ᠣᠷᠠᠳ ᠮᠣᠩᠭᠤᠯᠴᠣᠳ ᠤᠨ ᠠᠷᠠᠰᠣ ᠰᠢᠷᠢ ᠢᠳᠡᠭᠡᠯᠡᠬᠦ ᠣᠬᠠᠭᠠᠨ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2019/6/12
                                     
                                       ᠵᠢᠷᠤᠭ ᠢ ᠰᠦᠯᠵᠢᠶᠡᠨ ᠠᠴᠠ ᠪᠠᠭᠤᠯᠭᠠᠪᠠ                ᠦᠬᠡᠷ ᠤᠨ ᠠᠷᠠᠰᠤ ᠶᠢ ᠪᠣᠯᠪᠠᠰᠤᠷᠠᠭᠤᠯᠬᠤ ᠳᠤ ᠢᠳᠡᠭᠡᠯᠡᠬᠦ᠂ ᠬᠠᠲᠠᠭᠠᠵᠤ ᠲᠣᠰᠣᠯᠠᠬᠤ ︵ᠨᠠᠷᠠᠨ ᠳᠤ ᠬᠡᠳᠥᠨ ᠡᠳᠥᠷ ᠢᠶᠠᠷ ᠳᠡᠯᠭᠡᠨ ᠲᠣᠰᠣ ᠶᠢ ᠨᠢ ᠠᠷᠠᠰᠤᠨ  ᠳᠤ ᠨᠢ ᠰᠢᠩᠭᠡᠭᠡᠳᠡᠭ︶᠂ ᠬᠤᠰᠤᠬᠤ᠂ ᠵᠦᠰᠦᠬᠦ ᠵᠡᠷᠭᠡ ᠬᠡᠳᠥᠨ ᠠᠯᠬᠤᠮ ᠢᠶᠠᠷ ᠶᠠᠪᠤᠭᠳᠠᠳᠠᠭ᠃ ᠢᠳᠡᠭᠡᠯᠡᠬᠦ ᠳᠤ ᠰᠢᠷ᠎ᠡ ᠪᠤᠳᠠᠭ᠎ᠠ ᠶᠢ ᠰᠢᠩᠭᠡᠨ ᠴᠢᠨᠠᠭᠠᠳ ᠲᠣᠮᠣ ᠸᠠᠭᠠᠷ ᠤᠨ ᠰᠠᠪᠠᠨ ᠳᠤ ᠬᠢᠵᠦ ᠲᠠᠯᠪᠢᠭᠠᠳ ᠢᠰᠬᠡᠨ᠎ᠡ᠃ ᠪᠤᠳᠠᠭ᠎ᠠ ᠨᠢ ᠢᠰᠦᠭᠰᠡᠨ ᠤ ᠳᠠᠷᠠᠭ᠎ᠠ ᠢᠳᠡᠭᠡᠯᠡᠬᠦ ᠠᠷᠠᠰᠤ ᠪᠠᠨ ᠢᠳᠡᠭᠡ ᠲᠠᠢ ᠭᠠᠩ ᠳᠤ ᠪᠠᠨ ᠬᠢᠬᠦ ᠶᠢᠨ ᠬᠠᠮᠲᠤ ᠠᠷᠠᠰᠤᠨ ᠤ ᠣᠯᠠᠨ ᠴᠥᠭᠡᠨ ᠢ ᠦᠵᠡᠵᠦ ᠳᠠᠪᠤᠰᠤ ᠶᠢᠨ ᠬᠡᠮᠵᠢᠶ᠎ᠡ ᠶᠢ ᠲᠣᠬᠢᠷᠠᠭᠤᠯᠵᠤ ᠬᠢᠨ᠎ᠡ᠃ ᠳᠠᠪᠤᠰᠤ ᠶᠢ ᠬᠡᠮᠵᠢᠶᠡᠨ ᠳᠤ ᠨᠢ ᠲᠣᠬᠢᠷᠠᠭᠤᠯᠵᠤ ᠬᠢᠬᠦ ᠪᠣᠯ ᠠᠷᠠᠰᠤ ᠢᠳᠡᠭᠦᠯᠬᠦ ᠶᠢᠨ ᠴᠢᠬᠤᠯᠠ ᠮᠡᠷᠭᠡᠵᠢᠯ ᠪᠣᠯᠣᠨ᠎ᠠ᠃ ᠳᠠᠪᠤᠰᠤ ᠨᠢ ᠬᠡᠲᠦᠷᠡᠪᠡᠯ ᠠᠷᠠᠰᠤᠨ ᠤ ᠬᠥᠷᠥᠰᠥ ᠨᠢ ᠮᠠᠭᠤᠳᠠᠬᠤ ᠪᠥᠭᠡᠳ ᠬᠤᠨᠢ ᠢᠮᠠᠭᠠᠨ ᠤ ᠠᠷᠠᠰᠤ ᠪᠣᠯ ᠦᠰᠦ ᠨᠢ ᠤᠨᠠᠵᠤ ᠬᠠᠯᠴᠠᠭᠠᠶᠢᠷᠠᠬᠤ ᠠᠶᠤᠯ ᠲᠠᠢ ᠪᠠᠶᠢᠳᠠᠭ᠃ ᠳᠠᠪᠤᠰᠤ ᠨᠢ ᠪᠠᠭᠠᠳᠠᠪᠠᠯ ᠠᠷᠠᠰᠤᠨ ᠤ ᠢᠳᠡᠭᠡ ᠣᠷᠣᠬᠤ ᠴᠢᠨᠠᠷ ᠢ ᠰᠢᠭᠤᠳ ᠨᠥᠯᠥᠭᠡᠯᠡᠨ᠎ᠡ᠃ ᠦᠬᠡᠷ ᠤᠨ ᠠᠷᠠᠰᠤ ᠪᠠᠨ ᠭᠠᠩ ᠳᠤ ᠪᠠᠨ ᠬᠢᠭᠰᠡᠨ ᠤ ᠳᠠᠷᠠᠭ᠎ᠠ ᠲᠣᠭᠲᠠᠭᠰᠠᠨ ᠬᠤᠭᠤᠴᠠᠭ᠎ᠠ ᠲᠠᠢ ᠡᠷᠭᠢᠭᠦᠯᠵᠦ ᠬᠥᠳᠡᠯᠭᠡᠬᠦ ᠶᠢ ᠰᠢᠭᠤᠳ ᠨᠥᠯᠥᠭᠡᠯᠡᠨ᠎ᠡ᠃ ᠦᠬᠡᠷ  ᠤᠨ ᠠᠷᠠᠰᠤ ᠪᠠᠨ ᠭᠠᠩ ᠳᠤ ᠪᠠᠨ ᠬᠢᠭᠰᠡᠨ ᠤ ᠳᠠᠷᠠᠭ᠎ᠠ ᠲᠣᠭᠲᠠᠭᠰᠠᠨ ᠬᠤᠭᠤᠴᠠᠭ᠎ᠠ ᠲᠠᠢ ᠡᠷᠭᠢᠭᠦᠯᠵᠦ ᠬᠥᠳᠡᠯᠭᠡᠬᠦ ᠬᠡᠷᠡᠭᠲᠡᠢ᠃ ᠡᠨᠡ ᠮᠡᠲᠦ ᠪᠠᠷ 30 — 40 ᠬᠤᠨᠤᠭ ᠤᠨ ᠬᠤᠭᠤᠴᠠᠭ᠎ᠠ ᠪᠣᠯᠪᠠᠯ ᠠᠷᠠᠰᠤ ᠨᠢ ᠪᠦᠷᠢᠨ ᠰᠠᠶᠢᠨ ᠢᠳᠡᠭᠡ ᠣᠷᠣᠵᠤ ᠪᠣᠯᠪᠠᠰᠤᠷᠠᠳᠠᠭ᠃      ᠢᠳᠡᠭᠡ ᠣᠷᠣᠭᠰᠠᠨ ᠠᠷᠠᠰᠤ ᠪᠠᠨ ᠳᠤᠲᠠᠭᠤ ᠬᠠᠲᠠᠭᠠᠭᠰᠠᠨ ᠤ ᠳᠠᠷᠠᠭ᠎ᠠ ᠥᠭᠡᠬᠦᠨ ᠲᠣᠰᠣ ᠪᠠᠷ ᠨᠡᠶᠢᠳᠡᠮ ᠲᠣᠰᠣᠯᠠᠨ᠎ᠠ᠃ ᠲᠣᠰᠣᠯᠠᠵᠤ ᠪᠠᠷᠠᠭᠰᠠᠨ ᠬᠤᠶᠢᠨ᠎ᠠ ᠠᠷᠠᠰᠤ ᠪᠠᠨ ᠬᠡᠳᠥᠨ ᠡᠳᠥᠷ ᠨᠠᠷᠠᠨ ᠳᠤ ᠡᠭᠡᠭᠡᠵᠦ ᠲᠣᠰᠣ ᠶᠢ ᠨᠢ ᠪᠦᠷᠢᠨ ᠰᠠᠶᠢᠬᠠᠨ ᠰᠢᠩᠭᠡᠭᠡᠨ᠎ᠡ᠃ ᠲᠣᠰᠣ ᠨᠢ ᠰᠢᠩᠭᠡᠭᠰᠡᠨ ᠠᠷᠠᠰᠤ ᠪᠠᠨ ᠬᠤᠶᠠᠷ ᠲᠣᠮᠣ ᠠᠷᠵᠠᠭᠠᠷ ᠴᠢᠯᠠᠭᠤ ᠶᠢᠨ ᠳᠤᠮᠳᠠ ᠲᠣᠬᠤᠨ ᠲᠠᠯᠪᠢᠵᠤ ᠪᠦᠳᠥᠭᠦᠨ ᠮᠣᠳᠣ ᠪᠠᠷ ᠳᠡᠭᠡᠭᠰᠢ ᠳᠣᠷᠣᠭᠰᠢ ᠱᠦᠷᠭᠦᠭᠡᠵᠦ ᠠᠷᠠᠰᠤ ᠨᠢ ᠵᠥᠭᠡᠯᠡᠷᠡᠭᠰᠡᠨ ᠤ ᠳᠠᠷᠠᠭ᠎ᠠ ᠳᠡᠯᠭᠡᠵᠦ ᠲᠠᠯᠪᠢᠭᠠᠳ ᠬᠢᠲᠤᠭ᠎ᠠ ᠪᠠᠷ ᠠᠷᠠᠰᠤᠨ ᠳᠡᠭᠡᠷᠡᠬᠢ ᠰᠢᠷ᠎ᠡ ᠮᠢᠬ᠎ᠠ ᠶᠢ ᠨᠢ ᠬᠤᠰᠤᠵᠤ ᠴᠡᠪᠡᠷᠯᠡᠨ᠎ᠡ᠃ ᠢᠳᠡᠭᠡᠯᠡᠭᠰᠡᠨ ᠦᠬᠡᠷ ᠤᠨ ᠠᠷᠠᠰᠤ ᠪᠠᠷ ᠰᠤᠷ ᠬᠢᠳᠡᠭ᠃ ᠰᠤᠷ ᠢ ᠬᠡᠷᠡᠭᠴᠡᠭᠡ ᠪᠠᠨ ᠦᠨᠳᠥᠰᠦᠯᠡᠨ ᠥᠷᠭᠡᠨ᠂ᠨᠠᠷᠢᠨ᠂ ᠤᠷᠲᠤ᠂ ᠣᠬᠤᠷ ᠡᠯᠳᠡᠪ ᠶᠠᠩᠵᠤ ᠪᠠᠷ ᠣᠭᠲᠣᠯᠵᠤ ᠰᠠᠯᠭᠠᠬᠤ ᠶᠢ ᠰᠤᠷ ᠵᠦᠰᠦᠬᠦ ᠭᠡᠳᠡᠭ᠃      ᠬᠤᠨᠢ ᠢᠮᠠᠭᠠᠨ ᠤ ᠠᠷᠠᠰᠤ ᠶᠢ ᠢᠳᠡᠭᠡᠯᠡᠬᠦ ᠳᠤ ᠢᠳᠡᠭᠡᠯᠡᠬᠦ᠂ ᠡᠯᠳᠡᠬᠦ᠂ ᠬᠤᠰᠤᠬᠤ ᠶᠠᠪᠤᠴᠠ ᠶᠢ ᠥᠩᠭᠡᠷᠡᠭᠦᠯᠳᠡᠭ᠃ ᠢᠳᠡᠭᠡᠯᠡᠬᠦ ᠳᠤ ᠰᠢᠷ᠎ᠡ ᠪᠤᠳᠠᠭ᠎ᠠ ᠶᠢ ᠰᠢᠩᠭᠡᠨ ᠴᠢᠨᠠᠵᠤ ᠸᠠᠭᠠᠷ ᠤᠨ ᠭᠠᠩ ᠳᠤ ᠬᠢᠵᠦ ᠢᠰᠬᠡᠨ᠎ᠡ  ᠃ ᠰᠢᠩᠭᠡᠨ ᠪᠤᠳᠠᠭ᠎ᠠ ᠨᠢ ᠭᠦᠢᠴᠡᠳ ᠰᠠᠶᠢᠨ ᠢᠰᠦᠭᠰᠡᠨ ᠤ ᠰᠡᠭᠦᠯᠡᠷ ᠤᠬᠢᠶᠠᠵᠤ ᠳᠡᠪᠲᠦᠭᠡᠭᠰᠡᠨ ᠬᠤᠨᠢ ᠢᠮᠠᠭᠠᠨ   ᠤ ᠠᠷᠠᠰᠤ ᠪᠠᠨ  ᠢᠳᠡᠭᠡᠨ ᠳᠤ ᠪᠠᠨ ᠬᠢᠵᠦ᠂ ᠠᠷᠠᠰᠤᠨ ᠤ ᠣᠯᠠᠨ ᠴᠥᠭᠡᠨ ᠤ ᠪᠠᠶᠢᠳᠠᠯ ᠢ ᠦᠵᠡᠵᠦ ᠳᠠᠪᠤᠰᠤ ᠪᠠᠨ ᠬᠢᠨ᠎ᠡ᠃ ᠢᠩᠭᠢᠭᠡᠳ ᠢᠳᠡᠭᠡ ᠪᠠᠨ ᠰᠠᠶᠢᠲᠤᠷ ᠬᠥᠳᠡᠯᠭᠡᠨ᠎ᠡ᠃ ᠬᠤᠨᠢ ᠢᠮᠠᠭᠠᠨ ᠤ ᠠᠷᠠᠰᠤ ᠪᠠᠷᠤᠭ 7 — 10 ᠡᠳᠥᠷ ᠪᠣᠯᠪᠠᠯ ᠭᠦᠢᠴᠡᠳ ᠢᠳᠡᠭᠡ ᠣᠷᠣᠵᠤ ᠪᠣᠯᠪᠠᠰᠤᠷᠠᠳᠠᠭ᠃ ᠢᠳᠡᠭᠡᠯᠡᠵᠦ ᠬᠠᠲᠠᠭᠠᠭᠰᠠᠨ ᠬᠤᠨᠢ ᠢᠮᠠᠭᠠᠨ ᠤ ᠠᠷᠠᠰᠤ ᠪᠠᠨ ᠳᠠᠬᠢᠨ ᠳᠠᠪᠤᠰᠤ ᠦᠭᠡᠢ ᠰᠢᠩᠭᠡᠨ ᠴᠠᠢ ᠪᠠᠷ ᠰᠦᠷᠴᠢᠨ ᠴᠢᠭᠢᠭᠲᠦᠭᠦᠯᠵᠦ᠂ ᠲᠤᠰᠬᠠᠢ ᠡᠯᠭᠦᠭᠦᠷ ᠳᠤ ᠠᠷᠠᠰᠤᠨ ᠤ ᠨᠢᠭᠡ ᠦᠵᠦᠭᠦᠷ ᠢ ᠡᠯᠭᠦᠵᠦ ᠲᠣᠭᠲᠠᠭᠠᠭᠠᠳ ᠳᠣᠷᠣᠭᠰᠢ ᠤᠨᠵᠢᠢᠭᠰᠠᠨ ᠬᠡᠰᠡᠭ ᠤᠨ ᠬᠥᠷᠥᠰᠥᠨ ᠲᠠᠯ᠎ᠡ ᠶᠢ ᠡᠯᠳᠡᠭᠦᠷ ᠲᠡᠮᠦᠷ ᠢᠶᠠᠷ ᠬᠤᠰᠤᠵᠤ ᠵᠥᠭᠡᠯᠡᠷᠡᠲᠡᠯ᠎ᠡ ᠡᠯᠳᠡᠨ᠎ᠡ᠃ ᠡᠯᠳᠡᠵᠦ ᠪᠠᠷᠠᠭᠰᠠᠨ ᠤ ᠳᠠᠷᠠᠭ᠎ᠠ ᠠᠷᠠᠰᠤ ᠪᠠᠨ ᠬᠥᠨᠳᠡᠯᠡᠨ ᠮᠣᠳᠣᠨ ᠪᠠᠭᠠᠨ᠎ᠠ ᠳᠡᠭᠡᠷ᠎ᠡ ᠲᠣᠬᠤᠵᠤ ᠲᠠᠯᠪᠢᠭᠠᠳ ᠲᠤᠰᠬᠠᠢ ᠲᠡᠮᠦᠷ ᠬᠤᠰᠤᠭᠤᠷ ᠢᠶᠠᠷ ᠬᠥᠷᠥᠰᠥ ᠶᠢ ᠨᠢ ᠳᠠᠬᠢᠨ ᠳᠠᠪᠲᠠᠨ ᠬᠤᠰᠤᠵᠤ ᠪᠣᠯᠪᠠᠰᠤᠷᠠᠭᠤᠯᠤᠨ᠎ᠠ᠃      ᠢᠩᠭᠢᠵᠦ ᠬᠤᠰᠤᠭᠰᠠᠨ ᠤ ᠳᠠᠷᠠᠭ᠎ᠠ ᠠᠷᠠᠰᠤ ᠪᠠᠨ ᠬᠡᠷᠡᠭᠴᠡᠭᠡ ᠪᠠᠨ ᠦᠨᠳᠥᠰᠦᠯᠡᠨ ᠲᠣᠩᠭᠤᠷᠠᠭ ᠢᠶᠠᠷ ᠡᠰᠬᠡᠨ ᠳᠡᠪᠡᠯ ᠬᠤᠪᠴᠠᠰᠤ ᠬᠢᠳᠡᠭ᠃      ᠠᠳᠤᠭᠤᠨ ᠤ ᠠᠷᠠᠰᠤ ᠶᠢ ᠢᠳᠡᠭᠡᠯᠡᠭᠦᠯᠦᠨ ᠪᠣᠯᠪᠠᠰᠤᠷᠠᠭᠤᠯᠬᠤ ᠥᠩᠭᠡ ᠪᠤᠳᠤᠭ ᠣᠷᠣᠭᠤᠯᠵᠤ ᠭᠥᠯᠢᠮ ᠬᠢᠬᠦ ᠪᠠ ᠭᠤᠲᠤᠯ ᠤᠨ ᠲᠠᠰᠠᠮ᠎ᠠ ᠰᠢᠷᠢ ᠬᠢᠳᠡᠭ᠃      ᠲᠡᠮᠡᠭᠡᠨ ᠤ ᠠᠷᠠᠰᠤ ᠶᠢ ᠲᠦᠭᠦᠬᠡᠢ ᠪᠠᠷ ᠵᠠᠷᠤᠳᠠᠭ᠃ ᠲᠡᠭᠡᠬᠦ ᠳᠤ ᠪᠠᠨ ᠭᠤᠣᠯᠳᠠᠭᠤ ᠦᠳᠡᠭᠡᠷᠢ ᠬᠢᠵᠦ ᠮᠣᠩᠭᠤᠯ ᠭᠡᠷ ᠤᠨ ᠬᠠᠨ᠎ᠠ ᠶᠢ ᠦᠳᠡᠳᠡᠭ ᠪᠢᠯᠡ᠃        ︽ ᠤᠷᠠᠳ ᠵᠠᠩ ᠦᠢᠯᠡ︾ ᠭᠡᠬᠦ ᠨᠣᠮ ᠠᠴᠠ ᠴᠡᠯᠡᠭᠡᠷ ᠡᠰᠢᠯᠡᠪᠡ
ᠢᠷᠡᠯᠲᠡ᠄ ᠪᠠᠶᠠᠨ ᠨᠠᠭᠤᠷ ᠤᠨ ᠰᠤᠨᠢᠨ