ᠤᠷᠠᠳᠴᠤᠳ ᠤᠨ ᠨᠡᠶᠢᠭᠡᠮ ᠤᠨ ᠵᠠᠩ ᠦᠢᠯᠡ—— ᠤᠷᠤᠰᠢᠭᠤᠯᠭ᠎ᠠ ᠶᠢᠨ ᠶᠤᠰᠦ ᠵᠠᠩᠰᠢᠯ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2019/7/5
     ᠤᠷᠠᠳᠴᠤᠳ ᠤᠨ ᠤᠷᠤᠰᠢᠭᠤᠯᠭ᠎ᠠ ᠶᠢᠨ ᠶᠤᠰᠤ ᠵᠠᠩᠰᠢᠯ ᠲᠦᠢᠯ ᠤᠨ ᠲᠦᠬᠦᠮ ᠲᠦᠲᠡ᠂ ᠪᠤᠯᠪᠠᠰᠤᠨ᠂ ᠪᠤᠷᠤᠭᠵᠢᠭᠤᠨ᠂ ᠪᠦᠷᠢᠯᠭᠡᠨ ᠰᠦᠢᠳᠭᠡᠬᠦ ᠦᠬᠡᠢ ᠵᠢᠷᠤᠮ ᠶᠤᠰᠤ ᠲᠠᠢ ᠪᠠᠶᠢᠳᠠᠭ᠃ ᠦᠨᠳᠦᠰᠦᠨ ᠳᠤ ᠪᠠᠨ ᠬᠡᠭᠦᠷ ᠴᠢᠨᠳᠠᠷ ᠬᠠᠳᠠᠭᠠᠯᠠᠬᠤ ᠦᠬᠡᠢ᠂ ᠶᠡᠭᠡ ᠪᠠᠷ ᠲᠠᠬᠢᠯ ᠰᠢᠳᠤᠯᠭᠡ ᠲᠠᠯᠪᠢᠬᠤ ᠦᠬᠡᠢ᠂ ᠪᠡᠯᠪᠡᠰᠦᠷᠡᠯ ᠤᠨ ᠬᠤᠪᠴᠠᠰᠤ ᠡᠮᠦᠰᠬᠦ ᠦᠬᠡᠢ᠂ ᠴᠠᠭᠠᠰᠤᠨ ᠵᠤᠭᠤᠰ ᠰᠢᠳᠠᠭᠠᠬᠤ ᠦᠬᠡᠢ᠂ ᠭᠠᠰᠢᠭᠤᠳᠠᠯ ᠤᠨ ᠬᠦᠭᠵᠢᠮ ᠠᠶᠠᠯᠭᠤ ᠲᠠᠯᠪᠢᠳᠠᠭ ᠦᠭᠡᠢ᠃ ᠬᠡᠳᠡᠯ᠎ᠡ ᠰᠢᠷ᠎ᠠ ᠶᠢᠨ ᠱᠠᠰᠢᠨ ᠰᠢᠳᠤᠵᠤ ᠪᠠᠶᠢᠭᠰᠠᠨ ᠲᠡᠷᠡ ᠡᠷᠢᠨ ᠳᠤ ᠡᠷᠬᠢᠮ ᠢᠵᠠᠭᠤᠷᠲᠠᠨ᠂ ᠡᠭᠡᠯ ᠲᠤᠤᠷᠠᠳᠤ᠂ ᠪᠠᠶᠠᠨ ᠶᠠᠳᠠᠭᠤ ᠭᠡᠵᠤ ᠢᠯᠭᠠᠯ ᠦᠭᠡᠢ ᠭᠡᠬᠦᠷ ᠴᠢᠨᠳᠠᠷ ᠤᠷᠤᠰᠢᠭᠤᠯᠬᠤ ᠳᠤ  ᠪᠠᠨ ᠪᠦᠷ ᠯᠠᠮ᠎ᠠ ᠬᠤᠸᠠᠷᠠᠭ ᠵᠠᠯᠠᠵᠤ ᠨᠤᠮ ᠬᠦᠷᠢᠮ ᠤᠩᠰᠢᠭᠤᠯᠵᠤ ᠬᠤᠶᠢᠰᠢᠲᠠ ᠶᠢᠨ ᠬᠡᠰᠢᠭ ᠪᠤᠶᠠᠨ᠂ ᠰᠦᠨᠡᠰᠦ ᠶᠢ ᠨᠢ ᠢᠷᠦᠭᠡᠨ ᠲᠠᠭᠠᠳᠬᠠᠵᠤ ᠬᠦᠳᠡᠭᠡᠯᠡᠬᠦ᠂ ᠬᠠᠶᠢᠯᠤᠭᠤᠯᠬᠤ᠂ ᠪᠤᠯᠠᠰᠢᠯᠠᠬᠤ ᠵᠡᠷᠭᠡ ᠭᠤᠷᠪᠠᠨ ᠠᠷᠭ᠎ᠠ ᠪᠠᠷ ᠤᠷᠤᠰᠢᠭᠤᠯᠳᠠᠭ᠃      1᠂ ᠬᠦᠳᠡᠭᠡᠯᠡᠬᠦ — — — ᠪᠤᠯ ᠤᠷᠠᠳᠴᠤᠳ ᠤᠨ ᠲᠤᠮᠲᠠ ᠲᠦᠭᠡᠮᠡᠯ ᠤᠷᠤᠰᠢᠵᠤ ᠪᠠᠶᠢᠭᠰᠠᠨ ᠦᠷᠬᠦᠯᠵᠢ ᠬᠡᠷᠡᠭᠯᠡᠭᠳᠡᠬᠦ ᠭᠤᠤᠯ ᠤᠷᠤᠰᠢᠭᠤᠯᠭ᠎ᠠ ᠶᠢᠨ ᠠᠷᠭ᠎ᠠ ᠪᠠᠷᠢᠯ ᠪᠤᠯᠵᠤ ᠪᠠᠶᠢᠵᠠᠢ᠃ ᠤᠷᠠᠳᠴᠤᠳ ᠬᠦᠮᠦᠨ ᠲᠠᠭᠠᠯᠠᠯ ᠪᠤᠯᠤᠮᠠᠭᠴᠠ ᠠᠮᠠᠨ ᠳᠤ ᠨᠢ ᠠᠯᠲᠠ ᠮᠦᠩᠭᠦ ᠱᠢᠷᠦ ᠰᠤᠪᠤᠳ ᠡᠷᠳᠡᠨᠢ ᠶᠢᠨ ᠵᠦᠢᠯ ᠠᠴᠠ ᠵᠠᠭᠤᠯᠭᠠᠵᠤ᠂ ᠨᠢᠭᠤᠷ ᠢ ᠨᠢ ᠴᠠᠭᠠᠨ ᠦᠩᠭᠡᠲᠡᠢ ᠬᠠᠳᠠᠭ ᠪᠤᠶᠤ ᠪᠦᠰ ᠢᠶᠠᠷ ᠪᠦᠳᠡᠭᠡᠵᠤ ᠭᠤᠳᠤᠯ ᠤᠨ ᠤᠯᠠ ᠳᠤ ᠨᠢ ᠲᠡᠮᠳᠡᠭ ᠦᠬᠡᠢ ᠴᠤᠯ ᠴᠠᠭᠠᠨ ᠮᠤᠳᠤᠤ ᠴᠠᠭᠠᠰᠤ ᠨᠠᠭᠠᠵᠤ ᠪᠦᠬᠦ ᠪᠡᠶ᠎ᠡ ᠶᠢ ᠨᠢ ᠴᠠᠭᠠᠨ ᠪᠦᠰ ᠡᠰᠡᠭᠦᠯ᠎ᠡ ᠲᠠᠩ ᠲᠠᠪᠬᠤᠷ ᠲᠤᠪᠴᠢ ᠰᠢᠯᠪᠢ ᠦᠬᠡᠢ ᠲᠡᠷᠯᠢᠭ ᠡᠮᠦᠰᠦᠬᠦᠯᠬᠦ ᠪᠠ ᠤᠷᠢᠶᠠᠵᠤ ᠤᠷᠤᠰᠢᠭᠤᠯᠳᠠᠭ᠃ ᠭᠡᠬᠦ ᠳᠤ ᠪᠠᠨ ᠠᠶᠢᠯ ᠤᠨ ᠵᠠᠬ᠎ᠠ ᠵᠠᠮ ᠠᠴᠠ ᠵᠠᠶᠢᠲᠠᠢ ᠬᠦᠳᠡᠭᠡ ᠭᠡᠭᠡᠷ᠎ᠡ ᠭᠠᠵᠠᠷ ᠠᠪᠠᠴᠢᠵᠤ ᠲᠠᠯᠪᠢᠭᠠᠳ ᠵᠡᠷᠯᠢᠭ ᠠᠷᠢᠶᠠᠳᠠᠨ ᠰᠢᠪᠠᠭᠤᠳ ᠤᠨ ᠦᠭᠶᠦᠭᠡ ᠪᠤᠯᠭᠠᠳᠠᠭ ᠶᠤᠮ᠃ ᠲᠠᠭᠠᠯᠠᠯ ᠪᠤᠯᠤᠭᠰᠠᠨ ᠬᠦᠮᠦᠨ ᠢ ᠬᠦᠳᠡᠭᠡᠯᠡᠬᠦ ᠳᠤ ᠪᠠᠨ ᠦᠬᠡᠷ ᠬᠦᠯᠦᠭᠰᠡᠨ ᠲᠡᠷᠭᠡ ᠪᠠᠷ ᠲᠡᠭᠡᠭᠡᠳᠡᠭ ᠦᠭᠡᠢ᠃ ᠲᠡᠷᠡ ᠨᠢ ︽ᠦᠬᠦᠯ ᠤᠨ ᠮᠠᠭᠤ ᠪᠠᠷ ᠦᠬᠦᠵᠤ ᠦᠬᠡᠷ ᠲᠡᠷᠭᠡ ᠪᠠᠷ ᠲᠡᠭᠡᠭᠡᠯᠭᠡᠨ᠎ᠡ︾ ᠭᠡᠰᠡᠨ ᠮᠤᠩᠭᠤᠯᠴᠤᠳ ᠤᠨ ᠬᠠᠭᠤᠴᠢ  ᠰᠡᠴᠡᠨ ᠦᠭᠡᠨ ᠠᠴᠠ ᠪᠤᠯᠤᠭᠰᠠᠨ ᠴᠡᠭᠡᠷ ᠬᠤᠷᠢᠭ᠎ᠠ ᠶᠤᠮ᠃ ᠬᠠᠤᠯᠢ ᠴᠠᠭᠠᠵᠠ ᠠᠴᠠ ᠵᠦᠷᠢᠴᠡᠵᠤ ᠴᠠᠭᠠᠵᠠᠯᠠᠭᠳᠠᠭᠰᠠᠳ ᠤᠨ ᠬᠡᠬᠦᠷ ᠢ ᠦᠬᠡᠷ ᠲᠡᠷᠬᠡ ᠪᠠᠷ ᠲᠡᠭᠡᠭᠡᠵᠤ ᠪᠠᠶᠢᠭᠰᠠᠨ ᠬᠡᠳᠡᠭ᠃ ᠤᠷᠤᠰᠢᠭᠤᠯᠭ᠎ᠠ ᠶᠢᠨ ᠭᠠᠵᠠᠷ ᠤᠶᠢᠷ᠎ᠠ ᠪᠤᠯ ᠵᠠᠪᠠᠯ ᠦᠷ᠎ᠡ ᠬᠡᠤᠬᠡᠳ᠂ ᠲᠦᠷᠦᠯ ᠰᠠᠳᠤᠨ ᠨᠢ ᠬᠠᠨ᠎ᠠ ᠪᠤᠶᠤ ᠶᠠᠮᠠᠷ ᠨᠢᠭᠡᠨ ᠬᠦᠩᠭᠡᠨ ᠬᠠᠳᠠᠭᠤᠯᠢᠭ ᠪᠤᠳᠠᠰ ᠲᠡᠭᠡᠷ᠎ᠡ ᠲᠠᠯᠪᠢᠭᠠᠳ ᠬᠦᠯ ᠢ ᠨᠢ ᠤᠴᠢᠬᠤ ᠵᠦᠭ ᠦᠭᠡᠳᠡ ᠴᠢᠭᠯᠡᠬᠦᠯᠵᠤ ᠭᠠᠵᠠᠷ ᠲᠠᠯᠪᠢᠵᠤ ᠠᠮᠠᠷᠠᠬᠤ ᠦᠬᠡᠢ ᠪᠠᠷ ᠡᠬᠡᠯᠵᠢᠯᠡᠨ ᠰᠤᠯᠢᠨ ᠲᠠᠮᠨᠠᠵᠤ ᠠᠪᠠᠴᠠᠭᠠᠳ ᠬᠦᠳᠡᠭᠡ ᠬᠡᠪᠲᠡᠨ ᠤᠨᠲᠠᠵᠤ ᠪᠠᠶᠢᠬᠤ ᠰᠢᠭ ᠲᠤᠯᠤᠭᠠᠢ  ᠶᠢ ᠨᠢ ᠤᠮᠠᠷ᠎ᠠ ᠵᠦᠭ ᠲᠤ ᠴᠢᠭᠯᠡᠬᠦᠯᠦᠨ ᠲᠠᠯᠪᠢᠳᠠᠭ ᠪᠠᠶᠢᠭᠰᠠᠨ ᠶᠤᠮ᠃ ᠬᠦᠢᠳᠡᠨ ᠰᠡᠷᠢᠬᠦᠨ ᠤᠯᠠᠷᠢᠯ ᠲᠤᠬᠢᠶᠠᠯᠳᠤᠪᠠᠯ ᠨᠤᠮᠤᠬᠠᠨ ᠲᠡᠮᠡᠭᠡ ᠪᠠᠨ ᠬᠤᠮᠨᠤᠵᠤ᠂ ᠬᠤᠮ  ᠤᠨ ᠬᠤᠶᠠᠷ ᠲᠠᠯ᠎ᠠ ᠳᠤ ᠰᠤᠮᠠᠯ ᠳᠤ ᠬᠤᠨᠢ ᠢᠮᠠᠭᠠᠨ ᠤ ᠬᠠᠭᠤᠷᠠᠢ ᠬᠤᠷᠭᠤᠯ ᠢ ᠲᠦᠬᠦᠷᠡᠩ ᠰᠠᠪᠠᠯᠠᠵᠤ᠂ ᠬᠤᠮ ᠲᠠᠢ ᠪᠠᠨ ᠲᠡᠭᠰᠢ ᠰᠠᠶᠢᠬᠠᠨ ᠲᠡᠩᠴᠡᠬᠦᠯᠦᠨ ᠠᠴᠢᠭᠠᠳ ᠲᠠᠭᠠᠯᠠᠯ ᠪᠤᠯᠤᠭᠰᠠᠨ ᠬᠦᠮᠦᠨ ᠤ ᠬᠡᠬᠦᠷ ᠢᠶᠠᠨ ᠬᠦᠯ ᠲᠠᠯ᠎ᠠ ᠶᠢ ᠨᠢ ᠲᠡᠮᠡᠭᠡᠨ ᠤ ᠲᠤᠯᠤᠭᠠᠢ ᠦᠭᠡᠲᠡ ᠴᠢᠭᠯᠡᠬᠦᠯᠦᠨ ᠬᠢᠯᠭᠠᠰᠤ᠂ ᠲᠡᠮᠡᠭᠡᠨ ᠨᠤᠤᠰᠤ ᠪᠠᠷ ᠲᠠᠮᠤᠭᠰᠠᠨ ᠲᠠᠳᠠᠯᠭ᠎ᠠ ᠪᠠᠷ ᠬᠦᠳᠦᠯᠵᠤ ᠠᠯᠬᠤᠨ ᠶᠠᠪᠤᠵᠤ ᠬᠦᠳᠡᠭᠡᠯᠡᠳᠡᠭ ᠪᠠᠶᠢᠭᠰᠠᠨ ᠪᠠᠶᠢᠵᠠᠢ᠃       2᠂ ᠬᠠᠶᠢᠯᠤᠭᠤᠯᠬᠤ — — — ᠡᠨᠡ ᠨᠢ ᠤᠷᠠᠳᠴᠤᠳ ᠤᠨ ᠪᠠᠰᠠ ᠨᠢᠭᠡᠨ ᠤᠷᠤᠰᠢᠭᠤᠯᠬᠤ ᠴᠡᠪᠡᠷ ᠠᠷᠢᠭᠤᠨ᠂ ᠪᠤᠬᠢᠷᠳᠤᠯ ᠦᠭᠡᠢ ᠪᠤᠯᠪᠠᠰᠤᠨ ᠠᠷᠭ᠎ᠠ ᠶᠤᠮ᠃ ᠬᠠᠶᠢᠯᠤᠭᠤᠯᠬᠤ ᠠᠷᠭ᠎ᠠ ᠨᠢ ᠤᠯᠠᠩᠬᠢ ᠳᠤ ᠪᠠᠨ ᠡᠷᠬᠢᠮ ᠢᠵᠠᠭᠤᠷᠲᠠᠨ  ᠂  ᠪᠠᠶᠠᠳ ᠨᠤᠶᠠᠳ ᠬᠡᠷᠡᠭᠯᠡᠵᠤ ᠪᠠᠶᠢᠵᠠᠢ᠃ ᠬᠠᠷᠠᠴᠤ ᠶᠠᠳᠠᠭᠤ ᠠᠷᠠᠳ ᠬᠡᠷᠡᠭᠯᠡᠵᠤ ᠪᠠᠶᠢᠭᠰᠠᠨ ᠪᠤᠯᠪᠠᠴᠤ᠂ ᠬᠠᠯᠳᠠᠪᠤᠷᠢᠳᠤ ᠡᠪᠡᠳᠴᠢᠨ ᠬᠢᠵᠢᠭ᠂ ᠡᠮᠡᠭᠲᠠᠢ ᠶᠢᠨ ᠡᠪᠡᠳᠴᠢᠨ᠂ ᠨᠢᠷᠠᠶᠢᠯᠠᠬᠤ ᠠᠴᠠ ᠰᠢᠯᠳᠠᠵᠤ ᠦᠬᠦᠭᠰᠡᠨ ᠵᠠᠯᠠᠭᠤ ᠪᠠᠭ᠎ᠠ ᠨᠠᠰᠤᠨ ᠤ ᠬᠦᠮᠦᠨ ᠢ ᠵᠦᠢ ᠪᠤᠰᠤ ᠶᠢᠨ ᠦᠬᠦᠯ ᠬᠡᠵᠤ ᠰᠢᠳᠠᠭᠠᠵᠤ ᠬᠠᠶᠢᠯᠤᠭᠤᠯᠬᠤ ᠠᠷᠭ᠎ᠠ ᠬᠡᠷᠡᠭᠯᠡᠵᠤ ᠪᠠᠶᠢᠭᠰᠠᠨ ᠶᠤᠮ᠃      ᠬᠠᠶᠢᠯᠤᠭᠤᠯᠬᠤ ᠭᠠᠵᠠᠷ ᠰᠤᠩᠭᠤᠬᠤ ᠳᠤ ᠪᠠᠨ ᠲᠠᠭᠠᠯᠠᠯ ᠪᠤᠯᠤᠭᠰᠠᠨ ᠬᠦᠮᠦᠨ ᠤ ᠭᠡᠷ ᠠᠴᠠ ᠤᠶᠢᠷ᠎ᠠ ᠬᠦᠮᠦᠨ ᠮᠠᠯ ᠤᠴᠢᠳᠠᠭ ᠦᠬᠡᠢ ᠡᠪᠡᠰᠤ ᠤᠷᠭᠤᠮᠠᠯ ᠲᠠᠴᠢᠷ ᠨᠢᠮᠬᠡᠨ ᠵᠢᠭᠠᠬᠠᠨ ᠲᠠᠯᠠᠪᠠᠢ ᠲᠠᠢ ᠭᠠᠵᠠᠷ ᠮᠤᠳᠤ ᠲᠦᠯᠡᠭᠡ ᠪᠠᠷ ᠰᠢᠲᠠᠭᠠᠨ ᠬᠠᠶᠢᠯᠤᠭᠤᠯᠳᠠᠭ᠃ ᠬᠠᠶᠢᠯᠤᠭᠤᠯᠬᠤ ᠠᠷᠭ᠎ᠠ ᠨᠢ ᠲᠦᠯᠡᠭᠡ ᠮᠤᠳᠤ᠂ ᠬᠦᠷᠵᠡᠩ ᠠᠷᠭᠠᠯ ᠵᠡᠷᠭᠡ ᠲᠦᠯᠡᠰᠢ ᠲᠡᠭᠰᠢ ᠰᠠᠶᠢᠬᠠᠨ ᠤᠪᠤᠭᠠᠯᠠᠵᠤ ᠪᠤᠰᠬᠠᠭᠠᠳ᠂ ᠲᠡᠭᠡᠷ᠎ᠡ ᠨᠢ ᠲᠠᠭᠠᠯᠠᠯ ᠪᠤᠯᠤᠭᠰᠠᠨ ᠬᠦᠮᠦᠨ ᠤ ᠬᠡᠬᠦᠷ ᠢᠶᠠᠨ ᠡᠯᠢᠭᠡᠨ ᠲᠠᠯ᠎ᠠ ᠶᠢ ᠤᠷᠤᠭᠤ ᠬᠠᠨᠳᠤᠭᠤᠯᠤᠨ ᠲᠠᠯᠪᠢᠵᠤ ᠲᠤᠤᠷ᠎ᠠ ᠠᠴᠠ ᠨᠢ ᠭᠠᠯ ᠨᠤᠴᠤᠭᠠᠨ ᠬᠦᠭᠵᠢᠭᠡᠵᠤ ᠲᠡᠷᠡ ᠬᠡᠰᠡᠭ ᠲᠦᠯᠡᠰᠢ ᠪᠠᠷ ᠢᠶᠠᠨ ᠰᠢᠲᠠᠭᠠᠵᠤ ᠪᠠᠷᠠᠭᠠᠬᠤ ᠠᠷᠭ᠎ᠠ ᠬᠡᠮᠵᠢᠶ᠎ᠡ ᠠᠪᠳᠠᠭ᠃ ᠰᠢᠲᠠᠭᠠᠭᠰᠠᠨ ᠲᠠᠷᠠᠭ᠎ᠠ ᠭᠤᠷᠪᠠᠳᠤᠭᠠᠷ ᠡᠳᠦᠷ ᠲᠤ ᠨᠢ ᠴᠢᠨᠳᠠᠷ ᠶᠠᠰᠤ ᠶᠢ ᠲᠡᠬᠦᠵᠤ ᠠᠪᠤᠭᠠᠳ ᠦᠨᠳᠦᠷᠯᠢᠭ ᠠᠭᠤᠯᠠ ᠬᠠᠶᠢᠷᠬᠠᠨ ᠲᠤᠮᠳᠠᠬᠢ ᠡᠪᠡᠰᠤ ᠤᠷᠭᠤᠮᠠᠯ ᠰᠠᠬᠤᠯᠢᠭ ᠡᠰᠡᠬᠦᠯ᠎ᠡ ᠲᠠᠭᠠᠯᠠᠯ ᠪᠤᠯᠤᠭᠰᠠᠨ ᠬᠦᠮᠦᠨ ᠤ ᠲᠠᠭᠠᠰᠢᠶᠠᠨ ᠪᠢᠰᠢᠷᠡᠳᠡᠭ ᠭᠠᠵᠠᠷ ᠲᠤ ᠴᠢᠨᠳᠠᠷ ᠢ ᠰᠠᠴᠤᠨ ᠤᠷᠤᠰᠢᠭᠤᠯᠳᠠᠭ ᠵᠠᠩᠰᠢᠯ ᠲᠠᠢ ᠪᠠᠶᠢᠭᠰᠠᠨ ᠶᠤᠮ᠃ ᠡᠷᠬᠢᠮ ᠢᠵᠠᠭᠤᠷᠲᠠᠨ᠂ ᠪᠠᠶᠠᠳ ᠨᠤᠶᠠᠳ᠂ ᠯᠠᠮ᠎ᠠ ᠬᠤᠸᠠᠷᠠᠭ ᠪᠤᠯ ᠴᠢᠨᠳᠠᠷ ᠢᠶᠠᠨ ᠲᠡᠬᠦᠵᠤ ᠠᠪᠤᠭᠠᠳ ᠰᠦᠮ᠎ᠡ ᠳᠠᠬᠢ ᠡᠷᠳᠡᠨᠢ ᠶᠢᠨ ᠰᠤᠪᠤᠷᠭ᠎ᠠ ᠳᠤ ᠬᠠᠳᠠᠭᠠᠯᠠᠬᠤ ᠪᠤᠶᠤ ᠰᠦᠮ᠎ᠡ ᠬᠡᠶᠢᠳ ᠤᠨ ᠤᠶᠢᠷ᠎ᠠ ᠤᠷᠴᠢᠮ ᠠᠪᠠᠴᠢᠵᠤ ᠰᠠᠴᠤᠭᠠᠳ ᠲᠠᠷᠠᠭ᠎ᠠ ᠲᠦᠷᠦᠯ ᠳᠤ ᠪᠠᠨ ᠪᠤᠷᠬᠠᠨ ᠤ ᠲᠦᠷᠦᠯ ᠤᠯᠬᠤ ᠶᠢ ᠵᠦᠩᠨᠡᠨ ᠪᠡᠯᠭᠡᠳᠡᠳᠡᠭ ᠵᠠᠩ ᠵᠠᠩᠰᠢᠯ ᠴᠦ ᠪᠠᠶᠢᠭᠰᠠᠨ ᠶᠤᠮ᠃      3᠂ ᠪᠤᠯᠠᠰᠢᠯᠠᠬᠤ  — — — ᠪᠠᠰᠠ ᠠᠪᠰᠠᠯᠠᠵᠤ ᠪᠤᠯᠠᠰᠢᠯᠠᠬᠤ ᠬᠡᠵᠤ ᠨᠡᠷᠡᠯᠡᠳᠡᠭ᠃ ᠡᠶᠢᠮᠦᠷᠬᠦᠦ ᠤᠷᠤᠰᠢᠭᠤᠯᠭ᠎ᠠ ᠶᠢ ᠭᠤᠤᠯᠳᠠᠭᠤ ᠡᠷᠬᠢᠮ ᠢᠵᠠᠭᠤᠷᠲᠠᠨ᠂ ᠪᠠᠶᠠᠴᠤᠳ᠂ ᠯᠠᠮ᠎ᠠ ᠬᠤᠸᠠᠷᠠᠭ ᠲᠤ ᠬᠡᠷᠡᠭᠯᠡᠵᠤ ᠪᠠᠶᠢᠭᠰᠠᠨ ᠶᠤᠮ᠃ ᠬᠦᠮᠦᠨ ᠲᠠᠭᠠᠯᠠᠯ ᠪᠤᠯᠪᠠᠯ ᠭᠡᠷ ᠤᠨ ᠬᠦᠮᠦᠰ ᠨᠢ ᠲᠡᠷᠡ ᠲᠠᠷᠤᠢ ᠳᠤ ᠨᠢ ᠲᠠᠭᠠᠯᠠᠯ ᠪᠤᠯᠤᠭᠰᠠᠨ ᠬᠦᠮᠦᠨ ᠳᠤ ᠪᠠᠨ ᠰᠢᠨ᠎ᠡ ᠬᠤᠪᠴᠠᠰᠤ ᠰᠤᠯᠢᠵᠤ ᠡᠮᠦᠰᠭᠡᠬᠦ ᠪᠤᠶᠤ ᠪᠡᠶ᠎ᠡ ᠶᠢ ᠨᠢ ᠴᠠᠭᠠᠨ ᠪᠤᠰ ᠢᠶᠠᠷ ᠤᠷᠢᠶᠠᠭᠰᠠᠨ ᠤ ᠰᠡᠭᠦᠯᠡᠷ ᠠᠪᠰᠠᠯᠠᠬᠤ ᠳᠤ ᠪᠠᠨ ᠲᠠᠭᠠᠯᠠᠯ ᠪᠤᠯᠤᠭᠰᠠᠨ ᠬᠦᠮᠦᠨ ᠤ ᠠᠮᠢᠳᠤ ᠰᠡᠷᠢᠬᠦᠨ ᠪᠠᠶᠢᠬᠤ ᠦᠶ᠎ᠡ ᠳᠤ ᠪᠠᠨ ᠡᠳ᠋ᠯᠡᠵᠤ ᠬᠡᠷᠡᠭᠯᠡᠵᠤ ᠪᠠᠶᠢᠭᠰᠠᠨ ᠪᠠᠭ᠋ᠠᠷᠤᠯ ᠬᠠᠶᠢᠷᠠᠳᠠᠢ ᠬᠤᠪᠴᠠᠰᠤ ᠬᠤᠨᠠᠷ᠂ ᠮᠠᠯᠠᠭᠠᠢ᠂ ᠬᠦᠬᠦᠷ ᠂ ᠬᠡᠳᠡ ᠬᠢᠳᠤᠭ᠎ᠠ᠂ ᠠᠶᠠᠭ᠎ᠠ ᠮᠡᠳᠤ ᠡᠮᠦᠰᠭᠡᠯ ᠵᠡᠬᠦᠰᠭᠡᠯ᠂ ᠡᠳ᠋ᠯᠡᠬᠦᠨ ᠢ ᠬᠡᠪᠲᠡᠭᠡ ᠪᠠ ᠰᠠᠭᠤᠭ᠎ᠠ ᠠᠪᠰᠠᠨ ᠳᠤ ᠨᠢ ᠬᠠᠮᠳᠤ ᠠᠪᠰᠠᠯᠠᠭᠠᠳ ᠨᠦᠭᠡ ᠮᠠᠯᠳᠠᠵᠤ ᠰᠢᠷᠤᠢ  ᠪᠠᠷ ᠪᠤᠯᠠᠰᠢᠯᠠᠳᠠᠭ᠃ ᠵᠠᠷᠢᠮ ᠨᠢ ᠪᠠᠰᠠ ᠭᠠᠵᠠᠷ ᠤᠨ ᠬᠦᠷᠦᠰᠦᠨ ᠲᠡᠭᠡᠷ᠎ᠡ ᠢᠯᠡ ᠤᠷᠤᠰᠢᠭᠤᠯᠵᠤ᠂ ᠠᠭᠤᠯᠠ ᠬᠠᠳᠠ ᠲᠠᠢ ᠭᠠᠵᠠᠷ ᠪᠤᠯ ᠴᠢᠯᠠᠭᠤ ᠪᠠᠷ ᠤᠩᠭᠤᠨ ᠤᠪᠤᠭ᠎ᠠ ᠪᠤᠰᠬᠠᠳᠠᠭ ᠵᠠᠩᠰᠢᠯ ᠴᠦ ᠰᠡᠬᠦᠯ ᠤᠨ ᠦᠶ᠎ᠡ ᠦᠵᠡᠭᠳᠡᠵᠤ ᠪᠠᠶᠢᠭᠰᠠᠨ ᠶᠤᠮ᠃      ᠤᠷᠠᠳᠴᠤᠳ ᠤᠨ ᠲᠤᠮᠳᠠ ᠬᠡᠬᠦᠷ ᠤᠷᠤᠰᠢᠭᠤᠯᠭ᠎ᠠ ᠲᠠᠢ ᠬᠤᠯᠪᠤᠭᠳᠠᠭᠰᠠᠨ ᠮᠠᠰᠢ ᠤᠯᠠᠨ ᠪᠤᠷᠤᠭᠵᠢᠭᠤᠨ ᠪᠤᠯᠪᠠᠰᠤᠨ ᠦᠪᠡᠷᠮᠢᠴᠡ ᠤᠨᠴᠠᠯᠢᠭ ᠬᠠᠳᠠᠭᠠᠯᠠᠭᠳᠠᠭᠰᠠᠨ ᠵᠠᠩ ᠵᠠᠩᠰᠢᠯ᠂ ᠴᠡᠭᠡᠷ ᠶᠤᠰᠤ ᠨᠤᠭᠤᠳ ᠪᠠᠶᠢᠳᠠᠭ᠃      ᠬᠡᠳᠤ ᠶᠢ ᠲᠦᠬᠦᠮ ᠲᠤᠷᠠᠳᠪᠠᠯ᠄ ᠤᠷᠠᠳᠴᠤᠳ ᠲᠠᠭᠠᠯᠠᠯ ᠪᠤᠯᠤᠭᠠᠳ ᠤᠷᠤᠰᠢᠭᠤᠯᠤᠭᠰᠠᠨ ᠦᠬᠡᠢ ᠲᠠᠯᠪᠢᠵᠤ ᠪᠠᠶᠢᠭ᠎ᠠ ᠬᠦᠮᠦᠨ ᠤ ᠭᠡᠷ ᠤᠨ ᠡᠷᠤᠬᠡ ᠪᠠᠨ ᠡᠳᠦᠷ ᠢᠶᠠᠷ ᠪᠤᠯᠤᠭᠰᠠᠨ ᠴᠦ ᠬᠠᠭᠠᠰ ᠪᠦᠳᠡᠭᠡᠵᠤ ᠪᠠᠶᠢᠳᠠᠭ᠃ ᠲᠡᠷᠡ ᠨᠢ ᠡᠨᠡ ᠠᠶᠢᠯ ᠳᠤ ᠬᠦᠮᠦᠨ ᠲᠠᠭᠠᠯᠠᠯ ᠪᠤᠯᠤᠭᠠᠳ ᠪᠠᠶᠢᠨ᠎ᠠ ᠭᠡᠰᠡᠨ ᠲᠡᠮᠳᠡᠭ ᠲᠤᠬᠢᠶ᠎ᠠ ᠪᠤᠯᠵᠤ ᠂ ᠵᠠᠮ ᠤᠨ ᠬᠦᠮᠦᠨ ᠢᠷᠡᠪᠡᠯ ᠪᠤᠰᠤᠳ ᠬᠡᠷ ᠲᠤ ᠤᠷᠤᠬᠤ ᠪᠤᠶᠤ ᠭᠡᠷ ᠤᠨ ᠭᠠᠳᠠᠨ᠎ᠠ ᠠᠭᠤᠯᠵᠠᠵᠤ ᠶᠠᠷᠢᠯᠴᠠᠨ ᠠᠵᠢᠯ ᠶᠠᠪᠤᠳᠠᠯ ᠢᠶᠠᠨ ᠲᠦᠬᠦᠮ ᠶᠠᠷᠢᠯᠴᠠᠳᠠᠭ᠃ ᠲᠠᠭᠠᠯᠠᠯ ᠪᠤᠯᠤᠭᠰᠠᠨ ᠬᠦᠮᠦᠨ ᠤ ᠲᠦᠷᠦᠯ ᠰᠠᠳᠤᠨ᠂ ᠦᠷ᠎ᠡ ᠬᠡᠤᠬᠡᠳ᠂ ᠠᠨᠳᠠ ᠨᠠᠶᠢᠵᠠ ᠨᠢ ᠢᠷᠡᠵᠤ ᠡᠷᠬᠢᠨ ᠦᠵᠡᠪᠡᠰᠦ ᠤᠷᠢᠳ ᠢᠶᠠᠷ ᠦᠭᠡᠷ᠎ᠡ ᠭᠡᠷ ᠲᠤ ᠤᠷᠤᠵᠤ ᠴᠠᠢ ᠠᠮᠰᠠᠭᠰᠠᠨ ᠤ ᠲᠠᠷᠠᠭ᠎ᠠ ᠰᠠᠶ᠋ᠢ ᠬᠡᠷ ᠤᠨ ᠬᠦᠮᠦᠨ ᠤ ᠪᠠᠷ᠎ᠠ ᠪᠤᠯᠤᠯᠭ᠎ᠠ ᠲᠠᠢ ᠪᠠᠷ ᠲᠠᠭᠠᠯᠠᠯ ᠪᠤᠯᠤᠭᠰᠠᠨ ᠬᠦᠮᠦᠨ ᠤ ᠭᠡᠷ ᠲᠤ ᠤᠷᠤᠵᠤ ᠵᠤᠯᠠ ᠬᠦᠵᠢ ᠠᠰᠠᠭᠠᠨ ᠲᠠᠬᠢᠯᠭ᠎ᠠ ᠬᠠᠳᠠᠭ ᠢᠶᠠᠨ ᠲᠠᠯᠪᠢᠵᠤ ᠮᠦᠷᠬᠦᠵᠤ ᠶᠤᠰᠤᠯᠠᠨ ᠪᠠᠷᠠᠯᠠᠳᠠᠭ ᠵᠠᠩᠰᠢᠯ ᠲᠠᠢ ᠪᠠᠶᠢᠳᠠᠭ᠃      ᠲᠠᠭᠠᠯᠠᠯ ᠪᠤᠯᠤᠭᠰᠠᠨ ᠬᠦᠮᠦᠨ ᠢ ᠶᠠᠮᠠᠷ ᠨᠢᠭᠡᠨ ᠬᠡᠯᠪᠡᠷᠢ ᠪᠠᠷ ᠤᠷᠤᠰᠢᠭᠤᠯᠤᠭᠰᠠᠨ ᠴᠦ ᠭᠡᠷ ᠠᠴᠠ ᠭᠠᠷᠭᠠᠬᠤ ᠳᠤ ᠪᠠᠨ ᠡᠬᠦᠳᠡ ᠪᠠᠨ ᠰᠡᠬᠦᠵᠤ ᠭᠡᠷ ᠲᠡᠭᠡᠷ᠎ᠡ  ᠪᠠᠨ ᠲᠠᠯᠪᠢᠭᠠᠳ ᠬᠤᠶᠠᠷ ᠬᠠᠳᠠᠪᠴᠢᠨ ᠳᠤ ᠪᠠᠨ ᠴᠠᠭᠠᠨ ᠲᠡᠷᠡᠰᠤ ᠬᠦᠨᠳᠡᠯᠡᠨ ᠬᠠᠪᠴᠢᠭᠤᠯᠵᠤ᠂ ᠮᠤᠷᠳᠠᠬᠤ ᠬᠡᠵᠤ ᠪᠠᠶᠢᠭ᠎ᠠ ᠬᠦᠮᠦᠨ ᠢᠶᠠᠨ ᠬᠦᠯ ᠢᠶᠠᠷ ᠨᠢ ᠭᠠᠳᠠᠭᠰᠢ ᠭᠡᠷ ᠠᠴᠠ ᠭᠠᠷᠭᠠᠳᠠᠭ ᠵᠠᠩᠰᠢᠯ ᠲᠠᠢ᠃ ᠲᠡᠬᠦᠨ ᠢ   ᠢᠶᠠᠨ ᠲᠠᠭᠠᠯᠠᠯ ᠪᠤᠯᠤᠭᠰᠠᠨ ᠬᠦᠮᠦᠨ ᠢᠶᠠᠨ ᠬᠦᠯ ᠢᠶᠠᠷ ᠨᠢ ᠶᠠᠪᠤᠭᠤᠯᠤᠨ ᠮᠤᠷᠳᠠᠭᠤᠯᠵᠤ ᠪᠠᠶᠢᠨ᠎ᠠ ᠭᠡᠵᠤ ᠨᠡᠷᠡᠯᠡᠳᠡᠭ᠃ ᠨᠠᠰᠤᠲᠠᠶᠢᠴᠤᠳ ᠨᠠᠰᠤᠨ ᠬᠠᠷᠠᠭ᠎ᠠ ᠪᠠᠷ ᠲᠠᠭᠠᠯᠠᠯ ᠪᠤᠯᠤᠭᠰᠠᠳ ᠢ ᠤᠷᠤᠰᠢᠭᠤᠯᠬᠤ ᠪᠠᠷ ᠭᠡᠷ ᠠᠴᠠ ᠭᠠᠷᠭᠠᠬᠤ ᠳᠤ ᠪᠡᠷᠢ ᠪᠤᠯᠤᠭᠰᠠᠳ ᠲᠠᠬᠢᠯᠭ᠎ᠠ ᠶᠢᠨ ᠢᠳᠡᠭᠡᠨ ᠠᠴᠠ ᠪᠠᠨ ᠠᠪᠴᠤ ᠲᠠᠯᠠᠯᠭ᠎ᠠ ᠬᠤᠷᠤᠶᠢᠯᠠᠵᠤ ᠠᠪᠳᠠᠭ᠃ ᠲᠠᠯᠠᠯᠭ᠎ᠠ ᠠᠪᠴᠤ ᠪᠠᠶᠢᠭ᠎ᠠ ᠶᠢᠨ ᠦᠨᠳᠦᠰᠦᠨ ᠤᠳᠬ᠎ᠠ ᠠᠭᠤᠯᠭ᠎ᠠ ᠨᠢ ᠲᠡᠭᠡᠳᠦᠰ ᠶᠡᠬᠡᠰ ᠢᠶᠠᠨ ᠬᠦᠷᠦᠰᠦᠳᠦ ᠶᠢᠷᠲᠢᠨᠴᠤ ᠠᠴᠠ ᠰᠠᠯᠤᠭᠰᠠᠨ ᠤ ᠲᠠᠷᠠᠭ᠎ᠠ᠂ ᠦᠷ᠎ᠡ ᠬᠡᠤᠬᠡᠳ ᠪᠤᠯᠤᠭᠰᠠᠳ ᠴᠢᠨᠢ ᠠᠯᠳᠠᠷ ᠨᠡᠷ᠎ᠡ ᠶᠢ ᠨᠢ ᠭᠤᠳᠤᠭᠠᠬᠤ ᠦᠭᠡᠢ ᠰᠠᠶᠢᠨ ᠰᠠᠶᠢᠬᠠᠨ ᠠᠶᠢᠯ ᠡᠷᠦᠬᠡ ᠪᠤᠯᠵᠤ᠂ ᠦᠷ᠎ᠡ ᠬᠡᠤᠬᠡᠳ ᠢᠶᠠᠨ ᠬᠦᠮᠦᠵᠢᠬᠦᠯᠦᠨ ᠰᠤᠷᠭᠠᠵᠤ ᠶᠠᠪᠤᠨ᠎ᠠ ᠬᠡᠰᠡᠨ ᠪᠠ ᠰᠦᠨᠡᠰᠦ ᠨᠢ ᠲᠦᠷᠭᠡᠨ ᠬᠦᠮᠦᠨ ᠤ ᠲᠦᠷᠦᠯ ᠤᠯᠬᠤ ᠶᠢ ᠵᠦᠩᠨᠡᠭᠰᠡᠨ ᠪᠡᠯᠭᠡᠳᠡᠯ ᠤᠨ ᠵᠠᠩ ᠵᠠᠩᠰᠢᠯ ᠶᠤᠮ᠃      ᠤᠷᠠᠳᠴᠤᠳ ᠬᠦᠮᠦᠨ ᠤ ᠬᠦᠴᠦᠨ᠂ ᠡᠳ᠋ ᠪᠤᠳᠠᠰ᠂ ᠴᠠᠭ ᠢ ᠪᠦᠷᠢᠯᠭᠡᠬᠦ ᠦᠭᠡᠢ ᠪᠠᠷ ᠵᠦᠪᠬᠡᠨ ᠦᠷ᠎ᠡ ᠬᠡᠤᠬᠡᠳ᠂ ᠲᠦᠷᠦᠯ ᠰᠠᠳᠤᠨ ᠪᠤᠯᠤᠨ ᠠᠨᠳᠠ ᠨᠠᠶᠢᠵᠠ ᠨᠢ ᠰᠠᠶᠢᠨ ᠲᠤᠷ᠎ᠠ ᠠᠴᠠ ᠪᠠᠨ ᠢᠷᠡᠵᠤ ᠤᠷᠤᠯᠴᠠᠭᠠᠳ ᠪᠡᠯᠪᠡᠰᠦᠷᠡᠯ ᠭᠠᠰᠢᠭᠤᠳᠠᠯ ᠤᠨ ᠤᠷᠴᠢᠨ ᠠᠬᠤᠢ ᠳᠤ ᠦᠭᠡ ᠲᠠᠭᠤᠨ ᠴᠦᠭᠡᠨ᠂  ᠨᠠᠮᠤᠭᠤᠬᠠᠨ ᠪᠠᠶᠢᠳᠠᠯ ᠲᠤᠤᠷ᠎ᠠ ᠪᠤᠰᠢᠭᠤ ᠲᠦᠷᠭᠡᠨ ᠬᠦᠳᠡᠯᠦᠯᠴᠡᠨ ᠤᠷᠤᠰᠢᠭᠤᠯᠳᠠᠭ᠃      ᠠᠬᠠᠮᠠᠳ ᠨᠠᠰᠤᠲᠠᠶᠢᠴᠤᠳ ᠲᠠᠭᠠᠯᠠᠯ ᠪᠤᠯᠤᠭᠠᠳ ᠬᠠᠷ᠎ᠠ ᠪᠠᠷᠢᠵᠤ ᠪᠠᠶᠢᠬᠤ ᠬᠤᠭᠤᠴᠠᠭᠠᠨ ᠳᠤ ᠦᠭᠡ ᠵᠦᠷᠢᠯᠳᠦᠬᠦ ᠶᠢ ᠤᠨᠴᠠ ᠴᠡᠭᠡᠷᠯᠡᠵᠤ᠂ ᠬᠠᠷᠢᠯᠴᠠᠨ ᠨᠠᠶᠢᠷ ᠲᠠᠯᠪᠢᠵᠤ᠂ ᠬᠠᠷᠢᠯᠴᠠᠨ ᠬᠠᠪᠰᠤᠷᠤᠯᠴᠠᠵᠤ ᠡᠶᠡᠯᠰᠡᠭ ᠨᠠᠶᠢᠷᠠᠮᠳᠠᠭᠤ ᠪᠠᠶᠢᠬᠤ ᠪᠠᠨ ᠴᠢᠩᠭ᠎ᠠ ᠪᠠᠷᠢᠮᠳᠠᠯᠠᠵᠤ᠂ ᠭᠠᠰᠢᠭᠤᠳᠠᠯ ᠪᠡᠯᠪᠡᠰᠦᠷᠡᠯ ᠤᠨ ᠡᠳᠦᠷ ᠬᠤᠭᠤᠴᠠᠭ᠎ᠠ ᠪᠠᠨ ᠦᠩᠭᠡᠷᠡᠬᠦᠯᠳᠡᠭ ᠶᠤᠮ᠃      ᠲᠠᠭᠠᠯᠠᠯ ᠪᠤᠯᠤᠭᠰᠠᠨ ᠬᠦᠮᠦᠨ ᠢᠶᠠᠨ ᠭᠤᠷᠪᠠᠨ ᠲᠤᠯᠤᠭ᠎ᠠ ᠬᠤᠷᠢᠨ ᠨᠢᠭᠡᠨ ᠡᠳᠤᠷ᠂ ᠲᠤᠯᠤᠭᠠᠨ ᠲᠤᠯᠤᠭ᠎ᠠ ᠲᠦᠴᠢ ᠶᠢᠰᠦᠨ ᠡᠳᠦᠷ ᠲᠤ ᠨᠢ ᠲᠤᠰ ᠲᠤᠰ ᠬᠡᠩᠰᠢᠬᠦᠦ ᠰᠢᠲᠠᠭᠠᠵᠤ ᠲᠠᠭᠠᠯᠠᠯ ᠪᠤᠯᠤᠭᠰᠠᠨ ᠬᠦᠮᠦᠨ ᠤ ᠬᠤᠶᠢᠨ᠎ᠠ ᠠᠴᠠ ᠮᠦᠷᠦᠭᠡᠳᠴᠤ ᠪᠠᠶᠢᠭ᠎ᠠ ᠰᠡᠳᠬᠢᠯᠭᠡ ᠪᠠᠨ ᠪᠤᠷᠤᠭᠵᠢᠭᠤᠨ ᠢᠯᠡᠳᠭᠡᠵᠤ᠂ ᠠᠬᠠᠮᠠᠳ ᠨᠠᠰᠤᠲᠠᠶᠢᠴᠤᠳ ᠢᠶᠠᠨ ᠬᠦᠨᠳᠤᠳᠭᠡᠵᠤ ᠦᠷ᠎ᠡ ᠠᠴᠢᠨᠠᠷ᠂ ᠬᠤᠶᠢᠴᠢ ᠦᠶ᠎ᠡ ᠶᠢᠨ ᠬᠢᠨ ᠳᠤ ᠪᠠᠨ ᠬᠦᠮᠦᠨ ᠪᠤᠯᠬᠤ ᠵᠢᠮ᠎ᠡ ᠶᠤᠰᠤ ᠵᠢᠭᠠᠨ ᠰᠤᠷᠭᠠᠵᠤ ᠬᠦᠮᠦᠵᠢᠬᠦᠯᠦᠨ ᠡᠵᠡᠮᠰᠢᠬᠦᠯᠳᠡᠭ ᠵᠠᠩᠰᠢᠯ ᠲᠠᠢ ᠪᠠᠶᠢᠳᠠᠭ᠃      ᠲᠠᠭᠠᠯᠠᠯ ᠪᠤᠯᠤᠭᠰᠠᠨ ᠬᠦᠮᠦᠨ ᠤ ᠬᠤᠶᠢᠨ᠎ᠠ ᠠᠴᠠ ᠦᠷ᠎ᠡ ᠠᠴᠢᠨᠠᠷ ᠪᠤᠯᠤᠭᠰᠠᠳ ᠬᠤᠷᠢᠨ ᠨᠢᠭᠡᠨ ᠡᠳᠦᠷ᠂ ᠲᠦᠴᠢ ᠶᠢᠰᠦᠨ ᠡᠳᠦᠷ᠂ ᠵᠠᠭᠤᠨ ᠡᠳᠤᠷ ᠤᠨ ᠪᠡᠯᠪᠡᠰᠦᠷᠡᠯ ᠬᠢᠵᠤ ︽ᠬᠠᠷ᠎ᠠ ᠪᠠᠷᠢᠳᠠᠭ︾᠃ ᠬᠠᠷ᠎ᠠ ᠪᠠᠷᠢᠬᠤ ᠠᠷᠭ᠎ᠠ ᠬᠡᠯᠪᠡᠷᠢ ᠨᠢ ᠪᠤᠰᠤᠳ ᠲᠠᠢ ᠠᠮᠤᠷ ᠮᠡᠨᠳᠤ ᠰᠤᠯᠢᠯᠴᠠᠳᠠᠭ ᠦᠬᠡᠢ᠂ ᠬᠤᠷᠢᠮ ᠨᠠᠶᠢᠷ ᠲᠤ ᠤᠷᠤᠯᠴᠠᠳᠠᠭ ᠦᠬᠡᠢ᠂ ᠲᠠᠭᠤᠤ ᠲᠠᠭᠤᠯᠠᠵᠤ ᠨᠠᠭᠠᠳᠤᠨ ᠴᠡᠩᠭᠡᠯᠳᠦᠬᠦ ᠳᠤ ᠤᠷᠤᠯᠴᠠᠳᠠᠭ ᠦᠭᠡᠢ᠂ ᠬᠡᠶᠢᠴᠢᠨ ᠵᠤᠴᠢᠳ ᠢᠷᠡᠭᠰᠡᠨ ᠴᠦ ᠬᠦᠭᠡᠷᠦᠯᠳᠤᠨ ᠨᠡᠷᠬᠢᠯᠳᠤᠳᠠᠭ ᠦᠬᠡᠢ᠂ ᠪᠤᠰᠤᠳ ᠲᠤ ᠮᠠᠯ ᠤᠨᠤᠭ᠎ᠠ᠂ ᠮᠦᠩᠭᠦ ᠵᠤᠭᠤᠰ᠂ ᠡᠳ᠋ ᠡᠳ᠋ᠯᠡᠬᠦᠨ ᠵᠢᠭᠡᠯᠡᠬᠦᠯᠵᠤ ᠦᠭᠳᠡᠭ ᠦᠭᠡᠢ᠂ ᠠᠷᠢᠬᠢ ᠲᠠᠷᠠᠰᠤ ᠤᠤᠭᠤᠳᠠᠭ ᠦᠭᠡᠢ᠂ ᠦᠰᠦ ᠬᠡᠵᠢᠭᠡ ᠪᠠᠨ ᠵᠠᠰᠠᠭᠤᠯᠳᠠᠭ ᠦᠬᠡᠢ᠂ ᠡᠮᠡᠭᠳᠠᠶᠢᠴᠤᠳ ᠬᠡᠤᠬᠡᠨᠴᠤᠳ ᠲᠤᠯᠤᠭᠠᠢ ᠶᠢᠨ ᠵᠠᠰᠠᠯ ᠵᠠᠬᠦᠰᠭᠡᠯ ᠢᠶᠠᠨ ᠵᠡᠬᠦᠳᠡᠭ ᠦᠬᠡᠢ᠂ ᠡᠷᠡᠭᠲᠠᠶᠢᠴᠤᠳ ᠮᠠᠯᠠᠭᠠᠢ ᠵᠢᠩᠰᠡ  ᠪᠠᠨ ᠵᠡᠬᠦᠳᠡᠭ ᠦᠬᠡᠢ ᠪᠠᠶᠢᠵᠤ᠂ ᠬᠠᠷ᠎ᠠ ᠲᠠᠶᠢᠯᠤᠭᠰᠠᠨ ᠡᠳᠦᠷ ᠠᠴᠠ ᠬᠤᠶᠢᠰᠢ ᠰᠠᠶ᠋ᠢ ᠮᠠᠯᠠᠭᠠᠢ ᠵᠢᠩᠰᠡ᠂ ᠵᠠᠰᠠᠯ ᠵᠡᠬᠦᠰᠬᠡᠯ ᠢᠶᠠᠨ ᠵᠡᠬᠦᠵᠤ ᠪᠤᠰᠤᠳ ᠬᠦᠮᠦᠨ ᠲᠠᠢ ᠠᠮᠤᠷ ᠮᠠᠨᠳᠤ ᠰᠤᠯᠢᠯᠴᠠᠬᠤ ᠮᠡᠳᠦ ᠪᠠᠷ ᠠᠯᠢᠪᠠ ᠴᠡᠭᠡᠷ ᠬᠤᠷᠢᠭ᠎ᠠ ᠪᠠᠨ ᠲᠠᠶᠢᠯᠳᠠᠭ ᠪᠤᠯᠪᠠᠰᠤᠨ ᠰᠠᠶᠢᠬᠠᠨ ᠵᠠᠩ ᠲᠠᠳᠬᠠᠯ ᠲᠠᠢ ᠪᠠᠶᠢᠳᠠᠭ ᠶᠤᠮ᠃ ᠲᠠᠭᠠᠯᠠᠯ ᠪᠤᠯᠤᠭᠰᠠᠨ ᠬᠦᠮᠦᠨ ᠤ ᠦᠷ᠎ᠡ ᠠᠴᠢᠨᠠᠷ ᠪᠦᠬᠦᠯᠢ ᠵᠢᠯ ᠤᠨ ᠲᠤᠳᠤᠷ᠎ᠠ ᠤᠷᠤᠭ ᠬᠤᠷᠢᠮ ᠬᠢᠬᠦ ᠦᠭᠡᠢ ᠪᠠᠷ ᠪᠡᠯᠪᠡᠰᠦᠷᠡᠯ ᠭᠠᠰᠢᠭᠤᠳᠠᠯ ᠤᠨ ᠴᠠᠭ ᠬᠤᠭᠤᠴᠠᠭ᠎ᠠ ᠪᠠᠨ ᠦᠩᠭᠡᠷᠡᠭᠡᠨ ᠬᠦᠢᠴᠡᠳᠭᠡᠵᠤ᠂ ᠠᠬᠠᠮᠠᠳ ᠲᠤᠮᠤᠭᠠᠳᠠᠳ ᠢᠶᠠᠨ ᠬᠦᠨᠳᠤᠳᠭᠡᠨ ᠠᠴᠢᠯᠠᠯ ᠶᠤᠰᠤ ᠵᠢᠷᠤᠮ ᠢ ᠬᠦᠢᠴᠡᠳᠭᠡᠳᠡᠭ ᠡᠷᠬᠢᠮ ᠨᠠᠨᠳᠢᠨ ᠰᠤᠷᠲᠠᠯ ᠢ ᠪᠠᠷᠢᠮᠳᠠᠯᠠᠵᠤ ᠪᠠᠶᠢᠭᠰᠠᠨ ᠶᠤᠮ᠃      ᠤᠷᠠᠳᠴᠤᠳ ᠲᠠᠭᠠᠯᠠᠯ ᠪᠤᠯᠤᠭᠰᠠᠨ ᠠᠬᠠᠮᠠᠳ ᠲᠤ ᠪᠠᠨ ᠵᠢᠯ ᠪᠦᠷᠢ ᠶᠢᠨ ᠨᠡᠭᠡᠭᠡᠭᠰᠡᠨ ᠬᠠᠩᠰᠢ ᠶᠢᠨ ᠡᠳᠦᠷ ᠪᠤᠯᠤᠨ ᠬᠦᠭᠡᠭᠡ ᠰᠠᠷ᠎ᠠ ᠶᠢᠨ ᠭᠤᠴᠢᠨ ᠳᠤ ᠵᠤᠯᠠ ᠬᠦᠵᠢ ᠠᠰᠠᠭᠠᠵᠤ᠂ ᠬᠡᠩᠰᠢᠬᠦᠦ ᠰᠢᠲᠠᠭᠠᠳᠠᠭ ᠵᠤᠷᠰᠢᠯ ᠲᠠᠢ᠃ ᠲᠡᠷᠡ ᠨᠢ ᠠᠬᠠᠮᠠᠳ ᠲᠤ ᠪᠠᠨ ᠠᠴᠢᠯᠠᠯ ᠬᠦᠢᠴᠡᠳᠭᠡᠬᠦ ᠠᠷᠭ᠎ᠠ ᠬᠡᠯᠪᠡᠷᠢ ᠪᠠᠷ ᠬᠤᠶᠢᠴᠢ ᠦᠶ᠎ᠡ  ᠪᠠᠨ ᠰᠤᠷᠭᠠᠵᠤ ᠪᠠᠶᠢᠭ᠎ᠠ ᠵᠠᠩ ᠠᠷᠠᠨᠰᠢᠨ ᠶᠤᠮ᠃      ᠰᠢᠯᠢᠳᠡᠭ ᠵᠠᠩ ᠰᠤᠷᠲᠠᠯ ᠢᠶᠠᠨ ᠦᠷᠬᠦᠯᠵᠢᠲᠡ ᠵᠠᠯᠭᠠᠮᠵᠢᠯᠠᠨ ᠪᠠᠳᠠᠷᠠᠭᠤᠯᠵᠤ᠂ ᠮᠤᠩᠭᠤᠯ ᠦᠨᠳᠦᠰᠦᠲᠡᠨ ᠤ ᠪᠤᠷᠤᠭᠵᠢᠭᠤᠨ ᠪᠤᠯᠪᠠᠰᠤᠨ᠂ ᠡᠷᠬᠢᠮ ᠨᠠᠨᠳᠢᠨ ᠤᠪᠤᠷ ᠰᠤᠷᠲᠠᠯ ᠢᠶᠠᠷ ᠢᠶᠠᠨ ᠪᠤᠰᠤᠳ ᠦᠨᠳᠦᠰᠦᠲᠡᠨ ᠵᠢᠴᠢ ᠲᠡᠯᠡᠬᠡᠢ ᠨᠡᠶᠢᠲᠡ ᠶᠢ ᠨᠦᠯᠦᠭᠡᠯᠡᠵᠤ᠂ ᠦᠪᠡᠷ ᠤᠨ ᠲᠠᠪᠠᠭᠤᠯᠢᠭ ᠢᠶᠠᠨ ᠬᠦᠴᠦ ᠲᠠᠯᠪᠢᠨ ᠤᠬᠠᠭᠤᠯᠵᠤ ᠪᠠᠶᠠᠨ ᠴᠢᠨᠡᠭᠡᠯᠢᠭ ᠪᠤᠯᠪᠠᠰᠤᠨ ᠡᠶ᠎ᠡ ᠨᠠᠶᠢᠷᠠᠮᠳᠠᠭᠤ ᠨᠡᠶᠢᠭᠡᠮ ᠢ ᠴᠤᠭᠴᠠᠯᠠᠨ ᠪᠠᠶᠢᠭᠤᠯᠬᠤ ᠪᠠᠷ ᠬᠦᠴᠦᠯᠡᠨ ᠴᠢᠷᠮᠠᠶᠢᠵᠤ᠂ ᠤᠯᠤᠰ ᠦᠨᠳᠦᠰᠦᠲᠡᠨ ᠳᠤ ᠪᠠᠨ ᠬᠤᠪᠢ ᠨᠡᠮᠡᠷᠢ ᠡᠷᠬᠦᠬᠦ ᠪᠠᠷ ᠠᠭᠲᠠ ᠶᠢᠨ ᠵᠢᠯᠤᠭᠤ ᠪᠠᠨ ᠰᠤᠯᠠᠷᠠᠭᠤᠯᠤᠰᠢ ᠦᠬᠡᠢ ᠰᠤᠩᠭᠠᠵᠠᠭᠠᠶ᠎ᠠ︕ᠵᠤᠷᠢᠭᠪᠠᠭᠠᠳᠤᠷ ᠤᠨ ᠨᠠᠶᠢᠷᠠᠭᠤᠯᠤᠨ ᠵᠤᠬᠢᠶᠠᠭᠰᠠᠨ ︽ ᠤᠷᠠᠨ ᠲᠠᠷᠬᠠᠨ ᠤᠷᠠᠳ ᠤᠨ ᠵᠠᠩ ᠦᠢᠯᠡ︾ ᠬᠡᠭᠦ ᠨᠤᠮ ᠠᠴᠠ ᠪᠠᠭᠤᠯᠭᠠᠪᠠ
ᠢᠷᠡᠯᠲᠡ᠄ ᠤᠷᠠᠳ ᠤᠨ ᠲᠤᠮᠳᠠᠳᠤ ᠬᠤᠰᠢᠭᠤᠨ ᠤ ᠵᠠᠰᠠᠭ ᠤᠨ ᠤᠷᠳᠤᠨ ᠤ ᠮᠤᠩᠭᠤᠯ ᠰᠦᠯᠵᠢᠶ᠎ᠡ