ᠤᠷᠠᠳ ᠴᠠᠭᠠᠨ ᠢᠳᠡᠭᠡᠨ ᠤ ᠨᠡᠷᠡᠶᠢᠳᠤᠯ ᠪᠠ ᠪᠤᠯᠪᠠᠰᠤᠷᠠᠭᠤᠯᠬᠤ ᠠᠷᠭ᠎ᠠ ᠮᠡᠷᠭᠡᠰᠢᠯ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2019/6/21
   
           ᠤᠷᠠᠳ ᠮᠤᠩᠭᠤᠯᠴᠤᠳ ᠲᠡᠤᠬᠡᠨ ᠠᠴᠠ ᠪᠠᠨ ᠨᠡᠬᠦᠳᠡᠯ ᠮᠠᠶ᠋ᠢᠭ ᠤᠨ ᠴᠤᠯ ᠮᠠᠯᠵᠢᠬᠤ ᠦᠢᠯᠡᠳᠪᠦᠷᠢᠯᠡᠯ ᠡᠷᠬᠢᠯᠡᠵᠤ ᠡᠪᠡᠰᠦᠨ ᠤ ᠰᠤᠷᠭᠤᠭ᠂ ᠤᠰᠤᠨ ᠤ ᠲᠤᠩᠭᠠᠯᠠᠭ ᠢ ᠲᠠᠭᠠᠵᠤ ᠠᠵᠤ ᠲᠦᠷᠦᠨ ᠠᠮᠢᠳᠤᠷᠠᠵᠤ ᠢᠷᠡᠭᠰᠡᠨ ᠪᠤᠯᠬᠤᠷ ᠮᠠᠯ ᠤᠨ ᠰᠦ ᠪᠠᠨ ᠠᠰᠢᠭᠯᠠᠵᠤ ᠴᠠᠭᠠᠨ ᠢᠳᠡᠭᠡᠨ ᠪᠤᠯᠭᠠᠬᠤ ᠲᠠᠯ᠎ᠠ ᠪᠠᠷ ᠦᠪᠡᠷᠮᠢᠴᠡ ᠠᠷᠭ᠎ᠠ ᠲᠤᠷᠰᠢᠯᠭ᠎ᠠ ᠪᠠ ᠠᠪᠢᠶᠠᠰ ᠲᠠᠢ ᠪᠠᠶᠢᠳᠠᠭ᠃ ᠲᠡᠶᠢᠮᠦ ᠠᠴᠠ ᠲᠠᠲᠡᠨ ᠤ ᠴᠠᠭᠠᠨ ᠢᠳᠡᠭᠡᠨ ᠤ ᠨᠡᠷᠡᠶᠢᠳᠤᠯ ᠵᠢᠴᠢ ᠴᠠᠭᠠᠨ ᠢᠳᠡᠭᠡᠨ ᠢ ᠡᠳ᠋ᠰᠢᠬᠦᠯᠦᠨ ᠪᠤᠯᠪᠠᠰᠤᠷᠠᠭᠤᠯᠬᠤ ᠨᠢ ᠴᠤ ᠦᠪᠡᠷᠮᠢᠴᠡ ᠤᠨᠴᠠᠯᠢᠭ ᠲᠠᠢ ᠪᠢᠯᠡ᠃     ᠤᠷᠠᠳᠴᠤᠳ ᠠᠷᠠᠴᠢᠯᠠᠵᠤ ᠮᠠᠯᠵᠢᠭᠰᠠᠨ ᠲᠠᠪᠤᠨ ᠬᠤᠰᠢᠭᠤ ᠮᠠᠯ ᠢᠶᠠᠨ ᠪᠦᠬᠦᠨ ᠢ ᠰᠠᠭᠠᠵᠤ ᠴᠠᠭᠠᠨ ᠢᠳᠡᠭᠡᠨ ᠪᠤᠯᠪᠠᠰᠤᠷᠠᠭᠤᠯᠳᠠᠭ᠃ ᠭᠡᠪᠡᠴᠤ ᠬᠡᠬᠦᠦ ᠪᠠᠨ ᠰᠠᠭᠠᠵᠤ ᠵᠦᠪᠬᠡᠨ ᠴᠡᠭᠡ ᠨᠡᠷᠡᠬᠦ ᠠᠴᠠ ᠪᠢᠰᠢ ᠪᠤᠰᠤᠳ ᠢᠳᠡᠭᠡᠨ ᠪᠤᠯᠪᠠᠰᠤᠷᠠᠭᠤᠯᠳᠠᠭ ᠦᠬᠡᠢ᠃ ᠬᠠᠷᠢᠨ ᠦᠨᠢᠶ᠎ᠡ ᠢᠩᠭᠡ ᠬᠤᠨᠢ ᠢᠮᠠᠭ᠎ᠠ ᠪᠠᠨ ᠰᠠᠭᠠᠵᠤ ᠤᠯᠠᠨ ᠵᠦᠢᠯ ᠤᠨ ᠨᠡᠷᠡᠶᠢᠳᠦᠯ ᠲᠠᠢ ᠴᠠᠭᠠᠨ ᠢᠳᠡᠭᠡᠨ ᠪᠤᠯᠪᠠᠰᠤᠷᠠᠭᠤᠯᠵᠤ᠂ ᠢᠳᠡᠭᠡᠨ ᠪᠠ ᠤᠮᠳᠠᠭᠠᠨ ᠡᠳ᠋ᠰᠢᠬᠦᠯᠦᠨ ᠪᠤᠯᠪᠠᠰᠤᠷᠠᠭᠤᠯᠳᠠᠭ ᠵᠠᠩ ᠠᠷᠠᠨᠰᠢᠨ ᠠᠷᠭ᠎ᠠ ᠲᠡᠮ ᠲᠠᠢ ᠪᠠᠶᠢᠳᠠᠭ ᠶᠤᠮ᠃    
           ᠴᠠᠭᠠᠨ ᠢᠳᠡᠭᠡᠨ ᠤ ᠨᠡᠷᠡᠶᠢᠳᠦᠯ ᠲᠦᠷᠦᠯ ᠵᠦᠢᠯ ᠠᠴᠠ ᠲᠦᠬᠦᠮ ᠲᠤᠷᠠᠳᠪᠠᠯ᠄ᠰᠠᠭᠠᠮᠠᠯ ᠰᠦ — — — ᠰᠠᠶ᠋ᠢᠬᠠᠨ ᠰᠠᠭᠠᠵᠤ ᠭᠠᠷᠭᠠᠭᠰᠠᠨ ᠲᠦᠬᠦᠬᠡᠢ ᠰᠦ ᠪᠠᠨ ︽ᠰᠠᠭᠠᠮᠠᠯ ᠰᠦ︾ ᠭᠡᠳᠡᠭ᠃ ᠰᠠᠭᠠᠮᠠᠯ ᠭᠡᠰᠡᠨ ᠨᠢ ᠰᠠᠶ᠋ᠢᠬᠠᠨ ᠰᠠᠭᠠᠵᠤ ᠭᠠᠷᠭᠠᠭᠰᠠᠨ ᠰᠦ ᠭᠡᠳᠡᠭ ᠤᠳᠬ᠎ᠠ ᠲᠠᠢ ᠨᠡᠷ᠎ᠡ ᠦᠬᠡ ᠶᠤᠮ᠃ ᠰᠠᠭᠠᠮᠠᠯ ᠰᠦ ᠪᠠᠨ ᠤᠤᠭᠤᠬᠤ᠂ ᠬᠡᠤᠬᠡᠳ ᠲᠡᠵᠢᠬᠡᠬᠦ᠂ ᠴᠠᠢ ᠰᠦᠯᠡᠬᠦ ᠪᠠ ᠲᠠᠬᠢᠨ ᠪᠤᠯᠪᠠᠰᠤᠷᠠᠭᠤᠯᠳᠠᠭ᠃ᠦᠷᠦᠮ᠎ᠡ — — — ᠨᠡᠶᠢᠳᠡ ᠲᠦᠷᠪᠡᠨ ᠵᠦᠢᠯ ᠪᠠᠶᠢᠳᠠᠭ᠃ ᠡᠬᠦᠨ ᠳᠤ ᠬᠠᠮᠤᠭᠰᠠᠨ ᠦᠷᠦᠮ᠎ᠡ᠂ ᠪᠤᠯᠭᠤᠭᠰᠠᠨ ᠦᠷᠦᠮ᠎ᠡ᠂ ᠪᠦᠯᠢᠭᠰᠡᠨ ᠦᠷᠦᠮ᠎ᠡ᠂ ᠬᠠᠳᠠᠭᠠᠭᠰᠠᠨ ᠦᠷᠦᠮ᠎ᠡ ᠬᠡᠵᠤ ᠲᠤᠰ ᠲᠤᠰ ᠢᠯᠭᠠᠨ ᠰᠠᠯᠭᠠᠵᠤ ᠨᠡᠷᠡᠯᠡᠳᠡᠭ᠃      1᠂ ᠰᠠᠭᠠᠭᠰᠠᠨ ᠰᠠᠭᠠᠮᠠᠯ ᠰᠦ ᠪᠠᠨ ᠰᠠᠪᠠᠨ ᠳᠤ ᠲᠠᠯᠪᠢᠭᠠᠳ ᠡᠭᠡᠳᠡᠬᠦᠯᠵᠤ ᠲᠡᠭᠡᠷᠡᠬᠢ ᠦᠷᠦᠮ᠎ᠡ ᠶᠢ ᠨᠢ ᠬᠠᠮᠤᠵᠤ ᠠᠪᠤᠭᠰᠠᠨ ᠢᠶᠠᠨ ︽ᠬᠠᠮᠤᠭᠰᠠᠨ ᠦᠷᠦᠮ᠎ᠡ  ᠬᠡᠬᠦ ᠪᠤᠶᠤ ᠲᠦᠭᠦᠬᠡᠢ ᠦᠷᠦᠮ᠎ᠡ︾ ᠬᠡᠳᠡᠭ᠃      2᠂ ᠰᠠᠭᠠᠭᠰᠠᠨ ᠰᠠᠭᠠᠮᠠᠯ ᠰᠦ ᠪᠠᠨ ᠲᠡᠷᠡ ᠲᠤᠤᠷ᠎ᠠ ᠨᠢ ᠲᠤᠭᠤᠭᠠᠨ ᠳᠤ ᠬᠢᠵᠤ ᠬᠦᠭᠡᠷᠦᠬᠦᠯᠵᠤ ᠪᠤᠴᠠᠯᠭᠠᠨ ᠲᠡᠷᠡ ᠲᠤᠤᠷ᠎ᠠ ᠨᠢ ᠲᠠᠬᠢᠨ ᠭᠠᠷᠭᠠᠵᠤ ᠠᠪᠤᠭᠠᠳ ᠰᠠᠪᠠᠨ ᠳᠤ ᠲᠡᠪᠰᠢᠯᠡᠵᠤ ᠲᠠᠯᠪᠢᠨ ᠡᠭᠡᠳᠡᠬᠦᠯᠵᠤ ᠲᠡᠭᠡᠷᠡᠬᠢ ᠦᠷᠦᠮ᠎ᠡ ᠶᠢ ᠨᠢ ᠬᠠᠮᠤᠵᠤ ᠠᠪᠤᠭᠰᠠᠨ ᠢᠶᠠᠨ ︽ᠪᠤᠯᠭᠤᠭᠰᠠᠨ ᠦᠷᠦᠮ᠎ᠡ︾ ᠭᠡᠳᠡᠭ᠃      3᠂ ᠰᠠᠭᠠᠭᠰᠠᠨ ᠰᠠᠭᠠᠮᠠᠯ ᠰᠦ ᠪᠠᠨ ᠲᠡᠷᠡ ᠲᠠᠷᠤᠢ ᠳᠤ ᠨᠢ ᠲᠤᠭᠤᠭᠠᠨ ᠳᠤ ᠬᠢᠵᠤ ᠠᠷᠭᠠᠯ ᠲᠦᠯᠡᠬᠡᠨ ᠭᠠᠯ ᠢᠶᠠᠷ ᠵᠦᠭᠡᠯᠡᠨ ᠬᠦᠬᠡᠷᠦᠬᠦᠯᠵᠤ ᠤᠬᠤᠷ ︵ᠵᠢᠭᠠᠬᠠᠨ︶ ᠰᠢᠨᠠᠭ᠎ᠠ ᠪᠠᠷ ᠤᠯᠠᠨ ᠤᠳᠠᠭ᠎ᠠ ᠰᠠᠮᠤᠷᠤᠭᠠᠳ ᠲᠡᠭᠡᠷ᠎ᠡ ᠨᠢ ᠤᠪᠤᠶᠢᠲᠠᠯ᠎ᠠ ᠬᠦᠭᠡᠰᠦ ᠭᠠᠷᠭᠠᠭᠰᠠᠨ ᠤ ᠲᠠᠷᠠᠭ᠎ᠠ ᠭᠠᠯ ᠤᠨ ᠬᠦᠴᠦᠨ ᠢᠶᠠᠨ ᠪᠠᠭᠠᠰᠬᠠᠨ ᠲᠠᠷᠤᠭᠠᠳ ᠬᠦᠷᠦᠭᠡᠭᠰᠡᠨ ᠤ ᠲᠠᠷᠠᠭ᠎ᠠ ᠲᠡᠭᠡᠷ᠎ᠡ ᠨᠢ ᠬᠠᠳᠠᠭᠤᠷᠠᠨ ᠴᠠᠷᠴᠠᠭᠰᠠᠨ ᠦᠷᠦᠮ᠎ᠡ ᠪᠠᠨ ᠲᠤᠰᠬᠠᠢ ᠵᠤᠬᠢᠶᠠᠭᠰᠠᠨ ᠰᠠᠪᠬ᠎ᠠ ᠮᠤᠳᠤ ᠪᠠᠷ ᠭᠤᠤᠯ ᠢᠶᠠᠷ ᠨᠢ ᠤᠷᠤᠭᠤᠯᠵᠤ ᠡᠯᠬᠦᠨ ᠲᠠᠪᠬᠤᠷᠯᠠᠵᠤ ᠠᠪᠤᠭᠠᠳ ᠰᠠᠯᠬᠢᠨ ᠨᠠᠷᠠᠨ ᠳᠤ ᠠᠷᠢᠭᠤᠨ ᠴᠡᠪᠡᠷ ᠭᠠᠵᠠᠷ ᠠᠭᠤᠷᠰᠢᠭᠤᠯᠤᠨ ᠬᠠᠳᠠᠭᠠᠵᠤ ᠲᠠᠯ᠎ᠠ ᠲᠤᠭᠤᠷᠢᠭ ᠬᠡᠯᠪᠡᠷᠢ ᠲᠠᠢ ᠪᠤᠯᠭᠠᠨ ᠬᠠᠳᠠᠭᠠᠭᠰᠠᠨ ᠢᠶᠠᠨ ︽ᠬᠠᠳᠠᠭᠠᠭᠰᠠᠨ ᠦᠷᠦᠮ᠎ᠡ︾ ᠭᠡᠳᠡᠭ᠃ ᠬᠠᠳᠠᠭᠠᠭᠰᠠᠨ ᠦᠷᠦᠮ᠎ᠡ ᠠᠪᠤᠭᠰᠠᠨ ᠰᠦ ᠪᠠᠨ ︽ᠬᠦᠭᠡᠷᠦᠬᠦᠯᠦᠭᠰᠡᠨ ᠰᠦ︾ ᠬᠡᠵᠤ ᠨᠡᠷᠡᠯᠡᠭᠡᠳ᠂ ᠤᠤᠭᠤᠬᠤ᠂ ᠬᠡᠤᠬᠡᠳ ᠲᠡᠵᠢᠬᠡᠬᠦ᠂ ᠴᠠᠢ ᠰᠦᠯᠡᠬᠦ  ᠂ ᠡᠭᠡᠳᠡᠭᠰᠡᠨ ᠰᠦ ᠲᠠᠢ ᠪᠠᠨ ᠬᠠᠮᠳᠤᠷᠠᠭᠤᠯᠵᠤ ᠸᠠᠭᠠᠷ ᠰᠠᠪᠠᠨ ᠳᠤ ᠰᠠᠪᠠᠯᠠᠵᠤ ᠠᠶᠢᠷᠠᠭ ᠪᠤᠯᠭᠠᠨ ᠲᠠᠬᠢᠨ ᠪᠤᠴᠠᠯᠭᠠᠵᠤ ᠰᠢᠷᠠᠰᠤ ᠶᠢ ᠰᠢᠬᠠᠨ ᠭᠠᠷᠭᠠᠭᠠᠳ ᠠᠭᠠᠷᠤᠤᠯ ᠬᠤᠷᠤᠳ ᠪᠠᠵᠠᠵᠤ ᠬᠡᠪᠯᠡᠳᠡᠭ ᠵᠠᠩᠰᠢᠯ ᠲᠠᠢ᠃      4᠂ ᠰᠠᠭᠠᠭᠰᠠᠨ ᠰᠠᠭᠠᠮᠠᠯ ᠰᠦ ᠪᠠᠨ ᠪᠠᠭ᠎ᠠ ᠰᠢᠭ᠋ ᠠᠮᠠᠰᠠᠷ ᠲᠠᠢ ᠪᠦᠭᠡᠷᠡᠩᠬᠡᠢ ᠬᠡᠯᠪᠡᠷᠢ ᠲᠠᠢ ᠸᠠᠭᠠᠷ ᠲᠤ ᠰᠠᠪᠠᠯᠠᠵᠤ ᠲᠠᠯᠪᠢᠭᠠᠳ ᠦᠷᠦᠮ᠎ᠡ ᠲᠠᠢ ᠨᠢ ᠡᠭᠡᠳᠡᠬᠦᠯᠦᠭᠰᠡᠨ ᠤ ᠰᠡᠭᠦᠯᠡᠷ ᠪᠦᠯᠢᠵᠤ ᠦᠷᠦᠮ᠎ᠡ ᠰᠦ ᠶᠢ ᠨᠢ ᠢᠯᠭᠠᠵᠤ ᠬᠠᠮᠤᠵᠤ ᠠᠪᠤᠭᠰᠠᠨ ᠢᠶᠠᠨ ︽ᠪᠦᠯᠢᠭᠰᠡᠨ ᠦᠷᠦᠮ᠎ᠡ︾ ᠬᠡᠳᠡᠭ᠃ᠰᠢᠷ᠎ᠠ ᠲᠤᠰᠤ — — — ᠤᠷᠠᠳᠴᠤᠳ ᠬᠠᠮᠤᠭᠰᠠᠨ ︵ᠲᠦᠬᠦᠬᠡᠢ︶ ᠪᠠ ᠪᠦᠯᠢᠭᠰᠡᠨ ᠬᠤᠶᠠᠷ ᠵᠦᠢᠯ ᠤᠨ ᠦᠷᠦᠮ᠎ᠡ ᠪᠠᠨ ᠲᠤᠭᠤᠭᠠᠨ ᠳᠤ  ᠬᠢᠵᠤ ᠪᠤᠴᠠᠯᠭᠠᠨ ᠬᠠᠶᠢᠯᠤᠭᠤᠯᠤᠭᠠᠳ ᠰᠢᠬᠠᠵᠤ ᠭᠠᠷᠭᠠᠭᠰᠠᠨ ᠲᠤᠰᠤ ᠪᠠᠨ ︽ᠰᠢᠷ᠎ᠠ ᠲᠤᠰᠤ︾ ᠭᠡᠳᠡᠭ᠃ ᠰᠢᠷ᠎ᠠ ᠲᠤᠰᠤ ᠪᠤᠯ ᠴᠠᠭᠠᠨ ᠢᠳᠡᠭᠡᠨ ᠤ ᠤᠬᠢ ᠪᠤᠯᠤᠨ᠎ᠠ᠃ᠵᠦᠭᠡᠭᠡᠢ — — — ᠰᠢᠷ᠎ᠠ ᠲᠤᠰᠤ ᠠᠴᠠ ᠰᠠᠯᠭᠠᠵᠤ ᠦᠯᠡᠳᠡᠭᠡᠭᠰᠡᠨ ᠬᠦᠷᠡᠩ ᠦᠩᠭᠡᠲᠠᠢ ᠰᠢᠭᠠᠷᠤ ᠶᠢ ︽ᠵᠦᠭᠡᠭᠡᠢ︾ ᠭᠡᠳᠡᠭ᠃ᠡᠭᠡᠳᠡᠭᠰᠡᠨ ᠰᠦ — — — ᠰᠠᠪᠠᠨ ᠳᠤ ᠲᠡᠪᠰᠢᠯᠡᠭᠡᠳ ᠡᠭᠡᠳᠡᠬᠦᠯᠵᠤ ᠦᠷᠦᠮ᠎ᠡ ᠶᠢ ᠨᠢ ᠬᠠᠮᠤᠭᠠᠳ ᠬᠤᠴᠤᠷᠤᠭᠰᠠᠨ ᠰᠦ ᠪᠠᠨ ︽ᠡᠭᠡᠳᠡᠭᠰᠡᠨ ᠰᠦ︾ ᠬᠡᠳᠡᠭ᠃ ᠲᠠᠷᠤᠢ ᠰᠠᠭᠠᠮᠠᠯ ᠡᠭᠡᠳᠡᠭᠡᠭᠰᠡᠨ ᠪᠠ ᠪᠤᠯᠭᠤᠵᠤ ᠡᠭᠡᠳᠡᠭᠡᠭᠰᠡᠨ ᠰᠦ ᠬᠡᠵᠤ ᠢᠯᠭᠠᠨ ᠰᠠᠯᠭᠠᠵᠤ ᠨᠡᠷᠡᠯᠡᠳᠡᠭ ᠵᠠᠩᠰᠢᠯ ᠲᠠᠢ᠃ᠪᠦᠯᠢᠭᠰᠡᠨ ᠰᠦ — — — ᠸᠠᠭᠠᠷ ᠲᠤ ᠰᠠᠪᠠᠯᠠᠵᠤ ᠡᠭᠡᠳᠡᠬᠦᠯᠦᠭᠡᠳ ᠪᠦᠯᠢᠵᠤ ᠦᠷᠦᠮ᠎ᠡ ᠶᠢ ᠨᠢ ᠢᠯᠭᠠᠷᠠᠭᠤᠯᠵᠤ ᠠᠪᠤᠭᠰᠠᠨ ᠰᠦ ᠪᠠᠨ ︽ᠪᠦᠯᠢᠭᠰᠡᠨ ᠰᠦ︾ ᠭᠡᠳᠡᠭ᠃      
      ᠤᠷᠠᠳᠴᠤᠳ ᠪᠤᠯᠭᠤᠭᠰᠠᠨ ᠪᠠ ᠬᠠᠳᠠᠭᠠᠭᠰᠠᠨ ᠦᠷᠦᠮ᠎ᠡ ᠪᠠᠷ ᠰᠢᠷ᠎ᠠ ᠲᠤᠰᠤ ᠰᠢᠬᠠᠳᠠᠭ ᠦᠬᠡᠢ᠃ ᠵᠦᠪᠬᠡᠨ ᠪᠤᠯᠭᠤᠭᠰᠠᠨ ᠪᠤᠳᠠᠭ᠎ᠠ᠂ ᠪᠤᠤᠪᠤ᠂ ᠠᠭᠠᠷᠤᠤᠯ᠂ ᠵᠡᠷᠭᠡ ᠢᠳᠡᠭᠡᠨ ᠲᠠᠢ ᠴᠠᠢ ᠤᠤᠭᠤᠬᠤ ᠳᠤ ᠪᠠᠨ ᠬᠤᠯᠢᠰᠢ ᠠᠮᠲᠠ ᠪᠤᠯᠭᠠᠳᠠᠭ ᠵᠠᠩᠰᠢᠯ ᠲᠠᠢ᠃ᠱᠦᠬᠦᠮᠡᠯ — — — ᠡᠭᠡᠳᠡᠬᠦᠯᠦᠭᠰᠡᠨ ︵ᠰᠠᠭᠠᠮᠠᠯ ᠪᠤᠯᠭᠤᠭᠰᠠᠨ ᠪᠦᠷ ᠪᠠᠭᠳᠠᠨ᠎ᠠ︶ ᠪᠦᠯᠢᠭᠰᠡᠨ ᠰᠦ ᠶᠢᠨ ᠦᠷᠦᠮ᠎ᠡ ᠪᠠᠨ ᠬᠠᠮᠤᠵᠤ ᠢᠯᠭᠠᠷᠠᠭᠤᠯᠤᠨ ᠠᠪᠤᠮᠠᠭᠴᠠ ᠰᠦ ᠶᠢ ᠨᠢ ᠲᠤᠭᠤᠭᠠᠨ ᠳᠤ ᠬᠢᠵᠤ ᠵᠦᠭᠡᠯᠡᠨ ᠭᠠᠯ ᠢᠶᠠᠷ ᠵᠤᠬᠢᠮᠵᠢᠲᠠᠢ ᠬᠠᠯᠠᠭᠤᠯᠤᠨ ᠠᠭᠠᠷᠴᠠ ᠱᠦᠬᠦᠳᠡᠭ ᠪᠦᠰ ᠤᠭᠤᠲᠠᠨ ᠳᠤ ᠪᠠᠨ ᠰᠠᠪᠠᠯᠠᠵᠤ ᠲᠠᠷᠤᠭᠠᠳ ᠰᠠᠷᠠᠰᠤ ᠶᠢ ᠨᠢ ᠰᠢᠬᠠᠵᠤ ᠭᠠᠷᠭᠠᠭᠰᠠᠨ ᠤ ᠲᠠᠷᠠᠭ᠎ᠠ ᠭᠠᠷ ᠢᠶᠠᠷ ᠪᠠᠵᠠᠬᠤ ᠦᠬᠡᠢ ᠪᠠᠷ ᠪᠤᠲᠠᠷᠠᠭᠠᠨ ᠬᠠᠳᠠᠭᠠᠭᠰᠠᠨ ᠠᠭᠠᠷᠤᠤᠯ ᠢᠶᠠᠨ ︽ᠱᠦᠬᠦᠮᠡᠯ︾ ᠭᠡᠳᠡᠭ᠃ ᠱᠦᠬᠦᠮᠡᠯ ᠪᠤᠯ ᠬᠦᠴᠢᠯᠢᠭ ᠦᠬᠡᠢ ᠪᠦᠭᠡᠳ ᠬᠠᠳᠠᠭᠤᠯᠢᠭ ᠴᠢᠨᠠᠷ ᠲᠠᠢ ᠪᠠᠶᠢᠳᠠᠭ᠃ᠴᠠᠭ᠎ᠠ — — — ᠡᠭᠡᠳᠡᠬᠦᠯᠦᠭᠰᠡᠨ ︵ᠰᠠᠭᠠᠮᠠᠯ ᠪᠤᠯᠭᠤᠭᠰᠠᠨ ᠪᠦᠷ ᠪᠠᠭᠳᠠᠨ᠎ᠠ︶ ᠪᠦᠯᠢᠭᠰᠡᠨ ᠰᠦ   ᠪᠠᠨ ᠪᠦᠳᠦᠬᠦᠨ ᠰᠢᠭ ᠪᠡᠶ᠎ᠡ ᠲᠠᠢ ᠠᠮᠠᠰᠠᠷ ᠪᠠᠭ᠎ᠠ ᠸᠠᠭᠠᠷ ᠲᠤ ᠴᠤᠭᠯᠠᠭᠤᠯᠤᠨ ᠬᠠᠳᠠᠭᠠᠯᠠᠵᠤ ᠲᠠᠯᠪᠢᠭᠠᠳ ᠲᠤᠯᠠᠭᠠᠨ ᠢ ᠠᠩᠬᠠᠷᠤᠨ ᠵᠤᠬᠢᠴᠠᠭᠤᠯᠵᠤ ᠦᠷᠬᠦᠯᠵᠢ ᠪᠦᠯᠢᠵᠤ ᠬᠦᠳᠡᠯᠭᠡᠵᠤ ᠪᠠᠶᠢᠭᠠᠳ ᠬᠦᠴᠢᠯᠢᠭ ᠴᠢᠨᠠᠷ ᠲᠠᠢ ᠪᠤᠯᠭᠠᠬᠤ  ᠪᠠᠨ ︽ᠴᠠᠭ᠎ᠠ︾ ᠭᠡᠳᠡᠭ᠃ᠠᠭᠠᠷᠤᠤᠯ ᠬᠤᠷᠤᠳ — — — ᠴᠠᠭ᠎ᠠ ᠪᠠᠨ ᠴᠢᠨᠠᠵᠤ ᠲᠤᠰᠬᠠᠢ ᠤᠭᠤᠲᠠ ᠪᠠᠷ ᠰᠢᠷᠠᠰᠤ ᠶᠢ ᠨᠢ ᠱᠦᠭᠦᠷᠡᠬᠦᠯᠦᠨ ᠭᠠᠷᠭᠠᠭᠰᠠᠨ ᠤ ᠲᠠᠷᠠᠭ᠎ᠠ ᠠᠭᠠᠷᠤᠤᠯ ᠪᠠᠵᠠᠵᠤ ᠬᠤᠷᠤᠳ ᠬᠡᠪᠯᠡᠳᠡᠭ᠃ ᠲᠡᠬᠦᠨ ᠢ ᠪᠠᠨ ᠲᠡᠳᠡ ᠬᠦᠴᠢᠯᠢᠭ ︽ᠠᠭᠠᠷᠤᠤᠯ ᠬᠤᠷᠤᠳ︾ ᠬᠡᠳᠡᠭ᠃ ᠭᠠᠷ ᠢᠶᠠᠷ ᠢᠶᠠᠨ ᠪᠠᠵᠠᠵᠤ ᠲᠠᠪᠤᠨ ᠬᠤᠷᠤᠭᠤᠨ ᠤ ᠵᠠᠪᠰᠠᠷ ᠢᠶᠠᠷ ᠭᠠᠷᠭᠠᠭᠰᠠᠨ ᠢᠶᠠᠨ ︽ᠠᠭᠠᠷᠤᠤᠯ︾ ᠬᠡᠵᠤ᠂ ᠲᠤᠰᠬᠠᠢ ᠬᠡᠪ ᠵᠠᠭᠪᠤᠷ ᠢᠶᠠᠷ ᠵᠤᠬᠢᠶᠠᠭᠰᠠᠨ ᠢᠶᠠᠨ ︽ᠬᠤᠷᠤᠳ︾ ᠬᠡᠳᠡᠭ᠃ᠠᠶᠢᠷᠠᠭ — — — ᠴᠠᠭ᠎ᠠ ᠳᠤ ᠪᠠᠨ ᠬᠦᠷᠦᠩᠭᠡ ᠤᠷᠤᠭᠤᠯᠵᠤ᠂ ᠭᠤᠤᠯᠳᠠᠭᠤ ᠤᠨᠠᠭᠠᠨ ᠤ ᠵᠠᠭᠤᠰᠢ ᠲᠠᠢ ᠲᠤᠰᠬᠠᠢ ᠬᠦᠷᠦᠩᠭᠡ ᠵᠠᠯᠠᠳᠠᠭ᠃ ᠦᠷᠬᠦᠯᠵᠢᠯᠡᠨ ᠢᠰᠭᠡᠵᠤ ᠤᠨᠴᠠ ᠬᠦᠴᠢᠯᠢᠭ ᠠᠮᠲᠠ ᠲᠠᠢ ᠪᠤᠯᠭᠠᠬᠤ ᠪᠠᠨ ︽ᠠᠶᠢᠷᠠᠭ︾ ᠬᠡᠳᠡᠭ᠃ᠠᠭᠠᠷᠴᠠ — — — ᠤᠷᠠᠳᠴᠤᠳ ᠡᠭᠡᠳᠡᠭᠰᠡᠨ ᠪᠠ ᠬᠦᠴᠢᠯᠢᠭ ᠰᠦ ᠪᠠᠨ ᠴᠢᠨᠠᠭᠠᠳ ᠴᠡᠪᠡᠷ ᠴᠠᠭᠠᠨ ᠪᠦᠰ ᠤᠭᠤᠳᠠᠨ ᠳᠤ ᠰᠠᠪᠠᠯᠠᠵᠤ ᠰᠢᠷᠠᠰᠤ ᠶᠢ ᠨᠢ ᠰᠢᠬᠠᠵᠤ ᠭᠠᠷᠭᠠᠭᠰᠠᠨ ᠠᠭᠰᠢᠭᠤᠨ ᠰᠦ ᠪᠠᠨ ︽ᠠᠭᠠᠷᠴᠠ︾ ᠭᠡᠳᠡᠭ᠃ᠲᠤᠭᠤᠭ᠎ᠠ ᠨᠡᠷᠡᠭᠰᠡᠨ ᠠᠶᠢᠷᠠᠭ ᠲᠤᠳᠤᠷ᠎ᠠ ᠪᠠᠨ ᠲᠠᠬᠢᠨ ᠵᠤᠬᠢᠬᠤ ᠬᠠᠷᠢᠴᠠᠯ ᠤᠨ ᠬᠦᠭᠡᠷᠦᠬᠦᠯᠦᠭᠰᠡᠨ ᠰᠦ ᠨᠡᠮᠡᠵᠤ ᠬᠤᠳᠬᠤᠵᠤ ᠨᠠᠶᠢᠷᠠᠭᠤᠯᠤᠭᠠᠳ ᠠᠭᠠᠷᠴᠠ ᠶᠢᠨ ᠤᠭᠤᠳᠠ ᠪᠠᠷ ᠰᠢᠷᠠᠰᠤ ᠶᠢ ᠨᠢ ᠰᠢᠬᠠᠵᠤ ᠭᠠᠷᠭᠠᠭᠠᠳ ᠠᠭᠠᠷᠤᠤᠯ ᠪᠠᠵᠠᠵᠤ ᠬᠤᠷᠤᠳ ᠬᠡᠪᠯᠡᠳᠡᠭ ᠶᠤᠮ᠃ ᠠᠶᠢᠷᠠᠭ ᠢᠶᠠᠷ ᠬᠠᠳᠠᠭᠠᠵᠤ ᠭᠠᠷᠭᠠᠭᠰᠠᠨ ᠠᠭᠠᠷᠤᠤᠯ ᠬᠤᠷᠤᠳ ᠪᠤᠯ ᠤᠨᠴᠠ ᠰᠠᠶᠢᠨ ᠢᠳᠡᠭᠡᠨ ᠪᠦᠭᠡᠳ ᠡᠪᠡᠳᠴᠢᠨ ᠬᠡᠮ ᠬᠢᠵᠢᠭ ᠵᠠᠰᠠᠬᠤ᠂ ᠬᠤᠤᠷᠳᠠᠭᠳᠠᠯ ᠢ ᠲᠠᠶᠢᠯᠠᠬᠤ ᠤᠨᠴᠠ ᠦᠢᠯᠡᠳᠦᠯ ᠲᠠᠢ ᠢᠳᠡᠭᠡᠨ ᠶᠤᠮ᠃ᠲᠠᠰᠢᠯᠭ᠎ᠠ᠂ ᠡᠭᠡᠵᠡᠭᠡᠢ — — — ᠤᠷᠠᠳᠴᠤᠳ ᠨᠠᠮᠤᠷ ᠤᠨ ᠰᠡᠬᠦᠯᠴᠢ ᠡᠪᠦᠯ ᠤᠨ ᠤᠯᠠᠷᠢᠯ ᠳᠤ ᠦᠨᠢᠶ᠎ᠡ᠂ ᠢᠩᠭᠡ ᠪᠠᠨ ᠰᠠᠭᠠᠭᠠᠳ ᠰᠢᠷ᠎ᠠ ᠤᠰᠤᠨ ᠳᠤ ᠢᠳᠡᠭᠡᠯᠡᠵᠤ ᠪᠤᠯᠪᠠᠰᠤᠷᠠᠭᠤᠯᠤᠭᠰᠠᠨ ᠬᠦᠵᠡᠭᠡ ᠡᠰᠡᠬᠦᠯ᠎ᠡ ᠴᠡᠪᠡᠷ ᠴᠠᠭᠠᠨ ᠪᠦᠰ ᠢᠶᠠᠷ ᠲᠠᠪᠬᠤᠷᠯᠠᠵᠤ ᠤᠶᠤᠭᠰᠠᠨ ᠤᠭᠤᠳᠠ ᠪᠤᠶᠤ ᠬᠤᠨᠢ ᠢᠮᠠᠭᠠᠨ ᠤ ᠠᠷᠠᠰᠤ ᠪᠠᠷ ᠢᠳᠡᠭᠡᠯᠡᠵᠤ ᠤᠷᠠᠯᠠᠨ ᠤᠶᠤᠭᠰᠠᠨ ᠬᠦᠬᠦᠷ ᠲᠤᠯᠤᠮ ᠳᠤ ᠪᠠᠨ ᠰᠠᠭᠠᠮᠠᠯ ᠰᠦ ᠪᠠᠨ ᠲᠡᠷᠡ ᠬᠡᠪ ᠢᠶᠠᠷ ᠨᠢ ᠰᠠᠪᠠᠯᠠᠵᠤ ᠬᠤᠷᠠᠮᠳᠤᠭᠤᠯᠤᠭᠠᠳ ᠢᠳᠡᠭᠡᠨ ᠪᠤᠯᠭᠠᠳᠠᠭ᠃ ᠲᠡᠬᠦᠨ ᠢ ᠪᠠᠨ  ︽ ᠲᠠᠰᠢᠯᠭ᠎ᠠ ᠪᠤᠶᠤ ᠡᠭᠡᠵᠡᠭᠡᠢ︾ ᠬᠡᠳᠡᠭ᠃ ᠲᠡᠷᠡ ᠨᠢ ᠲᠤᠰᠤᠯᠢᠭ ᠪᠦᠭᠡᠳ ᠠᠮᠳᠠᠯᠢᠭ᠂ ᠡᠪᠦᠯ ᠬᠠᠪᠤᠷ ᠤᠨ ᠰᠦ ᠴᠠᠭ᠎ᠠ ᠬᠤᠪᠤᠷ ᠴᠤᠬᠠᠭ ᠤᠯᠠᠷᠢᠯ ᠳᠤ ᠢᠳᠡᠬᠦ ᠭᠤᠶᠤ ᠰᠠᠶᠢᠬᠠᠨ ᠴᠠᠭᠠᠨ ᠢᠳᠡᠭᠡᠨ ᠪᠤᠯᠳᠠᠭ᠃ᠴᠡᠭᠡ — — —  ᠭᠡᠭᠦᠦ ᠰᠠᠭᠠᠵᠤ ᠴᠡᠭᠡ ᠢᠰᠭᠡᠳᠡᠭ᠃ ᠴᠡᠭᠡ ᠶᠢᠨ ᠬᠦᠷᠦᠩᠭᠡ ᠪᠠᠨ ᠤᠨᠠᠭᠠᠨ ᠤ ᠵᠠᠭᠤᠰᠢ ᠪᠠᠨ ᠤᠬᠢᠶᠠᠵᠤ ᠴᠡᠪᠡᠷ ᠴᠠᠭᠠᠨ ᠪᠦᠰ ᠲᠤ ᠬᠢᠵᠤ ᠤᠶᠤᠭᠠᠳ ᠴᠡᠭᠡ ᠰᠦ ᠲᠤᠳᠤᠷ᠎ᠠ ᠪᠠᠨ ᠲᠠᠯᠪᠢᠵᠤ ᠬᠦᠷᠦᠩᠭᠡ ᠪᠤᠯᠭᠠᠬᠤ ᠪᠠ ᠪᠤᠰᠤᠳ ᠠᠴᠠ ᠬᠦᠷᠦᠩᠭᠡ ᠵᠠᠯᠠᠬᠤ ᠶᠢ ᠤᠶᠠᠯᠳᠤᠭᠤᠯᠳᠠᠭ᠃ ᠴᠡᠭᠡ ᠪᠤᠯ ᠢᠳᠡᠭᠡᠨ ᠮᠦᠷᠲᠡᠭᠡᠨ ᠤᠮᠳᠠᠭᠠᠨ ᠪᠤᠯᠳᠠᠭ᠂ ᠪᠠᠰᠠ ᠡᠪᠡᠳᠴᠢᠨ ᠠᠷᠬᠠᠭ ᠵᠠᠰᠠᠬᠤ ᠡᠮ ᠤᠨ ᠦᠢᠯᠡᠳᠦᠯ ᠲᠠᠢ ᠪᠠᠶᠢᠳᠠᠭ᠃
 ᠵᠤᠷᠢᠭᠪᠠᠭᠠᠳᠤᠷ ᠤᠨ ᠨᠠᠶᠢᠷᠠᠭᠤᠯᠤᠨ ᠵᠤᠬᠢᠶᠠᠭᠰᠠᠨ  ︽ᠤᠷᠠᠨ ᠲᠠᠷᠬᠠᠨ ᠤᠷᠠᠳ ᠤᠨ ᠵᠠᠩ ᠦᠢᠯᠡ︾  ᠬᠡᠬᠦ ᠨᠤᠮ ᠠᠴᠠ ᠪᠠᠭᠤᠯᠭᠠᠪᠠ
ᠢᠷᠡᠯᠲᠡ᠄ ᠤᠷᠠᠳ ᠤᠨ ᠲᠤᠮᠳᠠᠳᠤ ᠬᠤᠰᠢᠭᠤᠨ ᠤ ᠵᠠᠰᠠᠭ ᠤᠨ ᠤᠷᠳᠤᠨ ᠤ ᠮᠤᠩᠭᠤᠯ ᠰᠦᠯᠵᠢᠶ᠎ᠡ