᠲᠤ ᠪᠠᠯᠭᠠᠰᠤ ᠠᠮᠤᠭᠤᠯᠠᠩ ᠲᠠᠶᠢᠪᠤᠩ᠃ ᠠᠶᠢᠯ ᠤᠨ ᠡᠬᠦᠲᠡᠨ ᠳᠤ ᠭᠡᠤᠭᠡᠳ ᠤᠳ ᠴᠠᠰᠤᠨ ᠬᠦᠮᠦᠨ ᠪᠠᠷᠢᠭᠠᠳ ᠬᠦᠭᠡᠷᠦᠨ᠎ᠡ᠂ ᠵᠠᠷᠢᠮ ᠨᠢ ᠴᠠᠰᠤᠨ ︿︿ᠪᠠᠶᠢᠯᠲᠤᠭᠠᠨ﹀﹀ ᠬᠢᠭᠡᠳ ᠬᠦᠭᠵᠢᠯᠲᠦᠨ᠎ᠡ᠂ ᠨᠠᠪᠴᠢ ᠨᠠᠮᠠᠭ᠎ᠠ ᠨᠢ ᠴᠠᠰᠤᠨ ᠳᠤ ᠲᠠᠷᠤᠭᠲᠠᠭᠰᠠᠨ ᠨᠠᠷᠠᠰᠤ ᠠᠭᠠᠷᠤ ᠵᠡᠭᠡᠯᠢ ᠶᠢᠨ ᠬᠤᠶᠠᠷ ᠲᠠᠯ᠎ᠠ ᠪᠠᠷ ᠴᠢᠮᠡᠭ ᠪᠤᠯᠤᠨ ᠬᠦᠲᠡᠯᠦᠯ ᠦᠭᠡᠢ ᠰᠡᠭᠦᠶᠢᠨ᠂ ᠬᠠᠷ᠎ᠠ ᠨᠤᠭᠤᠭᠠᠨ ᠨᠠᠪᠴᠢ ᠨᠢ ᠬᠠᠪᠤᠷ ᠢᠶᠠᠨ ᠴᠢᠩᠨᠠᠵᠤ᠂ ᠭᠡᠤᠭᠡᠳ ᠤᠨ ᠢᠨᠢᠶᠡᠬᠦ ᠲᠠᠭᠤᠨ ᠢᠶᠠᠷ ᠪᠡᠶ᠎ᠡ ᠪᠠᠨ ᠰᠢᠯᠭᠡᠬᠦ ᠳᠤ᠂ ᠤᠨᠠᠭᠰᠠᠨ ᠴᠠᠰᠤ ᠨᠢ ᠦᠩᠭᠡᠷᠡᠬᠦ ᠬᠦᠮᠦᠰ ᠤᠨ ᠬᠦᠵᠦᠬᠦᠨ ᠳᠤ ᠤᠷᠤᠵᠤ ᠲᠠᠭᠠᠷᠠᠳᠠᠰᠤ ᠭᠦᠷᠭᠡᠬᠦ ᠨᠢ ᠰᠠᠶᠢᠬᠠᠨ᠃ ᠵᠠᠪ ᠲᠠᠭᠠᠷᠠᠭᠠᠳ ᠵᠠᠪᠰᠢᠶᠠᠨ ᠲᠠᠢ ᠪᠤᠯ ᠤᠷᠠᠳ ᠤᠨ ᠲᠤᠮᠲᠠᠲᠤ ᠬᠤᠰᠢᠭᠤᠨ ᠤ ᠬᠠᠯᠢᠭᠤᠲᠤ ᠪᠠᠯᠭᠠᠰᠤᠨ ᠤ ᠦᠨᠲᠦᠰᠦᠲᠡᠨ ᠤ ᠤᠨᠴᠠᠯᠢᠭ ᠲᠠᠢ ᠱᠤᠭᠤᠮᠠᠯ ᠢᠶᠠᠷ ᠭᠤᠤᠯᠲᠠᠭᠰᠠᠨ ︿︿ᠲᠡᠯᠭᠡᠷ ᠬᠠᠩᠭᠠᠢ﹀﹀ ᠠᠭᠤᠲᠠᠮ ᠲᠠᠯᠠᠪᠠᠢ᠂ ︿︿ᠬᠠᠰᠠᠷ﹀﹀ ᠠᠭᠤᠲᠠᠮ ᠲᠠᠯᠠᠪᠠᠢ᠂ ︿︿ᠬᠤᠨ ᠭᠠᠯᠠᠭᠤ﹀﹀ ᠠᠭᠤᠲᠠᠮ ᠲᠠᠯᠠᠪᠠᠢ᠂ ︿︿ᠪᠠ ᠶᠦᠨ ᠶᠢᠩ﹀﹀ ᠠᠭᠤᠲᠠᠮ ᠲᠠᠯᠠᠪᠠᠢ ᠪᠠ ︿︿ᠪᠢᠩ ᠾᠧ﹀﹀ ᠤᠰᠤᠨ ᠰᠢᠰᠲ᠋ᠧᠮ ᠤᠨ ᠦᠵᠡᠮᠵᠢ᠂ ᠠᠮᠢ ᠠᠬᠤᠢ ᠶᠢᠨ ᠬᠦᠷᠢᠶᠡᠯᠠᠩ ᠢᠶᠠᠷ ᠬᠦᠷᠦᠭᠡᠷᠡᠢ︕ ᠭᠤᠪᠢ ᠨᠤᠲᠤᠭ ᠤᠨ ᠠᠮᠢᠲᠤᠷᠠᠯ ᠤᠨ ᠦᠵᠡᠭᠲᠡᠯ᠂ ᠣᠷᠠᠳ ᠰᠤᠶᠤᠯ ᠤᠨ ᠭᠠᠶᠢᠬᠠᠮᠰᠢᠭ ᠬᠠᠷᠠᠭ᠎ᠠ ᠶᠢ ᠴᠢᠨᠢ ᠲᠡᠯᠡᠵᠦ᠂  ᠴᠡᠪᠠᠷ ᠠᠷᠢᠭᠤᠨ ᠠᠭᠤᠷ ᠠᠮᠢᠰᠬᠤᠯ᠂ ᠶᠠᠲᠠᠷᠠᠭ᠎ᠠ ᠶᠢ ᠴᠢᠨᠢ ᠲᠡᠶᠢᠯᠵᠤ᠂ ᠤᠷᠮ᠎ᠠ ᠶᠢ ᠴᠢᠨᠢ ᠬᠦᠭᠵᠢᠭᠡᠨ᠎ᠡ᠃             ᠲᠡᠷᠯᠢᠭ ᠤᠨ ᠡᠮᠵᠢᠶᠡᠷᠢ ᠭᠡᠮᠡᠷᠭᠡᠨ ᠬᠠᠯᠢᠭᠤᠲᠤ ᠭᠤᠤᠯ ᠤᠨ ᠬᠦᠪᠡᠭᠡ ᠪᠠᠷ ᠠᠯᠬᠤᠯᠠᠬᠤ ᠳᠤ ᠡᠰᠡᠷᠬᠦ ᠬᠦᠪᠡᠭᠡᠨ ᠳᠤ ᠢᠭᠴᠤ ᠤᠷᠭᠤᠭᠰᠠᠨ ᠮᠤᠲᠤᠨ  ᠤ ᠬᠠᠪᠢ ᠪᠠᠷ ᠮᠤᠩᠭᠤᠯ ᠢᠶᠠᠷ ᠢᠶᠠᠨ ᠭᠤᠶᠤᠭᠰᠠᠨ ᠬᠤᠶᠠᠷ ᠰᠢᠨ᠎ᠠ ᠬᠦᠮᠦᠨ ᠬᠤᠷᠢᠮ ᠤᠨ ᠰᠡᠬᠦᠲᠡᠷ ᠰᠡᠬᠦᠲᠡᠷᠯᠡᠨ᠂ ᠡᠭᠡ ᠪᠠᠶᠢᠭᠠᠯᠢ ᠶᠢᠨ ᠭᠤᠶᠤ ᠦᠵᠡᠮᠵᠢ ᠲᠠᠢ ᠮᠦᠴᠡᠭᠡᠷᠭᠡᠵᠦ ᠶᠠᠭᠠᠷᠠᠯᠲᠤᠨ᠎ᠠ ᠁            ︿︿ ᠁ ᠴᠡᠴᠡᠭᠯᠡᠵᠦ ᠪᠠᠶᠢᠭ᠎ᠠ ᠨᠢᠭᠡᠲᠦᠯ ᠳᠤ ᠪᠠᠨ            ᠴᠢᠷᠮᠡᠶᠢᠵᠦ ᠶᠠᠪᠤᠶ᠎ᠠ ᠬᠤᠶᠠᠭᠤᠯᠠ ᠪᠠᠨ                  ᠠ ᠬᠠ ᠠ ᠬᠠ ᠬᠦ᠋            ᠴᠡᠩᠭᠡᠯᠲᠦ ᠵᠢᠷᠭᠠᠯᠲᠤ ᠠᠮᠢᠲᠤᠷᠠᠯ ᠢᠶᠠᠨ            ᠪᠦᠲᠦᠭᠡᠵᠦ ᠶᠠᠪᠤᠶ᠎ᠠ ᠬᠤᠶᠠᠭᠤᠯᠠ ᠪᠠᠨ ᠬᠦ᠋﹀﹀᠃                      
ᠢᠷᠡᠯᠲᠡ᠄ ᠤᠷᠠᠳ ᠤᠨ ᠲᠤᠮᠳᠠᠳᠤ ᠬᠤᠰᠢᠭᠤᠨ ᠤ ᠵᠠᠰᠠᠭ ᠤᠨ ᠤᠷᠳᠤᠨ ᠤ ᠮᠤᠩᠭᠤᠯ ᠰᠦᠯᠵᠢᠶ᠎ᠡ